৪. নিব্বানৰগ্গো

১. ফস্সাদিৰিনিব্ভুজনপঞ্হো

১. রাজা আহ ‘‘ভন্তে নাগসেন, সক্কা ইমেসং ধম্মানং একতোভাৰগতানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং ৰিঞ্ঞাণং, অযং ৰিতক্কো, অযং ৰিচারো’তি’’? ‘‘ন সক্কা, মহারাজ, ইমেসং ধম্মানং একতোভাৰগতানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং ৰিঞ্ঞাণং, অযং ৰিতক্কো, অযং ৰিচারো’’’তি.

‘‘ওপম্মং করোহী’’তি. ‘‘যথা, মহারাজ, রঞ্ঞো সূদো অরসং ৰা রসং ৰা [যূসং ৰা রসং ৰা (সী. স্যা. পী.)] করেয্য, সো তত্থ দধিম্পি পক্খিপেয্য, লোণম্পি পক্খিপেয্য, সিঙ্গিৰেরম্পি পক্খিপেয্য, জীরকম্পি পক্খিপেয্য, মরিচম্পি পক্খিপেয্য, অঞ্ঞানিপি পকারানি পক্খিপেয্য, তমেনং রাজা এৰং ৰদেয্য, ‘দধিস্স মে রসং আহর, লোণস্স মে রসং আহর, সিঙ্গিৰেরস্স মে রসং আহর, জীরকস্স মে রসং আহর, মরিচস্স মে রসং আহর, সব্বেসং মে পক্খিত্তানং রসং আহরা’তি. সক্কা নু খো, মহারাজ, তেসং রসানং একতোভাৰগতানং ৰিনিব্ভুজিত্ৰা ৰিনিব্ভুজিত্ৰা রসং আহরিতুং অম্বিলত্তং ৰা লৰণত্তং ৰা তিত্তকত্তং ৰা কটুকত্তং ৰা কসাযত্তং ৰা মধুরত্তং ৰা’’তি? ‘‘ন হি, ভন্তে, সক্কা তেসং রসানং একতোভাৰগতানং ৰিনিব্ভুজিত্ৰা ৰিনিব্ভুজিত্ৰা রসং আহরিতুং অম্বিলত্তং ৰা লৰণত্তং ৰা তিত্তকত্তং ৰা কটুকত্তং ৰা কসাযত্তং ৰা মধুরত্তং ৰা, অপি চ খো পন সকেন সকেন লক্খণেন উপট্ঠহন্তী’’তি. ‘‘এৰমেৰ খো, মহারাজ, ন সক্কা ইমেসং ধম্মানং একতোভাৰগতানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতুং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং ৰিঞ্ঞাণং, অযং ৰিতক্কো, অযং ৰিচারো’তি, অপি চ খো পন সকেন সকেন লক্খণেন উপট্ঠহন্তী’’তি.

‘‘কল্লোসি, ভন্তে নাগসেনা’’তি.

ফস্সাদিৰিনিব্ভুজনপঞ্হো পঠমো.

২. নাগসেনপঞ্হো

২. থেরো আহ ‘‘লোণং, মহারাজ, চক্খুৰিঞ্ঞেয্য’’ন্তি. ‘‘আম, ভন্তে, চক্খুৰিঞ্ঞেয্য’’ন্তি. ‘‘সুট্ঠু খো, মহারাজ, জানাহী’’তি. ‘‘কিং পন, ভন্তে, জিৰ্হাৰিঞ্ঞেয্য’’ন্তি? ‘‘আম, মহারাজ, জিৰ্হাৰিঞ্ঞেয্য’’ন্তি. ‘‘কিং পন, ভন্তে, সব্বং লোণং জিৰ্হায ৰিজানাতী’’তি? ‘‘আম, মহারাজ, সব্বং লোণং জিৰ্হায ৰিজানাতি’’.

‘‘যদি, ভন্তে, সব্বং লোণং জিৰ্হায ৰিজানাতি, কিস্স পন তং সকটেহি বলীবদ্দা [বলিবদ্দা (সী. পী.)] আহরন্তি, ননু লোণমেৰ আহরিতব্ব’’ন্তি? ‘‘ন সক্কা, মহারাজ, লোণমেৰ আহরিতুং একতোভাৰগতা এতে ধম্মা গোচরনানত্তগতা লোণং গরুভাৰো চাতি. সক্কা পন, মহারাজ, লোণং তুলায তুলযিতু’’ন্তি? ‘‘আম, ভন্তে, সক্কা’’তি. ‘‘ন সক্কা, মহারাজ, লোণং তুলায তুলযিতুং, গরুভাৰো তুলায তুলিযতী’’তি.

‘‘কল্লোসি, ভন্তে নাগসেনা’’তি.

নাগসেনপঞ্হো দুতিযো.

৩. পঞ্চাযতনকম্মনিব্বত্তপঞ্হো

৩. রাজা আহ ‘‘ভন্তে নাগসেন, যানিমানি পঞ্চাযতনানি, কিং নু তানি নানাকম্মেহি নিব্বত্তানি, উদাহু একেন কম্মেনা’’তি? ‘‘নানাকম্মেহি, মহারাজ, নিব্বত্তানি, ন একেন কম্মেনা’’তি.

‘‘ওপম্মং করোহী’’তি. ‘‘তং কিং মঞ্ঞসি, মহারাজ, একস্মিং খেত্তে নানাবীজানি ৰপ্পেয্যুং, তেসং নানাবীজানং নানাফলানি নিব্বত্তেয্যু’’ন্তি? ‘‘আম, ভন্তে, নিব্বত্তেয্যু’’ন্তি. ‘‘এৰমেৰ খো, মহারাজ, যানি যানি পঞ্চাযতনানি, তানি তানি নানাকম্মেহি নিব্বত্তানি, ন একেন কম্মেনা’’তি.

‘‘কল্লোসি, ভন্তে নাগসেনা’’তি.

পঞ্চাযতনকম্মনিব্বত্তপঞ্হো ততিযো.

৪. কম্মনানাকরণপঞ্হো

৪. রাজা আহ ‘‘ভন্তে নাগসেন, কেন কারণেন মনুস্সা ন সব্বে সমকা, অঞ্ঞে অপ্পাযুকা, অঞ্ঞে দীঘাযুকা, অঞ্ঞে বহ্ৰাবাধা অঞ্ঞে অপ্পাবাধা, অঞ্ঞে দুব্বণ্ণা, অঞ্ঞে ৰণ্ণৰন্তো, অঞ্ঞে অপ্পেসক্খা, অঞ্ঞে মহেসক্খা, অঞ্ঞে অপ্পভোগা, অঞ্ঞে মহাভোগা, অঞ্ঞে নীচকুলীনা, অঞ্ঞে মহাকুলীনা, অঞ্ঞে দুপ্পঞ্ঞা, অঞ্ঞে পঞ্ঞৰন্তো’’তি?

থেরো আহ ‘‘কিস্স পন, মহারাজ, রুক্খা ন সব্বে সমকা, অঞ্ঞে অম্বিলা, অঞ্ঞে লৰণা, অঞ্ঞে তিত্তকা, অঞ্ঞে কটুকা, অঞ্ঞে কসাৰা, অঞ্ঞে মধুরা’’তি? ‘‘মঞ্ঞামি, ভন্তে, বীজানং নানাকরণেনা’’তি. ‘‘এৰমেৰ খো, মহারাজ, কম্মানং নানাকরণেন মনুস্সা ন সব্বে সমকা, অঞ্ঞে অপ্পাযুকা, অঞ্ঞে দীঘাযুকা, অঞ্ঞে বহ্ৰাবাধা, অঞ্ঞে অপ্পাবাধা, অঞ্ঞে দুব্বণ্ণা, অঞ্ঞে ৰণ্ণৰন্তো, অঞ্ঞে অপ্পেসক্খা, অঞ্ঞে মহেসক্খা, অঞ্ঞে অপ্পভোগা, অঞ্ঞে মহাভোগা, অঞ্ঞে নীচকুলীনা, অঞ্ঞে মহাকুলীনা, অঞ্ঞে দুপ্পঞ্ঞা, অঞ্ঞে পঞ্ঞৰন্তো. ভাসিতম্পেতং মহারাজ ভগৰতা – ‘কম্মস্সকা, মাণৰ, সত্তা কম্মদাযাদা কম্মযোনী কম্মবন্ধূ কম্মপ্পটিসরণা, কম্মং সত্তে ৰিভজতি যদিদং হীনপ্পণীততাযা’’’তি.

‘‘কল্লোসি, ভন্তে নাগসেনা’’তি.

কম্মনানাকরণপঞ্হো চতুত্থো.

৫. ৰাযামকরণপঞ্হো

৫. রাজা আহ ‘‘ভন্তে নাগসেন, তুম্হে ভণথ ‘কিন্তি ইমং দুক্খং নিরুজ্ঝেয্য, অঞ্ঞঞ্চ দুক্খং নুপ্পজ্জেয্যা’তি. এতদত্থা, মহারাজ, অম্হাকং পব্বজ্জা’’তি. ‘‘কিং পটিকচ্চেৰ ৰাযমিতেন, ননু সম্পত্তে কালে ৰাযমিতব্ব’’ন্তি? থেরো আহ ‘‘সম্পত্তে কালে, মহারাজ, ৰাযামো অকিচ্চকরো ভৰতি, পটিকচ্চেৰ ৰাযামো কিচ্চকরো ভৰতী’’তি.

‘‘ওপম্মং করোহী’’তি. ‘‘তং কিং মঞ্ঞসি, মহারাজ, যদা ত্ৰং পিপাসিতো ভৰেয্যাসি, তদা ত্ৰং উদপানং খণাপেয্যাসি, তল়াকং খণাপেয্যাসি ‘পানীযং পিৰিস্সামী’তি? ‘‘ন হি, ভন্তে’’তি. ‘‘এৰমেৰ খো, মহারাজ, সম্পত্তে কালে ৰাযামো অকিচ্চকরো ভৰতি, পটিকচ্চেৰ ৰাযামো কিচ্চকরো ভৰতী’’তি.

‘‘ভিয্যো ওপম্মং করোহী’’তি. ‘‘তং কিং মঞ্ঞসি, মহারাজ, যদা ত্ৰং বুভুক্খিতো ভৰেয্যাসি, তদা ত্ৰং খেত্তং কসাপেয্যাসি, সালিং রোপাপেয্যাসি, ধঞ্ঞং অতিহরাপেয্যাসি ‘ভত্তং ভুঞ্জিস্সামী’তি? ‘‘ন হি, ভন্তে’’তি. ‘‘এৰমেৰ খো, মহারাজ, সম্পত্তে কালে ৰাযামো অকিচ্চকরো ভৰতি, পটিকচ্চেৰ ৰাযামো কিচ্চকরো ভৰতীতি.

‘‘ভিয্যো ওপম্মং করোহী’’তি. ‘‘তং কিং মঞ্ঞসি, মহারাজ, যদা তে সঙ্গামো পচ্চুপট্ঠিতো ভৰেয্য, তদা ত্ৰং পরিখং খণাপেয্যাসি, পাকারং কারাপেয্যাসি, গোপুরং কারাপেয্যাসি, অট্টালকং কারাপেয্যাসি, ধঞ্ঞং অতিহরাপেয্যাসি, তদা ত্ৰং হত্থিস্মিং সিক্খেয্যাসি, অস্সস্মিং সিক্খেয্যাসি, রথস্মিং সিক্খেয্যাসি, ধনুস্মিং সিক্খেয্যাসি, থরুস্মিং সিক্খেয্যাসী’’তি? ‘‘ন হি, ভন্তে’’তি. ‘‘এৰমেৰ খো, মহারাজ, সম্পত্তে কালে ৰাযামো অকিচ্চকরো ভৰতি, পটিকচ্চেৰ ৰাযামো কিচ্চকরো ভৰতি. ভাসিতম্পেতং মহারাজ ভগৰতা –

‘‘‘পটিকচ্চেৰ তং কযিরা, যং জঞ্ঞা হিতমত্তনো;

ন সাকটিকচিন্তায, মন্তা ধীরো পরক্কমে.

‘‘‘যথা সাকটিকো মট্ঠং [নাম (সী. পী. ক.) সং. নি. ১.১০৩], সমং হিত্ৰা মহাপথং;

ৰিসমং মগ্গমারুয্হ, অক্খচ্ছিন্নোৰ ঝাযতি.

‘‘‘এৰং ধম্মা অপক্কম্ম, অধম্মমনুৰত্তিয;

মন্দো মচ্চু মুখং পত্তো, অক্খচ্ছিন্নোৰ ঝাযতী’’’তি [সোচতীতি (সব্বত্থ)].

‘‘কল্লোসি, ভন্তে নাগসেনা’’তি.

ৰাযামকরণপঞ্হো পঞ্চমো.

৬. নেরযিকগ্গিউণ্হভাৰপঞ্হো

৬. রাজা আহ ‘‘ভন্তে নাগসেন, তুম্হে ভণথ ‘পাকতিকঅগ্গিতো নেরযিকো অগ্গি মহাভিতাপতরো হোতি, খুদ্দকোপি পাসাণো পাকতিকে অগ্গিম্হি পক্খিত্তো দিৰসম্পি পচ্চমানো [ধমমানো (সী. পী.)] ন ৰিলযং গচ্ছতি, কূটাগারমত্তোপি পাসাণো নেরযিকগ্গিম্হি পক্খিত্তো খণেন ৰিলযং গচ্ছতী’তি, এতং ৰচনং ন সদ্দহামি, এৰঞ্চ পন ৰদেথ ‘যে চ তত্থ উপ্পন্না সত্তা, তে অনেকানিপি ৰস্সসহস্সানি নিরযে পচ্চমানা ন ৰিলযং গচ্ছন্তী’তি, তম্পি ৰচনং ন সদ্দহামী’’তি.

থেরো আহ ‘‘তং কিং মঞ্ঞসি, মহারাজ, যা তা সন্তি মকরিনিযোপি সুসুমারিনিযোপি কচ্ছপিনিযোপি মোরিনিযোপি কপোতিনিযোপি, কিংনু তা কক্খল়ানি পাসাণানি সক্খরাযো চ খাদন্তী’’তি? ‘‘আম, ভন্তে, খাদন্তী’’তি. ‘‘কিং পন তানি তাসং কুচ্ছিযং কোট্ঠব্ভন্তরগতানি ৰিলযং গচ্ছন্তী’’তি? ‘‘আম, ভন্তে, ৰিলযং গচ্ছন্তী’’তি. ‘‘যো পন তাসং কুচ্ছিযং গব্ভো, সোপি ৰিলযং গচ্ছতী’’তি? ‘‘ন হি ভন্তে’’তি. ‘‘কেন কারণেনা’’তি? ‘‘মঞ্ঞামি, ভন্তে, কম্মাধিকতেন ন ৰিলযং গচ্ছতী’’তি. ‘‘এৰমেৰ খো, মহারাজ, কম্মাধিকতেন নেরযিকা সত্তা অনেকানিপি ৰস্সসহস্সানি নিরযে পচ্চমানা ন ৰিলযং গচ্ছন্তি. ভাসিতম্পেতং, মহারাজ, ভগৰতা – ‘সো ন তাৰ কালং করোতি, যাৰ ন তং পাপকম্মং ব্যন্তীহোতী’’’তি.

‘‘ভিয্যো ওপম্মং করোহী’’তি. ‘‘তং কিং মঞ্ঞসি, মহারাজ, যা তা সন্তি সীহিনিযোপি ব্যগ্ঘিনিযোপি দীপিনিযোপি কুক্কুরিনিযোপি, কিংনু তা কক্খল়ানি অট্ঠিকানি মংসানি খাদন্তীতি? ‘‘আম, ভন্তে, খাদন্তী’’তি. ‘‘কিং পন তানি তাসং কুচ্ছিযং কোট্ঠব্ভন্তরগতানি ৰিলযং গচ্ছন্তী’’তি? ‘‘আম, ভন্তে, ৰিলযং গচ্ছন্তী’’তি. ‘‘যো পন তাসং কুচ্ছিযং গব্ভো, সোপি ৰিলযং গচ্ছতী’’তি? ‘‘ন হি ভন্তে’’তি. ‘‘কেন কারণেনা’’তি? ‘‘মঞ্ঞামি, ভন্তে, কম্মাধিকতেন ন ৰিলযং গচ্ছতী’’তি. ‘‘এৰমেৰ খো, মহারাজ, কম্মাধিকতেন নেরযিকা সত্তা অনেকানিপি ৰস্সসহস্সানি নিরযে পচ্চমানা ন ৰিলযং গচ্ছন্তী’’তি.

‘‘ভিয্যো ওপম্মং করোহী’’তি. ‘‘তং কিং মঞ্ঞসি, মহারাজ, যা তা সন্তি যোনকসুখুমালিনিযোপি খত্তিযসুখুমালিনিযোপি ব্রাহ্মণসুখুমালিনিযোপি গহপতিসুখুমালিনিযোপি, কিংনু তা কক্খল়ানি খজ্জকানি মংসানি খাদন্তী’’তি? ‘‘আম, ভন্তে, খাদন্তী’’তি. ‘‘কিং পন তানি তাসং কুচ্ছিযং কোট্ঠব্ভন্তরগতানি ৰিলযং গচ্ছন্তী’’তি? ‘‘আম, ভন্তে, ৰিলযং গচ্ছন্তী’’তি. ‘‘যো পন তাসং কুচ্ছিযং গব্ভো সোপি ৰিলযং গচ্ছতী’’তি? ‘‘ন হি ভন্তে’’তি. ‘‘কেন কারণেনা’’তি. ‘‘মঞ্ঞামি, ভন্তে, কম্মাধিকতেন ন ৰিলযং গচ্ছতী’’তি. ‘‘এৰমেৰ খো, মহারাজ, কম্মাধিকতেন নেরযিকা সত্তা অনেকানিপি ৰস্সসহস্সানি নিরযে পচ্চমানা ন ৰিলযং গচ্ছন্তি. ভাসিতম্পেতং, মহারাজ, ভগৰতা – ‘‘সো ন তাৰ কালং করোতি, যাৰ ন তং পাপকম্মং ব্যন্তীহোতী’’তি.

‘‘কল্লোসি, ভন্তে নাগসেনা’’তি.

নেরযিকগ্গিউণ্হভাৰপঞ্হো ছট্ঠো.

৭. পথৰিসন্ধারকপঞ্হো

৭. রাজা আহ ‘‘ভন্তে নাগসেন, তুম্হে ভণথ ‘অযং মহা পথৰী উদকে পতিট্ঠিতা, উদকং ৰাতে পতিট্ঠিতং, ৰাতো আকাসে পতিট্ঠিতো’তি, এতম্পি ৰচনং ন সদ্দহামী’’তি. থেরো ধম্মকরকেন [ধম্মকরণেন (ক.)] উদকং গহেত্ৰা রাজানং মিলিন্দং সঞ্ঞাপেসি ‘‘যথা, মহারাজ, ইমং উদকং ৰাতেন আধারিতং, এৰং তম্পি উদকং ৰাতেন আধারিত’’ন্তি.

‘‘কল্লোসি, ভন্তে নাগসেনা’’তি.

পথৰিসন্ধারকপঞ্হো সত্তমো.

৮. নিরোধনিব্বানপঞ্হো

৮. রাজা আহ ‘‘ভন্তে নাগসেন, নিরোধো নিব্বান’’ন্তি? ‘‘আম, মহারাজ, নিরোধো নিব্বান’’ন্তি. ‘‘কথং, ভন্তে, নাগসেন, নিরোধো নিব্বান’’ন্তি? ‘‘সব্বে বালপুথুজ্জনা খো, মহারাজ, অজ্ঝত্তিকবাহিরে আযতনে অভিনন্দন্তি অভিৰদন্তি অজ্ঝোসায তিট্ঠন্তি, তে তেন সোতেন ৰুয্হন্তি, ন পরিমুচ্চন্তি জাতিযা জরায মরণেন সোকেন পরিদেৰেন দুক্খেহি দোমনস্সেহি উপাযাসেহি ন পরিমুচ্চন্তি দুক্খস্মাতি ৰদামি. সুতৰা চ খো, মহারাজ, অরিযসাৰকো অজ্ঝত্তিকবাহিরে আযতনে নাভিনন্দতি নাভিৰদতি নাজ্ঝোসায তিট্ঠতি, তস্স তং অনভিনন্দতো অনভিৰদতো অনজ্ঝোসায তিট্ঠতো তণ্হা নিরুজ্ঝতি, তণ্হানিরোধা উপাদাননিরোধো, উপাদাননিরোধা ভৰনিরোধো, ভৰনিরোধা জাতিনিরোধো, জাতিনিরোধা জরামরণং সোকপরিদেৰদুক্খদোমনস্সুপাযাসা নিরুজ্ঝন্তি, এৰমেতস্স কেৰলস্স দুক্খক্খন্ধস্স নিরোধো হোতি, এৰং খো, মহারাজ, নিরোধো নিব্বান’’ন্তি.

‘‘কল্লোসি, ভন্তে নাগসেনা’’তি.

নিরোধনিব্বানপঞ্হো অট্ঠমো.

৯. নিব্বানলভনপঞ্হো

৯. রাজা আহ ‘‘ভন্তে নাগসেন, সব্বেৰ লভন্তি নিব্বান’’ন্তি? ‘‘ন খো, মহারাজ, সব্বেৰ লভন্তি নিব্বানং, অপি চ খো, মহারাজ, যো সম্মা পটিপন্নো অভিঞ্ঞেয্যে ধম্মে অভিজানাতি, পরিঞ্ঞেয্যে ধম্মে পরিজানাতি, পহাতব্বে ধম্মে পজহতি, ভাৰেতব্বে ধম্মে ভাৰেতি, সচ্ছিকাতব্বে ধম্মে সচ্ছিকরোতি, সো লভতি নিব্বান’’ন্তি.

‘‘কল্লোসি, ভন্তে নাগসেনা’’তি.

নিব্বানলভনপঞ্হো নৰমো.

১০. নিব্বানসুখজাননপঞ্হো

১০. রাজা আহ ‘‘ভন্তে নাগসেন, যো ন লভতি নিব্বানং, জানাতি সো ‘সুখং নিব্বান’’’ন্তি? ‘‘আম, মহারাজ, যো ন লভতি নিব্বানং, জানাতি সো ‘সুখং নিব্বান’’’ন্তি. ‘‘কথং, ভন্তে নাগসেন, অলভন্তো জানাতি ‘সুখং নিব্বান’’’ন্তি? ‘‘তং কিং মঞ্ঞসি, মহারাজ, যেসং নচ্ছিন্না হত্থপাদা, জানেয্যুং তে, মহারাজ, ‘দুক্খং হত্থপাদচ্ছেদন’’’ন্তি? ‘‘আম, ভন্তে, জানেয্যু’’ন্তি. ‘‘কথং জানেয্যু’’ন্তি? ‘‘অঞ্ঞেসং, ভন্তে, ছিন্নহত্থপাদানং পরিদেৰিতসদ্দং সুত্ৰা জানন্তি ‘দুক্খং হত্থপাদচ্ছেদন’’’ন্তি. ‘‘এৰমেৰ খো, মহারাজ, যেসং দিট্ঠং নিব্বানং, তেসং সদ্দং সুত্ৰা জানাতি ‘সুখং নিব্বান’’’ন্তি.

‘‘কল্লোসি, ভন্তে নাগসেনা’’তি.

নিব্বানসুখজাননপঞ্হো দসমো.

নিব্বানৰগ্গো চতুত্থো.

ইমস্মিং ৰগ্গে দস পঞ্হা.