৩. ৰীমংসনপঞ্হো

৩. রাজা আহ ‘‘ভন্তে নাগসেন, সল্লপিস্সসি মযা সদ্ধি’’ন্তি? ‘‘সচে, ত্ৰং মহারাজ, পণ্ডিতৰাদং [পণ্ডিতৰাদা (সী. পী.)] সল্লপিস্সসি সল্লপিস্সামি, সচে পন রাজৰাদং সল্লপিস্সসি ন সল্লপিস্সামী’’তি. ‘‘কথং, ভন্তে নাগসেন, পণ্ডিতা সল্লপন্তী’’তি? ‘‘পণ্ডিতানং খো, মহারাজ, সল্লাপে আৰেঠনম্পি কযিরতি, নিব্বেঠনম্পি কযিরতি, নিগ্গহোপি কযিরতি, পটিকম্মম্পি কযিরতি, ৰিস্সাসোপি [ৰিসেসোপি (সী. পী.)] কযিরতি, পটিৰিস্সাসোপি কযিরতি, ন চ তেন পণ্ডিতা কুপ্পন্তি, এৰং খো, মহারাজ, পণ্ডিতা সল্লপন্তী’’তি. ‘‘কথং পন, ভন্তে, রাজানো সল্লপন্তী’’তি? ‘‘রাজানো খো, মহারাজ, সল্লাপে একং ৰত্থুং পটিজানন্তি, যো তং ৰত্থুং ৰিলোমেতি, তস্স দণ্ডং আণাপেন্তি ‘ইমস্স দণ্ডং পণেথা’তি, এৰং খো, মহারাজ, রাজানো সল্লপন্তী’’তি. ‘‘পণ্ডিতৰাদাহং, ভন্তে, সল্লপিস্সামি, নো রাজৰাদং, ৰিস্সট্ঠো ভদন্তো সল্লপতু যথা ভিক্খুনা ৰা সামণেরেন ৰা উপাসকেন ৰা আরামিকেন ৰা সদ্ধিং সল্লপতি, এৰং ৰিস্সট্ঠো ভদন্তো সল্লপতু মা ভাযতূ’’তি. ‘‘সুট্ঠু মহারাজা’’তি থেরো অব্ভানুমোদি.

রাজা আহ ‘‘ভন্তে নাগসেন, পুচ্ছিস্সামী’’তি. ‘‘পুচ্ছ মহারাজা’’তি. ‘‘পুচ্ছিতোসি মে ভন্তে’’তি. ‘‘ৰিসজ্জিতং মহারাজা’’তি. ‘‘কিং পন, ভন্তে, তযা ৰিসজ্জিত’’ন্তি? ‘‘কিং পন, মহারাজ, তযা পুচ্ছিত’’ন্তি.

ৰীমংসনপঞ্হো ততিযো.