৪২১. গঙ্গমালজাতকং (৫)

৩৬. অঙ্গারজাতা পথৰী, কুক্কুল়ানুগতা মহী;

অথ গাযসি ৰত্তানি [ৰত্থানি (ক.)], ন তং তপতি আতপো.

৩৭. উদ্ধং তপতি আদিচ্চো, অধো তপতি ৰালুকা;

অথ গাযসি ৰত্তানি [ৰত্থানি (ক.)], ন তং তপতি আতপো.

৩৮. ন মং তপতি আতপো, আতপা [আতপ্পা (সী. স্যা. পী.)] তপযন্তি মং;

অত্থা হি ৰিৰিধা রাজ, তে তপন্তি ন আতপো.

৩৯. অদ্দসং কাম তে মূলং, সঙ্কপ্পা কাম জাযসি;

ন তং সঙ্কপ্পযিস্সামি, এৰং কাম ন হেহিসি.

৪০. অপ্পাপি কামা ন অলং, বহূহিপি ন তপ্পতি;

অহহা বাললপনা, পরিৰজ্জেথ [পটিৰিজ্ঝেথ (পী. সী. অট্ঠ.)] জগ্গতো.

৪১. অপ্পস্স কম্মস্স ফলং মমেদং, উদযো অজ্ঝাগমা মহত্তপত্তং;

সুলদ্ধলাভো ৰত মাণৰস্স, যো পব্বজী কামরাগং পহায.

৪২. তপসা পজহন্তি পাপকম্মং, তপসা ন্হাপিতকুম্ভকারভাৰং;

তপসা অভিভুয্য গঙ্গমাল, নামেনালপসজ্জ ব্রহ্মদত্তং.

৪৩. সন্দিট্ঠিকমেৰ ‘‘অম্ম’’ পস্সথ, খন্তীসোরচ্চস্স অযং [যো (স্যা. পী. ক.)] ৰিপাকো;

যো [সো (স্যা. ক.)] সব্বজনস্স ৰন্দিতোহু, তং ৰন্দাম সরাজিকা সমচ্চা.

৪৪. মা কিঞ্চি অৰচুত্থ গঙ্গমালং, মুনিনং মোনপথেসু সিক্খমানং;

এসো হি অতরি অণ্ণৰং, যং তরিত্ৰা চরন্তি ৰীতসোকাতি.

গঙ্গমালজাতকং পঞ্চমং.