৪২২. চেতিযজাতকং (৬)

৪৫. ধম্মো হৰে হতো হন্তি, নাহতো হন্তি কিঞ্চনং [কঞ্চিনং (পী.)];

তস্মা হি ধম্মং ন হনে, মা ত্ৰং [তং (স্যা. পী.)] ধম্মো হতো হনি.

৪৬. অলিকং ভাসমানস্স, অপক্কমন্তি দেৰতা;

পূতিকঞ্চ মুখং ৰাতি, সকট্ঠানা চ ধংসতি;

যো জানং পুচ্ছিতো পঞ্হং, অঞ্ঞথা নং ৰিযাকরে.

৪৭. সচে হি সচ্চং ভণসি, হোহি রাজ যথা পুরে;

মুসা চে ভাসসে রাজ, ভূমিযং তিট্ঠ চেতিয.

৪৮. অকালে ৰস্সতী তস্স, কালে তস্স ন ৰস্সতি;

যো জানং পুচ্ছিতো পঞ্হং, অঞ্ঞথা নং ৰিযাকরে.

৪৯. সচে হি সচ্চং ভণসি, হোহি রাজ যথা পুরে;

মুসা চে ভাসসে রাজ, ভূমিং পৰিস চেতিয.

৫০. জিৰ্হা তস্স দ্ৰিধা হোতি, উরগস্সেৰ দিসম্পতি;

যো জানং পুচ্ছিতো পঞ্হং, অঞ্ঞথা নং ৰিযাকরে.

৫১. সচে হি সচ্চং ভণসি, হোহি রাজ যথা পুরে;

মুসা চে ভাসসে রাজ, ভিয্যো পৰিস চেতিয.

৫২. জিৰ্হা তস্স ন ভৰতি, মচ্ছস্সেৰ দিসম্পতি;

যো জানং পুচ্ছিতো পঞ্হং, অঞ্ঞথা নং ৰিযাকরে.

৫৩. সচে হি সচ্চং ভণসি, হোহি রাজ যথা পুরে;

মুসা চে ভাসসে রাজ, ভিয্যো পৰিস চেতিয.

৫৪. থিযোৰ তস্স জাযন্তি [থিযো তস্স পজাযন্তি (ক.)], ন পুমা জাযরে কুলে;

যো জানং পুচ্ছিতো পঞ্হং, অঞ্ঞথা নং ৰিযাকরে.

৫৫. সচে হি সচ্চং ভণসি, হোহি রাজ যথা পুরে;

মুসা চে ভাসসে রাজ, ভিয্যো পৰিস চেতিয.

৫৬. পুত্তা তস্স ন ভৰন্তি, পক্কমন্তি দিসোদিসং;

যো জানং পুচ্ছিতো পঞ্হং, অঞ্ঞথা নং ৰিযাকরে.

৫৭. সচে হি সচ্চং ভণসি, হোহি রাজ যথা পুরে;

মুসা চে ভাসসে রাজ, ভিয্যো পৰিস চেতিয.

৫৮. স রাজা ইসিনা সত্তো, অন্তলিক্খচরো পুরে;

পাৰেক্খি পথৰিং চেচ্চো, হীনত্তো পত্ৰ পরিযাযং [অত্তপরিযাযং (সী. স্যা.), পত্তপরিযাযং (ক. সী. নিয্য)].

৫৯. তস্মা হি ছন্দাগমনং, নপ্পসংসন্তি পণ্ডিতা;

অদুট্ঠচিত্তো ভাসেয্য, গিরং সচ্চূপসংহিতন্তি.

চেতিযজাতকং ছট্ঠং.