৮. অট্ঠকনিপাতো

৪১৭. কচ্চানিজাতকং (১)

১. ওদাতৰত্থা সুচি অল্লকেসা, কচ্চানি কিং কুম্ভিমধিস্সযিত্ৰা [কুম্ভিমপস্সযিত্ৰা (পী.)];

পিট্ঠা তিলা ধোৰসি তণ্ডুলানি, তিলোদনো হেহিতি কিস্স হেতু.

২. ন খো অযং ব্রাহ্মণ ভোজনত্থা [ভোজনত্থং (স্যা.)], তিলোদনো হেহিতি সাধুপক্কো;

ধম্মো মতো তস্স পহুত্তমজ্জ [পহূনমজ্জ (স্যা.), পহূতমজ্জ (সী.), বহূতমজ্জা (পী.)], অহং করিস্সামি সুসানমজ্ঝে.

৩. অনুৰিচ্চ কচ্চানি করোহি কিচ্চং, ধম্মো মতো কো নু তৰেৰ [তৰেত (সী. স্যা. পী.)] সংসি;

সহস্সনেত্তো অতুলানুভাৰো, ন মিয্যতী ধম্মৰরো কদাচি.

৪. দল়্হপ্পমাণং মম এত্থ ব্রহ্মে, ধম্মো মতো নত্থি মমেত্থ কঙ্খা;

যে যেৰ দানি পাপা ভৰন্তি, তে তেৰ দানি সুখিতা ভৰন্তি.

৫. সুণিসা হি ময্হং ৰঞ্ঝা অহোসি, সা মং ৰধিত্ৰান ৰিজাযি পুত্তং;

সা দানি সব্বস্স কুলস্স ইস্সরা, অহং পনম্হি [ৰসামি (স্যা.)] অপৰিদ্ধা একিকা.

৬. জীৰামি ৰোহং ন মতোহমস্মি [নাহং মতোস্মি (সী. পী.)], তৰেৰ অত্থায ইধাগতোস্মি;

যা তং ৰধিত্ৰান ৰিজাযি পুত্তং, সহাৰ পুত্তেন করোমি ভস্মং.

৭. এৰঞ্চ [এতঞ্চ (সী. পী.)] তে রুচ্চতি দেৰরাজ, মমেৰ অত্থায ইধাগতোসি;

অহঞ্চ পুত্তো সুণিসা চ নত্তা, সম্মোদমানা ঘরমাৰসেম.

৮. এৰঞ্চ তে রুচ্চতি কাতিযানি, হতাপি সন্তা ন জহাসি ধম্মং;

তুৰঞ্চ [ত্ৰঞ্চ (পী. ক.)] পুত্তো সুণিসা চ নত্তা, সম্মোদমানা ঘরমাৰসেথ.

৯. সা কাতিযানী সুণিসায সদ্ধিং, সম্মোদমানা ঘরমাৰসিত্থ;

পুত্তো চ নত্তা চ উপট্ঠহিংসু, দেৰানমিন্দেন অধিগ্গহীতাতি.

কচ্চানিজাতকং পঠমং.

৪১৮. অট্ঠসদ্দজাতকং (২)

১০. ইদং পুরে নিন্নমাহু, বহুমচ্ছং মহোদকং;

আৰাসো বকরাজস্স, পেত্তিকং ভৰনং মম;

ত্যজ্জ ভেকেন [ভিঙ্গেন (ক.)] যাপেম, ওকং ন ৰজহামসে [ওকন্তং ন জহামসে (ক.)].

১১. কো দুতিযং অসীলিস্স, বন্ধরস্সক্খি ভেচ্ছতি [ভেজ্জতি (সী. স্যা. পী.), ভিন্দতি (ক.)];

কো মে পুত্তে কুলাৰকং, মঞ্চ সোত্থিং করিস্সতি.

১২. সব্বা পরিক্খযা ফেগ্গু, যাৰ তস্সা গতী অহু;

খীণভক্খো মহারাজ, সারে ন রমতী ঘুণো.

১৩. সা নূনাহং ইতো গন্ত্ৰা, রঞ্ঞো মুত্তা নিৰেসনা;

অত্তানং রমযিস্সামি, দুমসাখনিকেতিনী.

১৪. সো নূনাহং ইতো গন্ত্ৰা, রঞ্ঞো মুত্তো নিৰেসনা;

অগ্গোদকানি পিস্সামি, যূথস্স পুরতো ৰজং.

১৫. তং মং কামেহি সম্মত্তং, রত্তং কামেসু মুচ্ছিতং;

আনযী ভরতো [ৰনতো (ক.)] লুদ্দো, বাহিকো ভদ্দমত্থু তে.

১৬. অন্ধকারতিমিসাযং, তুঙ্গে উপরিপব্বতে;

সা মং সণ্হেন মুদুনা, মা পাদং খলি [খণি (সী. স্যা. পী.)] যস্মনি.

১৭. অসংসযং জাতিখযন্তদস্সী, ন গব্ভসেয্যং পুনরাৰজিস্সং;

অযমন্তিমা পচ্ছিমা গব্ভসেয্যা [অযং হি মে অন্তিমা গব্ভসেয্যা (সী. পী.)], খীণো মে সংসারো পুনব্ভৰাযাতি.

অট্ঠসদ্দজাতকং দুতিযং.

৪১৯. সুলসাজাতকং (৩)

১৮. ইদং সুৰণ্ণকাযূরং, মুত্তা ৰেল়ুরিযা বহূ;

সব্বং হরস্সু ভদ্দন্তে, মঞ্চ দাসীতি সাৰয.

১৯. ওরোপযস্সু কল্যাণি, মা বাল়্হং [বহুং (সী. স্যা. পী.)] পরিদেৰসি;

ন চাহং অভিজানামি, অহন্ত্ৰা ধনমাভতং.

২০. যতো সরামি অত্তানং, যতো পত্তাস্মি ৰিঞ্ঞুতং;

ন চাহং অভিজানামি, অঞ্ঞং পিযতরং তযা.

২১. এহি তং উপগূহিস্সং [উপগুয্হিস্সং (ক.)], করিস্সঞ্চ পদক্খিণং;

ন হি দানি পুন অত্থি, মম তুয্হঞ্চ সঙ্গমো.

২২. ন হি সব্বেসু ঠানেসু, পুরিসো হোতি পণ্ডিতো;

ইত্থীপি পণ্ডিতা হোতি, তত্থ তত্থ ৰিচক্খণা.

২৩. ন হি সব্বেসু ঠানেসু, পুরিসো হোতি পণ্ডিতো;

ইত্থীপি পণ্ডিতা হোতি, লহুং অত্থং ৰিচিন্তিকা [লহুমত্থৰিচিন্তিকা (সী. পী.)].

২৪. লহুঞ্চ ৰত খিপ্পঞ্চ, নিকট্ঠে সমচেতযি;

মিগং পুণ্ণাযতেনেৰ [পুণ্ণাযতনেৰ (স্যা.)], সুলসা সত্তুকং ৰধি.

২৫. যোধ উপ্পতিতং অত্থং, ন খিপ্পমনুবুজ্ঝতি;

সো হঞ্ঞতি মন্দমতি, চোরোৰ গিরিগব্ভরে.

২৬. যো চ উপ্পতিতং অত্থং, খিপ্পমেৰ নিবোধতি;

মুচ্চতে সত্তুসম্বাধা, সুলসা সত্তুকামিৰাতি.

সুলসাজাতকং ততিযং.

৪২০. সুমঙ্গলজাতকং (৪)

২৭. ভুসম্হি [ভুসম্পি (ক.), ভুসং হি (সী. নিয্য)] কুদ্ধোতি অৰেক্খিযান, ন তাৰ দণ্ডং পণযেয্য ইস্সরো;

অট্ঠানসো অপ্পতিরূপমত্তনো, পরস্স দুক্খানি ভুসং উদীরযে.

২৮. যতো চ জানেয্য পসাদমত্তনো, অত্থং নিযুঞ্জেয্য পরস্স দুক্কটং;

তদাযমত্থোতি সযং অৰেক্খিয, অথস্স দণ্ডং সদিসং নিৰেসযে.

২৯. ন চাপি ঝাপেতি পরং ন অত্তনং, অমুচ্ছিতো যো নযতে নযানযং;

যো দণ্ডধারো ভৰতীধ ইস্সরো, স ৰণ্ণগুত্তো সিরিযা ন ধংসতি.

৩০. যে খত্তিযা সে অনিসম্মকারিনো, পণেন্তি দণ্ডং সহসা পমুচ্ছিতা;

অৰণ্ণসংযুতা [যুত্তাৰ (ক.)] জহন্তি জীৰিতং, ইতো ৰিমুত্তাপি চ যন্তি দুগ্গতিং.

৩১. ধম্মে চ যে অরিযপ্পৰেদিতে রতা, অনুত্তরা তে ৰচসা মনসা কম্মুনা চ;

তে সন্তিসোরচ্চসমাধিসণ্ঠিতা, ৰজন্তি লোকং দুভযং তথাৰিধা.

৩২. রাজাহমস্মি নরপমদানমিস্সরো, সচেপি কুজ্ঝামি ঠপেমি অত্তনং;

নিসেধযন্তো জনতং তথাৰিধং, পণেমি দণ্ডং অনুকম্প যোনিসো.

৩৩. সিরী চ লক্খী চ তৰেৰ খত্তিয, জনাধিপ মা ৰিজহি কুদাচনং;

অক্কোধনো নিচ্চপসন্নচিত্তো, অনীঘো তুৰং ৰস্সসতানি পালয.

৩৪. গুণেহি এতেহি উপেত খত্তিয, ঠিতমরিযৰত্তী [ৰত্তি (সী.), ৰুত্তি (ক.)] সুৰচো অকোধনো;

সুখী অনুপ্পীল় পসাসমেদিনিং [অনুপ্পীল়ং সহসমেদনিং (ক.)], ইতো ৰিমুত্তোপি চ যাহি সুগ্গতিং.

৩৫. এৰং সুনীতেন [সুৰিনীতেন (পী.)] সুভাসিতেন, ধম্মেন ঞাযেন উপাযসো নযং;

নিব্বাপযে সঙ্খুভিতং মহাজনং, মহাৰ মেঘো সলিলেন মেদিনিন্তি [মেদনিন্তি (স্যা. ক.)].

সুমঙ্গলজাতকং চতুত্থং.

৪২১. গঙ্গমালজাতকং (৫)

৩৬. অঙ্গারজাতা পথৰী, কুক্কুল়ানুগতা মহী;

অথ গাযসি ৰত্তানি [ৰত্থানি (ক.)], ন তং তপতি আতপো.

৩৭. উদ্ধং তপতি আদিচ্চো, অধো তপতি ৰালুকা;

অথ গাযসি ৰত্তানি [ৰত্থানি (ক.)], ন তং তপতি আতপো.

৩৮. ন মং তপতি আতপো, আতপা [আতপ্পা (সী. স্যা. পী.)] তপযন্তি মং;

অত্থা হি ৰিৰিধা রাজ, তে তপন্তি ন আতপো.

৩৯. অদ্দসং কাম তে মূলং, সঙ্কপ্পা কাম জাযসি;

ন তং সঙ্কপ্পযিস্সামি, এৰং কাম ন হেহিসি.

৪০. অপ্পাপি কামা ন অলং, বহূহিপি ন তপ্পতি;

অহহা বাললপনা, পরিৰজ্জেথ [পটিৰিজ্ঝেথ (পী. সী. অট্ঠ.)] জগ্গতো.

৪১. অপ্পস্স কম্মস্স ফলং মমেদং, উদযো অজ্ঝাগমা মহত্তপত্তং;

সুলদ্ধলাভো ৰত মাণৰস্স, যো পব্বজী কামরাগং পহায.

৪২. তপসা পজহন্তি পাপকম্মং, তপসা ন্হাপিতকুম্ভকারভাৰং;

তপসা অভিভুয্য গঙ্গমাল, নামেনালপসজ্জ ব্রহ্মদত্তং.

৪৩. সন্দিট্ঠিকমেৰ ‘‘অম্ম’’ পস্সথ, খন্তীসোরচ্চস্স অযং [যো (স্যা. পী. ক.)] ৰিপাকো;

যো [সো (স্যা. ক.)] সব্বজনস্স ৰন্দিতোহু, তং ৰন্দাম সরাজিকা সমচ্চা.

৪৪. মা কিঞ্চি অৰচুত্থ গঙ্গমালং, মুনিনং মোনপথেসু সিক্খমানং;

এসো হি অতরি অণ্ণৰং, যং তরিত্ৰা চরন্তি ৰীতসোকাতি.

গঙ্গমালজাতকং পঞ্চমং.

৪২২. চেতিযজাতকং (৬)

৪৫. ধম্মো হৰে হতো হন্তি, নাহতো হন্তি কিঞ্চনং [কঞ্চিনং (পী.)];

তস্মা হি ধম্মং ন হনে, মা ত্ৰং [তং (স্যা. পী.)] ধম্মো হতো হনি.

৪৬. অলিকং ভাসমানস্স, অপক্কমন্তি দেৰতা;

পূতিকঞ্চ মুখং ৰাতি, সকট্ঠানা চ ধংসতি;