নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

জাতকপাল়ি

(পঠমো ভাগো)

১. এককনিপাতো

১. অপণ্ণকৰগ্গো

১. অপণ্ণকজাতকং

১. অপণ্ণকং ঠানমেকে, দুতিযং আহু তক্কিকা;

এতদঞ্ঞায মেধাৰী, তং গণ্হে যদপণ্ণকন্তি [তং গণ্হেয্য অপণ্ণকং (ক.)].

অপণ্ণকজাতকং পঠমং.

২. ৰণ্ণুপথজাতকং

২. অকিলাসুনো ৰণ্ণুপথে [ৰণ্ণপথে (ক.)] খণন্তা, উদঙ্গণে তত্থ পপং অৰিন্দুং;

এৰং মুনী ৰীরিয [মুনি ৰিরিয (পী.), মুনি ৰীরিয (স্যা. ক.)] বলূপপন্নো, অকিলাসু ৰিন্দে হদযস্স সন্তিন্তি.

ৰণ্ণুপথজাতকং দুতিযং.

৩. সেরিৰৰাণিজজাতকং

৩. ইধ চে নং [ইধ চে হি নং (সী. পী.)] ৰিরাধেসি, সদ্ধম্মস্স নিযামতং [নিযামকং (স্যা. ক.)];

চিরং ত্ৰং অনুতপ্পেসি [অনুতপেস্সসি (সী. পী.), অনুতপ্পিস্সসি (?)], সেরিৰাযংৰ ৰাণিজোতি.

সেরিৰৰাণিজজাতকং ততিযং.

৪. চূল়সেট্ঠিজাতকং

৪. অপ্পকেনপি মেধাৰী, পাভতেন ৰিচক্খণো;

সমুট্ঠাপেতি অত্তানং, অণুং অগ্গিংৰ সন্ধমন্তি.

চূল় [চুল্ল (সী.), চুল্লক (স্যা. পী.)] সেট্ঠিজাতকং চতুত্থং.

৫. তণ্ডুলনাল়িজাতকং

৫. [কিমগ্ঘতী তণ্ডুলনাল়িকা চ, বারাণসী অন্তরবাহিরানি; অস্সপঞ্চসতে তানি, একা তণ্ডুলনাল়িকাতি; (স্যা.)] কিমগ্ঘতি তণ্ডুলনাল়িকায, অস্সান মূলায ৰদেহি রাজ [নাল়িকা চ (সী.), নাল়িকায (ক. সী. অট্ঠ.)];

বারাণসিং সন্তরবাহিরতো [বাহিরন্তং (সী.)], অযমগ্ঘতি তণ্ডুলনাল়িকাতি [কিমগ্ঘতী ৰণ্ডুলনাল়িকা চ, বারাণসী অন্তরবাহিরানি; অস্সপঞ্চসতে তানি, একা তণ্ডুলনাল়িকাতি; (স্যা.)].

তণ্ডুলনাল়িজাতকং পঞ্চমং.

৬. দেৰধম্মজাতকং

৬. হিরিওত্তপ্পসম্পন্না, সুক্কধম্মসমাহিতা;

সন্তো সপ্পুরিসা লোকে, দেৰধম্মাতি ৰুচ্চরেতি.

দেৰধম্মজাতকং ছট্ঠং.

৭. কট্ঠহারিজাতকং

৭. পুত্তো ত্যাহং মহারাজ, ত্ৰং মং পোস জনাধিপ;

অঞ্ঞেপি দেৰো পোসেতি, কিঞ্চ [কিঞ্চি (ক.)] দেৰো সকং পজন্তি.

কট্ঠহারি [কট্ঠৰাহন (ক.)] জাতকং সত্তমং.

৮. গামণিজাতকং

৮. অপি অতরমানানং, ফলাসাৰ সমিজ্ঝতি;

ৰিপক্কব্রহ্মচরিযোস্মি, এৰং জানাহি গামণীতি.

গামণিজাতকং অট্ঠমং.

৯. মঘদেৰজাতকং

৯. উত্তমঙ্গরুহা ময্হং, ইমে জাতা ৰযোহরা;

পাতুভূতা দেৰদূতা, পব্বজ্জাসমযো মমাতি.

মঘদেৰ [মখাদেৰ (সী. পী.), দেৰদূত (ক.)] জাতকং নৰমং.

১০. সুখৰিহারিজাতকং

১০. যঞ্চ অঞ্ঞে ন রক্খন্তি, যো চ অঞ্ঞে ন রক্খতি;

স ৰে রাজ সুখং সেতি, কামেসু অনপেক্খৰাতি.

সুখৰিহারিজাতকং দসমং.

অপণ্ণকৰগ্গো পঠমো.

তস্সুদ্দানং –

ৰরাপণ্ণক ৰণ্ণুপথ সেরিৰরো, সুৰিচক্খণ তণ্ডুলনাল়িকস্সা;

হিরি পুত্তৰরুত্তগামণিনা, যো চ ন রক্খতি তেন দসাতি.

২. সীলৰগ্গো

১১. লক্খণমিগজাতকং

১১. হোতি সীলৰতং অত্থো, পটিসন্থার [পটিসন্ধার (ক.)] ৰুত্তিনং;

লক্খণং পস্স আযন্তং, ঞাতিসঙ্ঘপুরক্খতং [পুরক্খিতং (স্যা.), পুরেক্খিতং (ক.)];

অথ পস্সসিমং কাল়ং, সুৰিহীনংৰ ঞাতিভীতি.

লক্খণমিগজাতকং পঠমং.

১২. নিগ্রোধমিগজাতকং

১২. নিগ্রোধমেৰ সেৰেয্য, ন সাখমুপসংৰসে;

নিগ্রোধস্মিং মতং সেয্যো, যঞ্চে সাখস্মি [সাখস্মিং (সী. পী.)] জীৰিতন্তি.

নিগ্রোধমিগজাতকং দুতিযং.

১৩. কণ্ডিজাতকং

১৩. ধিরত্থু কণ্ডিনং সল্লং, পুরিসং গাল়্হৰেধিনং;

ধিরত্থু তং জনপদং, যত্থিত্থী পরিণাযিকা;

তে চাপি ধিক্কিতা [ধিক্কতা (?)] সত্তা, যে ইত্থীনং ৰসংগতাতি.

কণ্ডিজাতকং ততিযং.

১৪. ৰাতমিগজাতকং

১৪. ন কিরত্থি রসেহি পাপিযো, আৰাসেহি ৰ [ৰা (সব্বত্থ)] সন্থৰেহি ৰা;

ৰাতমিগং গহননিস্সিতং [গেহনিস্সিতং (সী. পী.)], ৰসমানেসি রসেহি সঞ্জযোতি.

ৰাতমিগজাতকং চতুত্থং.

১৫. খরাদিযজাতকং

১৫. অট্ঠক্খুরং খরাদিযে, মিগং ৰঙ্কাতিৰঙ্কিনং;

সত্তহি কালাতিক্কন্তং [সত্তহি কলাহ’তিক্কন্তং (সী.), সত্তকালেহ’তিক্কন্তং (স্যা.), সত্তহি কালাহ’তিক্কন্তং (পী.)], ন নং ওৰদিতুস্সহেতি.

খরাদিযজাতকং পঞ্চমং.

১৬. তিপল্লত্থমিগজাতকং

১৬. মিগং তিপল্লত্থ [তিপল্লত্ত (ক.)] মনেকমাযং, অট্ঠক্খুরং অড্ঢরত্তাপপাযিং [অড্ঢরত্তাৰপাযিং (সী. পী.)];

একেন সোতেন ছমাস্সসন্তো, ছহি কলাহিতিভোতি [কলাহতিভোতি (সী. স্যা. পী.)] ভাগিনেয্যোতি.

তিপল্লত্থমিগজাতকং ছট্ঠং.

১৭. মালুতজাতকং

১৭. কাল়ে ৰা যদি ৰা জুণ্হে, যদা ৰাযতি মালুতো;

ৰাতজানি হি সীতানি, উভোত্থমপরাজিতাতি.

মালুতজাতকং সত্তমং.

১৮. মতকভত্তজাতকং

১৮. এৰং চে সত্তা জানেয্যুং, দুক্খাযং জাতিসম্ভৰো;

ন পাণো পাণিনং হঞ্ঞে, পাণঘাতী হি সোচতীতি.

মতকভত্তজাতকং অট্ঠমং.

১৯. আযাচিতভত্তজাতকং

১৯. সচে মুচ্চে [মুঞ্চে (সী. স্যা. পী.)] পেচ্চ মুচ্চে [মুঞ্চে (সী. স্যা. পী.)], মুচ্চমানো হি বজ্ঝতি;

ন হেৰং ধীরা মুচ্চন্তি, মুত্তি বালস্স বন্ধনন্তি.

আযাচিতভত্তজাতকং নৰমং.

২০. নল়পানজাতকং

২০. দিস্ৰা পদমনুত্তিণ্ণং, দিস্ৰানোতরিতং পদং;

নল়েন ৰারিং পিস্সাম [পিৰিস্সাম (সী. স্যা. পী.)], নেৰ [ন চ (ক.)] মং ত্ৰং ৰধিস্সসীতি.

নল়পানজাতকং দসমং.

সীলৰগ্গো দুতিযো.

তস্সুদ্দানং –

অথ লক্খণ সাখ ধিরত্থু পুন, ন কিরত্থি রসেহি খরাদিযা;

অতিভোতি ৰর [রস (সব্বত্থ)] মালুত পাণ, মুচ্চেন নল়অৰ্হযনেন ভৰন্তি দসাতি.

৩. কুরুঙ্গৰগ্গো

২১. কুরুঙ্গমিগজাতকং

২১. ঞাতমেতং কুরুঙ্গস্স, যং ত্ৰং সেপণ্ণি সিয্যসি [সেয্যসি (সী. স্যা. পী.)];

অঞ্ঞং সেপণ্ণি গচ্ছামি, ন মে তে রুচ্চতে ফলন্তি.

কুরুঙ্গমিগজাতকং পঠমং.

২২. কুক্কুরজাতকং

২২. যে কুক্কুরা রাজকুলম্হি ৰদ্ধা, কোলেয্যকা ৰণ্ণবলূপপন্না;

তেমে ন ৰজ্ঝা মযমস্ম ৰজ্ঝা, নাযং সঘচ্চা দুব্বলঘাতিকাযন্তি.

কুক্কুরজাতকং দুতিযং.

২৩. গোজানীযজাতকং

২৩. অপি পস্সেন সেমানো, সল্লেভি সল্ললীকতো;

সেয্যোৰ ৰল়ৰা গোজো [ভোজ্জো (সী.), ভোজ্ঝো (স্যা. পী.)], যুঞ্জ মঞ্ঞেৰ সারথীতি.

গোজানীয [ভোজাজানীয (সী. স্যা. পী.)] জাতকং ততিযং.

২৪. আজঞ্ঞজাতকং

২৪. যদা যদা যত্থ যদা, যত্থ যত্থ যদা যদা;

আজঞ্ঞো কুরুতে ৰেগং, হাযন্তি তত্থ ৰাল়ৰাতি.

আজঞ্ঞজাতকং চতুত্থং.

২৫. তিত্থজাতকং

২৫. অঞ্ঞমঞ্ঞেহি তিত্থেহি, অস্সং পাযেহি সারথি;

অচ্চাসনস্স পুরিসো, পাযাসস্সপি তপ্পতীতি.

তিত্থজাতকং পঞ্চমং.

২৬. মহিল়ামুখজাতকং

২৬. পুরাণচোরান ৰচো নিসম্ম, মহিল়ামুখো পোথযমন্ৰচারী;

সুসঞ্ঞতানঞ্হি ৰচো নিসম্ম, গজুত্তমো সব্বগুণেসু অট্ঠাতি.

মহিল়ামুখজাতকং ছট্ঠং.

২৭. অভিণ্হজাতকং

২৭. নালং কবল়ং পদাতৰে, ন চ পিণ্ডং ন কুসে ন ঘংসিতুং;

মঞ্ঞামি অভিণ্হদস্সনা, নাগো স্নেহমকাসি [সিনেহমকাসি (সী. স্যা. পী.)] কুক্কুরেতি.

অভিণ্হজাতকং সত্তমং.

২৮. নন্দিৰিসালজাতকং

২৮. মনুঞ্ঞমেৰ ভাসেয্য, নামনুঞ্ঞং কুদাচনং;

মনুঞ্ঞং ভাসমানস্স, গরুং ভারং উদদ্ধরি;

ধনঞ্চ নং অলাভেসি, তেন চত্তমনো অহূতি.

নন্দিৰিসালজাতকং অট্ঠমং.

২৯. কণ্হজাতকং

২৯. যতো যতো গরু ধুরং, যতো গম্ভীরৰত্তনী;

তদাস্সু কণ্হং যুঞ্জন্তি, স্ৰাস্সু তং ৰহতে ধুরন্তি.

কণ্হজাতকং নৰমং.

৩০. মুনিকজাতকং

৩০. মা মুনিকস্স পিহযি, আতুরন্নানি ভুঞ্জতি;

অপ্পোস্সুক্কো ভুসং খাদ, এতং দীঘাযুলক্খণন্তি.

মুনিকজাতকং দসমং.

কুরুঙ্গৰগ্গো ততিযো.

তস্সুদ্দানং –

কুরুঙ্গস্স কুক্কুরগোজৰরো, পুন ৰাল়ৰস্সসিরিৰ্হযনো [সিরিৰযনো (সব্বত্থ)];

মহিল়ামুখনামনুঞ্ঞৰরো, ৰহতে ধুর মুনিকেন দসাতি.

৪. কুলাৰকৰগ্গো

৩১. কুলাৰকজাতকং

৩১. কুলাৰকা মাতলি সিম্বলিস্মিং, ঈসামুখেন পরিৰজ্জযস্সু;

কামং চজাম অসুরেসু পাণং, মা মে দিজা ৰিক্কুলৰা [মাযিমে দিজা ৰিকুলাৰা (সী. স্যা. পী.)] অহেসুন্তি.

কুলাৰকজাতকং পঠমং.

৩২. নচ্চজাতকং

৩২. রুদং মনুঞ্ঞং রুচিরা চ পিট্ঠি, ৰেল়ুরিযৰণ্ণূপনিভা [ৰণ্ণূপটিভা (স্যা.), ৰণ্ণসন্নিভা (ক.)] চ গীৰা;