৪১৫. কুম্মাসপিণ্ডিজাতকং (৭-২-১০)

১৪২. ন কিরত্থি অনোমদস্সিসু, পারিচরিযা বুদ্ধেসু অপ্পিকা [অপ্পকা (ক.)];

সুক্খায অলোণিকায চ, পস্সফলং কুম্মাসপিণ্ডিযা.

১৪৩. হত্থিগৰস্সা চিমে বহূ [হত্থিগৰাস্সা চ মে বহূ (সী.), হত্থী গৰাস্সা চিমে বহূ (স্যা.), হত্থী গৰাস্সা চ মে বহূ (পী.)], ধনধঞ্ঞং পথৰী চ কেৰলা;

নারিযো চিমা অচ্ছরূপমা, পস্সফলং কুম্মাসপিণ্ডিযা.

১৪৪. অভিক্খণং রাজকুঞ্জর, গাথা ভাসসি কোসলাধিপ;

পুচ্ছামি তং রট্ঠৰড্ঢন, বাল়্হং পীতিমনো পভাসসি.

১৪৫. ইমস্মিঞ্ঞেৰ নগরে, কুলে অঞ্ঞতরে অহুং;

পরকম্মকরো আসিং, ভতকো সীলসংৰুতো.

১৪৬. কম্মায নিক্খমন্তোহং, চতুরো সমণেদ্দসং;

আচারসীলসম্পন্নে, সীতিভূতে অনাসৰে.

১৪৭. তেসু চিত্তং পসাদেত্ৰা, নিসীদেত্ৰা [নিসাদেত্ৰা (?)] পণ্ণসন্থতে;

অদং বুদ্ধান কুম্মাসং, পসন্নো সেহি পাণিভি.

১৪৮. তস্স কম্মস্স কুসলস্স, ইদং মে এদিসং ফলং;

অনুভোমি ইদং রজ্জং, ফীতং ধরণিমুত্তমং.

১৪৯. দদং ভুঞ্জ মা চ পমাদো [দদ ভুঞ্জ চ মা চ পমাদো (সী. পী.)], চক্কং ৰত্তয কোসলাধিপ;

মা রাজ অধম্মিকো অহু, ধম্মং পালয কোসলাধিপ.

১৫০. সোহং তদেৰ পুনপ্পুনং, ৰটুমং আচরিস্সামি সোভনে;

অরিযাচরিতং সুকোসলে, অরহন্তো মে মনাপাৰ পস্সিতুং.

১৫১. দেৰী ৰিয অচ্ছরূপমা, মজ্ঝে নারিগণস্স সোভসি;

কিং কম্মমকাসি ভদ্দকং, কেনাসি ৰণ্ণৰতী সুকোসলে.

১৫২. অম্বট্ঠকুলস্স খত্তিয, দাস্যাহং পরপেসিযা অহুং;

সঞ্ঞতা চ [সঞ্ঞতা (সী. পী.)] ধম্মজীৰিনী, সীলৰতী চ অপাপদস্সনা.

১৫৩. উদ্ধটভত্তং অহং তদা, চরমানস্স অদাসি ভিক্খুনো;

ৰিত্তা সুমনা সযং অহং, তস্স কম্মস্স ফলং মমেদিসন্তি.

কুম্মাসপিণ্ডিজাতকং দসমং.