২. গন্ধারৰগ্গো

৪০৬. গন্ধারজাতকং (৭-২-১)

৭৬. হিত্ৰা গামসহস্সানি, পরিপুণ্ণানি সোল়স;

কোট্ঠাগারানি ফীতানি, সন্নিধিং দানি কুব্বসি.

৭৭. হিত্ৰা গন্ধারৰিসযং, পহূতধনধারিযং [ধানিযং (সী. পী.), ধঞ্ঞন্তি অত্থো];

পসাসনতো [পসাসনিতো (সী. স্যা.), পসাসনাতো (পী.)] নিক্খন্তো, ইধ দানি পসাসসি.

৭৮. ধম্মং ভণামি ৰেদেহ, অধম্মো মে ন রুচ্চতি;

ধম্মং মে ভণমানস্স, ন পাপমুপলিম্পতি.

৭৯. যেন কেনচি ৰণ্ণেন, পরো লভতি রুপ্পনং;

মহত্থিযম্পি চে ৰাচং, ন তং ভাসেয্য পণ্ডিতো.

৮০. কামং রুপ্পতু ৰা মা ৰা, ভুসংৰ ৰিকিরীযতু;

ধম্মং মে ভণমানস্স, ন পাপমুপলিম্পতি.

৮১. নো চে অস্স সকা বুদ্ধি, ৰিনযো ৰা সুসিক্খিতো;

ৰনে অন্ধমহিংসোৰ [অন্ধমহিসোৰ (সী. পী.)] চরেয্য বহুকো জনো.

৮২. যস্মা চ পনিধেকচ্চে, আচেরম্হি [আচারম্হি (সী. পী.)] সুসিক্খিতা;

তস্মা ৰিনীতৰিনযা, চরন্তি সুসমাহিতাতি.

গন্ধারজাতকং পঠমং.

৪০৭. মহাকপিজাতকং (৭-২-২)

৮৩. অত্তানং সঙ্কমং কত্ৰা, যো সোত্থিং সমতারযি;

কিং ত্ৰং তেসং কিমে [কিমো (সী. পী.), কিং মে (স্যা.)] তুয্হং, হোন্তি এতে [হেতে (স্যা.), সো তে (ক.)] মহাকপি.

৮৪. রাজাহং ইস্সরো তেসং, যূথস্স পরিহারকো;

তেসং সোকপরেতানং, ভীতানং তে অরিন্দম.

৮৫. উল্লঙ্ঘযিত্ৰা [স লঙ্ঘযিত্ৰা (পী.), সুলঙ্ঘযিত্ৰা (ক.)] অত্তানং, ৰিস্সট্ঠধনুনো সতং;

ততো অপরপাদেসু, দল়্হং বন্ধং লতাগুণং.

৮৬. ছিন্নব্ভমিৰ ৰাতেন, নুণ্ণো [নুন্নো (সী.)] রুক্খং উপাগমিং;

সোহং অপ্পভৰং তত্থ, সাখং হত্থেহি অগ্গহিং.

৮৭. তং মং ৰিযাযতং সন্তং, সাখায চ লতায চ;

সমনুক্কমন্তা পাদেহি, সোত্থিং সাখামিগা গতা.

৮৮. তং মং ন তপতে বন্ধো, মতো [ৰধো (সী. স্যা. পী.)] মে ন তপেস্সতি;

সুখমাহরিতং তেসং, যেসং রজ্জমকারযিং.

৮৯. এসা তে উপমা রাজ, তং সুণোহি অরিন্দম [অত্থসন্দস্সনী কতা (পী.)];

রঞ্ঞা রট্ঠস্স যোগ্গস্স, বলস্স নিগমস্স চ;

সব্বেসং সুখমেট্ঠব্বং, খত্তিযেন পজানতাতি.

মহাকপিজাতকং দুতিযং.

৪০৮. কুম্ভকারজাতকং (৭-২-৩)

৯০. অম্বাহমদ্দং ৰনমন্তরস্মিং, নীলোভাসং ফলিতং [ফলিনং (পী.)] সংৰিরূল়্হং;

তমদ্দসং ফলহেতু ৰিভগ্গং, তং দিস্ৰা ভিক্খাচরিযং চরামি.

৯১. সেলং সুমট্ঠং নরৰীরনিট্ঠিতং [নরৰিদ্দুনিট্ঠিতং (ক.)], নারী যুগং ধারযি অপ্পসদ্দং;

দুতিযঞ্চ আগম্ম অহোসি সদ্দো, তং দিস্ৰা ভিক্খাচরিযং চরামি.

৯২. দিজা দিজং কুণপমাহরন্তং, একং সমানং বহুকা সমেচ্চ;

আহারহেতূ পরিপাতযিংসু, তং দিস্ৰা ভিক্খাচরিযং চরামি.

৯৩. উসভাহমদ্দং যূথস্স মজ্ঝে, চলক্ককুং ৰণ্ণবলূপপন্নং;

তমদ্দসং কামহেতু ৰিতুন্নং, তং দিস্ৰা ভিক্খাচরিযং চরামি.

৯৪. করণ্ডকো [করণ্ডুনাম (সী. পী.)] কলিঙ্গানং, গন্ধারানঞ্চ নগ্গজি;

নিমিরাজা ৰিদেহানং, পঞ্চালানঞ্চ দুম্মুখো;

এতে রট্ঠানি হিত্ৰান, পব্বজিংসু অকিঞ্চনা.

৯৫. সব্বেপিমে দেৰসমা সমাগতা, অগ্গী যথা পজ্জলিতো তথেৰিমে;

অহম্পি একো চরিস্সামি ভগ্গৰি, হিত্ৰান কামানি যথোধিকানি.

৯৬. অযমেৰ কালো ন হি অঞ্ঞো অত্থি, অনুসাসিতা মে ন ভৰেয্য পচ্ছা;

অহম্পি একা চরিস্সামি ভগ্গৰ, সকুণীৰ মুত্তা পুরিসস্স হত্থা.

৯৭. আমং পক্কঞ্চ জানন্তি, অথো লোণং অলোণকং;

তমহং দিস্ৰান পব্বজিং, চরেৰ ত্ৰং চরামহন্তি.

কুম্ভকারজাতকং ততিযং.

৪০৯. দল়্হধম্মজাতকং (৭-২-৪)

৯৮. অহং চে দল়্হধম্মস্স [দল়্হধম্মায (পী.)], ৰহন্তি নাভিরাধযিং;

ধরন্তী উরসি সল্লং, যুদ্ধে ৰিক্কন্তচারিনী.

৯৯. নূন রাজা ন জানাতি [ন হ নূন রাজা জানাতি (সী. পী.)], মম ৰিক্কমপোরিসং;

সঙ্গামে সুকতন্তানি, দূতৰিপ্পহিতানি চ.

১০০. সা নূনাহং মরিস্সামি, অবন্ধু অপরাযিনী [অপরাযিণী (সী.), অপরাযণী (?)];

তদা হি [তথা হি (পী.)] কুম্ভকারস্স, দিন্না ছকণহারিকা.

১০১. যাৰতাসীসতী পোসো, তাৰদেৰ পৰীণতি;

অত্থাপাযে জহন্তি নং, ওট্ঠিব্যাধিংৰ খত্তিযো.

১০২. যো পুব্বে কতকল্যাণো, কতত্থো নাৰবুজ্ঝতি;

অত্থা তস্স পলুজ্জন্তি, যে হোন্তি অভিপত্থিতা.

১০৩. যো পুব্বে কতকল্যাণো, কতত্থো মনুবুজ্ঝতি;

অত্থা তস্স পৰড্ঢন্তি, যে হোন্তি অভিপত্থিতা.

১০৪. তং ৰো ৰদামি ভদ্দন্তে [ভদ্দং ৰো (সী. স্যা. পী.)], যাৰন্তেত্থ সমাগতা;

সব্বে কতঞ্ঞুনো হোথ, চিরং সগ্গম্হি ঠস্সথাতি.

দল়্হধম্মজাতকং চতুত্থং.

৪১০. সোমদত্তজাতকং (৭-২-৫)

১০৫. যো মং পুরে পচ্চুড্ডেতি [পচ্চুদেতি (সী. স্যা. পী.), পচ্চুট্ঠেতি (ক.)], অরঞ্ঞে দূরমাযতো;

সো ন দিস্সতি মাতঙ্গো, সোমদত্তো কুহিং গতো.

১০৬. অযং ৰা সো মতো সেতি, অল্লসিঙ্গংৰ ৰচ্ছিতো [অল্লপিঙ্কৰ ছিজ্জিতো (সী. পী.), অল্লপীতংৰ ৰিচ্ছিতো (স্যা.)];

ভুম্যা নিপতিতো সেতি, অমরা ৰত কুঞ্জরো.

১০৭. অনগারিযুপেতস্স, ৰিপ্পমুত্তস্স তে সতো;

সমণস্স ন তং সাধু, যং পেতমনুসোচসি.

১০৮. সংৰাসেন হৰে সক্ক, মনুস্সস্স মিগস্স ৰা;

হদযে জাযতে পেমং, তং ন সক্কা অসোচিতুং.

১০৯. মতং মরিস্সং রোদন্তি, যে রুদন্তি লপন্তি চ;

তস্মা ত্ৰং ইসি মা রোদি, রোদিতং মোঘমাহু সন্তো.

১১০. কন্দিতেন হৰে ব্রহ্মে, মতো পেতো সমুট্ঠহে;

সব্বে সঙ্গম্ম রোদাম, অঞ্ঞমঞ্ঞস্স ঞাতকে.

১১১. আদিত্তং ৰত মং সন্তং, ঘতসিত্তংৰ পাৰকং;

ৰারিনা ৰিয ওসিঞ্চং, সব্বং নিব্বাপযে দরং.

১১২. অব্বহী ৰত মে সল্লং, যমাসি হদযস্সিতং;

যো মে সোকপরেতস্স, পুত্তসোকং অপানুদি.

১১৩. সোহং অব্বূল়্হসল্লোস্মি, ৰীতসোকো অনাৰিলো;

ন সোচামি ন রোদামি, তৰ সুত্ৰান ৰাসৰাতি.

সোমদত্তজাতকং পঞ্চমং.

৪১১. সুসীমজাতকং (৭-২-৬)

১১৪. কাল়ানি কেসানি পুরে অহেসুং, জাতানি সীসম্হি যথাপদেসে;

তানজ্জ সেতানি সুসীম [সুসিম (ক.)] দিস্ৰা, ধম্মং চর ব্রহ্মচরিযস্স কালো.

১১৫. মমেৰ দেৰ পলিতং ন তুয্হং, মমেৰ সীসং মম উত্তমঙ্গং;

‘‘অত্থং করিস্স’’ন্তি মুসা অভাণিং [অভাসিং (ক.)], একাপরাধং খম রাজসেট্ঠ.

১১৬. দহরো তুৰং দস্সনিযোসি রাজ, পঠমুগ্গতো হোসি [হোহি (সী.), হোতি (ক.)] যথা কল়ীরো;

রজ্জঞ্চ কারেহি মমঞ্চ পস্স, মা কালিকং অনুধাৰী জনিন্দ.

১১৭. পস্সামি ৰোহং দহরিং কুমারিং, সামট্ঠপস্সং সুতনুং সুমজ্ঝং;

কাল়প্পৰাল়াৰ পৰেল্লমানা, পলোভযন্তীৰ [সা লোভযন্তীৰ (পী.)] নরেসু গচ্ছতি.

১১৮. তমেন পস্সামিপরেন নারিং, আসীতিকং নাৰুতিকং ৰ জচ্চা;

দণ্ডং গহেত্ৰান পৰেধমানং, গোপানসীভোগ্গসমং চরন্তিং.

১১৯. সোহং তমেৰানুৰিচিন্তযন্তো, একো সযামি [পস্সামি (ক.)] সযনস্স মজ্ঝে;

‘‘অহম্পি এৰং’’ ইতি পেক্খমানো, ন গহে রমে [ন গেহে রমে (সী.), গেহে ন রমে (স্যা. ক.)] ব্রহ্মচরিযস্স কালো.

১২০. রজ্জুৰালম্বনী চেসা, যা গেহে ৰসতো রতি;

এৰম্পি ছেত্ৰান ৰজন্তি ধীরা, অনপেক্খিনো কামসুখং পহাযাতি.

সুসীমজাতকং ছট্ঠং.

৪১২. কোটসিম্বলিজাতকং (৭-২-৭)

১২১. অহং দসসতংব্যামং, উরগমাদায আগতো;

তঞ্চ মঞ্চ মহাকাযং, ধারযং নপ্পৰেধসি [ন পৰেধযি (ক.)].

১২২. অথিমং খুদ্দকং পক্খিং, অপ্পমংসতরং মযা;

ধারযং ব্যথসি [ব্যাধসে (সী.), ব্যধসে (পী.), ব্যাধসি (ক.)] ভীতা [ভীতো (সী. স্যা. পী.)], কমত্থং কোটসিম্বলি [কোটিসিম্বলি (সী. পী.)].

১২৩. মংসভক্খো তুৰং রাজ, ফলভক্খো অযং দিজো;

অযং নিগ্রোধবীজানি, পিলক্খুদুম্বরানি চ;

অস্সত্থানি চ ভক্খিত্ৰা, খন্ধে মে ওহদিস্সতি.

১২৪. তে রুক্খা সংৰিরূহন্তি, মম পস্সে নিৰাতজা;

তে মং পরিযোনন্ধিস্সন্তি, অরুক্খং মং করিস্সরে.

১২৫. সন্তি অঞ্ঞেপি রুক্খা সে, মূলিনো খন্ধিনো দুমা;

ইমিনা সকুণজাতেন, বীজমাহরিতা হতা.

১২৬. অজ্ঝারূহাভিৰড্ঢন্তি [অজ্ঝারূল়্হাভিৰড্ঢন্তি (সী. পী.)], ব্রহন্তম্পি ৰনপ্পতিং;

তস্মা রাজ পৰেধামি, সম্পস্সংনাগতং ভযং.

১২৭. সঙ্কেয্য সঙ্কিতব্বানি, রক্খেয্যানাগতং ভযং;

অনাগতভযা ধীরো, উভো লোকে অৰেক্খতীতি.

কোটসিম্বলিজাতকং সত্তমং.

৪১৩. ধূমকারিজাতকং (৭-২-৮)

১২৮. রাজা অপুচ্ছি ৰিধুরং, ধম্মকামো যুধিট্ঠিলো;

অপি ব্রাহ্মণ জানাসি, কো একো বহু সোচতি.

১২৯. ব্রাহ্মণো অজযূথেন, পহূতেধো [বহূতেজো (পী. ক.), বহুতেন্দো (স্যা.)] ৰনে ৰসং;

ধূমং অকাসি ৰাসেট্ঠো, রত্তিন্দিৰমতন্দিতো.

১৩০. তস্স তং ধূমগন্ধেন, সরভা মকসড্ডিতা [মকসদ্দিতা (সী. স্যা.), মকসট্টিতা (পী. ক.)];

ৰস্সাৰাসং উপাগচ্ছুং, ধূমকারিস্স সন্তিকে.

১৩১. সরভেসু মনং কত্ৰা, অজা সো নাৰবুজ্ঝথ;

আগচ্ছন্তী ৰজন্তী ৰা [আগচ্ছন্তি ৰজন্তি ৰা (স্যা. পী.), আগচ্ছন্তিং ৰজন্তিং ৰা (ক.)], তস্স তা ৰিনসুং [ৰিনস্সুং (সী.)] অজা.

১৩২. সরভা সরদে কালে, পহীনমকসে ৰনে;

পাৰিসুং গিরিদুগ্গানি, নদীনং পভৰানি চ.

১৩৩. সরভে চ গতে দিস্ৰা, অজা চ ৰিভৰং গতা [অজে চ ৰিভৰং গতে (ক.)];

কিসো চ ৰিৰণ্ণো চাসি, পণ্ডুরোগী চ ব্রাহ্মণো.

১৩৪. এৰং যো সং নিরংকত্ৰা, আগন্তুং কুরুতে পিযং;

সো একো বহু সোচতি, ধূমকারীৰ ব্রাহ্মণোতি.

ধূমকারিজাতকং অট্ঠমং.

৪১৪. জাগরজাতকং (৭-২-৯)

১৩৫. কোধ জাগরতং সুত্তো, কোধ সুত্তেসু জাগরো;

কো মমেতং ৰিজানাতি, কো তং পটিভণাতি মে.

১৩৬. অহং জাগরতং সুত্তো, অহং সুত্তেসু জাগরো;

অহমেতং ৰিজানামি, অহং পটিভণামি তে.

১৩৭. কথং জাগরতং সুত্তো, কথং সুত্তেসু জাগরো;

কথং এতং ৰিজানাসি, কথং পটিভণাসি মে.

১৩৮. যে ধম্মং নপ্পজানন্তি, সংযমোতি দমোতি চ;

তেসু সুপ্পমানেসু, অহং জগ্গামি দেৰতে.

১৩৯. যেসং রাগো চ দোসো চ, অৰিজ্জা চ ৰিরাজিতা;

তেসু জাগরমানেসু, অহং সুত্তোস্মি দেৰতে.

১৪০. এৰং জাগরতং সুত্তো, এৰং সুত্তেসু জাগরো;