৭. সত্তকনিপাতো

১. কুক্কুৰগ্গো

৩৯৬. কুক্কুজাতকং (৭-১-১)

১. দিযড্ঢকুক্কূ উদযেন কণ্ণিকা, ৰিদত্থিযো অট্ঠ পরিক্খিপন্তি নং;

সা সিংসপা [সসিংসপা (সী. পী.), সা সীসপা (স্যা.), যা সিংসপা (ক. সী. নিয্য)] সারমযা অফেগ্গুকা, কুহিং ঠিতা উপ্পরিতো [উপরিতো (সী. স্যা. পী.)] ন ধংসতি.

২. যা তিংসতি সারমযা অনুজ্জুকা, পরিকিরিয [পকিরিযা (ক.)] গোপাণসিযো সমং ঠিতা [সমট্ঠিতা (সী. স্যা.)];

তাহি সুসঙ্গহিতা বলসা পীল়িতা [তা সঙ্গহিতা বলসা চ পীল়িতা (সী.), তাহি সুসঙ্গহিতা বলসা চ পীল়িতা (স্যা.), তাহি সঙ্গহীতা বলসা চ পীল়িতা (পী.)], সমং ঠিতা উপ্পরিতো ন ধংসতি.

৩. এৰম্পি মিত্তেহি দল়্হেহি পণ্ডিতো, অভেজ্জরূপেহি সুচীহি মন্তিভি;

সুসঙ্গহীতো সিরিযা ন ধংসতি, গোপাণসী ভারৰহাৰ কণ্ণিকা.

৪. খরত্তচং বেল্লং যথাপি সত্থৰা, অনামসন্তোপি করোতি তিত্তকং;

সমাহরং সাদুং করোতি পত্থিৰ, অসাদুং কযিরা তনুবন্ধমুদ্ধরং [তনুৰট্টমুদ্ধরং (সী. পী.)].

৫. এৰম্পি গামনিগমেসু পণ্ডিতো, অসাহসং রাজধনানি সঙ্ঘরং;

ধম্মানুৰত্তী পটিপজ্জমানো, স ফাতি কযিরা অৰিহেঠযং পরং.

৬. ওদাতমূলং সুচিৰারিসম্ভৰং, জাতং যথা পোক্খরণীসু অম্বুজং;

পদুমং যথা অগ্গিনিকাসিফালিমং, ন কদ্দমো ন রজো ন ৰারি লিম্পতি.

৭. এৰম্পি ৰোহারসুচিং অসাহসং, ৰিসুদ্ধকম্মন্তমপেতপাপকং;

ন লিম্পতি কম্মকিলেস তাদিসো, জাতং যথা পোক্খরণীসু অম্বুজন্তি.

কুক্কুজাতকং পঠমং.

৩৯৭. মনোজজাতকং (৭-১-২)

৮. যথা চাপো নিন্নমতি, জিযা চাপি নিকূজতি;

হঞ্ঞতে নূন মনোজো, মিগরাজা সখা মম.

৯. হন্দ দানি ৰনন্তানি, পক্কমামি যথাসুখং;

নেতাদিসা সখা হোন্তি, লব্ভা মে জীৰতো সখা.

১০. ন পাপজনসংসেৰী, অচ্চন্তং সুখমেধতি;

মনোজং পস্স সেমানং, গিরিযস্সানুসাসনী [অরিযস্সানুসাসনী (সী. স্যা. পী.)].

১১. ন পাপসম্পৰঙ্কেন, মাতা পুত্তেন নন্দতি;

মনোজং পস্স সেমানং, অচ্ছন্নং [সচ্ছন্নং (ক.)] সম্হি লোহিতে.

১২. এৰমাপজ্জতে পোসো, পাপিযো চ নিগচ্ছতি;

যো ৰে হিতানং ৰচনং, ন করোতি অত্থদস্সিনং.

১৩. এৰঞ্চ সো হোতি ততো চ পাপিযো, যো উত্তমো অধমজনূপসেৰী;

পস্সুত্তমং অধমজনূপসেৰিতং [সেৰিং (স্যা.)], মিগাধিপং সরৰরৰেগনিদ্ধুতং.

১৪. নিহীযতি পুরিসো নিহীনসেৰী, ন চ হাযেথ কদাচি তুল্যসেৰী;

সেট্ঠমুপগমং [মুপনমং (সী. পী. অ. নি. ৩.২৬)] উদেতি খিপ্পং, তস্মাত্তনা উত্তরিতরং [তস্মা অত্তনো উত্তরিং (সী. পী.), তস্মা অত্তনো উত্তরং (স্যা.)] ভজেথাতি.

মনোজজাতকং দুতিযং.

৩৯৮. সুতনুজাতকং (৭-১-৩)

১৫. রাজা তে ভত্তং পাহেসি, সুচিং মংসূপসেচনং;

মঘদেৰস্মিং [মখাদেৰস্মিং (সী. পী.), মাঘদেৰস্মিং (ক.)] অধিৰত্থে, এহি নিক্খম্ম ভুঞ্জস্সু.

১৬. এহি মাণৰ ওরেন, ভিক্খমাদায সূপিতং;

ত্ৰঞ্চ মাণৰ ভিক্খা চ [ভক্খোসি (স্যা.), ভক্খাৰ (ক.)], উভো ভক্খা ভৰিস্সথ.

১৭. অপ্পকেন তুৰং যক্খ, থুল্লমত্থং জহিস্সসি;

ভিক্খং তে নাহরিস্সন্তি, জনা মরণসঞ্ঞিনো.

১৮. লদ্ধায যক্খা [লদ্ধাযং যক্খ (সী. স্যা. পী.)] তৰ নিচ্চভিক্খং, সুচিং পণীতং রসসা উপেতং;

ভিক্খঞ্চ তে আহরিযো নরো ইধ, সুদুল্লভো হেহিতি ভক্খিতে [খাদিতে (সী. স্যা. পী.)] মযি.

১৯. মমেৰ [মমেস (সী. পী.)] সুতনো অত্থো, যথা ভাসসি মাণৰ;

মযা ত্ৰং সমনুঞ্ঞাতো, সোত্থিং পস্সাহি মাতরং.

২০. খগ্গং ছত্তঞ্চ পাতিঞ্চ, গচ্ছমাদায [গচ্ছেৰাদায (সী. স্যা. পী.)] মাণৰ;

সোত্থিং পস্সতু তে মাতা, ত্ৰঞ্চ পস্সাহি মাতরং.

২১. এৰং যক্খ সুখী হোহি, সহ সব্বেহি ঞাতিভি;

ধনঞ্চ মে অধিগতং, রঞ্ঞো চ ৰচনং কতন্তি.

সুতনুজাতকং ততিযং.

৩৯৯. মাতুপোসকগিজ্ঝজাতকং (৭-১-৪)

২২. তে কথং নু করিস্সন্তি, ৰুদ্ধা গিরিদরীসযা;

অহং বদ্ধোস্মি পাসেন, নিলীযস্স ৰসং গতো.

২৩. কিং গিজ্ঝ পরিদেৰসি, কা নু তে পরিদেৰনা;

ন মে সুতো ৰা দিট্ঠো ৰা, ভাসন্তো মানুসিং দিজো.

২৪. ভরামি মাতাপিতরো, ৰুদ্ধে গিরিদরীসযে;

তে কথং নু করিস্সন্তি, অহং ৰসং গতো তৰ.

২৫. যং নু গিজ্ঝো যোজনসতং, কুণপানি অৰেক্খতি;

কস্মা জালঞ্চ পাসঞ্চ, আসজ্জাপি ন বুজ্ঝসি.

২৬. যদা পরাভৰো হোতি, পোসো জীৰিতসঙ্খযে;

অথ জালঞ্চ পাসঞ্চ, আসজ্জাপি ন বুজ্ঝতি.

২৭. ভরস্সু মাতাপিতরো, ৰুদ্ধে গিরিদরীসযে;

মযা ত্ৰং সমনুঞ্ঞাতো, সোত্থিং পস্সাহি ঞাতকে.

২৮. এৰং লুদ্দক নন্দস্সু, সহ সব্বেহি ঞাতিভি;

ভরিস্সং মাতাপিতরো, ৰুদ্ধে গিরিদরীসযেতি.

মাতুপোসকগিজ্ঝজাতকং চতুত্থং.

৪০০. দব্ভপুপ্ফজাতকং (৭-১-৫)

২৯. অনুতীরচারী ভদ্দন্তে, সহাযমনুধাৰ মং;

মহা মে গহিতো [রোহিতো (ক.)] মচ্ছো, সো মং হরতি ৰেগসা.

৩০. গম্ভীরচারী ভদ্দন্তে, দল়্হং গণ্হাহি থামসা;

অহং তং উদ্ধরিস্সামি, সুপণ্ণো উরগামিৰ [উরগম্মিৰ (সী. স্যা. পী.)].

৩১. ৰিৰাদো নো সমুপ্পন্নো, দব্ভপুপ্ফ সুণোহি মে;

সমেহি মেধগং [মেধকং (পী.)] সম্ম, ৰিৰাদো ৰূপসম্মতং.

৩২. ধম্মট্ঠোহং পুরে আসিং, বহূ অড্ডা মে তীরিতা [বহুঅট্টং মে তীরিতং (সী.), বহুঅট্টংৰ তীরিতং (স্যা.), বহু অত্থং মে তীরিতং (পী.)];

সমেমি মেধগং সম্ম, ৰিৰাদো ৰূপসম্মতং.

৩৩. অনুতীরচারি নঙ্গুট্ঠং, সীসং গম্ভীরচারিনো;

অচ্চাযং [অথাযং (সী. পী.)] মজ্ঝিমো খণ্ডো, ধম্মট্ঠস্স ভৰিস্সতি.

৩৪. চিরম্পি ভক্খো অভৰিস্স, সচে ন ৰিৰদেমসে;

অসীসকং অনঙ্গুট্ঠং, সিঙ্গালো হরতি রোহিতং.

৩৫. যথাপি রাজা নন্দেয্য, রজ্জং লদ্ধান খত্তিযো;

এৰাহমজ্জ নন্দামি, দিস্ৰা পুণ্ণমুখং পতিং.

৩৬. কথং নু থলজো সন্তো, উদকে মচ্ছং পরামসি;

পুট্ঠো মে সম্ম অক্খাহি, কথং অধিগতং তযা.

৩৭. ৰিৰাদেন কিসা হোন্তি, ৰিৰাদেন ধনক্খযা;

জীনা উদ্দা ৰিৰাদেন, ভুঞ্জ মাযাৰি রোহিতং.

৩৮. এৰমেৰ মনুস্সেসু, ৰিৰাদো যত্থ জাযতি;

ধম্মট্ঠং পটিধাৰন্তি, সো হি নেসং ৰিনাযকো;

ধনাপি তত্থ জীযন্তি, রাজকোসো পৰড্ঢতীতি [চ ৰড্ঢতি (পী.)].

দব্ভপুপ্ফজাতকং পঞ্চমং.

৪০১. পণ্ণকজাতকং (৭-১-৬)

৩৯. পণ্ণকং [দসণ্ণকং (সী. স্যা. পী.)] তিখিণধারং, অসিং সম্পন্নপাযিনং;

পরিসাযং পুরিসো গিলতি, কিং দুক্করতরং ততো;

যদঞ্ঞং দুক্করং ঠানং, তং মে অক্খাহি পুচ্ছিতো.

৪০. গিলেয্য পুরিসো লোভা, অসিং সম্পন্নপাযিনং;

যো চ ৰজ্জা দদামীতি, তং দুক্করতরং ততো;

সব্বঞ্ঞং সুকরং ঠানং, এৰং জানাহি মদ্দৰ [মাগধ (সী. স্যা. পী.)].

৪১. ব্যাকাসি আযুরো পঞ্হং, অত্থং [অত্থ (পী. সী. নিয্য)] ধম্মস্স কোৰিদো;

পুক্কুসং দানি পুচ্ছামি, কিং দুক্করতরং ততো;

যদঞ্ঞং দুক্করং ঠানং, তং মে অক্খাহি পুচ্ছিতো.

৪২. ন ৰাচমুপজীৰন্তি, অফলং গিরমুদীরিতং;

যো চ দত্ৰা অৰাকযিরা, তং দুক্করতরং ততো;

সব্বঞ্ঞং সুকরং ঠানং, এৰং জানাহি মদ্দৰ.

৪৩. ব্যাকাসি পুক্কুসো পঞ্হং, অত্থং ধম্মস্স কোৰিদো;

সেনকং দানি পুচ্ছামি, কিং দুক্করতরং ততো;

যদঞ্ঞং দুক্করং ঠানং, তং মে অক্খাহি পুচ্ছিতো.

৪৪. দদেয্য পুরিসো দানং, অপ্পং ৰা যদি ৰা বহুং;

যো চ দত্ৰা নানুতপ্পে [তপে (সী. পী.)], তং দুক্করতরং ততো;

সব্বঞ্ঞং সুকরং ঠানং, এৰং জানাহি মদ্দৰ.

৪৫. ব্যাকাসি আযুরো পঞ্হং, অথো পুক্কুসপোরিসো;

সব্বে পঞ্হে অতিভোতি, যথা ভাসতি সেনকোতি.

পণ্ণক [দসণ্ণক (সী. স্যা. পী.)] জাতকং ছট্ঠং.

৪০২. সত্তুভস্তজাতকং (৭-১-৭)

৪৬. ৰিব্ভন্তচিত্তো কুপিতিন্দ্রিযোসি, নেত্তেহি তে ৰারিগণা সৰন্তি;

কিং তে নট্ঠং কিং পন পত্থযানো, ইধাগমা ব্রহ্মে তদিঙ্ঘ [ব্রাহ্মণ ইঙ্ঘ (সী. স্যা.)] ব্রূহি.

৪৭. মিয্যেথ ভরিযা ৰজতো মমজ্জ, অগচ্ছতো মরণমাহ যক্খো;

এতেন দুক্খেন পৰেধিতোস্মি, অক্খাহি মে সেনক এতমত্থং.

৪৮. বহূনি ঠানানি ৰিচিন্তযিত্ৰা, যমেত্থ ৰক্খামি তদেৰ সচ্চং;

মঞ্ঞামি তে ব্রাহ্মণ সত্তুভস্তং, অজানতো কণ্হসপ্পো পৰিট্ঠো.

৪৯. আদায দণ্ডং পরিসুম্ভ ভস্তং, পস্সেল়মূগং উরগং দুজিৰ্হং [দিজিৰ্হং (সী. পী.)];

ছিন্দজ্জ কঙ্খং ৰিচিকিচ্ছিতানি, ভুজঙ্গমং পস্স পমুঞ্চ ভস্তং.

৫০. সংৰিগ্গরূপো পরিসায মজ্ঝে, সো ব্রাহ্মণো সত্তুভস্তং পমুঞ্চি;

অথ নিক্খমি উরগো উগ্গতেজো, আসীৰিসো সপ্পো ফণং করিত্ৰা.

৫১. সুলদ্ধলাভা জনকস্স রঞ্ঞো, যো পস্সতী সেনকং সাধুপঞ্ঞং;

ৰিৰট্টছদ্দো [ৰিৰত্তচ্ছদ্দো (সী.), ৰিৰট্টচ্ছদো (স্যা.), ৰিৰট্টচ্ছদ্দা (পী.)] নুসি সব্বদস্সী, ঞাণং নু তে ব্রাহ্মণ ভিংসরূপং.

৫২. ইমানি মে সত্তসতানি অত্থি, গণ্হাহি সব্বানি দদামি তুয্হং;

তযা হি মে জীৰিতমজ্জ লদ্ধং, অথোপি ভরিযায মকাসি সোত্থিং.

৫৩. ন পণ্ডিতা ৰেতনমাদিযন্তি, চিত্রাহি গাথাহি সুভাসিতাহি;

ইতোপি তে ব্রহ্মে দদন্তু ৰিত্তং, আদায ত্ৰং গচ্ছ সকং নিকেতন্তি.

সত্তুভস্তজাতকং [সেনকজাতকং (স্যা.)] সত্তমং.

৪০৩. অট্ঠিসেনকজাতকং (৭-১-৮)

৫৪. যেমে অহং ন জানামি, অট্ঠিসেন ৰনিব্বকে;

তে মং সঙ্গম্ম যাচন্তি, কস্মা মং ত্ৰং ন যাচসি.

৫৫. যাচকো অপ্পিযো হোতি, যাচং অদদমপ্পিযো;

তস্মাহং তং ন যাচামি, মা মে ৰিদেস্সনা [ৰিদ্দেসনা (সী. পী.)] অহু.

৫৬. যো ৰে যাচনজীৰানো, কালে যাচং ন যাচতি;

পরঞ্চ পুঞ্ঞা [পুঞ্ঞং (স্যা. ক.)] ধংসেতি, অত্তনাপি ন জীৰতি.

৫৭. যো চ [যো ৰে (ক.)] যাচনজীৰানো, কালে যাচঞ্হি যাচতি [যাচংপি যাচতি (স্যা.), যাচানি যাচতি (পী.), যাচতি যাচনং (সী. নিয্য), যাচনং যাচতি (ক.)];

পরঞ্চ পুঞ্ঞং লব্ভেতি, অত্তনাপি চ জীৰতি.

৫৮. ন ৰে দেস্সন্তি [ন ৰে দুস্সন্তি (স্যা.), ন ৰে দিস্সন্তি (পী.), ন ৰিদেস্সন্তি (ক. অট্ঠ.)] সপ্পঞ্ঞা, দিস্ৰা যাচকমাগতে;

ব্রহ্মচারি পিযো মেসি, ৰদ ত্ৰং [ৰর তং (সী.), ৰর ত্ৰং (পী.)] ভঞ্ঞমিচ্ছসি [যঞ্ঞমিচ্ছসি (?)].

৫৯. ন ৰে যাচন্তি সপ্পঞ্ঞা, ধীরো চ ৰেদিতুমরহতি;

উদ্দিস্স অরিযা তিট্ঠন্তি, এসা অরিযান যাচনা.

৬০. দদামি তে ব্রাহ্মণ রোহিণীনং, গৰং সহস্সং সহ পুঙ্গৰেন;

অরিযো হি অরিযস্স কথং ন দজ্জা, সুত্ৰান গাথা তৰ ধম্মযুত্তাতি.

অট্ঠিসেনকজাতকং অট্ঠমং.

৪০৪. কপিজাতকং (৭-১-৯)

৬১. যত্থ ৰেরী নিৰসতি, ন ৰসে তত্থ পণ্ডিতো;

একরত্তং দিরত্তং ৰা, দুক্খং ৰসতি ৰেরিসু.

৬২. দিসো ৰে লহুচিত্তস্স, পোসস্সানুৰিধীযতো;

একস্স কপিনো হেতু, যূথস্স অনযো কতো.