৪১১. সুসীমজাতকং (৭-২-৬)

১১৪. কাল়ানি কেসানি পুরে অহেসুং, জাতানি সীসম্হি যথাপদেসে;

তানজ্জ সেতানি সুসীম [সুসিম (ক.)] দিস্ৰা, ধম্মং চর ব্রহ্মচরিযস্স কালো.

১১৫. মমেৰ দেৰ পলিতং ন তুয্হং, মমেৰ সীসং মম উত্তমঙ্গং;

‘‘অত্থং করিস্স’’ন্তি মুসা অভাণিং [অভাসিং (ক.)], একাপরাধং খম রাজসেট্ঠ.

১১৬. দহরো তুৰং দস্সনিযোসি রাজ, পঠমুগ্গতো হোসি [হোহি (সী.), হোতি (ক.)] যথা কল়ীরো;

রজ্জঞ্চ কারেহি মমঞ্চ পস্স, মা কালিকং অনুধাৰী জনিন্দ.

১১৭. পস্সামি ৰোহং দহরিং কুমারিং, সামট্ঠপস্সং সুতনুং সুমজ্ঝং;

কাল়প্পৰাল়াৰ পৰেল্লমানা, পলোভযন্তীৰ [সা লোভযন্তীৰ (পী.)] নরেসু গচ্ছতি.

১১৮. তমেন পস্সামিপরেন নারিং, আসীতিকং নাৰুতিকং ৰ জচ্চা;

দণ্ডং গহেত্ৰান পৰেধমানং, গোপানসীভোগ্গসমং চরন্তিং.

১১৯. সোহং তমেৰানুৰিচিন্তযন্তো, একো সযামি [পস্সামি (ক.)] সযনস্স মজ্ঝে;

‘‘অহম্পি এৰং’’ ইতি পেক্খমানো, ন গহে রমে [ন গেহে রমে (সী.), গেহে ন রমে (স্যা. ক.)] ব্রহ্মচরিযস্স কালো.

১২০. রজ্জুৰালম্বনী চেসা, যা গেহে ৰসতো রতি;

এৰম্পি ছেত্ৰান ৰজন্তি ধীরা, অনপেক্খিনো কামসুখং পহাযাতি.

সুসীমজাতকং ছট্ঠং.