৩৯৬. কুক্কুজাতকং (৭-১-১)

১. দিযড্ঢকুক্কূ উদযেন কণ্ণিকা, ৰিদত্থিযো অট্ঠ পরিক্খিপন্তি নং;

সা সিংসপা [সসিংসপা (সী. পী.), সা সীসপা (স্যা.), যা সিংসপা (ক. সী. নিয্য)] সারমযা অফেগ্গুকা, কুহিং ঠিতা উপ্পরিতো [উপরিতো (সী. স্যা. পী.)] ন ধংসতি.

২. যা তিংসতি সারমযা অনুজ্জুকা, পরিকিরিয [পকিরিযা (ক.)] গোপাণসিযো সমং ঠিতা [সমট্ঠিতা (সী. স্যা.)];

তাহি সুসঙ্গহিতা বলসা পীল়িতা [তা সঙ্গহিতা বলসা চ পীল়িতা (সী.), তাহি সুসঙ্গহিতা বলসা চ পীল়িতা (স্যা.), তাহি সঙ্গহীতা বলসা চ পীল়িতা (পী.)], সমং ঠিতা উপ্পরিতো ন ধংসতি.

৩. এৰম্পি মিত্তেহি দল়্হেহি পণ্ডিতো, অভেজ্জরূপেহি সুচীহি মন্তিভি;

সুসঙ্গহীতো সিরিযা ন ধংসতি, গোপাণসী ভারৰহাৰ কণ্ণিকা.

৪. খরত্তচং বেল্লং যথাপি সত্থৰা, অনামসন্তোপি করোতি তিত্তকং;

সমাহরং সাদুং করোতি পত্থিৰ, অসাদুং কযিরা তনুবন্ধমুদ্ধরং [তনুৰট্টমুদ্ধরং (সী. পী.)].

৫. এৰম্পি গামনিগমেসু পণ্ডিতো, অসাহসং রাজধনানি সঙ্ঘরং;

ধম্মানুৰত্তী পটিপজ্জমানো, স ফাতি কযিরা অৰিহেঠযং পরং.

৬. ওদাতমূলং সুচিৰারিসম্ভৰং, জাতং যথা পোক্খরণীসু অম্বুজং;

পদুমং যথা অগ্গিনিকাসিফালিমং, ন কদ্দমো ন রজো ন ৰারি লিম্পতি.

৭. এৰম্পি ৰোহারসুচিং অসাহসং, ৰিসুদ্ধকম্মন্তমপেতপাপকং;

ন লিম্পতি কম্মকিলেস তাদিসো, জাতং যথা পোক্খরণীসু অম্বুজন্তি.

কুক্কুজাতকং পঠমং.