৩৯৭. মনোজজাতকং (৭-১-২)

৮. যথা চাপো নিন্নমতি, জিযা চাপি নিকূজতি;

হঞ্ঞতে নূন মনোজো, মিগরাজা সখা মম.

৯. হন্দ দানি ৰনন্তানি, পক্কমামি যথাসুখং;

নেতাদিসা সখা হোন্তি, লব্ভা মে জীৰতো সখা.

১০. ন পাপজনসংসেৰী, অচ্চন্তং সুখমেধতি;

মনোজং পস্স সেমানং, গিরিযস্সানুসাসনী [অরিযস্সানুসাসনী (সী. স্যা. পী.)].

১১. ন পাপসম্পৰঙ্কেন, মাতা পুত্তেন নন্দতি;

মনোজং পস্স সেমানং, অচ্ছন্নং [সচ্ছন্নং (ক.)] সম্হি লোহিতে.

১২. এৰমাপজ্জতে পোসো, পাপিযো চ নিগচ্ছতি;

যো ৰে হিতানং ৰচনং, ন করোতি অত্থদস্সিনং.

১৩. এৰঞ্চ সো হোতি ততো চ পাপিযো, যো উত্তমো অধমজনূপসেৰী;

পস্সুত্তমং অধমজনূপসেৰিতং [সেৰিং (স্যা.)], মিগাধিপং সরৰরৰেগনিদ্ধুতং.

১৪. নিহীযতি পুরিসো নিহীনসেৰী, ন চ হাযেথ কদাচি তুল্যসেৰী;

সেট্ঠমুপগমং [মুপনমং (সী. পী. অ. নি. ৩.২৬)] উদেতি খিপ্পং, তস্মাত্তনা উত্তরিতরং [তস্মা অত্তনো উত্তরিং (সী. পী.), তস্মা অত্তনো উত্তরং (স্যা.)] ভজেথাতি.

মনোজজাতকং দুতিযং.