৩৯৫. পারাৰতজাতকং (৬-২-১০)

১৩৪. চিরস্সং ৰত পস্সামি, সহাযং মণিধারিনং;

সুকতা [সুকতায (সী. পী.)] মস্সুকুত্তিযা, সোভতে ৰত মে সখা.

১৩৫. পরূল়্হকচ্ছনখলোমো, অহং কম্মেসু ব্যাৰটো;

চিরস্সং ন্হাপিতং লদ্ধা, লোমং তং অজ্জং হারযিং [অপহারযিং (সী. পী.)].

১৩৬. যং নু লোমং অহারেসি, দুল্লভং লদ্ধ কপ্পকং;

অথ কিঞ্চরহি তে সম্ম, কণ্ঠে কিণিকিণাযতি [ইদং কণ্ঠে কিণাযতি (ক.), কণ্ঠে কিংনিকিলাযতি (স্যা.)].

১৩৭. মনুস্সসুখুমালানং, মণি কণ্ঠেসু লম্বতি;

তেসাহং অনুসিক্খামি, মা ত্ৰং মঞ্ঞি দৰা কতং.

১৩৮. সচেপিমং পিহযসি, মস্সুকুত্তিং সুকারিতং;

কারযিস্সামি তে সম্ম, মণিঞ্চাপি দদামি তে.

১৩৯. ত্ৰঞ্ঞেৰ মণিনা ছন্নো, সুকতায চ মস্সুযা;

আমন্ত খো তং গচ্ছামি, পিযং মে তৰ দস্সনন্তি.

পারাৰতজাতকং [কাকজাতকং (সী. পী.), মণিজাতকং (স্যা.)] দসমং.

খরপুত্তৰগ্গো [সেনকৰগ্গো (সী. পী.), খুরপুত্তৰগ্গো (স্যা.), সূচিৰগ্গো (ক.)] দুতিযো.

তস্সুদ্দানং –

অথ পস্স সসূচি চ তুণ্ডিলকো, মিগ ময্হকপঞ্চমপক্খিৰরো;

অথ পঞ্জলি ৰারিজ মেজ্ঝ পুন, অথ ৰট্ট কপোতৰরেন দসাতি.

অথ ৰগ্গুদ্দানং –

অথ ৰগ্গং পকিত্তিস্সং, ছনিপাতং ৰরুত্তমে;

অৰারিযা চ খরো চ [সেনক (সী.), সূচি চ (স্যা. ক.)], দ্ৰে চ ৰুত্তা সুব্যঞ্জনাতি.

ছক্কনিপাতং নিট্ঠিতং.