২. খরপুত্তৰগ্গো

৩৮৬. খরপুত্তজাতকং (৬-২-১)

৭৬. সচ্চং কিরেৰমাহংসু, ৰস্তং [ভস্তং (সী. পী.), কলকং (স্যা.), গরং (ক.)] বালোতি পণ্ডিতা;

পস্স বালো রহোকম্মং, আৰিকুব্বং ন বুজ্ঝতি.

৭৭. ত্ৰং খোপি [ত্ৰং নু খো (সী. স্যা.), ত্ৰঞ্চ খো (পী.)] সম্ম বালোসি, খরপুত্ত ৰিজানহি;

রজ্জুযা হি [রজ্জুযাসি (পী.)] পরিক্খিত্তো, ৰঙ্কোট্ঠো ওহিতোমুখো.

৭৮. অপরম্পি সম্ম তে বাল্যং [অযম্পি সম্ম তে বালো (ক.)], যো মুত্তো ন পলাযসি;

সো চ বালতরো সম্ম, যং ত্ৰং ৰহসি সেনকং.

৭৯. যং নু সম্ম অহং বালো, অজরাজ ৰিজানহি;

অথ কেন সেনকো বালো, তং মে অক্খাহি পুচ্ছিতো.

৮০. উত্তমত্থং লভিত্ৰান, ভরিযায যো পদস্সতি [ভযিযা যো পদস্সতি (পী.), ভযিযা ন ভৰিস্সতি (ক.)];

তেন জহিস্সতত্তানং, সা চেৰস্স ন হেস্সতি.

৮১. ন ৰে পিযম্মেতি [ন পিযমেতি (ক.), ন পিযমেদন্তি (কত্থচি)] জনিন্দ তাদিসো, অত্তং নিরংকত্ৰা পিযানি সেৰতি [সেৰযে (?)];

অত্তাৰ সেয্যো পরমা চ সেয্যো, লব্ভা পিযা ওচিতত্থেন পচ্ছাতি.

খরপুত্তজাতকং পঠমং.

৩৮৭. সূচিজাতকং (৬-২-২)

৮২. অকক্কসং অফরুসং, খরধোতং সুপাসিযং;

সুখুমং তিখিণগ্গঞ্চ, কো সূচিং কেতুমিচ্ছতি.

৮৩. সুমজ্জঞ্চ সুপাসঞ্চ, অনুপুব্বং [অনুপুব্ব (সী. স্যা.)] সুৰট্টিতং;

ঘনঘাতিমং পটিথদ্ধং, কো সূচিং কেতুমিচ্ছতি.

৮৪. ইতো দানি পতাযন্তি, সূচিযো বল়িসানি চ;

কোযং কম্মারগামস্মিং, সূচিং ৰিক্কেতুমিচ্ছতি.

৮৫. ইতো সত্থানি গচ্ছন্তি, কম্মন্তা ৰিৰিধা পুথূ;

কোযং কম্মারগামস্মিং, সূচিং ৰিক্কেতুমিচ্ছতি [মরহতি (সী. স্যা. পী.)].

৮৬. সূচিং কম্মারগামস্মিং, ৰিক্কেতব্বা পজানতা;

আচরিযাৰ জানন্তি [আচরিযা সঞ্জানন্তি (ক.), আচরিযা পজানন্তি (স্যা.), আচরিযাৰ সঞ্জানন্তি (পী.)], কম্মং সুকতদুক্কটং [দুক্কতং (সী. পী.)].

৮৭. ইমং চে [ইমঞ্চ (সী. স্যা. পী.)] তে পিতা ভদ্দে, সূচিং জঞ্ঞা মযা কতং;

তযা চ মং নিমন্তেয্য, যঞ্চত্থঞ্ঞং ঘরে ধনন্তি.

সূচিজাতকং দুতিযং.

৩৮৮. তুণ্ডিলজাতকং (৬-২-৩)

৮৮. নৰছন্নকে [নৰছন্দকে (সী. পী.), নৰচ্ছদ্দকে (স্যা.)] দানি [দোণি (ক.), দানং, দানে (কত্থচি)] দিয্যতি, পুণ্ণাযং দোণি সুৰামিনী ঠিতা;

বহুকে জনে পাসপাণিকে, নো চ খো মে পটিভাতি ভুঞ্জিতুং.

৮৯. তসসি ভমসি লেণমিচ্ছসি, অত্তাণোসি কুহিং গমিস্সসি;

অপ্পোস্সুক্কো ভুঞ্জ তুণ্ডিল, মংসত্থায হি পোসিতাম্হসে [পোসিযামসে (সী. স্যা. পী.)].

৯০. ওগহ রহদং অকদ্দমং, সব্বং সেদমলং পৰাহয;

গণ্হাহি নৰং ৰিলেপনং, যস্স গন্ধো ন কদাচি ছিজ্জতি.

৯১. কতমো রহদো অকদ্দমো, কিংসু সেদমলন্তি ৰুচ্চতি;

কতমঞ্চ নৰং ৰিলেপনং, যস্স গন্ধো ন কদাচি ছিজ্জতি.

৯২. ধম্মো রহদো অকদ্দমো, পাপং সেদমলন্তি ৰুচ্চতি;

সীলঞ্চ নৰং ৰিলেপনং, তস্স গন্ধো ন কদাচি ছিজ্জতি.

৯৩. নন্দন্তি সরীরঘাতিনো, ন চ নন্দন্তি সরীরধারিনো;

পুণ্ণায চ পুণ্ণমাসিযা, রমমানাৰ জহন্তি জীৰিতন্তি.

তুণ্ডিলজাতকং ততিযং.

৩৮৯. সুৰণ্ণকক্কটজাতকং (৬-২-৪)

৯৪. সিঙ্গীমিগো আযতচক্খুনেত্তো, অট্ঠিত্তচো ৰারিসযো অলোমো;

তেনাভিভূতো কপণং রুদামি, হরে সখা কিস্স নু মং জহাসি.

৯৫. সো পস্সসন্তো মহতা ফণেন, ভুজঙ্গমো কক্কটমজ্ঝপত্তো;

সখা সখারং পরিতাযমানো, ভুজঙ্গমং কক্কটকো গহেসি.

৯৬. ন ৰাযসং নো পন কণ্হসপ্পং, ঘাসত্থিকো কক্কটকো অদেয্য;

পুচ্ছামি তং আযতচক্খুনেত্ত, অথ কিস্স হেতুম্হ উভো গহীতা.

৯৭. অযং পুরিসো মম অত্থকামো, যো মং গহেত্ৰান দকায নেতি;

তস্মিং মতে দুক্খমনপ্পকং মে, অহঞ্চ এসো চ উভো ন হোম.

৯৮. মমঞ্চ দিস্ৰান পৰদ্ধকাযং, সব্বো জনো হিংসিতুমেৰ মিচ্ছে;

সাদুঞ্চ থূলঞ্চ মুদুঞ্চ মংসং, কাকাপি মং দিস্ৰান [দিস্ৰ (সী. পী.)] ৰিহেঠযেয্যুং.

৯৯. সচেতস্স হেতুম্হ উভো গহীতা, উট্ঠাতু পোসো ৰিসমাৰমামি [ৰিসমাচমামি (সী. পী. ক.)];

মমঞ্চ কাকঞ্চ পমুঞ্চ খিপ্পং, পুরে ৰিসং গাল়্হমুপেতি মচ্চং.

১০০. সপ্পং পমোক্খামি ন তাৰ কাকং, পটিবন্ধকো [পটিবদ্ধকো (সী. পী.)] হোহিতি [হোতি হি (স্যা.)] তাৰ কাকো;

পুরিসঞ্চ দিস্ৰান সুখিং অরোগং, কাকং পমোক্খামি যথেৰ সপ্পং.

১০১. কাকো তদা দেৰদত্তো অহোসি, মারো পন কণ্হসপ্পো অহোসি;

আনন্দভদ্দো কক্কটকো অহোসি, অহং তদা ব্রাহ্মণো হোমি সত্থাতি [তত্থাতি (সী. পী.)].

সুৰণ্ণকক্কটজাতকং চতুত্থং.

৩৯০. ময্হকজাতকং (৬-২-৫)

১০২. সকুণো ময্হকো নাম, গিরিসানুদরীচরো;

পক্কং পিপ্ফলিমারুয্হ, ময্হং ময্হন্তি কন্দতি.

১০৩. তস্সেৰং ৰিলপন্তস্স, দিজসঙ্ঘা সমাগতা;

ভুত্ৰান পিপ্ফলিং যন্তি, ৰিলপত্ৰেৰ সো দিজো.

১০৪. এৰমেৰ ইধেকচ্চো, সঙ্ঘরিত্ৰা বহুং ধনং;

নেৰত্তনো ন ঞাতীনং, যথোধিং পটিপজ্জতি.

১০৫. ন সো অচ্ছাদনং ভত্তং, ন মালং ন ৰিলেপনং;

অনুভোতি [নানুভোতি (স্যা. ক.)] সকিং কিঞ্চি, ন সঙ্গণ্হাতি ঞাতকে.

১০৬. তস্সেৰং ৰিলপন্তস্স, ময্হং ময্হন্তি রক্খতো;

রাজানো অথ ৰা চোরা, দাযদা যে ৰ [যে চ (স্যা. ক.)] অপ্পিযা;

ধনমাদায গচ্ছন্তি, ৰিলপত্ৰেৰ সো নরো.

১০৭. ধীরো [ধীরো চ (সী.)] ভোগে অধিগম্ম, সঙ্গণ্হাতি চ ঞাতকে;

তেন সো কিত্তিং পপ্পোতি, পেচ্চ সগ্গে পমোদতীতি [সগ্গে চ মোদতীতি (সী. পী.)].

ময্হকজাতকং পঞ্চমং.

৩৯১. ৰিজ্জাধরজাতকং (৬-২-৬)

১০৮. দুব্বণ্ণরূপং তুৰমরিযৰণ্ণী, পুরক্খত্ৰা [পুরক্খিত্ৰা (স্যা. ক.)] পঞ্জলিকো নমস্সসি;

সেয্যো নু তে সো উদৰা [উদাহু (স্যা. ক.)] সরিক্খো, নামং পরস্সত্তনো চাপি ব্রূহি.

১০৯. ন নামগোত্তং গণ্হন্তি রাজ, সম্মগ্গতানুজ্জুগতান [সমগ্গতানুজ্জুগতান (স্যা.), সমুগ্গতানুজ্জুগতান (ক.)] দেৰা;

অহঞ্চ তে নামধেয্যং ৰদামি, সক্কোহমস্মী তিদসানমিন্দো.

১১০. যো দিস্ৰা ভিক্খুং চরণূপপন্নং, পুরক্খত্ৰা পঞ্জলিকো নমস্সতি;

পুচ্ছামি তং দেৰরাজেতমত্থং, ইতো চুতো কিং লভতে সুখং সো.

১১১. যো দিস্ৰা ভিক্খুং চরণূপপন্নং, পুরক্খত্ৰা পঞ্জলিকো নমস্সতি;

দিট্ঠেৰ ধম্মে লভতে পসংসং, সগ্গঞ্চ সো যাতি সরীরভেদা.

১১২. লক্খী ৰত মে উদপাদি অজ্জ, যং ৰাসৰং ভূতপতিদ্দসাম;

ভিক্খুঞ্চ দিস্ৰান তুৰঞ্চ সক্ক, কাহামি পুঞ্ঞানি অনপ্পকানি.

১১৩. অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

ভিক্খুঞ্চ দিস্ৰান মমঞ্চ রাজ, করোহি পুঞ্ঞানি অনপ্পকানি.

১১৪. অক্কোধনো নিচ্চপসন্নচিত্তো, সব্বাতিথীযাচযোগো ভৰিত্ৰা;

নিহচ্চ মানং অভিৰাদযিস্সং, সুত্ৰান দেৰিন্দ সুভাসিতানীতি.

ৰিজ্জাধর [ধজৰিহেঠক (সী. পী.), পব্বজিতৰিহেঠক (স্যা.)] জাতকং ছট্ঠং.

৩৯২. সিঙ্ঘপুপ্ফজাতকং (৬-২-৭)

১১৫. যমেতং [যমেকং (পী.)] ৰারিজং পুপ্ফং, অদিন্নং উপসিঙ্ঘসি;

একঙ্গমেতং থেয্যানং, গন্ধথেনোসি মারিস.

১১৬. ন হরামি ন ভঞ্জামি, আরা সিঙ্ঘামি ৰারিজং;

অথ কেন নু ৰণ্ণেন, গন্ধথেনোতি ৰুচ্চতি.

১১৭. যোযং ভিসানি খণতি, পুণ্ডরীকানি ভঞ্জতি;

এৰং আকিণ্ণকম্মন্তো, কস্মা এসো ন ৰুচ্চতি.

১১৮. আকিণ্ণলুদ্দো পুরিসো, ধাতিচেলংৰ মক্খিতো;

তস্মিং মে ৰচনং নত্থি, তঞ্চারহামি ৰত্তৰে.

১১৯. অনঙ্গণস্স পোসস্স, নিচ্চং সুচিগৰেসিনো;

ৰালগ্গমত্তং পাপস্স, অব্ভামত্তংৰ খাযতি.

১২০. অদ্ধা মং যক্খ জানাসি, অথো মং অনুকম্পসি;

পুনপি যক্খ ৰজ্জাসি, যদা পস্সসি এদিসং.

১২১. নেৰ তং উপজীৰামি, নপি তে ভতকাম্হসে [ভতকম্হসে (সী. পী.), ভতিকম্হসে (স্যা.)];

ত্ৰমেৰ ভিক্খু জানেয্য, যেন গচ্ছেয্য সুগ্গতিন্তি.

সিঙ্ঘপুপ্ফ [ভিসপুপ্ফ (সী. পী.), উপসিঙ্ঘপুপ্ফ (স্যা.)] জাতকং সত্তমং.

৩৯৩. ৰিঘাসাদজাতকং (৬-২-৮)

১২২. সুসুখং ৰত জীৰন্তি, যে জনা ৰিঘাসাদিনো;

দিট্ঠেৰ ধম্মে পাসংসা, সম্পরাযে চ সুগ্গতী.

১২৩. সুকস্স [সুৰস্স (সী. স্যা. পী.)] ভাসমানস্স, ন নিসামেথ পণ্ডিতা;

ইদং সুণাথ সোদরিযা, অম্হেৰাযং পসংসতি.

১২৪. নাহং তুম্হে পসংসামি, কুণপাদা সুণাথ মে;

উচ্ছিট্ঠভোজিনো [ভোজনা (ক.)] তুম্হে, ন তুম্হে ৰিঘাসাদিনো.

১২৫. সত্তৰস্সা পব্বজিতা, মেজ্ঝারঞ্ঞে [মজ্ঝেরঞ্ঞে (ক.)] সিখণ্ডিনো;

ৰিঘাসেনেৰ যাপেন্তা, মযং চে ভোতো গারয্হা;

কে নু ভোতো পসংসিযা.

১২৬. তুম্হে সীহানং ব্যগ্ঘানং, ৰাল়ানঞ্চাৰসিট্ঠকং;

উচ্ছিট্ঠেনেৰ যাপেন্তা, মঞ্ঞিৰ্হো ৰিঘাসাদিনো.

১২৭. যে ব্রাহ্মণস্স সমণস্স, অঞ্ঞস্স ৰা [অঞ্ঞস্স চ (সী. স্যা.), অঞ্ঞস্সেৰ (পী.)] ৰনিব্বিনো [ৰণিব্বিনো (সী. স্যা.)];

দত্ৰাৰ [দত্ৰান (পী. ক.)] সেসং ভুঞ্জন্তি, তে জনা ৰিঘাসাদিনোতি.

ৰিঘাসাদজাতকং অট্ঠমং.

৩৯৪. ৰট্টকজাতকং (৬-২-৯)

১২৮. পণীতং ভুঞ্জসে ভত্তং, সপ্পিতেলঞ্চ মাতুল;

অথ কেন নু ৰণ্ণেন, কিসো ত্ৰমসি ৰাযস.

১২৯. অমিত্তমজ্ঝে ৰসতো, তেসু আমিসমেসতো;

নিচ্চং উব্বিগ্গহদযস্স, কুতো কাকস্স দল়্হিযং.

১৩০. নিচ্চং উব্বেগিনো [উব্বিগ্গিনো (স্যা. ক.), উব্বেধিনো (সী.)] কাকা, ধঙ্কা পাপেন কম্মুনা;

লদ্ধো পিণ্ডো ন পীণেতি, কিসো তেনস্মি ৰট্টক.

১৩১. লূখানি তিণবীজানি, অপ্পস্নেহানি ভুঞ্জসি;

অথ কেন নু ৰণ্ণেন, থূলো ত্ৰমসি ৰট্টক.

১৩২. অপ্পিচ্ছা অপ্পচিন্তায, অদূরগমনেন চ;

লদ্ধালদ্ধেন যাপেন্তো, থূলো তেনস্মি ৰাযস.

১৩৩. অপ্পিচ্ছস্স হি পোসস্স, অপ্পচিন্তসুখস্স [অপ্পচিন্তিসুখস্স (সী. স্যা. পী.)] চ;

সুসঙ্গহিতমানস্স [সুসঙ্গহিতপমাণস্স (সী. স্যা. পী.)], ৰুত্তী সুসমুদানযাতি.

ৰট্টকজাতকং নৰমং.

৩৯৫. পারাৰতজাতকং (৬-২-১০)

১৩৪. চিরস্সং ৰত পস্সামি, সহাযং মণিধারিনং;

সুকতা [সুকতায (সী. পী.)] মস্সুকুত্তিযা, সোভতে ৰত মে সখা.

১৩৫. পরূল়্হকচ্ছনখলোমো, অহং কম্মেসু ব্যাৰটো;

চিরস্সং ন্হাপিতং লদ্ধা, লোমং তং অজ্জং হারযিং [অপহারযিং (সী. পী.)].

১৩৬. যং নু লোমং অহারেসি, দুল্লভং লদ্ধ কপ্পকং;

অথ কিঞ্চরহি তে সম্ম, কণ্ঠে কিণিকিণাযতি [ইদং কণ্ঠে কিণাযতি (ক.), কণ্ঠে কিংনিকিলাযতি (স্যা.)].

১৩৭. মনুস্সসুখুমালানং, মণি কণ্ঠেসু লম্বতি;

তেসাহং অনুসিক্খামি, মা ত্ৰং মঞ্ঞি দৰা কতং.

১৩৮. সচেপিমং পিহযসি, মস্সুকুত্তিং সুকারিতং;

কারযিস্সামি তে সম্ম, মণিঞ্চাপি দদামি তে.

১৩৯. ত্ৰঞ্ঞেৰ মণিনা ছন্নো, সুকতায চ মস্সুযা;

আমন্ত খো তং গচ্ছামি, পিযং মে তৰ দস্সনন্তি.