৩৯৪. ৰট্টকজাতকং (৬-২-৯)

১২৮. পণীতং ভুঞ্জসে ভত্তং, সপ্পিতেলঞ্চ মাতুল;

অথ কেন নু ৰণ্ণেন, কিসো ত্ৰমসি ৰাযস.

১২৯. অমিত্তমজ্ঝে ৰসতো, তেসু আমিসমেসতো;

নিচ্চং উব্বিগ্গহদযস্স, কুতো কাকস্স দল়্হিযং.

১৩০. নিচ্চং উব্বেগিনো [উব্বিগ্গিনো (স্যা. ক.), উব্বেধিনো (সী.)] কাকা, ধঙ্কা পাপেন কম্মুনা;

লদ্ধো পিণ্ডো ন পীণেতি, কিসো তেনস্মি ৰট্টক.

১৩১. লূখানি তিণবীজানি, অপ্পস্নেহানি ভুঞ্জসি;

অথ কেন নু ৰণ্ণেন, থূলো ত্ৰমসি ৰট্টক.

১৩২. অপ্পিচ্ছা অপ্পচিন্তায, অদূরগমনেন চ;

লদ্ধালদ্ধেন যাপেন্তো, থূলো তেনস্মি ৰাযস.

১৩৩. অপ্পিচ্ছস্স হি পোসস্স, অপ্পচিন্তসুখস্স [অপ্পচিন্তিসুখস্স (সী. স্যা. পী.)] চ;

সুসঙ্গহিতমানস্স [সুসঙ্গহিতপমাণস্স (সী. স্যা. পী.)], ৰুত্তী সুসমুদানযাতি.

ৰট্টকজাতকং নৰমং.