৩৪০. ৰিসয্হজাতকং (৪-৪-১০)

১৫৭. অদাসি দানানি পুরে ৰিসয্হ, দদতো চ তে খযধম্মো অহোসি;

ইতো পরং চে ন দদেয্য দানং, তিট্ঠেয্যুং তে সংযমন্তস্স ভোগা.

১৫৮. অনরিযমরিযেন সহস্সনেত্ত, সুদুগ্গতেনাপি অকিচ্চমাহু;

মা ৰো ধনং তং অহু দেৰরাজ [অহুৰা জনিন্দ (ক. সী. স্যা. পী.)], যং ভোগহেতু ৰিজহেমু সদ্ধং.

১৫৯. যেন একো রথো যাতি, যাতি তেনাপরো রথো;

পোরাণং নিহিতং ৰত্তং, ৰত্ততঞ্ঞেৰ [ৰদ্ধং, ৰদ্ধতঞ্ঞেৰ (ক. সী. পী.)] ৰাসৰ.

১৬০. যদি হেস্সতি দস্সাম, অসন্তে কিং দদামসে;

এৰংভূতাপি দস্সাম, মা দানং পমদম্হসেতি.

ৰিসয্হজাতকং দসমং.

কোকিলৰগ্গো [কোকালিকৰগ্গো (ক.)] চতুত্থো.

তস্সুদ্দানং –

অতিৰেলপভাসতি জীতৰরো, ৰনমজ্ঝ রথেসভ জিম্হগমো;

অথ জম্বু তিণাসনপীঠৰরং, অথ তণ্ডুল মোর ৰিসয্হ দসাতি.