৪. কোকিলৰগ্গো

৩৩১. কোকিলজাতকং (৪-৪-১)

১২১. যো ৰে কালে অসম্পত্তে, অতিৰেলং পভাসতি;

এৰং সো নিহতো সেতি, কোকিলাযিৰ অত্রজো.

১২২. ন হি সত্থং সুনিসিতং, ৰিসং হলাহলামিৰ [হলাহলং ইৰ (পী.)];

এৰং নিকট্ঠে [নিক্কড্ঢে (স্যা.), নিকড্ঢে (ক.)] পাতেতি, ৰাচা দুব্ভাসিতা যথা.

১২৩. তস্মা কালে অকালে ৰা [অকালে চ (সী. স্যা.)], ৰাচং রক্খেয্য পণ্ডিতো;

নাতিৰেলং পভাসেয্য, অপি অত্তসমম্হি ৰা.

১২৪. যো চ কালে মিতং ভাসে, মতিপুব্বো ৰিচক্খণো;

সব্বে অমিত্তে আদেতি, সুপণ্ণো উরগামিৰাতি.

কোকিলজাতকং [কোকালিকজাতকং (সব্বত্থ)] পঠমং.

৩৩২. রথলট্ঠিজাতকং (৪-৪-২)

১২৫. অপি হন্ত্ৰা হতো ব্রূতি, জেত্ৰা জিতোতি ভাসতি;

পুব্বৰক্খাযিনো [পুব্বমক্খাযিনো (সী. স্যা.)] রাজ, অঞ্ঞদত্থু [একদত্থু (সী. পী.)] ন সদ্দহে.

১২৬. তস্মা পণ্ডিতজাতিযো, সুণেয্য ইতরস্সপি;

উভিন্নং ৰচনং সুত্ৰা, যথা ধম্মো তথা করে.

১২৭. অলসো গিহী কামভোগী ন সাধু, অসঞ্ঞতো পব্বজিতো ন সাধু;

রাজা ন সাধু অনিসম্মকারী, যো পণ্ডিতো কোধনো তং ন সাধু.

১২৮. নিসম্ম খত্তিযো কযিরা, নানিসম্ম দিসম্পতি;

নিসম্মকারিনো রাজ [রঞ্ঞো (সী. স্যা.)], যসো কিত্তি চ ৰড্ঢতীতি.

রথলট্ঠিজাতকং দুতিযং.

৩৩৩. পক্কগোধজাতকং (৪-৪-৩)

১২৯. তদেৰ মে ত্ৰং ৰিদিতো, ৰনমজ্ঝে রথেসভ;

যস্স তে খগ্গবদ্ধস্স, সন্নদ্ধস্স তিরীটিনো;

অস্সত্থদুমসাখায, পক্কা গোধা পলাযথ.

১৩০. নমে নমন্তস্স ভজে ভজন্তং, কিচ্চানুকুব্বস্স করেয্য কিচ্চং;

নানত্থকামস্স করেয্য অত্থং, অসম্ভজন্তম্পি ন সম্ভজেয্য.

১৩১. চজে চজন্তং ৰনথং ন কযিরা, অপেতচিত্তেন ন সম্ভজেয্য;

দিজো দুমং খীণফলন্তি [ফলংৰ (ক. সী. স্যা. ক.), দুকনিপাতে পুটভত্তজাতকেন সংসন্দেতব্বং] ঞত্ৰা, অঞ্ঞং সমেক্খেয্য মহা হি লোকো.

১৩২. সো তে করিস্সামি যথানুভাৰং, কতঞ্ঞুতং খত্তিযে [খত্তিযো (স্যা. ক.)] পেক্খমানো;

সব্বঞ্চ তে ইস্সরিযং দদামি, যস্সিচ্ছসী তস্স তুৰং দদামীতি.

পক্কগোধজাতকং [গোধজাতকং (সী. স্যা. পী.)] ততিযং.

৩৩৪. রাজোৰাদজাতকং (৪-৪-৪)

১৩৩. গৰং চে তরমানানং, জিম্হং গচ্ছতি পুঙ্গৰো;

সব্বা তা জিম্হং গচ্ছন্তি [সব্বা গাৰী জিম্হং যন্তি (সী. স্যা.)], নেত্তে জিম্হং গতে সতি.

১৩৪. এৰমেৰ মনুস্সেসু, যো হোতি সেট্ঠসম্মতো;

সো চে অধম্মং চরতি, পগেৰ ইতরা পজা;

সব্বং রট্ঠং দুখং সেতি, রাজা চে হোতি অধম্মিকো.

১৩৫. গৰং চে তরমানানং, উজুং গচ্ছতি পুঙ্গৰো;

সব্বা গাৰী উজুং যন্তি [সব্বা তা উজুং গচ্ছন্তি (পী. অ. নি. ৪.৭০)], নেত্তে উজুং গতে সতি.

১৩৬. এৰমেৰ মনুস্সেসু, যো হোতি সেট্ঠসম্মতো;

সো সচে ধম্মং চরতি, পগেৰ ইতরা পজা;

সব্বং রট্ঠং সুখং সেতি, রাজা চে হোতি ধম্মিকোতি.

রাজোৰাদজাতকং চতুত্থং.

৩৩৫. জম্বুকজাতকং (৪-৪-৫)

১৩৭. ব্রহা পৰড্ঢকাযো সো, দীঘদাঠো চ জম্বুক;

ন ত্ৰং তত্থ কুলে জাতো, যত্থ গণ্হন্তি কুঞ্জরং.

১৩৮. অসীহো সীহমানেন, যো অত্তানং ৰিকুব্বতি;

কোত্থূৰ [কুট্ঠূৰ (সী.), কুত্থুৰ (স্যা. পী)] গজমাসজ্জ, সেতি ভূম্যা অনুত্থুনং.

১৩৯. যসস্সিনো উত্তমপুগ্গলস্স, সঞ্জাতখন্ধস্স মহব্বলস্স;

অসমেক্খিয থামবলূপপত্তিং, স সেতি নাগেন হতোযং জম্বুকো.

১৪০. যো চীধ কম্মং কুরুতে পমায, থামব্বলং অত্তনি সংৰিদিত্ৰা;

জপ্পেন মন্তেন সুভাসিতেন, পরিক্খৰা সো ৰিপুলং জিনাতীতি.

জম্বুকজাতকং পঞ্চমং.

৩৩৬. ব্রহাছত্তজাতকং (৪-৪-৬)

১৪১. তিণং তিণন্তি লপসি, কো নু তে তিণমাহরি;

কিং নু তে তিণকিচ্চত্থি, তিণমেৰ পভাসসি.

১৪২. ইধাগমা ব্রহ্মচারী, ব্রহা ছত্তো বহুস্সুতো;

সো মে [সো ৰে (ক.)] সব্বং সমাদায, তিণং নিক্খিপ্প গচ্ছতি.

১৪৩. এৰেতং হোতি কত্তব্বং, অপ্পেন বহুমিচ্ছতা;

সব্বং সকস্স আদানং, অনাদানং তিণস্স চ. ( ) [(তিণস্স চাটীসু গতো, তত্থ কা পরিদেৰনা) (সী. স্যা.) (চাটীসু পক্খিপিত্ৰান, তত্থ কা পরিদেৰনা) (ক.)]

১৪৪. সীলৰন্তো ন কুব্বন্তি, বালো সীলানি কুব্বতি;

অনিচ্চসীলং দুস্সীল্যং [দুস্সীলং (পী.)], কিং পণ্ডিচ্চং করিস্সতীতি.

ব্রহাছত্তজাতকং ছট্ঠং.

৩৩৭. পীঠজাতকং (৪-৪-৭)

১৪৫. ন তে পীঠমদাযিম্হা [মদাসিম্হ (পী. ক.)], ন পানং নপি ভোজনং;

ব্রহ্মচারি খমস্সু মে, এতং পস্সামি অচ্চযং.

১৪৬. নেৰাভিসজ্জামি ন চাপি কুপ্পে, ন চাপি মে অপ্পিযমাসি কিঞ্চি;

অথোপি মে আসি মনোৰিতক্কো, এতাদিসো নূন কুলস্স ধম্মো.

১৪৭. এসস্মাকং কুলে ধম্মো, পিতুপিতামহো সদা;

আসনং উদকং পজ্জং, সব্বেতং নিপদামসে.

১৪৮. এসস্মাকং কুলে ধম্মো, পিতুপিতামহো সদা;

সক্কচ্চং উপতিট্ঠাম, উত্তমং ৰিয ঞাতকন্তি.

পীঠজাতকং সত্তমং.

৩৩৮. থুসজাতকং (৪-৪-৮)

১৪৯. ৰিদিতং থুসং উন্দুরানং [উন্দূরানং (ক.)], ৰিদিতং পন তণ্ডুলং;

থুসং থুসং [থুসং থূলং (সী.)] ৰিৰজ্জেত্ৰা, তণ্ডুলং পন খাদরে.

১৫০. যা মন্তনা অরঞ্ঞস্মিং, যা চ গামে নিকণ্ণিকা;

যঞ্চেতং ইতি চীতি চ, এতম্পি ৰিদিতং মযা.

১৫১. ধম্মেন কির জাতস্স, পিতা পুত্তস্স মক্কটো;

দহরস্সেৰ সন্তস্স, দন্তেহি ফলমচ্ছিদা.

১৫২. যমেতং পরিসপ্পসি [পরিসব্বেসি (ক.)], অজকাণোৰ সাসপে;

যোপাযং হেট্ঠতো সেতি [সেসি (সী.)], এতম্পি ৰিদিতং মযাতি.

থুসজাতকং অট্ঠমং.

৩৩৯. বাৰেরুজাতকং (৪-৪-৯)

১৫৩. অদস্সনেন মোরস্স, সিখিনো মঞ্জুভাণিনো;

কাকং তত্থ অপূজেসুং, মংসেন চ ফলেন চ.

১৫৪. যদা চ সরসম্পন্নো, মোরো বাৰেরুমাগমা;

অথ লাভো চ সক্কারো, ৰাযসস্স অহাযথ.

১৫৫. যাৰ নুপ্পজ্জতী বুদ্ধো, ধম্মরাজা পভঙ্করো;

তাৰ অঞ্ঞে অপূজেসুং, পুথূ সমণব্রাহ্মণে.

১৫৬. যদা চ সরসম্পন্নো, বুদ্ধো ধম্মং অদেসযি;

অথ লাভো চ সক্কারো, তিত্থিযানং অহাযথাতি.

বাৰেরুজাতকং নৰমং.

৩৪০. ৰিসয্হজাতকং (৪-৪-১০)

১৫৭. অদাসি দানানি পুরে ৰিসয্হ, দদতো চ তে খযধম্মো অহোসি;

ইতো পরং চে ন দদেয্য দানং, তিট্ঠেয্যুং তে সংযমন্তস্স ভোগা.

১৫৮. অনরিযমরিযেন সহস্সনেত্ত, সুদুগ্গতেনাপি অকিচ্চমাহু;

মা ৰো ধনং তং অহু দেৰরাজ [অহুৰা জনিন্দ (ক. সী. স্যা. পী.)], যং ভোগহেতু ৰিজহেমু সদ্ধং.

১৫৯. যেন একো রথো যাতি, যাতি তেনাপরো রথো;

পোরাণং নিহিতং ৰত্তং, ৰত্ততঞ্ঞেৰ [ৰদ্ধং, ৰদ্ধতঞ্ঞেৰ (ক. সী. পী.)] ৰাসৰ.

১৬০. যদি হেস্সতি দস্সাম, অসন্তে কিং দদামসে;

এৰংভূতাপি দস্সাম, মা দানং পমদম্হসেতি.

ৰিসয্হজাতকং দসমং.

কোকিলৰগ্গো [কোকালিকৰগ্গো (ক.)] চতুত্থো.

তস্সুদ্দানং –

অতিৰেলপভাসতি জীতৰরো, ৰনমজ্ঝ রথেসভ জিম্হগমো;

অথ জম্বু তিণাসনপীঠৰরং, অথ তণ্ডুল মোর ৰিসয্হ দসাতি.