৫. চূল়কুণালৰগ্গো

৩৪১. কণ্ডরীজাতকং (৪-৫-১)

১৬১. নরানমারামকরাসু নারিসু, অনেকচিত্তাসু অনিগ্গহাসু চ;

সব্বত্থ নাপীতিকরাপি [সব্ব’ত্তনা’পীতিকরাপি (সী. স্যা.)] চে সিযা [সিযুং (স্যা.)], ন ৰিস্সসে তিত্থসমা হি নারিযো.

১৬২. যং ৰে [যঞ্চ (স্যা. ক.)] দিস্ৰা কণ্ডরীকিন্নরানং [কিন্নরকিন্নরীনং (স্যা.), কিন্নরীকিন্নরানং (ক.)], সব্বিত্থিযো ন রমন্তি অগারে;

তং তাদিসং মচ্চং চজিত্ৰা ভরিযা, অঞ্ঞং দিস্ৰা পুরিসং পীঠসপ্পিং.

১৬৩. বকস্স চ বাৰরিকস্স [পাৰারিকস্স (সী.)] রঞ্ঞো, অচ্চন্তকামানুগতস্স ভরিযা;

অৰাচরী [অচ্চাচরি (স্যা.), অনাচরি (ক.)] পট্ঠৰসানুগস্স [বদ্ধৰসানুগস্স (সী. স্যা.), পত্তৰসানুগতস্স (ক.)], কং ৰাপি ইত্থী নাতিচরে তদঞ্ঞং.

১৬৪. পিঙ্গিযানী সব্বলোকিস্সরস্স, রঞ্ঞো পিযা ব্রহ্মদত্তস্স ভরিযা;

অৰাচরী পট্ঠৰসানুগস্স, তং ৰাপি সা নাজ্ঝগা কামকামিনীতি.

কণ্ডরীজাতকং [কিন্নরীজাতকং (ক. সী. ক.), কুণ্ডলিকজাতকং (স্যা.)] পঠমং.

৩৪২. ৰানরজাতকং (৪-৫-২)

১৬৫. অসক্খিং ৰত অত্তানং, উদ্ধাতুং উদকা থলং;

ন দানাহং পুন তুয্হং, ৰসং গচ্ছামি ৰারিজ.

১৬৬. অলমেতেহি অম্বেহি, জম্বূহি পনসেহি চ;

যানি পারং সমুদ্দস্স, ৰরং ময্হং উদুম্বরো.

১৬৭. যো চ উপ্পতিতং অত্থং, ন খিপ্পমনুবুজ্ঝতি;

অমিত্তৰসমন্ৰেতি, পচ্ছা চ অনুতপ্পতি.

১৬৮. যো চ উপ্পতিতং অত্থং, খিপ্পমেৰ নিবোধতি;

মুচ্চতে সত্তুসম্বাধা, ন চ পচ্ছানুতপ্পতীতি.

ৰানরজাতকং দুতিযং.

৩৪৩. কুন্তিনীজাতকং (৪-৫-৩)

১৬৯. অৰসিম্হ তৰাগারে, নিচ্চং সক্কতপূজিতা;

ত্ৰমেৰ দানিমকরি, হন্দ রাজ ৰজামহং.

১৭০. যো ৰে কতে পটিকতে, কিব্বিসে পটিকিব্বিসে;

এৰং তং সম্মতী ৰেরং, ৰস কুন্তিনি মাগমা.

১৭১. ন কতস্স চ কত্তা চ, মেত্তি [মেত্তী (পী.), মিত্তী (ক.)] সন্ধীযতে পুন;

হদযং নানুজানাতি, গচ্ছঞ্ঞেৰ রথেসভ.

১৭২. কতস্স চেৰ কত্তা চ, মেত্তি সন্ধীযতে পুন;

ধীরানং নো চ বালানং, ৰস কুন্তিনি মাগমাতি.

কুন্তিনীজাতকং ততিযং.

৩৪৪. অম্বজাতকং (৪-৫-৪)

১৭৩. যো নীলিযং মণ্ডযতি, সণ্ডাসেন ৰিহঞ্ঞতি;

তস্স সা ৰসমন্ৰেতু, যা তে অম্বে অৰাহরি.

১৭৪. ৰীসং ৰা পঞ্চৰীসং [পণ্ণুৰীসং (ক. সী. পী.)] ৰা, ঊনতিংসং ৰ জাতিযা;

তাদিসা পতি মা লদ্ধা [পতিং মা লদ্ধা (পী.), পতি মা’লত্থ (?)], যা তে অম্বে অৰাহরি.

১৭৫. দীঘং গচ্ছতু অদ্ধানং, একিকা অভিসারিকা;

সঙ্কেতে পতি মা অদ্দ [মা অদ্দস (সী. পী.)], যা তে অম্বে অৰাহরি.

১৭৬. অলঙ্কতা সুৰসনা, মালিনী চন্দনুস্সদা;

একিকা সযনে সেতু, যা তে অম্বে অৰাহরীতি.

অম্বজাতকং [অম্বচোরজাতকং (ক. সী. পী.)] চতুত্থং.

৩৪৫. গজকুম্ভজাতকং (৪-৫-৫)

১৭৭. ৰনং যদগ্গি দহতি, পাৰকো কণ্হৰত্তনী;

কথং করোসি পচলক, এৰং দন্ধপরক্কমো.

১৭৮. বহূনি রুক্খছিদ্দানি, পথব্যা ৰিৰরানি চ;

তানি চে নাভিসম্ভোম, হোতি নো কালপরিযাযো.

১৭৯. যো দন্ধকালে তরতি, তরণীযে চ দন্ধতি;

সুক্খপণ্ণংৰ অক্কম্ম, অত্থং ভঞ্জতি অত্তনো.

১৮০. যো দন্ধকালে দন্ধেতি, তরণীযে চ তারযি;

সসীৰ রত্তিং ৰিভজং, তস্সত্থো পরিপূরতীতি.

গজকুম্ভজাতকং পঞ্চমং.

৩৪৬. কেসৰজাতকং (৪-৫-৬)

১৮১. মনুস্সিন্দং জহিত্ৰান, সব্বকামসমিদ্ধিনং;

কথং নু ভগৰা কেসী, কপ্পস্স রমতি অস্সমে [রমতস্সমে (ক.)].

১৮২. সাদূনী [সাধূনি (ক. সী. স্যা. ক.)] রমণীযানি, সন্তি ৰক্খা মনোরমা;

সুভাসিতানি কপ্পস্স, নারদ রমযন্তি মং.

১৮৩. সালীনং ওদনং ভুঞ্জে, সুচিং মংসূপসেচনং;

কথং সামাকনীৰারং, অলোণং ছাদযন্তি তং.

১৮৪. সাদুং ৰা [অসাদুং (পী.)] যদি ৰাসাদুং, অপ্পং ৰা যদি ৰা বহুং;

ৰিস্সত্থো যত্থ ভুঞ্জেয্য, ৰিস্সাসপরমা রসাতি.

কেসৰজাতকং [কেসীজাতকং (ক.)] ছট্ঠং.

৩৪৭. অযকূটজাতকং (৪-৫-৭)

১৮৫. সব্বাযসং কূটমতিপ্পমাণং, পগ্গয্হ যো [সো (পী.)] তিট্ঠসি অন্তলিক্খে;

রক্খায মে [মং (সী.)] ত্ৰং ৰিহিতো নুসজ্জ, উদাহু মে চেতযসে [ৰাযমসে (সী. স্যা.)] ৰধায.

১৮৬. দূতো অহং রাজিধ রক্খসানং, ৰধায তুয্হং পহিতোহমস্মি;

ইন্দো চ তং রক্খতি দেৰরাজা, তেনুত্তমঙ্গং ন তে [ন হি (ক. সী. পী.), তে ন (ক.)] ফালযামি.

১৮৭. সচে চ মং রক্খতি দেৰরাজা, দেৰানমিন্দো মঘৰা সুজম্পতি;

কামং পিসাচা ৰিনদন্তু সব্বে, ন সন্তসে রক্খসিযা পজায.

১৮৮. কামং কন্দন্তু [কন্তন্তু (ক.), কণ্ডন্তু (স্যা.)] কুম্ভণ্ডা, সব্বে পংসুপিসাচকা;

নালং পিসাচা যুদ্ধায, মহতী সা ৰিভিংসিকাতি [ৰিভেসিকাতি (স্যা.), ৰিহেসিকাতি (পী.)].

অযকূটজাতকং সত্তমং.

৩৪৮. অরঞ্ঞজাতকং (৪-৫-৮)

১৮৯. অরঞ্ঞা গামমাগম্ম, কিংসীলং কিংৰতং অহং;

পুরিসং তাত সেৰেয্যং, তং মে অক্খাহি পুচ্ছিতো.

১৯০. যো তং ৰিস্সাসযে তাত, ৰিস্সাসঞ্চ খমেয্য তে;

সুস্সূসী চ তিতিক্খী চ, তং ভজেহি ইতো [তং ভজেয্যাসিতো (ক.)] গতো.

১৯১. যস্স কাযেন ৰাচায, মনসা নত্থি দুক্কটং;

উরসীৰ পতিট্ঠায, তং ভজেহি ইতো গতো.

১৯২. হলিদ্দিরাগং কপিচিত্তং, পুরিসং রাগৰিরাগিনং;

তাদিসং তাত মা সেৰি, নিম্মনুস্সম্পি চে সিযাতি.

অরঞ্ঞজাতকং অট্ঠমং.

৩৪৯. সন্ধিভেদজাতকং (৪-৫-৯)

১৯৩. নেৰ ইত্থীসু সামঞ্ঞং, নাপি ভক্খেসু সারথি;

অথস্স সন্ধিভেদস্স, পস্স যাৰ সুচিন্তিতং.

১৯৪. অসি তিক্খোৰ মংসম্হি, পেসুঞ্ঞং পরিৰত্ততি;

যত্থূসভঞ্চ সীহঞ্চ, ভক্খযন্তি মিগাধমা.

১৯৫. ইমং সো সযনং সেতি, যমিমং [যযিমং (সী. পী.), যিমং (ক.)] পস্সসি সারথি;

যো ৰাচং সন্ধিভেদস্স, পিসুণস্স নিবোধতি.

১৯৬. তে জনা সুখমেধন্তি, নরা সগ্গগতারিৰ;

যে ৰাচং সন্ধিভেদস্স, নাৰবোধন্তি সারথীতি.

সন্ধিভেদজাতকং নৰমং.

৩৫০. দেৰতাপঞ্হজাতকং (৪-৫-১০)

১৯৭. হন্তি হত্থেহি পাদেহি, মুখঞ্চ পরিসুম্ভতি;

স ৰে রাজ পিযো হোতি, কং তেন ত্ৰাভিপস্সসি [মভিপস্সসি (সী.)].

১৯৮. অক্কোসতি যথাকামং, আগমঞ্চস্স ইচ্ছতি;

স ৰে রাজ পিযো হোতি, কং তেন ত্ৰাভিপস্সসি.

১৯৯. অব্ভক্খাতি অভূতেন, অলিকেনাভিসারযে;

স ৰে রাজ পিযো হোতি, কং তেন ত্ৰাভিপস্সসি.

২০০. হরং অন্নঞ্চ পানঞ্চ, ৰত্থসেনাসনানি চ;

অঞ্ঞদত্থুহরা সন্তা, তে ৰে রাজ পিযা হোন্তি;

কং তেন ত্ৰাভিপস্সসীতি.

দেৰতাপঞ্হজাতকং দসমং.

চূল়কুণালৰগ্গো পঞ্চমো.

তস্সুদ্দানং –

নরানং অসক্খিৰসিম্হৰরো, নীলিযমগ্গিৰরঞ্চ পুন;

পুন রসাযসকূটৰরো, তথারঞ্ঞ সারথি হন্তি দসাতি.

অথ ৰগ্গুদ্দানং –

কালিঙ্গং [ৰিৰরং (বহূসু)] পুচিমন্দঞ্চ, কুটিদূসক কোকিলা [কুটিদূসং বহুভাণকং (বহূসু)];

চূল়কুণালৰগ্গো সো, পঞ্চমো সুপ্পকাসিতোতি.

চতুক্কনিপাতং নিট্ঠিতং.