৫৪৩. ভূরিদত্তজাতকং (৬)

৭৮৪. ‘‘যং কিঞ্চি রতনং অত্থি, ধতরট্ঠনিৰেসনে;

সব্বানি তে উপযন্তু, ধীতরং দেহি রাজিনো’’.

৭৮৫. ‘‘ন নো ৰিৰাহো নাগেহি, কতপুব্বো কুদাচনং;

তং ৰিৰাহং অসংযুত্তং, কথং অম্হে করোমসে’’.

৭৮৬. ‘‘জীৰিতং নূন তে চত্তং, রট্ঠং ৰা মনুজাধিপ;

ন হি নাগে কুপিতম্হি, চিরং জীৰন্তি তাদিসা.

৭৮৭. ‘‘যো ত্ৰং দেৰ মনুস্সোসি, ইদ্ধিমন্তং অনিদ্ধিমা;

ৰরুণস্স নিযং পুত্তং, যামুনং অতিমঞ্ঞসি’’.

৭৮৮. ‘‘নাতিমঞ্ঞামি রাজানং, ধতরট্ঠং যসস্সিনং;

ধতরট্ঠো হি নাগানং, বহূনমপি ইস্সরো.

৭৮৯. ‘‘অহি মহানুভাৰোপি, ন মে ধীতরমারহো;

খত্তিযো চ ৰিদেহানং, অভিজাতা সমুদ্দজা’’.

৭৯০. ‘‘কম্বলস্সতরা উট্ঠেন্তু, সব্বে নাগে নিৰেদয;

বারাণসিং পৰজ্জন্তু, মা চ কঞ্চি [কিঞ্চি (সী. পী. ক.)] ৰিহেঠযুং’’.

৭৯১. ‘‘নিৰেসনেসু সোব্ভেসু, রথিযা চচ্চরেসু চ;

রুক্খগ্গেসু চ লম্বন্তু, ৰিততা তোরণেসু চ.

৭৯২. ‘‘অহম্পি সব্বসেতেন, মহতা সুমহং পুরং;

পরিক্খিপিস্সং ভোগেহি, কাসীনং জনযং ভযং’’.

৭৯৩. তস্স তং ৰচনং সুত্ৰা, উরগানেকৰণ্ণিনো;

বারাণসিং পৰজ্জিংসু, ন চ কঞ্চি ৰিহেঠযুং.

৭৯৪. নিৰেসনেসু সোব্ভেসু, রথিযা চচ্চরেসু চ;

রুক্খগ্গেসু চ লম্বিংসু, ৰিততা তোরণেসু চ.

৭৯৫. তেসু দিস্ৰান লম্বন্তে, পুথূ কন্দিংসু নারিযো;

নাগে সোণ্ডিকতে দিস্ৰা, পস্সসন্তে মুহুং মুহুং.

৭৯৬. বারাণসী পব্যধিতা, আতুরা সমপজ্জথ;

বাহা পগ্গয্হ পক্কন্দুং, ‘‘ধীতরং দেহি রাজিনো’’.

৭৯৭. ‘‘পুপ্ফাভিহারস্স ৰনস্স মজ্ঝে, কো লোহিতক্খো ৰিততন্তরংসো;

কা কম্বুকাযূরধরা সুৰত্থা, তিট্ঠন্তি নারিযো দস ৰন্দমানা.

৭৯৮. ‘‘কো ত্ৰং ব্রহাবাহু ৰনস্স মজ্ঝে, ৰিরোচসি ঘতসিত্তোৰ অগ্গি;

মহেসক্খো অঞ্ঞতরোসি যক্খো, উদাহু নাগোসি মহানুভাৰো’’.

৭৯৯. ‘‘নাগোহমস্মি ইদ্ধিমা, তেজস্সী [তেজসী (সী. স্যা. পী. ক.)] দুরতিক্কমো;

ডংসেয্যং তেজসা কুদ্ধো, ফীতং জনপদং অপি.

৮০০. ‘‘সমুদ্দজা হি মে মাতা, ধতরট্ঠো চ মে পিতা;

সুদস্সনকনিট্ঠোস্মি, ভূরিদত্তোতি মং ৰিদূ’’.

৮০১. ‘‘যং গম্ভীরং সদাৰট্টং, রহদং ভিস্মং পেক্খসি;

এস দিব্যো মমাৰাসো, অনেকসতপোরিসো.

৮০২. ‘‘মযূরকোঞ্চাভিরুদং, নীলোদং ৰনমজ্ঝতো;

যমুনং পৰিস মা ভীতো, খেমং ৰত্তৰতং [ৰত্তৰতিং (স্যা. ক.)] সিৰং’’.

৮০৩. ‘‘তত্থ পত্তো সানুচরো, সহ পুত্তেন ব্রাহ্মণ;

পূজিতো ময্হং কামেহি, সুখং ব্রাহ্মণ ৰচ্ছসি’’.

৮০৪. ‘‘সমা সমন্তপরিতো, পহূততগরা [বহুকা তগ্গরা (সী. স্যা. পী.)] মহী;

ইন্দগোপকসঞ্ছন্না, সোভতি হরিতুত্তমা.

৮০৫. ‘‘রম্মানি ৰনচেত্যানি, রম্মা হংসূপকূজিতা;

ওপুপ্ফাপদ্মা তিট্ঠন্তি, পোক্খরঞ্ঞো [পোক্খরঞ্ঞা (স্যা. পী.)] সুনিম্মিতা.

৮০৬. ‘‘অট্ঠংসা সুকতা থম্ভা, সব্বে ৰেল়ুরিযামযা;

সহস্সথম্ভা পাসাদা, পূরা কঞ্ঞাহি জোতরে.

৮০৭. ‘‘ৰিমানং উপপন্নোসি, দিব্যং পুঞ্ঞেহি অত্তনো;

অসম্বাধং সিৰং রম্মং, অচ্চন্তসুখসংহিতং.

৮০৮. ‘‘মঞ্ঞে সহস্সনেত্তস্স, ৰিমানং নাভিকঙ্খসি;

ইদ্ধী হি ত্যাযং ৰিপুলা, সক্কস্সেৰ জুতীমতো’’.

৮০৯. ‘‘মনসাপি ন পত্তব্বো, আনুভাৰো জুতীমতো;

পরিচারযমানানং, সইন্দানং [ইন্দানং (স্যা. ক.)] ৰসৰত্তিনং’’.

৮১০. ‘‘তং ৰিমানং অভিজ্ঝায, অমরানং সুখেসিনং;

উপোসথং উপৰসন্তো, সেমি ৰম্মিকমুদ্ধনি’’.

৮১১. ‘‘অহঞ্চ মিগমেসানো, সপুত্তো পাৰিসিং ৰনং;

তং মং মতং ৰা জীৰং ৰা, নাভিৰেদেন্তি ঞাতকা.

৮১২. ‘‘আমন্তযে ভূরিদত্তং, কাসিপুত্তং যসস্সিনং;

তযা নো সমনুঞ্ঞাতা, অপি পস্সেমু ঞাতকে’’.

৮১৩. ‘‘এসো হি ৰত মে ছন্দো, যং ৰসেসি মমন্তিকে;

ন হি এতাদিসা কামা, সুলভা হোন্তি মানুসে.

৮১৪. ‘‘সচে ত্ৰং নিচ্ছসে ৰত্থুং, মম কামেহি পূজিতো;

মযা ত্ৰং সমনুঞ্ঞাতো, সোত্থিং পস্সাহি ঞাতকে’’.

৮১৫. ‘‘ধারযিমং মণিং দিব্যং, পসুং পুত্তে চ ৰিন্দতি;

অরোগো সুখিতো হোতি [হোহি (স্যা.)], গচ্ছেৰাদায ব্রাহ্মণ’’.

৮১৬. ‘‘কুসলং পটিনন্দামি, ভূরিদত্ত ৰচো তৰ;

পব্বজিস্সামি জিণ্ণোস্মি, ন কামে অভিপত্থযে’’.

৮১৭. ‘‘ব্রহ্মচরিযস্স চে ভঙ্গো, হোতি ভোগেহি কারিযং;

অৰিকম্পমানো এয্যাসি, বহুং দস্সামি তে ধনং’’.

৮১৮. ‘‘কুসলং পটিনন্দামি, ভূরিদত্ত ৰচো তৰ;

পুনপি আগমিস্সামি, সচে অত্থো ভৰিস্সতি’’.

৮১৯. ‘‘ইদং ৰত্ৰা ভূরিদত্তো, পেসেসি চতুরো জনে;

এথ গচ্ছথ উট্ঠেথ, খিপ্পং পাপেথ ব্রাহ্মণং.

৮২০. তস্স তং ৰচনং সুত্ৰা, উট্ঠায চতুরো জনা;

পেসিতা ভূরিদত্তেন, খিপ্পং পাপেসু ব্রাহ্মণং.

৮২১. ‘‘মণিং পগ্গয্হ মঙ্গল্যং, সাধুৰিত্তং [সাধুচিত্তং (পী.)] মনোরমং;

সেলং ব্যঞ্জনসম্পন্নং, কো ইমং মণিমজ্ঝগা’’.

৮২২. ‘‘লোহিতক্খসহস্সাহি, সমন্তা পরিৰারিতং;

অজ্জ কালং পথং [পদং (সী. পী.)] গচ্ছং, অজ্ঝগাহং মণিং ইমং’’.

৮২৩. ‘‘সুপচিণ্ণো অযং সেলো, অচ্চিতো মহিতো [মানিতো (ক.)] সদা;

সুধারিতো সুনিক্খিত্তো, সব্বত্থমভিসাধযে.

৮২৪. ‘‘উপচারৰিপন্নস্স, নিক্খেপে ধারণায ৰা;

অযং সেলো ৰিনাসায, পরিচিণ্ণো অযোনিসো.

৮২৫. ‘‘ন ইমং অকুসলো [কুসলং (ক.)] দিব্যং, মণিং ধারেতুমারহো;

পটিপজ্জ সতং নিক্খং, দেহিমং রতনং মম’’.

৮২৬. ‘‘ন চ ম্যাযং মণী কেয্যো, গোহি [কেহি (ক.)] ৰা রতনেহি ৰা;

সেলো ব্যঞ্জনসম্পন্নো, নেৰ কেয্যো মণী মম’’.

৮২৭. ‘‘নো চে তযা মণী কেয্যো, গোহি [কেহি (ক.)] ৰা রতনেহি ৰা;

অথ কেন মণী কেয্যো, তং মে অক্খাহি পুচ্ছিতো’’.

৮২৮. ‘‘যো মে সংসে মহানাগং, তেজস্সিং দুরতিক্কমং;

তস্স দজ্জং ইমং সেলং, জলন্তমিৰ তেজসা’’.

৮২৯. ‘‘কো নু ব্রাহ্মণৰণ্ণেন, সুপণ্ণো পততং ৰরো;

নাগং জিগীসমন্ৰেসি, অন্ৰেসং ভক্খমত্তনো.

৮৩০. ‘‘নাহং দিজাধিপো হোমি, ন দিট্ঠো গরুল়ো মযা;

আসীৰিসেন ৰিত্তোতি [ৰিত্তোস্মি (স্যা. ক.)], ৰজ্জো ব্রাহ্মণ মং ৰিদূ’’.

৮৩১. ‘‘কিং নু তুয্হং বলং অত্থি, কিং সিপ্পং ৰিজ্জতে তৰ;

কিস্মিং ৰা ত্ৰং পরত্থদ্ধো, উরগং নাপচাযসি’’.

৮৩২. ‘‘আরঞ্ঞিকস্স ইসিনো, চিররত্তং তপস্সিনো;

সুপণ্ণো কোসিযস্সক্খা, ৰিসৰিজ্জং অনুত্তরং.

৮৩৩. ‘‘তং ভাৰিতত্তঞ্ঞতরং, সম্মন্তং পব্বতন্তরে;

সক্কচ্চং তং উপট্ঠাসিং, রত্তিন্দিৰমতন্দিতো.

৮৩৪. ‘‘সো তদা পরিচিণ্ণো মে, ৰত্তৰা ব্রহ্মচরিযৰা;

দিব্বং পাতুকরী মন্তং, কামসা ভগৰা মম.

৮৩৫. ‘‘ত্যাহং মন্তে পরত্থদ্ধো, নাহং ভাযামি ভোগিনং;

আচরিযো ৰিসঘাতানং, অলম্পানোতি [আলম্বানোতি (সী. পী.), আলম্বাযনোতি (স্যা.)] মং ৰিদূ’’.

৮৩৬. ‘‘গণ্হামসে মণিং তাত, সোমদত্ত ৰিজানহি;

মা দণ্ডেন সিরিং পত্তং, কামসা পজহিম্হসে’’.

৮৩৭. ‘‘সকং নিৰেসনং পত্তং, যো তং ব্রাহ্মণ পূজযি;

এৰং কল্যাণকারিস্স, কিং মোহা দুব্ভিমিচ্ছসি’’.

৮৩৮. ‘‘সচে ত্ৰং [সচে হি (সী. পী. ক.)] ধনকামোসি, ভূরিদত্তো পদস্সতি [ভূরিদত্তং পদিস্সসি (ক.)];

তমেৰ গন্ত্ৰা যাচস্সু, বহুং দস্সতি তে ধনং’’.

৮৩৯. ‘‘হত্থগতং পত্তগতং, নিকিণ্ণং খাদিতুং ৰরং;

মা নো সন্দিট্ঠিকো অত্থো, সোমদত্ত উপচ্চগা’’.

৮৪০. ‘‘পচ্চতি নিরযে ঘোরে, মহিস্সমপি ৰিৰরতি [মহিস্সমৰ দীযতি (সী. পী.), মহিমস্স ৰিন্দ্রীযতি (স্যা.)];

মিত্তদুব্ভী হিতচ্চাগী, জীৰরেৰাপি সুস্সতি [জীৰরে চাপি সুস্সরে (সী. পী.)].

৮৪১. ‘‘সচে ত্ৰং [সচে হি (সী. পী. ক.)] ধনকামোসি, ভূরিদত্তো পদস্সতি;

মঞ্ঞে অত্তকতং ৰেরং, নচিরং ৰেদযিস্সসি’’.

৮৪২. ‘‘মহাযঞ্ঞং যজিত্ৰান, এৰং সুজ্ঝন্তি ব্রাহ্মণা;

মহাযঞ্ঞং যজিস্সাম, এৰং মোক্খাম পাপকা’’.

৮৪৩. ‘‘হন্দ দানি অপাযামি, নাহং অজ্জ তযা সহ;

পদম্পেকং [পদমেকং (স্যা. ক.)] ন গচ্ছেয্যং, এৰং কিব্বিসকারিনা’’.

৮৪৪. ‘‘ইদং ৰত্ৰান পিতরং, সোমদত্তো বহুস্সুতো;

উজ্ঝাপেত্ৰান ভূতানি, তম্হা ঠানা অপক্কমি.

৮৪৫. ‘‘গণ্হাহেতং মহানাগং, আহরেতং মণিং মম;

ইন্দগোপকৰণ্ণাভো, যস্স লোহিতকো সিরো.

৮৪৬. ‘‘কপ্পাসপিচুরাসীৰ, এসো কাযো পদিস্সতি [কায’স্স দিস্সতি (সী. পী.)];

ৰম্মিকগ্গগতো সেতি, তং ত্ৰং গণ্হাহি ব্রাহ্মণ’’.

৮৪৭. ‘‘অথোসধেহি দিব্বেহি, জপ্পং মন্তপদানি চ;

এৰং তং অসক্খি সত্থুং [সট্ঠুং (সী. পী.), যুট্ঠুং (স্যা.), সুত্তুং (ক.)], কত্ৰা পরিত্তমত্তনো’’.

৮৪৮. ‘‘মমং দিস্ৰান আযন্তং, সব্বকামসমিদ্ধিনং;

ইন্দ্রিযানি অহট্ঠানি, সাৰং [সামং (সী. পী.)] জাতং মুখং তৰ.

৮৪৯. ‘‘পদ্মং যথা হত্থগতং, পাণিনা পরিমদ্দিতং;

সাৰং জাতং [যন্তং (ক.)] মুখং তুয্হং, মমং দিস্ৰান এদিসং.

৮৫০. ‘‘কচ্চি নু তে নাভিসসি [তে নাভিসযি (সী.), তে নাভিস্সসি (স্যা.)], কচ্চি তে অত্থি ৰেদনা;

যেন সাৰং মুখং তুয্হং, মমং দিস্ৰান আগতং’’.

৮৫১. ‘‘সুপিনং তাত অদ্দক্খিং, ইতো মাসং অধোগতং;

দক্খিণং ৰিয মে বাহুং, ছেত্ৰা রুহিরমক্খিতং;

পুরিসো আদায পক্কামি, মম রোদন্তিযা সতি.

৮৫২. ‘‘যতোহং [যতো তং (সী.)] সুপিনমদ্দক্খিং, সুদস্সন ৰিজানহি;

ততো দিৰা ৰা রত্তিং ৰা, সুখং মে নোপলব্ভতি’’.

৮৫৩. ‘‘যং পুব্বে পরিৰারিংসু [পরিচারিংসু (সী. পী.)], কঞ্ঞা রুচিরৰিগ্গহা;

হেমজালপটিচ্ছন্না, ভূরিদত্তো ন দিস্সতি.

৮৫৪. ‘‘যং পুব্বে পরিৰারিংসু [পরিচারিংসু (সী. পী.)], নেত্তিংসৰরধারিনো;

কণিকারাৰ সম্ফুল্লা, ভূরিদত্তো ন দিস্সতি.

৮৫৫. ‘‘হন্দ দানি গমিস্সাম, ভূরিদত্তনিৰেসনং;

ধম্মট্ঠং সীলসম্পন্নং, পস্সাম তৰ ভাতরং’’.

৮৫৬. ‘‘তঞ্চ দিস্ৰান আযন্তিং, ভূরিদত্তস্স মাতরং;

বাহা পগ্গয্হ পক্কন্দুং, ভূরিদত্তস্স নারিযো.

৮৫৭. ‘‘পুত্তং তেয্যে ন জানাম, ইতো মাসং অধোগতং;

মতং ৰা যদি ৰা জীৰং, ভূরিদত্তং যসস্সিনং’’.