৯. উপাহনৰগ্গো

২৩১. উপাহনজাতকং (২-৯-১)

১৬১. যথাপি কীতা পুরিসস্সুপাহনা, সুখস্স অত্থায দুখং উদব্বহে;

ঘম্মাভিতত্তা থলসা পপীল়িতা, তস্সেৰ পাদে পুরিসস্স খাদরে.

১৬২. এৰমেৰ যো দুক্কুলীনো অনরিযো, তম্মাক [তম্হাক (সী.), তুম্হাক (স্যা. পী.)] ৰিজ্জঞ্চ সুতঞ্চ আদিয;

তমেৰ সো তত্থ সুতেন খাদতি, অনরিযো ৰুচ্চতি দুপাহনূপমোতি [পানদূপমোতি (সী. পী.)].

উপাহনজাতকং পঠমং.

২৩২. ৰীণাগুণজাতকং (২-৯-২)

১৬৩. একচিন্তিতো যমত্থো, বালো অপরিণাযকো;

ন হি খুজ্জেন ৰামেন, ভোতি সঙ্গন্তুমরহসি.

১৬৪. পুরিসূসভং মঞ্ঞমানা, অহং খুজ্জমকামযিং;

সোযং সংকুটিতো সেতি, ছিন্নতন্তি যথা ৰিণাতি [থুণাতি (সী.)].

ৰীণাগুণজাতকং দুতিযং.

২৩৩. ৰিকণ্ণজাতকং (২-৯-৩)

১৬৫. কামং যহিং ইচ্ছসি তেন গচ্ছ, ৰিদ্ধোসি মম্মম্হি [মমস্মি (ক.)] ৰিকণ্ণকেন;

হতোসি ভত্তেন সুৰাদিতেন [সৰাদিতেন (সী. স্যা. পী.)], লোলো চ মচ্ছে অনুবন্ধমানো.

১৬৬. এৰম্পি লোকামিসং ওপতন্তো, ৰিহঞ্ঞতী চিত্তৰসানুৰত্তী;

সো হঞ্ঞতি ঞাতিসখান মজ্ঝে, মচ্ছানুগো সোরিৰ সুংসুমারোতি [সুসুমারো (ক.)].

ৰিকণ্ণজাতকং ততিযং.

২৩৪. অসিতাভূজাতকং (২-৯-৪)

১৬৭. ত্ৰমেৰ দানিমকর [মকরি (স্যা.), মকরা (ক. সী.)], যং কামো ব্যগমা তযি;

সোযং অপ্পটিসন্ধিকো, খরছিন্নংৰ রেনুকং [রেরুকং (সী. পী.)].

১৬৮. অত্রিচ্ছং [অত্রিচ্ছা (সী. স্যা. পী.)] অতিলোভেন, অতিলোভমদেন চ;

এৰং হাযতি অত্থম্হা, অহংৰ অসিতাভুযাতি.

অসিতাভূজাতকং চতুত্থং.

২৩৫. ৰচ্ছনখজাতকং (২-৯-৫)

১৬৯. সুখা ঘরা ৰচ্ছনখ, সহিরঞ্ঞা সভোজনা;

যত্থ ভুত্ৰা পিৰিত্ৰা চ, সযেয্যাথ অনুস্সুকো.

১৭০. ঘরা নানীহমানস্স, ঘরা নাভণতো মুসা;

ঘরা নাদিন্নদণ্ডস্স, পরেসং অনিকুব্বতো [অনিক্রুব্বতো (ক.)];

এৰং ছিদ্দং দুরভিসম্ভৰং [দুরভিভৰং (সী. পী.)], কো ঘরং পটিপজ্জতীতি.

ৰচ্ছনখজাতকং পঞ্চমং.

২৩৬. বকজাতকং (২-৯-৬)

১৭১. ভদ্দকো ৰতযং পক্খী, দিজো কুমুদসন্নিভো;

ৰূপসন্তেহি পক্খেহি, মন্দমন্দোৰ ঝাযতি.

১৭২. নাস্স সীলং ৰিজানাথ, অনঞ্ঞায পসংসথ;

অম্হে দিজো ন পালেতি, তেন পক্খী ন ফন্দতীতি.

বকজাতকং ছট্ঠং.

২৩৭. সাকেতজাতকং (২-৯-৭)

১৭৩. কো নু খো ভগৰা হেতু, একচ্চে ইধ পুগ্গলে;

অতীৰ হদযং নিব্বাতি, চিত্তঞ্চাপি পসীদতি.

১৭৪. পুব্বেৰ সন্নিৰাসেন, পচ্চুপ্পন্নহিতেন ৰা;

এৰং তং জাযতে পেমং, উপ্পলংৰ যথোদকেতি.

সাকেতজাতকং সত্তমং.

২৩৮. একপদজাতকং (২-৯-৮)

১৭৫. ইঙ্ঘ একপদং তাত, অনেকত্থপদস্সিতং [পদনিস্সিতং (সী. পী.)];

কিঞ্চি সঙ্গাহিকং ব্রূসি, যেনত্থে সাধযেমসে.

১৭৬. দক্খেয্যেকপদং তাত, অনেকত্থপদস্সিতং;

তঞ্চ সীলেন সঞ্ঞুত্তং, খন্তিযা উপপাদিতং;

অলং মিত্তে সুখাপেতুং, অমিত্তানং দুখায চাতি.

একপদজাতকং অট্ঠমং.

২৩৯. হরিতমণ্ডূকজাতকং (২-৯-৯)

১৭৭. আসীৰিসম্পি মং [আসীৰিসং মমং (সী. পী.)] সন্তং, পৰিট্ঠং কুমিনামুখং;

রুচ্চতে হরিতামাতা, যং মং খাদন্তি মচ্ছকা.

১৭৮. ৰিলুম্পতেৰ পুরিসো, যাৰস্স উপকপ্পতি;

যদা চঞ্ঞে ৰিলুম্পন্তি, সো ৰিলুত্তো ৰিলুম্পতীতি [ৰিলুপ্পতীতি (?)].

হরিতমণ্ডূকজাতকং নৰমং.

২৪০. মহাপিঙ্গলজাতকং (২-৯-১০)

১৭৯. সব্বো জনো হিংসিতো পিঙ্গলেন, তস্মিং মতে পচ্চযা [পচ্চযং (সী. স্যা. পী.)] ৰেদযন্তি;

পিযো নু তে আসি অকণ্হনেত্তো, কস্মা নু ত্ৰং রোদসি দ্ৰারপাল.

১৮০. ন মে পিযো আসি অকণ্হনেত্তো, ভাযামি পচ্চাগমনায তস্স;

ইতো গতো হিংসেয্য মচ্চুরাজং, সো হিংসিতো আনেয্য পুন ইধ.

১৮১. দড্ঢো ৰাহসহস্সেহি, সিত্তো ঘটসতেহি সো;

পরিক্খতা চ সা ভূমি, মা ভাযি নাগমিস্সতীতি.

মহাপিঙ্গলজাতকং দসমং.

উপাহনৰগ্গো নৰমো.

তস্সুদ্দানং –

ৰরুপাহন খুজ্জ ৰিকণ্ণককো, অসিতাভুয পঞ্চমৰচ্ছনখো;

দিজ পেমৰরুত্তমএকপদং, কুমিনামুখ পিঙ্গলকেন দসাতি.