২. দুকনিপাতো

১. দল়্হৰগ্গো

১৫১. রাজোৰাদজাতকং (২-১-১)

১. দল়্হং দল়্হস্স খিপতি, বল্লিকো [মল্লিকো (সী. পী.)] মুদুনা মুদুং;

সাধুম্পি সাধুনা জেতি, অসাধুম্পি অসাধুনা;

এতাদিসো অযং রাজা, মগ্গা উয্যাহি সারথি.

২. অক্কোধেন জিনে কোধং, অসাধুং সাধুনা জিনে;

জিনে কদরিযং দানেন, সচ্চেনালিকৰাদিনং;

এতাদিসো অযং রাজা, মগ্গা উয্যাহি সারথীতি.

রাজোৰাদজাতকং পঠমং.

১৫২. অসমেক্খিতকম্মন্তং, তুরিতাভিনিপাতিনং.

সানি কম্মানি তপ্পেন্তি, উণ্হংৰজ্ঝোহিতং মুখে.

৪. সীহো চ সীহনাদেন, দদ্দরং অভিনাদযি;

সুত্ৰা সীহস্স নিগ্ঘোসং, সিঙ্গালো [সিগালো (সী. স্যা. পী.)] দদ্দরে ৰসং;

ভীতো সন্তাসমাপাদি, হদযঞ্চস্স অপ্ফলীতি.

সিঙ্গালজাতকং [সিগালজাতকং (সী. স্যা. পী.)] দুতিযং.

১৫৩. সূকরজাতকং (২-১-৩)

৫. চতুপ্পদো অহং সম্ম, ত্ৰম্পি সম্ম চতুপ্পদো;

এহি সম্ম [সীহ (সী. পী.)] নিৰত্তস্সু, কিং নু ভীতো পলাযসি.

৬. অসুচি পূতিলোমোসি, দুগ্গন্ধো ৰাসি সূকর;

সচে যুজ্ঝিতুকামোসি, জযং সম্ম দদামি তেতি.

সূকরজাতকং ততিযং.

১৫৪. উরগজাতক (২-১-৪)

৭. ইধূরগানং পৰরো পৰিট্ঠো, সেলস্স ৰণ্ণেন পমোক্খমিচ্ছং;

ব্রহ্মঞ্চ ৰণ্ণং [ৰক্কং (ক.)] অপচাযমানো, বুভুক্খিতো নো ৰিতরামি [ৰিসহামি (ক. সি. স্যা. পী.)] ভোত্তুং.

৮. সো ব্রহ্মগুত্তো চিরমেৰ জীৰ, দিব্যা চ তে পাতুভৰন্তু ভক্খা;

যো ব্রহ্মৰণ্ণং অপচাযমানো, বুভুক্খিতো নো ৰিতরাসি [সব্বত্থপি সমানং] ভোত্তুন্তি.

উরগজাতকং চতুত্থং.

১৫৫. ভগ্গজাতকং (২-১-৫)

৯. জীৰ ৰস্সসতং ভগ্গ [গগ্গ (সী. পী.)], অপরানি চ ৰীসতিং [ৰীসতি (স্যা. ক.)];

মা মং পিসাচা খাদন্তু, জীৰ ত্ৰং সরদো সতং.

১০. ত্ৰম্পি ৰস্সসতং জীৰ, অপরানি চ ৰীসতিং;

ৰিসং পিসাচা খাদন্তু, জীৰ ত্ৰং সরদো সতন্তি.

ভগ্গজাতকং পঞ্চমং.

১৫৬. অলীনচিত্তজাতকং (২-১-৬)

১১. অলীনচিত্তং নিস্সায, পহট্ঠা মহতী চমূ;

কোসলং সেনাসন্তুট্ঠং, জীৰগ্গাহং অগাহযি.

১২. এৰং নিস্সযসম্পন্নো, ভিক্খু আরদ্ধৰীরিযো;

ভাৰযং কুসলং ধম্মং, যোগক্খেমস্স পত্তিযা;

পাপুণে অনুপুব্বেন, সব্বসংযোজনক্খযন্তি.

অলীনচিত্তজাতকং ছট্ঠং.

১৫৭. গুণজাতকং (২-১-৭)

১৩. যেন কামং পণামেতি, ধম্মো বলৰতং মিগী;

উন্নদন্তী ৰিজানাহি, জাতং সরণতো ভযং.

১৪. অপি চেপি দুব্বলো মিত্তো, মিত্তধম্মেসু তিট্ঠতি;

সো ঞাতকো চ বন্ধু চ, সো মিত্তো সো চ মে সখা;

দাঠিনি মাতিমঞ্ঞিত্থো [মঞ্ঞিৰো (স্যা.), মঞ্ঞৰ্হো (ক.)], সিঙ্গালো মম পাণদোতি.

গুণজাতকং সত্তমং.

১৫৮. সুহনুজাতকং (২-১-৮)

১৫. নযিদং ৰিসমসীলেন, সোণেন সুহনূ সহ;

সুহনূপি তাদিসোযেৰ, যো সোণস্স সগোচরো.

১৬. পক্খন্দিনা পগব্ভেন, নিচ্চং সন্দানখাদিনা;

সমেতি পাপং পাপেন, সমেতি অসতা অসন্তি.

সুহনুজাতকং অট্ঠমং.

১৫৯. মোরজাতকং (২-১-৯)

১৭. উদেতযং চক্খুমা একরাজা, হরিস্সৰণ্ণো পথৰিপ্পভাসো [পঠৰিপ্পভাসো (সী. স্যা. পী.)];

তং তং নমস্সামি হরিস্সৰণ্ণং পথৰিপ্পভাসং, তযাজ্জ গুত্তা ৰিহরেমু দিৰসং.

যে ব্রাহ্মণা ৰেদগূ সব্বধম্মে, তে মে নমো তে চ মং পালযন্তু;

নমত্থু বুদ্ধানং [বুদ্ধান (?)] নমত্থু বোধিযা, নমো ৰিমুত্তানং [ৰিমুত্তান (?)] নমো ৰিমুত্তিযা;

ইমং সো পরিত্তং কত্ৰা, মোরো চরতি এসনা.

১৮. অপেতযং চক্খুমা একরাজা, হরিস্সৰণ্ণো পথৰিপ্পভাসো;

তং তং নম্মস্সামি হরিস্সৰণ্ণং পথৰিপ্পভাসং, তযাজ্জ গুত্তা ৰিহরেমু রত্তিং.

যে ব্রাহ্মণা ৰেদগূ সব্বধম্মে, তে মে নমো তে চ মং পালযন্তু;

নমত্থু বুদ্ধানং নমত্থু বোধিযা, নমো ৰিমুত্তানং নমো ৰিমুত্তিযা;

ইমং সো পরিত্তং কত্ৰা, মোরো ৰাসমকপ্পযীতি.

মোরজাতকং নৰমং.

১৬০. ৰিনীলজাতকং (২-১-১০)

১৯. এৰমেৰ নূন [নু (ক.)] রাজানং, ৰেদেহং মিথিলগ্গহং;

অস্সা ৰহন্তি আজঞ্ঞা, যথা হংসা ৰিনীলকং.

২০. ৰিনীল দুগ্গং ভজসি, অভূমিং তাত সেৰসি;

গামন্তকানি [গামন্তিকানি (সী.), গামন্তরানি (ক.)] সেৰস্সু, এতং মাতালযং তৰাতি.

ৰিনীলজাতকং দসমং.

দল়্হৰগ্গো পঠমো.

তস্সুদ্দানং –

ৰরবল্লিক দদ্দর সূকরকো, উরগূত্তম পঞ্চমভগ্গৰরো;

মহতীচমু যাৰ সিঙ্গালৰরো, সুহনুত্তম মোর ৰিনীলং দসাতি.

২. সন্থৰৰগ্গো

১৬১. ইন্দসমানগোত্তজাতকং (২-২-১)

২১. ন সন্থৰং [সন্ধৰং (ক.)] কাপুরিসেন কযিরা, অরিযো অনরিযেন পজানমত্থং;

চিরানুৰুত্থোপি করোতি পাপং, গজো যথা ইন্দসমানগোত্তং.

২২. যং ত্ৰেৰ জঞ্ঞা সদিসো মমন্তি, সীলেন পঞ্ঞায সুতেন চাপি;

তেনেৰ মেত্তিং কযিরাথ সদ্ধিং, সুখো হৰে সপ্পুরিসেন সঙ্গমোতি.

ইন্দসমানগোত্তজাতকং পঠমং.

১৬২. সন্থৰজাতকং (২-২-২)

২৩. ন সন্থৰস্মা পরমত্থি পাপিযো, যো সন্থৰো [সন্ধৰো (ক.)] কাপুরিসেন হোতি;

সন্তপ্পিতো সপ্পিনা পাযসেন [পাযাসেন (ক.)], কিচ্ছাকতং পণ্ণকুটিং অদয্হি [অদড্ঢহি (সী. স্যা.), অদট্ঠহি (পী.), অদদ্দহি (?)].

২৪. ন সন্থৰস্মা পরমত্থি সেয্যো, যো সন্থৰো সপ্পুরিসেন হোতি;

সীহস্স ব্যগ্ঘস্স চ দীপিনো চ, সামা মুখং লেহতি সন্থৰেনাতি.

সন্থৰজাতকং দুতিযং.

১৬৩. সুসীমজাতকং (২-২-৩)

২৫. কাল়া মিগা সেতদন্তা তৰীমে [তৰ ইমে (সী. স্যা. পী.)], পরোসতং হেমজালাভিছন্না [হেমজালাভিসঞ্ছন্না (সী.)];

তে তে দদামীতি সুসীম ব্রূসি, অনুস্সরং পেত্তিপিতামহানং.

২৬. কাল়া মিগা সেতদন্তা মমীমে [মম ইমে (সী. পী.)], পরোসতং হেমজালাভিচ্ছন্না;

তে তে দদামীতি ৰদামি মাণৰ, অনুস্সরং পেত্তিপিতামহানন্তি.

সুসীমজাতকং ততিযং.

১৬৪. গিজ্ঝজাতকং (২-২-৪)

২৭. যং নু গিজ্ঝো যোজনসতং, কুণপানি অৰেক্খতি;

কস্মা জালঞ্চ পাসঞ্চ, আসজ্জাপি ন বুজ্ঝসি.

২৮. যদা পরাভৰো হোতি, পোসো জীৰিতসঙ্খযে;

অথ জালঞ্চ পাসঞ্চ, আসজ্জাপি ন বুজ্ঝতীতি.

গিজ্ঝজাতকং চতুত্থং.

১৬৫. নকুলজাতকং (২-২-৫)

২৯. সন্ধিং কত্ৰা অমিত্তেন, অণ্ডজেন জলাবুজ;

ৰিৰরিয দাঠং সেসি [সযসি (সী. স্যা. পী.)], কুতো তে ভযমাগতং.

৩০. সঙ্কেথেৰ [সঙ্কতেৰ (ক.)] অমিত্তস্মিং, মিত্তস্মিম্পি ন ৰিস্সসে;

অভযা ভযমুপ্পন্নং, অপি মূলানি কন্ততীতি [মূলং নিকন্ততীতি (সী.)].

নকুলজাতকং পঞ্চমং.

১৬৬. উপসাল়কজাতকং (২-২-৬)

৩১. উপসাল়কনামানি [উপসাল়্হকনামানং (সী. স্যা. পী.)], সহস্সানি চতুদ্দস;

অস্মিং পদেসে দড্ঢানি, নত্থি লোকে অনামতং.

৩২. যম্হি সচ্চঞ্চ ধম্মো চ, অহিংসা সংযমো দমো;

এতং অরিযা সেৰন্তি, এতং লোকে অনামতন্তি.

উপসাল়কজাতকং ছট্ঠং.

১৬৭. সমিদ্ধিজাতকং (২-২-৭)

৩৩. অভুত্ৰা ভিক্খসি ভিক্খু, ন হি ভুত্ৰান ভিক্খসি;

ভুত্ৰান ভিক্খু ভিক্খস্সু, মা তং কালো উপচ্চগা.

৩৪. কালং ৰোহং ন জানামি, ছন্নো কালো ন দিস্সতি;

তস্মা অভুত্ৰা ভিক্খামি, মা মং কালো উপচ্চগাতি.

সমিদ্ধিজাতকং সত্তমং.

১৬৮. সকুণগ্ঘিজাতকং (২-২-৮)

৩৫. সেনো বলসা পতমানো, লাপং গোচরঠাযিনং;

সহসা অজ্ঝপ্পত্তোৰ, মরণং তেনুপাগমি.

৩৬. সোহং নযেন সম্পন্নো, পেত্তিকে গোচরে রতো;

অপেতসত্তু মোদামি, সম্পস্সং অত্থমত্তনোতি.

সকুণগ্ঘিজাতকং অট্ঠমং.

১৬৯. অরকজাতকং (২-২-৯)

৩৭. যো ৰে মেত্তেন চিত্তেন, সব্বলোকানুকম্পতি;

উদ্ধং অধো চ তিরিযং, অপ্পমাণেন সব্বসো.

৩৮. অপ্পমাণং হিতং চিত্তং, পরিপুণ্ণং সুভাৰিতং;

যং পমাণকতং কম্মং, ন তং তত্রাৰসিস্সতীতি.

অরকজাতকং নৰমং.

১৭০. ককণ্টকজাতকং (২-২-১০)

৩৯. নাযং পুরে উণ্ণমতি [উন্নমতি (স্যা.)], তোরণগ্গে ককণ্টকো;

মহোসধ ৰিজানাহি, কেন থদ্ধো ককণ্টকো.

৪০. অলদ্ধপুব্বং লদ্ধান, অড্ঢমাসং ককণ্টকো;

অতিমঞ্ঞতি রাজানং, ৰেদেহং মিথিলগ্গহন্তি.

ককণ্টকজাতকং দসমং.

সন্থৰৰগ্গো দুতিযো.

তস্সুদ্দানং –

অথ ইন্দসমান সপণ্ণকুটি, সুসিমুত্তম গিজ্ঝ জলাবুজকো;

উপসাল়ক ভিক্খু সলাপৰরো, অথ মেত্তৰরো দসপুণ্ণমতীতি.

৩. কল্যাণৰগ্গো

১৭১. কল্যাণধম্মজাতকং (২-৩-১)

৪১. কল্যাণধম্মোতি যদা জনিন্দ, লোকে সমঞ্ঞং অনুপাপুণাতি;

তস্মা ন হিয্যেথ [হীযেথ (সী.)] নরো সপঞ্ঞো, হিরিযাপি সন্তো ধুরমাদিযন্তি.

৪২. সাযং সমঞ্ঞা ইধ মজ্জ পত্তা, কল্যাণধম্মোতি জনিন্দ লোকে;

তাহং সমেক্খং ইধ পব্বজিস্সং, ন হি মত্থি ছন্দো ইধ কামভোগেতি.

কল্যাণধম্মজাতকং পঠমং.

১৭২. দদ্দরজাতকং (২-৩-২)

৪৩. কো নু সদ্দেন মহতা, অভিনাদেতি দদ্দরং;