১০. সিঙ্গালৰগ্গো

২৪১. সব্বদাঠিজাতকং (২-১০-১)

১৮২. সিঙ্গালো মানথদ্ধো চ, পরিৰারেন অত্থিকো;

পাপুণি মহতিং ভূমিং, রাজাসি সব্বদাঠিনং.

১৮৩. এৰমেৰ মনুস্সেসু, যো হোতি পরিৰারৰা;

সো হি তত্থ মহা হোতি, সিঙ্গালো ৰিয দাঠিনন্তি.

সব্বদাঠিজাতকং পঠমং.

২৪২. সুনখজাতকং (২-১০-২)

১৮৪. বালো ৰতাযং সুনখো, যো ৰরত্তং [যো চ যোত্তং (ক.)] ন খাদতি;

বন্ধনা চ পমুঞ্চেয্য, অসিতো চ ঘরং ৰজে.

১৮৫. অট্ঠিতং মে মনস্মিং মে, অথো মে হদযে কতং;

কালঞ্চ পটিকঙ্খামি, যাৰ পস্সুপতূ জনো [পসুপতুজ্জনো (স্যা. ক.)].

সুনখজাতকং দুতিযং.

২৪৩. গুত্তিলজাতকং (২-১০-৩)

১৮৬. সত্ততন্তিং সুমধুরং, রামণেয্যং অৰাচযিং;

সো মং রঙ্গম্হি অৰ্হেতি, সরণং মে হোহি কোসিয.

১৮৭. অহং তং সরণং সম্ম [অহং তে সরণং হোমি (ৰি. ৰ. ৩২৮)], অহমাচরিযপূজকো;

ন তং জযিস্সতি সিস্সো, সিস্সমাচরিয জেস্সসীতি.

গুত্তিলজাতকং ততিযং.

২৪৪. ৰিগতিচ্ছজাতকং (২-১০-৪)

১৮৮. যং পস্সতি ন তং ইচ্ছতি, যঞ্চ ন পস্সতি তং কিরিচ্ছতি;

মঞ্ঞামি চিরং চরিস্সতি, ন হি তং লচ্ছতি যং স ইচ্ছতি.

১৮৯. যং লভতি ন তেন তুস্সতি, যঞ্চ পত্থেতি লদ্ধং হীল়েতি;

ইচ্ছা হি অনন্তগোচরা, ৰিগতিচ্ছান [ৰীতিচ্ছানং (সী. পী.)] নমো করোমসেতি.

ৰিগতিচ্ছ [ৰীতিচ্ছ (সী. পী.)] জাতকং চতুত্থং.

২৪৫. মূলপরিযাযজাতকং (২-১০-৫)

১৯০. কালো ঘসতি ভূতানি, সব্বানেৰ সহত্তনা;

যো চ কালঘসো ভূতো, স ভূতপচনিং পচি.

১৯১. বহূনি নরসীসানি, লোমসানি ব্রহানি চ;

গীৰাসু পটিমুক্কানি, কোচিদেৰেত্থ কণ্ণৰাতি.

মূলপরিযাযজাতকং পঞ্চমং.

২৪৬. বালোৰাদজাতকং (২-১০-৬)

১৯২. হন্ত্ৰা ছেত্ৰা [ঝত্ৰা (সী. পী.), ঘত্ৰা (স্যা.)] ৰধিত্ৰা চ, দেতি দানং অসঞ্ঞতো;

এদিসং ভত্তং ভুঞ্জমানো, স পাপমুপলিম্পতি [স পাপেন উপলিপ্পতি (সী. পী.)].

১৯৩. পুত্তদারম্পি চে হন্ত্ৰা, দেতি দানং অসঞ্ঞতো;

ভুঞ্জমানোপি সপ্পঞ্ঞো, ন পাপমুপলিম্পতীতি.

বালোৰাদজাতকং ছট্ঠং.

২৪৭. পাদঞ্জলীজাতকং (২-১০-৭)

১৯৪. অদ্ধা পাদঞ্জলী সব্বে, পঞ্ঞায অতিরোচতি;

তথা হি ওট্ঠং ভঞ্জতি, উত্তরিং নূন পস্সতি.

১৯৫. নাযং ধম্মং অধম্মং ৰা, অত্থানত্থঞ্চ বুজ্ঝতি;

অঞ্ঞত্র ওট্ঠনিব্ভোগা, নাযং জানাতি কিঞ্চনন্তি.

পাদঞ্জলীজাতকং সত্তমং.

২৪৮. কিংসুকোপমজাতকং (২-১০-৮)

১৯৬. সব্বেহি কিংসুকো দিট্ঠো, কিংন্ৰেত্থ ৰিচিকিচ্ছথ;

ন হি সব্বেসু ঠানেসু, সারথী পরিপুচ্ছিতো.

১৯৭. এৰং সব্বেহি ঞাণেহি, যেসং ধম্মা অজানিতা;

তে ৰে ধম্মেসু কঙ্খন্তি, কিংসুকস্মিংৰ ভাতরোতি.

কিংসুকোপমজাতকং অট্ঠমং.

২৪৯. সালকজাতকং (২-১০-৯)

১৯৮. একপুত্তকো ভৰিস্সসি, ত্ৰঞ্চ নো হেস্সসি ইস্সরো কুলে;

ওরোহ দুমস্মা সালক, এহি দানি ঘরকং ৰজেমসে.

১৯৯. ননু মং সুহদযোতি [ননু মং হদযেতি (সী. পী.)] মঞ্ঞসি, যঞ্চ মং হনসি ৰেল়ুযট্ঠিযা;

পক্কম্বৰনে রমামসে, গচ্ছ ত্ৰং ঘরকং যথাসুখন্তি.

সালকজাতকং নৰমং.

২৫০. কপিজাতকং (২-১০-১০)

২০০. অযং ইসী উপসমসংযমে রতো, স তিট্ঠতি [সন্তিট্ঠতি (সী. পী.)] সিসিরভযেন অট্টিতো;

হন্দ অযং পৰিসতুমং অগারকং, ৰিনেতু সীতং দরথঞ্চ কেৰলং.

২০১. নাযং ইসী উপসমসংযমে রতো, কপী অযং দুমৰরসাখগোচরো;

সো দূসকো রোসকো চাপি জম্মো, সচেৰজেমম্পি [সচে + আৰজে + ইমম্পি] দূসেয্যগারন্তি [দূসযে ঘরন্তি (সী. স্যা. পী.)].

কপিজাতকং দসমং.

সিঙ্গালৰগ্গো দসমো.

তস্সুদ্দানং –

অথ রাজা সিঙ্গালৰরো সুনখো, তথা কোসিয ইচ্ছতি কালঘসো;

অথ দানৰরোট্ঠপি সারথিনা, পুনম্বৰনঞ্চ সিসিরকপি দসাতি.

অথ ৰগ্গুদ্দানং –

দল়্হঞ্চ ৰগ্গং অপরেন সন্থৰং, কল্যাণৰগ্গাসদিসো চ রূহকং;

নতংদল়্হ বীরণথম্ভকং পুন, কাসাৰুপাহন সিঙ্গালকেন দসাতি.

দুকনিপাতং নিট্ঠিতং.