৮. কাসাৰৰগ্গো

২২১. কাসাৰজাতকং (২-৮-১)

১৪১. অনিক্কসাৰো কাসাৰং, যো ৰত্থং পরিদহিস্সতি [পরিদহেস্সতি (সী. পী.)];

অপেতো দমসচ্চেন, ন সো কাসাৰমরহতি.

১৪২. যো চ ৰন্তকসাৰস্স, সীলেসু সুসমাহিতো;

উপেতো দমসচ্চেন, স ৰে কাসাৰমরহতীতি.

কাসাৰজাতকং পঠমং.

২২২. চূল়নন্দিযজাতকং (২-৮-২)

১৪৩. ইদং তদাচরিযৰচো, পারাসরিযো যদব্রৰি [পোরাণাচরিযোব্রৰি (ক.)];

মাসু ত্ৰং অকরি [অকরা (সী. পী.)] পাপং, যং ত্ৰং পচ্ছা কতং তপে.

১৪৪. যানি করোতি পুরিসো, তানি অত্তনি পস্সতি;

কল্যাণকারী কল্যাণং, পাপকারী চ পাপকং;

যাদিসং ৰপতে বীজং, তাদিসং হরতে ফলন্তি.

চূল়নন্দিযজাতকং দুতিযং.

২২৩. পুটভত্তজাতকং (২-৮-৩)

১৪৫. নমে নমন্তস্স ভজে ভজন্তং, কিচ্চানুকুব্বস্স করেয্য কিচ্চং;

নানত্থকামস্স করেয্য অত্থং, অসম্ভজন্তম্পি ন সম্ভজেয্য.

১৪৬. চজে চজন্তং ৰনথং ন কযিরা, অপেতচিত্তেন ন সম্ভজেয্য;

দিজো দুমং খীণফলন্তি ঞত্ৰা, অঞ্ঞং সমেক্খেয্য মহা হি লোকোতি.

পুটভত্তজাতকং ততিযং.

২২৪. কুম্ভিলজাতকং (২-৮-৪)

১৪৭. যস্সেতে চতুরো ধম্মা, ৰানরিন্দ যথা তৰ;

সচ্চং ধম্মো ধিতি চাগো, দিট্ঠং সো অতিৰত্ততি.

১৪৮. যস্স চেতে ন ৰিজ্জন্তি, গুণা পরমভদ্দকা;

সচ্চং ধম্মো ধিতি চাগো, দিট্ঠং সো নাতিৰত্ততীতি.

কুম্ভিলজাতকং চতুত্থং.

২২৫. খন্তিৰণ্ণজাতকং (২-৮-৫)

১৪৯. অত্থি মে পুরিসো দেৰ, সব্বকিচ্চেসু ব্যাৰটো [ৰাৰটো (ক.)];

তস্স চেকোপরাধত্থি, তত্থ ত্ৰং কিন্তি মঞ্ঞসি.

১৫০. অম্হাকম্পত্থি পুরিসো, এদিসো ইধ ৰিজ্জতি;

দুল্লভো অঙ্গসম্পন্নো, খন্তিরস্মাক রুচ্চতীতি.

খন্তিৰণ্ণজাতকং পঞ্চমং.

২২৬. কোসিযজাতকং (২-৮-৬)

১৫১. কালে নিক্খমনা সাধু, নাকালে সাধু নিক্খমো;

অকালেন হি নিক্খম্ম, এককম্পি বহুজ্জনো;

ন কিঞ্চি অত্থং জোতেতি, ধঙ্কসেনাৰ কোসিযং.

১৫২. ধীরো চ ৰিধিৰিধানঞ্ঞূ, পরেসং ৰিৰরানুগূ;

সব্বামিত্তে ৰসীকত্ৰা, কোসিযোৰ সুখী সিযাতি.

কোসিযজাতকং ছট্ঠং.

২২৭. গূথপাণজাতকং (২-৮-৭)

১৫৩. সূরো সূরেন সঙ্গম্ম, ৰিক্কন্তেন পহারিনা;

এহি নাগ নিৰত্তস্সু, কিং নু ভীতো পলাযসি;

পস্সন্তু অঙ্গমগধা, মম তুয্হঞ্চ ৰিক্কমং.

১৫৪. ন তং পাদা ৰধিস্সামি, ন দন্তেহি ন সোণ্ডিযা;

মীল়্হেন তং ৰধিস্সামি, পূতি হঞ্ঞতু পূতিনাতি.

গূথপাণজাতকং সত্তমং.

২২৮. কামনীতজাতকং (২-৮-৮)

১৫৫. তযো গিরিং অন্তরং কামযামি, পঞ্চালা কুরুযো কেককে চ [কুরযো কেকযে চ (সী.)];

ততুত্তরিং [তদুত্তরিং (ক.)] ব্রাহ্মণ কামযামি, তিকিচ্ছ মং ব্রাহ্মণ কামনীতং.

১৫৬. কণ্হাহিদট্ঠস্স করোন্তি হেকে, অমনুস্সপৰিট্ঠস্স [অমনুস্সৰদ্ধস্স (সী. পী.), অমনুস্সৰিট্ঠস্স (স্যা.)] করোন্তি পণ্ডিতা;

ন কামনীতস্স করোতি কোচি, ওক্কন্তসুক্কস্স হি কা তিকিচ্ছাতি.

কামনীতজাতকং অট্ঠমং.

২২৯. পলাযিতজাতকং (২-৮-৯)

১৫৭. গজগ্গমেঘেহি হযগ্গমালিভি, রথূমিজাতেহি সরাভিৰস্সেভি [সরাভিৰস্সভি (স্যা. সী. অট্ঠ.), সরাভিৰস্সিভি (?)];

থরুগ্গহাৰট্ট [ধনুগ্গহাৰট্ট (ক.)] দল়্হপ্পহারিভি, পরিৰারিতা তক্কসিলা সমন্ততো.

১৫৮. [অভিধাৰথা চ পতথা চ, ৰিৰিধৰিনদিতা চ দন্তিভি; ৰত্ততজ্জ তুমুলো ঘোসো, যথা ৰিজ্জুতা জলধরস্স গজ্জতোতি; (সী. পী. ক.)] অভিধাৰথ চূপধাৰথ চ [অভিধাৰথা চুপ্পতথা চ (স্যা.)], ৰিৰিধা ৰিনাদিতা [ৰিনাদিতত্থ (ক.)] ৰদন্তিভি;

ৰত্ততজ্জ তুমুলো ঘোসো যথা, ৰিজ্জুলতা জলধরস্স গজ্জতোতি [অভিধাৰথা চ পতথা চ, ৰিৰিধৰিনদিতা চ দন্তিভি; ৰত্ততজ্জ তুমুলো ঘোসো, যথা ৰিজ্জুতা জলধরস্স গজ্জতোতি; (সী. পী. ক.)].

পলাযিতজাতকং নৰমং.

২৩০. দুতিযপলাযিতজাতকং (২-৮-১০)

১৫৯. ধজমপরিমিতং অনন্তপারং, দুপ্পসহংধঙ্কেহি সাগরংৰ [সাগরমিৰ (সী. স্যা. পী.)];

গিরিমিৰঅনিলেন দুপ্পসয্হো [দুপ্পসহো (সী. পী. ক.)], দুপ্পসহো অহমজ্জতাদিসেন.

১৬০. মা বালিযং ৰিলপি [ৰিপ্পলপি (বহূসু)] ন হিস্স তাদিসং, ৰিডয্হসে [ৰিল়য্হসে (সী. পী.)] ন হি লভসে নিসেধকং;

আসজ্জসি গজমিৰ একচারিনং, যো তং পদা নল়মিৰ পোথযিস্সতীতি.

দুতিযপলাযিতজাতকং দসমং.

কাসাৰৰগ্গো অট্ঠমো.

তস্সুদ্দানং –

ৰরৰত্থৰচো দুমখীণফলং, চতুরোধম্মৰরং পুরিসুত্তম;

ধঙ্কমগধা চ তযোগিরিনাম, গজগ্গৰরো ধজৰরেন দসাতি.