৭. বীরণথম্ভৰগ্গো

২১১. সোমদত্তজাতকং (২-৭-১)

১২১. অকাসি যোগ্গং ধুৰমপ্পমত্তো, সংৰচ্ছরং বীরণথম্ভকস্মিং;

ব্যাকাসি সঞ্ঞং পরিসং ৰিগয্হ, ন নিয্যমো তাযতি অপ্পপঞ্ঞং.

১২২. দ্ৰযং যাচনকো তাত, সোমদত্ত নিগচ্ছতি;

অলাভং ধনলাভং ৰা, এৰং ধম্মা হি যাচনাতি.

সোমদত্তজাতকং পঠমং.

২১২. উচ্ছিট্ঠভত্তজাতকং (২-৭-২)

১২৩. অঞ্ঞো উপরিমো ৰণ্ণো, অঞ্ঞো ৰণ্ণো চ হেট্ঠিমো;

ব্রাহ্মণী ত্ৰেৰ পুচ্ছামি, কিং হেট্ঠা কিঞ্চ উপ্পরি.

১২৪. অহং নটোস্মি ভদ্দন্তে, ভিক্খকোস্মি ইধাগতো;

অযঞ্হি কোট্ঠমোতিণ্ণো, অযং সো যং [ত্ৰং (ক.)] গৰেসসীতি.

উচ্ছিট্ঠভত্তজাতকং দুতিযং.

২১৩. ভরুজাতকং (২-৭-৩)

১২৫. ইসীনমন্তরং কত্ৰা, ভরুরাজাতি [কুরুরাজাতি (ক.)] মে সুতং;

উচ্ছিন্নো সহ রট্ঠেহি [রট্ঠেন (সী. পী.)], সরাজা ৰিভৰঙ্গতো.

১২৬. তস্মা হি ছন্দাগমনং, নপ্পসংসন্তি পণ্ডিতা;

অদুট্ঠচিত্তো ভাসেয্য, গিরং সচ্চুপসংহিতন্তি.

ভরুজাতকং [কুরুরাতকং (ক.)] ততিযং.

২১৪. পুণ্ণনদীজাতকং (২-৭-৪)

১২৭. পুণ্ণং নদিং যেন চ পেয্যমাহু, জাতং যৰং যেন চ গুয্হমাহু;

দূরং গতং যেন চ অৰ্হযন্তি, সো ত্যাগতো [ত্যাভতো (স্যা. ক.) পহেল়িগাথাভাৰো মনসি কাতব্বো] হন্দ চ ভুঞ্জ ব্রাহ্মণ.

১২৮. যতো মং সরতী রাজা, ৰাযসম্পি পহেতৰে;

হংসা কোঞ্চা মযূরা চ [হংসকোঞ্চমযূরানং (ক. অট্ঠ. পাঠন্তরং)], অসতীযেৰ পাপিযাতি.

পুণ্ণনদীজাতকং চতুত্থং.

২১৫. কচ্ছপজাতকং (২-৭-৫)

১২৯. অৰধী ৰত অত্তানং, কচ্ছপো ব্যাহরং গিরং [কচ্ছপোৰ পব্যাহরং (স্যা.), কচ্ছপো সো পব্যাহরং (ক.)];

সুগ্গহীতস্মিং কট্ঠস্মিং, ৰাচায সকিযাৰধি.

১৩০. এতম্পি দিস্ৰা নরৰীরিযসেট্ঠ, ৰাচং পমুঞ্চে কুসলং নাতিৰেলং;

পস্সসি বহুভাণেন, কচ্ছপং ব্যসনং গতন্তি.

কচ্ছপজাতকং পঞ্চমং.

২১৬. মচ্ছজাতকং (২-৭-৬)

১৩১. ন মাযমগ্গি তপতি, ন সূলো সাধুতচ্ছিতো;

যঞ্চ মং মঞ্ঞতে মচ্ছী, অঞ্ঞং সো রতিযা গতো.

১৩২. সো মং দহতি রাগগ্গি, চিত্তং চূপতপেতি মং;

জালিনো মুঞ্চথাযিরা মং, ন কামে হঞ্ঞতে ক্ৰচীতি.

মচ্ছজাতকং ছট্ঠং.

২১৭. সেগ্গুজাতকং (২-৭-৭)

১৩৩. সব্বো লোকো অত্তমনো অহোসি, অকোৰিদা গামধম্মস্স সেগ্গু;

কোমারি কো নাম [কোমারিকা নাম (ক.), কোমারিকো নাম (স্যা. পী.)] তৰজ্জ ধম্মো, যং ত্ৰং গহিতা পৰনে পরোদসি.

১৩৪. যো দুক্খফুট্ঠায ভৰেয্য তাণং, সো মে পিতা দুব্ভি ৰনে করোতি;

সা কস্স কন্দামি ৰনস্স মজ্ঝে, যো তাযিতা সো সহসং করোতীতি.

সেগ্গুজাতকং সত্তমং.

২১৮. কূটৰাণিজজাতকং (২-৭-৮)

১৩৫. সঠস্স সাঠেয্যমিদং সুচিন্তিতং, পচ্চোড্ডিতং পটিকূটস্স কূটং;

ফালঞ্চে খাদেয্যুং [অদেয্যুং (সী. পী.)] মূসিকা, কস্মা কুমারং কুললা ন [নো (সী. স্যা. পী.)] হরেয্যুং.

১৩৬. কূটস্স হি সন্তি [সন্তীধ (ক.)] কূটকূটা, ভৰতি [ভৰন্তি (ক.)] চাপি নিকতিনো নিকত্যা;

দেহি পুত্তনট্ঠ ফালনট্ঠস্স ফালং, মা তে পুত্তমহাসি ফালনট্ঠোতি.

কূটৰাণিজজাতকং অট্ঠমং.

২১৯. গরহিতজাতকং (২-৭-৯)

১৩৭. হিরঞ্ঞং মে সুৰণ্ণং মে, এসা রত্তিং দিৰা কথা;

দুম্মেধানং মনুস্সানং, অরিযধম্মং অপস্সতং.

১৩৮. দ্ৰে দ্ৰে গহপতযো গেহে, একো তত্থ অমস্সুকো;

লম্বত্থনো ৰেণিকতো, অথো অঙ্কিতকণ্ণকো;

কীতো ধনেন বহুনা, সো তং ৰিতুদতে জনন্তি.

গরহিতজাতকং নৰমং.

২২০. ধম্মধজজাতকং (২-৭-১০)

১৩৯. সুখং জীৰিতরূপোসি, রট্ঠা ৰিৰনমাগতো;

সো এককো রুক্খমূলে [অরঞ্ঞস্মিং (সী. স্যা. পী.)], কপণো ৰিয ঝাযসি.

১৪০. সুখং জীৰিতরূপোস্মি, রট্ঠা ৰিৰনমাগতো;

সো এককো রুক্খমূলে, কপণো ৰিয ঝাযামি;

সতং ধম্মং অনুস্সরংতি.

ধম্মধজজাতকং দসমং.

বীরণথম্ভৰগ্গো সত্তমো.

তস্সুদ্দানং –

অথ বীরণথম্ভৰরো চ নটো, ভরুরাজৰরুত্তমপুণ্ণনদী;

বহুভাণি অগ্গিপৰনে মূসিকা, সহলম্বত্থনো কপণেন দসাতি.