৬. নতংদল়্হৰগ্গো

২০১. বন্ধনাগারজাতকং (২-৬-১)

১০১. ন তং দল়্হং বন্ধনমাহু ধীরা, যদাযসং দারুজপব্বজঞ্চ [বব্বজঞ্চ (সী.)];

সারত্তরত্তা মণিকুণ্ডলেসু, পুত্তেসু দারেসু চ যা অপেক্খা.

১০২. এতং দল়্হং বন্ধনমাহু ধীরা, ওহারিনং সিথিলং দুপ্পমুঞ্চং;

এতম্পি ছেত্ৰান ৰজন্তি ধীরা, অনপেক্খিনো কামসুখং পহাযাতি.

বন্ধনাগারজাতকং পঠমং.

২০২. কেল়িসীলজাতকং (২-৬-২)

১০৩. হংসা কোঞ্চা মযূরা চ, হত্থযো [হত্থিনো (সী.), হত্থিযো (স্যা. পী.)] পসদা মিগা;

সব্বে সীহস্স ভাযন্তি, নত্থি কাযস্মি তুল্যতা.

১০৪. এৰমেৰ মনুস্সেসু, দহরো চেপি পঞ্ঞৰা;

সো হি তত্থ মহা হোতি, নেৰ বালো সরীরৰাতি.

কেল়িসীলজাতকং দুতিযং.

২০৩. খণ্ডজাতকং (২-৬-৩)

১০৫. ৰিরূপক্খেহি মে মেত্তং, মেত্তং এরাপথেহি মে;

ছব্যাপুত্তেহি মে মেত্তং, মেত্তং কণ্হাগোতমকেহি চ.

অপাদকেহি মে মেত্তং, মেত্তং দ্ৰিপাদকেহি মে;

চতুপ্পদেহি মে মেত্তং, মেত্তং বহুপ্পদেহি মে.

মা মং অপাদকো হিংসি, মা মং হিংসি দ্ৰিপাদকো;

মা মং চতুপ্পদো হিংসি, মা মং হিংসি বহুপ্পদো.

সব্বে সত্তা সব্বে পাণা, সব্বে ভূতা চ কেৰলা;

সব্বে ভদ্রানি পস্সন্তু, মা কঞ্চি [কিঞ্চি (স্যা. ক.)] পাপমাগমা.

১০৬. অপ্পমাণো বুদ্ধো, অপ্পমাণো ধম্মো;

অপ্পমাণো সঙ্ঘো, পমাণৰন্তানি সরীসপানি [সিরিসপানি (সী. স্যা. পী.)];

অহিৰিচ্ছিকসতপদী, উণ্ণনাভি [উণ্ণানাভি (সী. স্যা. পী.)] সরবূমূসিকা.

কতা মে রক্খা কতা মে পরিত্তা, পটিক্কমন্তু ভূতানি;

সোহং নমো ভগৰতো, নমো সত্তন্নং সম্মাসম্বুদ্ধানন্তি.

খণ্ডজাতকং ততিযং.

২০৪. ৰীরকজাতকং (২-৬-৪)

১০৭. অপি ৰীরক পস্সেসি, সকুণং মঞ্জুভাণকং;

মযূরগীৰসঙ্কাসং, পতিং ময্হং সৰিট্ঠকং.

১০৮. উদকথলচরস্স পক্খিনো, নিচ্চং আমকমচ্ছভোজিনো;

তস্সানুকরং সৰিট্ঠকো, সেৰালে পলিগুণ্ঠিতো মতোতি.

ৰীরকজাতকং চতুত্থং.

২০৫. গঙ্গেয্যজাতকং (২-৬-৫)

১০৯. সোভতি মচ্ছো গঙ্গেয্যো, অথো সোভতি যামুনো [সোভন্তি মচ্ছা গঙ্গেয্যা, অথো সোভন্তি যামুনা (স্যা. পী.)];

চতুপ্পদোযং পুরিসো, নিগ্রোধপরিমণ্ডলো;

ঈসকাযত [ঈসমাযত (ক.)] গীৰো চ, সব্বেৰ অতিরোচতি.

১১০. যং পুচ্ছিতো ন তং অক্খাসি [অক্খা (সী. স্যা. পী.)], অঞ্ঞং অক্খাসি [অক্খাতি (স্যা. পী.)] পুচ্ছিতো;

অত্তপ্পসংসকো পোসো, নাযং অস্মাক রুচ্চতীতি.

গঙ্গেয্যজাতকং পঞ্চমং.

২০৬. কুরুঙ্গমিগজাতকং (২-৬-৬)

১১১. ইঙ্ঘ ৰদ্ধমযং [ৰদ্ধমযং (সী. স্যা. পী.)] পাসং, ছিন্দ দন্তেহি কচ্ছপ;

অহং তথা করিস্সামি, যথা নেহিতি লুদ্দকো.

১১২. কচ্ছপো পাৰিসী ৰারিং, কুরুঙ্গো পাৰিসী ৰনং;

সতপত্তো দুমগ্গম্হা, দূরে পুত্তে অপানযীতি.

কুরুঙ্গমিগজাতকং ছট্ঠং.

২০৭. অস্সকজাতকং (২-৬-৭)

১১৩. অযমস্সকরাজেন, দেসো ৰিচরিতো মযা;

অনুকাময কামেন [অনুকামযৰনুকামেন (সী. পী.)], পিযেন পতিনা সহ.

১১৪. নৰেন সুখদুক্খেন, পোরাণং অপিধীযতি [অপিথীযতি (সী. পী.), অপিথিয্যতি (স্যা.)];

তস্মা অস্সকরঞ্ঞাৰ, কীটো পিযতরো মমাতি.

অস্সকজাতকং সত্তমং.

২০৮. সুসুমারজাতকং (২-৬-৮)

১১৫. অলং মেতেহি অম্বেহি, জম্বূহি পনসেহি চ;

যানি পারং সমুদ্দস্স, ৰরং ময্হং উদুম্বরো.

১১৬. মহতী ৰত তে বোন্দি, ন চ পঞ্ঞা তদূপিকা;

সুসুমার [সুংসুমার (সী. স্যা. পী.)] ৰঞ্চিতো মেসি, গচ্ছ দানি যথাসুখন্তি.

সুসুমারজাতকং অট্ঠমং.

২০৯. কুক্কুটজাতকং (২-৬-৯)

১১৭. দিট্ঠা মযা ৰনে রুক্খা, অস্সকণ্ণা ৰিভীটকা [ৰিভেদকা (স্যা. ক.)];

ন তানি এৰং সক্কন্তি, যথা ত্ৰং রুক্খ সক্কসি.

১১৮. পুরাণকুক্কুটো [কক্করো (সী. স্যা. পী.)] অযং, ভেত্ৰা পঞ্জরমাগতো;

কুসলো ৰাল়পাসানং, অপক্কমতি ভাসতীতি.

কুক্কুট [কক্কর (সী. স্যা. পী.)] জাতকং নৰমং.

২১০. কন্দগলকজাতকং (২-৬-১০)

১১৯. অম্ভো কো নাম যং রুক্খো, সিন্নপত্তো [সীনপত্তো (সী. পী.)] সকণ্টকো;

যত্থ একপ্পহারেন, উত্তমঙ্গং ৰিভিজ্জিতং [ৰিসাটিকং (সী. স্যা. পী.), ৰিঘাটিতং (সী. নিয্য)].

১২০. অচারি ৰতাযং ৰিতুদং ৰনানি, কট্ঠঙ্গরুক্খেসু অসারকেসু;

অথাসদা খদিরং জাতসারং [জাতিসারং (ক.)], যত্থব্ভিদা গরুল়ো উত্তমঙ্গন্তি.

কন্দগলক [কন্দলক (ক.)] জাতকং দসমং.

নতংদল়্হৰগ্গো ছট্ঠো.

তস্সুদ্দানং –

দল়্হবন্ধন হংসৰরো চ পুন, ৰিরূপক্খ সৰিট্ঠক মচ্ছৰরো;

সকুরুঙ্গ সঅস্সক অম্বৰরো, পুন কুক্কুটকো গরুল়েন দসাতি.