৫. রুহকৰগ্গো

১৯১. রুহকজাতকং (২-৫-১)

৮১. অপি [অম্ভো (স্যা. ক. সী.)] রুহক ছিন্নাপি, জিযা সন্ধীযতে পুন;

সন্ধীযস্সু পুরাণিযা, মা কোধস্স ৰসং গমি.

৮২. ৰিজ্জমানেসু ৰাকেসু [ৰিজ্জমানাসু মরুৰাসু (সী.), ৰিজ্জমানাসু মরূদ্ৰাসু (পী.)], ৰিজ্জমানেসু কারিসু;

অঞ্ঞং জিযং করিস্সামি, অলঞ্ঞেৰ পুরাণিযাতি.

রুহকজাতকং পঠমং.

১৯২. সিরিকাল়কণ্ণিজাতকং (২-৫-২)

৮৩. ইত্থী সিযা রূপৰতী, সা চ সীলৰতী সিযা;

পুরিসো তং ন ইচ্ছেয্য, সদ্দহাসি মহোসধ.

৮৪. সদ্দহামি মহারাজ, পুরিসো দুব্ভগো সিযা;

সিরী চ কাল়কণ্ণী চ, ন সমেন্তি কুদাচনন্তি.

সিরিকাল়কণ্ণিজাতকং দুতিযং.

১৯৩. চূল়পদুমজাতকং (২-৫-৩)

৮৫. অযমেৰ সা অহমপি [অহম্পি (সী. স্যা. পী.), অহস্মি (ক.)] সো অনঞ্ঞো, অযমেৰ সো হত্থচ্ছিন্নো অনঞ্ঞো;

যমাহ ‘‘কোমারপতী মম’’ন্তি, ৰজ্ঝিত্থিযো নত্থি ইত্থীসু সচ্চং.

৮৬. ইমঞ্চ জম্মং মুসলেন হন্ত্ৰা, লুদ্দং ছৰং পরদারূপসেৰিং;

ইমিস্সা চ নং পাপপতিব্বতায, জীৰন্তিযা ছিন্দথ কণ্ণনাসন্তি.

চূল়পদুমজাতকং ততিযং.

১৯৪. মণিচোরজাতকং (২-৫-৪)

৮৭. ন সন্তি দেৰা পৰসন্তি নূন, ন হি নূন সন্তি ইধ লোকপালা;

সহসা করোন্তানমসঞ্ঞতানং, ন হি নূন সন্তী পটিসেধিতারো.

৮৮. অকালে ৰস্সতী তস্স, কালে তস্স ন ৰস্সতি;

সগ্গা চ চৰতি ঠানা, ননু সো তাৰতা হতোতি.

মণিচোরজাতকং চতুত্থং.

১৯৫. পব্বতূপত্থরজাতকং (২-৫-৫)

৮৯. পব্বতূপত্থরে [পব্বতপত্থরে (সী. স্যা. পী.)] রম্মে, জাতা পোক্খরণী সিৰা;

তং সিঙ্গালো অপাপাযি [অপাপাসি (সী. স্যা. পী.)], জানং সীহেন রক্খিতং.

৯০. পিৰন্তি চে [পিৰন্তি ৰে (সী.), পিৰন্তিৰ (পী.), পিৰন্তেৰ (?)] মহারাজ, সাপদানি মহানদিং;

ন তেন অনদী হোতি, খমস্সু যদি তে পিযাতি.

পব্বতূপত্থর [পব্বতপত্থর (সী. স্যা. পী.)] জাতকং পঞ্চমং.

১৯৬. ৰলাহকস্সজাতকং (২-৫-৬)

৯১. যে ন কাহন্তি ওৰাদং, নরা বুদ্ধেন দেসিতং;

ব্যসনং তে গমিস্সন্তি, রক্খসীহিৰ ৰাণিজা.

৯২. যে চ কাহন্তি ওৰাদং, নরা বুদ্ধেন দেসিতং;

সোত্থিং পারং গমিস্সন্তি, ৰলাহেনেৰ [ৰালাহেনেৰ (সী. পী.)] ৰাণিজাতি.

ৰলাহকস্স [ৰালাহস্স (সী. পী.)] জাতকং ছট্ঠং.

১৯৭. মিত্তামিত্তজাতকং (২-৫-৭)

৯৩. ন নং উম্হযতে দিস্ৰা, ন চ নং পটিনন্দতি;

চক্খূনি চস্স ন দদাতি, পটিলোমঞ্চ ৰত্ততি.

৯৪. এতে ভৰন্তি আকারা, অমিত্তস্মিং পতিট্ঠিতা;

যেহি অমিত্তং জানেয্য, দিস্ৰা সুত্ৰা চ পণ্ডিতোতি.

মিত্তামিত্তজাতকং সত্তমং.

১৯৮. রাধজাতকং (২-৫-৮)

৯৫. পৰাসা আগতো তাত, ইদানি নচিরাগতো;

কচ্চিন্নু তাত তে মাতা, ন অঞ্ঞমুপসেৰতি.

৯৬. ন খো পনেতং সুভণং, গিরং সচ্চুপসংহিতং;

সযেথ পোট্ঠপাদোৰ, মুম্মুরে [মুম্মুরে (স্যা.), মং পুরে (ক.) মুম্মুরসদ্দো থুসগ্গিম্হি কুক্কুল়ে চ ৰত্ততীতি সক্কতাভিধানেসু] উপকূথিতোতি [উপকূসিতোতি (সী. স্যা. পী.), উপকূলিতো (ক.)].

রাধজাতকং অট্ঠমং.

১৯৯. গহপতিজাতকং (২-৫-৯)

৯৭. উভযং মে ন খমতি, উভযং মে ন রুচ্চতি;

যাচাযং কোট্ঠমোতিণ্ণা, নাদ্দসং ইতি ভাসতি.

৯৮. তং তং গামপতি ব্রূমি, কদরে অপ্পস্মি জীৰিতে;

দ্ৰে মাসে সঙ্গরং কত্ৰা [কারং কত্ৰান (সী. পী.), সংকরং কত্ৰা (ক.)], মংসং জরগ্গৰং কিসং;

অপ্পত্তকালে চোদেসি, তম্পি ময্হং ন রুচ্চতীতি.

গহপতিজাতকং নৰমং.

২০০. সাধুসীলজাতকং (২-৫-১০)

৯৯. সরীরদব্যং ৰুড্ঢব্যং [ৰদ্ধব্যং (সী. পী.)], সোজচ্চং সাধুসীলিযং;

ব্রাহ্মণং তেৰ পুচ্ছাম, কন্নু তেসং ৰনিম্হসে [ৰণিম্হসে (সী. পী.)].

১০০. অত্থো অত্থি সরীরস্মিং, ৰুড্ঢব্যস্স নমো করে;

অত্থো অত্থি সুজাতস্মিং, সীলং অস্মাক রুচ্চতীতি.

সাধুসীলজাতকং দসমং.

রুহকৰগ্গো পঞ্চমো.

তস্সুদ্দানং –

অপিরুহক রূপৰতী মুসলো, পৰসন্তি সপঞ্চমপোক্খরণী;

অথ মুত্তিমৰাণিজ উম্হযতে, চিরআগত কোট্ঠ সরীর দসাতি.