৪. অসদিসৰগ্গো

১৮১. অসদিসজাতকং (২-৪-১)

৬১. ধনুগ্গহো অসদিসো, রাজপুত্তো মহব্বলো;

দূরেপাতী অক্খণৰেধী, মহাকাযপ্পদালনো.

৬২. সব্বামিত্তে রণং কত্ৰা, ন চ কঞ্চি ৰিহেঠযি;

ভাতরং সোত্থিং কত্ৰান, সংযমং অজ্ঝুপাগমীতি.

অসদিসজাতকং পঠমং.

১৮২. সঙ্গামাৰচরজাতকং (২-৪-২)

৬৩. সঙ্গামাৰচরো সূরো, বলৰা ইতি ৰিস্সুতো;

কিং নু তোরণমাসজ্জ, পটিক্কমসি কুঞ্জর.

৬৪. ওমদ্দ খিপ্পং পলিঘং, এসিকানি চ অব্বহ [উব্বহ (স্যা.), অব্ভুহ (ক.)];

তোরণানি চ মদ্দিত্ৰা, খিপ্পং পৰিস কুঞ্জরাতি.

সঙ্গামাৰচরজাতকং দুতিযং.

১৮৩. ৰালোদকজাতকং (২-৪-৩)

৬৫. ৰালোদকং অপ্পরসং নিহীনং, পিত্ৰা [পীত্ৰা (সী. পী.)] মদো জাযতি গদ্রভানং;

ইমঞ্চ পিত্ৰান রসং পণীতং, মদো ন সঞ্জাযতি সিন্ধৰানং.

৬৬. অপ্পং পিৰিত্ৰান নিহীনজচ্চো, সো মজ্জতী তেন জনিন্দ পুট্ঠো [ফুট্ঠো (সী. স্যা.), মুট্ঠো (ক.)];

ধোরয্হসীলী চ কুলম্হি জাতো, ন মজ্জতী অগ্গরসং পিৰিত্ৰাতি.

ৰালোদকজাতকং ততিযং.

১৮৪. গিরিদত্তজাতকং (২-৪-৪)

৬৭. দূসিতো গিরিদত্তেন [গিরিদন্তেন (পী.)], হযো সামস্স পণ্ডৰো;

পোরাণং পকতিং হিত্ৰা, তস্সেৰানুৰিধিয্যতি [নুৰিধীযতি (সী. পী.)].

৬৮. সচে চ তনুজো পোসো, সিখরাকার [সিঙ্গারাকার (স্যা.)] কপ্পিতো;

আননে নং [তং (সী. স্যা. পী.)] গহেত্ৰান, মণ্ডলে পরিৰত্তযে;

খিপ্পমেৰ পহন্ত্ৰান, তস্সেৰানুৰিধিয্যতীতি.

গিরিদত্তজাতকং চতুত্থং.

১৮৫. অনভিরতিজাতকং (২-৪-৫)

৬৯. যথোদকে আৰিলে অপ্পসন্নে, ন পস্সতি সিপ্পিকসম্বুকঞ্চ;

সক্খরং ৰালুকং মচ্ছগুম্বং, এৰং আৰিলম্হি [আৰিলে হি (সী.)] চিত্তে;

ন পস্সতি অত্তদত্থং পরত্থং.

৭০. যথোদকে অচ্ছে ৰিপ্পসন্নে, সো পস্সতি সিপ্পিকসম্বুকঞ্চ;

সক্খরং ৰালুকং মচ্ছগুম্বং, এৰং অনাৰিলম্হি চিত্তে;

সো পস্সতি অত্তদত্থং পরত্থন্তি.

অনভিরতিজাতকং পঞ্চমং.

১৮৬. দধিৰাহনজাতকং (২-৪-৬)

৭১. ৰণ্ণগন্ধরসূপেতো, অম্বোযং অহুৰা পুরে;

তমেৰ পূজং লভমানো, কেনম্বো কটুকপ্ফলো.

৭২. পুচিমন্দপরিৰারো, অম্বো তে দধিৰাহন;

মূলং মূলেন সংসট্ঠং, সাখা সাখা [সাখং (স্যা. ক.)] নিসেৰরে [নিৰীসরে (ক.)];

অসাতসন্নিৰাসেন, তেনম্বো কটুকপ্ফলোতি.

দধিৰাহনজাতকং ছট্ঠং.

১৮৭. চতুমট্ঠজাতকং (২-৪-৭)

৭৩. উচ্চে ৰিটভিমারুয্হ, মন্তযৰ্হো রহোগতা;

নীচে ওরুয্হ মন্তৰ্হো, মিগরাজাপি সোস্সতি.

৭৪. যং সুৰণ্ণো সুৰণ্ণেন [যং সুপণ্ণো সুপণ্ণেন (সী. স্যা. পী.)], দেৰো দেৰেন মন্তযে;

কিং তেত্থ চতুমট্ঠস্স, বিলং পৰিস জম্বুকাতি.

চতুমট্ঠজাতকং সত্তমং.

১৮৮. সীহকোত্থুজাতকং (২-৪-৮)

৭৫. সীহঙ্গুলী সীহনখো, সীহপাদপতিট্ঠিতো;

সো সীহো সীহসঙ্ঘম্হি, একো নদতি অঞ্ঞথা.

৭৬. মা ত্ৰং নদি রাজপুত্ত, অপ্পসদ্দো ৰনে ৰস;

সরেন খো [মা (ক.)] তং জানেয্যুং, ন হি তে পেত্তিকো সরোতি.

সীহকোত্থুজাতকং অট্ঠমং.

১৮৯. সীহচম্মজাতকং (২-৪-৯)

৭৭. নেতং সীহস্স নদিতং, ন ব্যগ্ঘস্স ন [ব্যগ্ঘস্স ন চ (ক.)] দীপিনো;

পারুতো সীহচম্মেন, জম্মো নদতি গদ্রভো.

৭৮. চিরম্পি খো তং খাদেয্য, গদ্রভো হরিতং যৰং;

পারুতো সীহচম্মেন, রৰমানোৰ দূসযীতি.

সীহচম্মজাতকং নৰমং.

১৯০. সীলানিসংসজাতকং (২-৪-১০)

৭৯. পস্স সদ্ধায সীলস্স, চাগস্স চ অযং ফলং;

নাগো নাৰায ৰণ্ণেন, সদ্ধং ৰহতুপাসকং.

৮০. সব্ভিরেৰ সমাসেথ, সব্ভি কুব্বেথ সন্থৰং;

সতঞ্হি সন্নিৰাসেন, সোত্থিং গচ্ছতি ন্হাপিতোতি.

সীলানিসংসজাতকং দসমং.

অসদিসৰগ্গো চতুত্থো.

তস্সুদ্দানং –

ধনুগ্গহ কুঞ্জর অপ্পরসো, গিরিদত্তমনাৰিলচিত্তৰরং;

দধিৰাহন জম্বূক সীহনখো, হরিতযৰ নাগৰরেন দসাতি.