২. সন্থৰৰগ্গো

১৬১. ইন্দসমানগোত্তজাতকং (২-২-১)

২১. ন সন্থৰং [সন্ধৰং (ক.)] কাপুরিসেন কযিরা, অরিযো অনরিযেন পজানমত্থং;

চিরানুৰুত্থোপি করোতি পাপং, গজো যথা ইন্দসমানগোত্তং.

২২. যং ত্ৰেৰ জঞ্ঞা সদিসো মমন্তি, সীলেন পঞ্ঞায সুতেন চাপি;

তেনেৰ মেত্তিং কযিরাথ সদ্ধিং, সুখো হৰে সপ্পুরিসেন সঙ্গমোতি.

ইন্দসমানগোত্তজাতকং পঠমং.

১৬২. সন্থৰজাতকং (২-২-২)

২৩. ন সন্থৰস্মা পরমত্থি পাপিযো, যো সন্থৰো [সন্ধৰো (ক.)] কাপুরিসেন হোতি;

সন্তপ্পিতো সপ্পিনা পাযসেন [পাযাসেন (ক.)], কিচ্ছাকতং পণ্ণকুটিং অদয্হি [অদড্ঢহি (সী. স্যা.), অদট্ঠহি (পী.), অদদ্দহি (?)].

২৪. ন সন্থৰস্মা পরমত্থি সেয্যো, যো সন্থৰো সপ্পুরিসেন হোতি;

সীহস্স ব্যগ্ঘস্স চ দীপিনো চ, সামা মুখং লেহতি সন্থৰেনাতি.

সন্থৰজাতকং দুতিযং.

১৬৩. সুসীমজাতকং (২-২-৩)

২৫. কাল়া মিগা সেতদন্তা তৰীমে [তৰ ইমে (সী. স্যা. পী.)], পরোসতং হেমজালাভিছন্না [হেমজালাভিসঞ্ছন্না (সী.)];

তে তে দদামীতি সুসীম ব্রূসি, অনুস্সরং পেত্তিপিতামহানং.

২৬. কাল়া মিগা সেতদন্তা মমীমে [মম ইমে (সী. পী.)], পরোসতং হেমজালাভিচ্ছন্না;

তে তে দদামীতি ৰদামি মাণৰ, অনুস্সরং পেত্তিপিতামহানন্তি.

সুসীমজাতকং ততিযং.

১৬৪. গিজ্ঝজাতকং (২-২-৪)

২৭. যং নু গিজ্ঝো যোজনসতং, কুণপানি অৰেক্খতি;

কস্মা জালঞ্চ পাসঞ্চ, আসজ্জাপি ন বুজ্ঝসি.

২৮. যদা পরাভৰো হোতি, পোসো জীৰিতসঙ্খযে;

অথ জালঞ্চ পাসঞ্চ, আসজ্জাপি ন বুজ্ঝতীতি.

গিজ্ঝজাতকং চতুত্থং.

১৬৫. নকুলজাতকং (২-২-৫)

২৯. সন্ধিং কত্ৰা অমিত্তেন, অণ্ডজেন জলাবুজ;

ৰিৰরিয দাঠং সেসি [সযসি (সী. স্যা. পী.)], কুতো তে ভযমাগতং.

৩০. সঙ্কেথেৰ [সঙ্কতেৰ (ক.)] অমিত্তস্মিং, মিত্তস্মিম্পি ন ৰিস্সসে;

অভযা ভযমুপ্পন্নং, অপি মূলানি কন্ততীতি [মূলং নিকন্ততীতি (সী.)].

নকুলজাতকং পঞ্চমং.

১৬৬. উপসাল়কজাতকং (২-২-৬)

৩১. উপসাল়কনামানি [উপসাল়্হকনামানং (সী. স্যা. পী.)], সহস্সানি চতুদ্দস;

অস্মিং পদেসে দড্ঢানি, নত্থি লোকে অনামতং.

৩২. যম্হি সচ্চঞ্চ ধম্মো চ, অহিংসা সংযমো দমো;

এতং অরিযা সেৰন্তি, এতং লোকে অনামতন্তি.

উপসাল়কজাতকং ছট্ঠং.

১৬৭. সমিদ্ধিজাতকং (২-২-৭)

৩৩. অভুত্ৰা ভিক্খসি ভিক্খু, ন হি ভুত্ৰান ভিক্খসি;

ভুত্ৰান ভিক্খু ভিক্খস্সু, মা তং কালো উপচ্চগা.

৩৪. কালং ৰোহং ন জানামি, ছন্নো কালো ন দিস্সতি;

তস্মা অভুত্ৰা ভিক্খামি, মা মং কালো উপচ্চগাতি.

সমিদ্ধিজাতকং সত্তমং.

১৬৮. সকুণগ্ঘিজাতকং (২-২-৮)

৩৫. সেনো বলসা পতমানো, লাপং গোচরঠাযিনং;

সহসা অজ্ঝপ্পত্তোৰ, মরণং তেনুপাগমি.

৩৬. সোহং নযেন সম্পন্নো, পেত্তিকে গোচরে রতো;

অপেতসত্তু মোদামি, সম্পস্সং অত্থমত্তনোতি.

সকুণগ্ঘিজাতকং অট্ঠমং.

১৬৯. অরকজাতকং (২-২-৯)

৩৭. যো ৰে মেত্তেন চিত্তেন, সব্বলোকানুকম্পতি;

উদ্ধং অধো চ তিরিযং, অপ্পমাণেন সব্বসো.

৩৮. অপ্পমাণং হিতং চিত্তং, পরিপুণ্ণং সুভাৰিতং;

যং পমাণকতং কম্মং, ন তং তত্রাৰসিস্সতীতি.

অরকজাতকং নৰমং.

১৭০. ককণ্টকজাতকং (২-২-১০)

৩৯. নাযং পুরে উণ্ণমতি [উন্নমতি (স্যা.)], তোরণগ্গে ককণ্টকো;

মহোসধ ৰিজানাহি, কেন থদ্ধো ককণ্টকো.

৪০. অলদ্ধপুব্বং লদ্ধান, অড্ঢমাসং ককণ্টকো;

অতিমঞ্ঞতি রাজানং, ৰেদেহং মিথিলগ্গহন্তি.

ককণ্টকজাতকং দসমং.

সন্থৰৰগ্গো দুতিযো.

তস্সুদ্দানং –

অথ ইন্দসমান সপণ্ণকুটি, সুসিমুত্তম গিজ্ঝ জলাবুজকো;

উপসাল়ক ভিক্খু সলাপৰরো, অথ মেত্তৰরো দসপুণ্ণমতীতি.