৫১৬. মহাকপিজাতকং (৬)

১৭৮. বারাণস্যং [বারাণস্সং (সী. পী.)] অহূ রাজা, কাসীনং রট্ঠৰড্ঢনো;

মিত্তামচ্চপরিব্যূল়্হো, অগমাসি মিগাজিনং [মিগাজিরং (সী.), মিগাচিরং (পী.)].

১৭৯. তত্থ ব্রাহ্মণমদ্দক্খি, সেতং চিত্রং কিলাসিনং;

ৰিদ্ধস্তং কোৰিল়ারংৰ, কিসং ধমনিসন্থতং.

১৮০. পরমকারুঞ্ঞতং পত্তং, দিস্ৰা কিচ্ছগতং নরং;

অৰচ ব্যম্হিতো রাজা, ‘‘যক্খানং কতমো নুসি.

১৮১. ‘‘হত্থপাদা চ তে সেতা, ততো সেততরং [সেততরো (পী.)] সিরো;

গত্তং কম্মাসৰণ্ণং তে, কিলাসবহুলো চসি.

১৮২. ‘‘ৰট্টনাৰল়ি [ৰট্ঠনাৰলি (পী.)] সঙ্কাসা, পিট্ঠি তে নিন্নতুন্নতা;

কাল়পব্বাৰ [কাল়পব্বা চ (স্যা.), কাল়া পব্বা চ (পী.)] তে অঙ্গা, নাঞ্ঞং পস্সামি এদিসং.

১৮৩. ‘‘উগ্ঘট্টপাদো তসিতো, কিসো ধমনিসন্থতো;

ছাতো আতত্তরূপোসি [আদিত্তরূপোসি (ক.), অতিত্তরূপোসি (স্যা. ক. অট্ঠ.)], কুতোসি কত্থ গচ্ছসি.

১৮৪. ‘‘দুদ্দসী অপ্পকারোসি, দুব্বণ্ণো ভীমদস্সনো;

জনেত্তি যাপি তে মাতা, ন তং ইচ্ছেয্য পস্সিতুং.

১৮৫. ‘‘কিং কম্মমকরং [কম্মমকরা (সী. স্যা. পী.)] পুব্বে, কং অৰজ্ঝং অঘাতযি;

কিব্বিসং যং করিত্ৰান, ইদং দুক্খং উপাগমি’’.

১৮৬. তগ্ঘ তে অহমক্খিস্সং, যথাপি কুসলো তথা;

সচ্চৰাদিঞ্হি লোকস্মিং, পসংসন্তীধ পণ্ডিতা.

১৮৭. একো চরং গোগৰেসো, মূল়্হো অচ্চসরিং ৰনে;

অরঞ্ঞে ইরীণে [ঈরিণে (সী. স্যা. পী.)] ৰিৰনে, নানাকুঞ্জরসেৰিতে.

১৮৮. ৰাল়মিগানুচরিতে, ৰিপ্পনট্ঠোস্মি কাননে;

অচরিং তত্থ সত্তাহং, খুপ্পিপাস [খুপ্পিপাসা (সী. পী.)] সমপ্পিতো.

১৮৯. তত্থ তিন্দুকমদ্দক্খিং, ৰিসমট্ঠং বুভুক্খিতো;

পপাতমভিলম্বন্তং, সম্পন্নফলধারিনং.

১৯০. ৰাতস্সিতানি ভক্খেসিং, তানি রুচ্চিংসু মে ভুসং;

অতিত্তো রুক্খমারূহিং [মারুয্হ (সী. স্যা.)], তত্থ হেস্সামি আসিতো.

১৯১. একং মে ভক্খিতং আসি, দুতিযং অভিপত্থিতং;

ততো সা ভঞ্জথ সাখা, ছিন্না ফরসুনা ৰিয.

১৯২. সোহং সহাৰ সাখাহি, উদ্ধংপাদো অৰংসিরো;

অপ্পতিট্ঠে অনালম্বে, গিরিদুগ্গস্মি পাপতং.

১৯৩. যস্মা চ ৰারি গম্ভীরং, তস্মা ন সমপজ্জিসং [সমপজ্জসিং (সী.), সমভজ্জিসং (পী.)];

তত্থ সেসিং নিরানন্দো, অনূনা [অনাথো (সী.)] দস রত্তিযো.

১৯৪. অথেত্থ কপি মাগঞ্ছি [মাগচ্ছি (স্যা. ক.)], গোনঙ্গুলো দরীচরো;

সাখাহি সাখং ৰিচরন্তো, খাদমানো দুমপ্ফলং.

১৯৫. সো মং দিস্ৰা কিসং পণ্ডুং, কারুঞ্ঞমকরং মযি;

অম্ভো কো নাম সো এত্থ, এৰং দুক্খেন অট্টিতো.

১৯৬. মনুস্সো অমনুস্সো ৰা, অত্তানং মে পৰেদয;

তস্সঞ্জলিং পণামেত্ৰা, ইদং ৰচনমব্রৰিং.

১৯৭. মনুস্সোহং ব্যসম্পত্তো [ৰসম্পত্তো (স্যা. ক.)], সা মে নত্থি ইতো গতি;

তং ৰো ৰদামি ভদ্দং ৰো, ত্ৰঞ্চ মে সরণং ভৰ.

১৯৮. গরুং [গরু (সী. পী.)] সিলং গহেত্ৰান, ৰিচরী [ৰিচরি (পী.)] পব্বতে কপি;

সিলায যোগ্গং কত্ৰান, নিসভো এতদব্রৰি.

১৯৯. এহি মে পিট্ঠিমারুয্হ, গীৰং গণ্হাহি বাহুভি;

অহং তং উদ্ধরিস্সামি, গিরিদুগ্গত ৰেগসা.

২০০. তস্স তং ৰচনং সুত্ৰা, ৰানরিন্দস্স সিরীমতো;

পিট্ঠিমারুয্হ ধীরস্স, গীৰং বাহাহি অগ্গহিং.

২০১. সো মং ততো সমুট্ঠাসি, তেজস্সী [তেজসী (স্যা. পী. ক.)] বলৰা কপি;

ৰিহঞ্ঞমানো কিচ্ছেন, গিরিদুগ্গত ৰেগসা.

২০২. উদ্ধরিত্ৰান মং সন্তো, নিসভো এতদব্রৰি;

ইঙ্ঘ মং সম্ম রক্খস্সু, পস্সুপিস্সং মুহুত্তকং.

২০৩. সীহা ব্যগ্ঘা চ দীপী চ, অচ্ছকোকতরচ্ছযো;

তে মং পমত্তং হিংসেয্যুং, তে ত্ৰং দিস্ৰা নিৰারয [দিস্ৰান ৰারয (পী.)].

২০৪. এৰং মে পরিত্তাতূন [পরিত্তাতুন (ক.)], পস্সুপি সো মুহুত্তকং;

তদাহং পাপিকং দিট্ঠিং, পটিলচ্ছিং অযোনিসো.

২০৫. ভক্খো অযং মনুস্সানং, যথা চঞ্ঞে ৰনে মিগা;

যং নূনিমং ৰধিত্ৰান, ছাতো খাদেয্য ৰানরং.

২০৬. অসিতো [আসিকো (পী.)] চ গমিস্সামি, মংসমাদায সম্বলং;

কন্তারং নিত্থরিস্সামি, পাথেয্যং মে ভৰিস্সতি.

২০৭. ততো সিলং গহেত্ৰান, মত্থকং সন্নিতাল়যিং;

মম গত্ত [ভত্ত (সী. স্যা.), হত্থ (পী.)] কিলন্তস্স, পহারো দুব্বলো অহু.

২০৮. সো চ ৰেগেনুদপ্পত্তো, কপি রুহির [রুধির (সী.)] মক্খিতো;

অস্সুপুণ্ণেহি নেত্তেহি, রোদন্তো মং উদিক্খতি.

২০৯. মায্যোমং করি ভদ্দন্তে, ত্ৰঞ্চ নামেদিসং করি;

ত্ৰঞ্চ খো নাম দীঘাৰু [দীঘাযু (পী.)], অঞ্ঞে [অঞ্ঞং (পী.)] ৰারেতুমরহসি.

২১০. অহো ৰত রে পুরিস, তাৰ দুক্করকারক;

এদিসা ৰিসমা দুগ্গা, পপাতা উদ্ধতো [উদ্ধটো (পী.)] মযা.

২১১. আনীতো পরলোকাৰ, দুব্ভেয্যং মং অমঞ্ঞথ;

তং তেন পাপধম্মেন, পাপং পাপেন চিন্তিতং.

২১২. মা হেৰ ত্ৰং অধম্মট্ঠ, ৰেদনং কটুকং ফুসি;

মা হেৰ পাপকম্মং তং, ফলং ৰেল়ুংৰ তং ৰধি.

২১৩. তযিমে নত্থি ৰিস্সাসো, পাপধম্ম অসঞ্ঞত [পাপধম্মং অমঞ্ঞথ (পী.)];

এহি মে পিট্ঠিতো গচ্ছ, দিস্সমানোৰ সন্তিকে.

২১৪. মুত্তোসি হত্থা ৰাল়ানং, পত্তোসি মানুসিং পদং;

এস মগ্গো অধম্মট্ঠ, তেন গচ্ছ যথাসুখং.

২১৫. ইদং ৰত্ৰা গিরিচরো, রহদে [রুহিরং (স্যা. ক.)] পক্খল্য মত্থকং;

অস্সূনি সম্পমজ্জিত্ৰা, ততো পব্বতমারুহি.

২১৬. সোহং তেনাভিসত্তোস্মি, পরিল়াহেন অট্টিতো;

ডয্হমানেন গত্তেন, ৰারিং পাতুং উপাগমিং.

২১৭. অগ্গিনা ৰিয সন্তত্তো, রহদো রুহিরমক্খিতো;

পুব্বলোহিতসঙ্কাসো, সব্বো মে সমপজ্জথ.

২১৮. যাৰন্তো উদবিন্দূনি, কাযস্মিং নিপতিংসু মে;

তাৰন্তো গণ্ড [গণ্ডূ (সী. পী.), গণ্ডু (স্যা.)] জাযেথ, অদ্ধবেলুৰসাদিসা.

২১৯. পভিন্না পগ্ঘরিংসু মে, কুণপা পুব্বলোহিতা;

যেন যেনেৰ গচ্ছামি, গামেসু নিগমেসু চ.

২২০. দণ্ডহত্থা নিৰারেন্তি, ইত্থিযো পুরিসা চ মং;

ওক্কিতা [ওকিণ্ণা (সী.)] পূতিগন্ধেন, মাস্সু ওরেন আগমা [মাগমা (সী. পী.)].

২২১. এতাদিসং ইদং দুক্খং, সত্ত ৰস্সানি দানি মে;

অনুভোমি সকং কম্মং, পুব্বে দুক্কটমত্তনো.

২২২. তং ৰো ৰদামি ভদ্দন্তে [ভদ্দং ৰো (সী. পী.)], যাৰন্তেত্থ সমাগতা;

মাস্সু মিত্তান [মিত্তানং (সী. পী.)] দুব্ভিত্থো, মিত্তদুব্ভো হি পাপকো.

২২৩. কুট্ঠী কিলাসী ভৰতি, যো মিত্তানিধ দুব্ভতি [যো মিত্তানং ইধদ্দুভি (সী. অট্ঠ.), যো মিত্তানং ইধ দুব্ভতি (পী.)];

কাযস্স ভেদা মিত্তদ্দু [মিত্তদুব্ভী (স্যা. ক.)], নিরযং সোপপজ্জতীতি [সো উপপজ্জতীতি (সী. স্যা. পী.)].

মহাকপিজাতকং ছট্ঠং.