৫১৭. দকরক্খসজাতকং (৭)

২২৪. সচে ৰো ৰুয্হমানানং, সত্তন্নং উদকণ্ণৰে;

মনুস্সবলিমেসানো, নাৰং গণ্হেয্য রক্খসো;

অনুপুব্বং কথং দত্ৰা, মুঞ্চেসি দকরক্খসা [দকরক্খতো (পী.)].

২২৫. মাতরং পঠমং দজ্জং, ভরিযং দত্ৰান ভাতরং;

ততো সহাযং দত্ৰান, পঞ্চমং দজ্জং [দজ্জ (স্যা.)] ব্রাহ্মণং;

ছট্ঠাহং দজ্জমত্তানং, নেৰ দজ্জং মহোসধং.

২২৬. পোসেতা তে জনেত্তী চ, দীঘরত্তানুকম্পিকা;

ছব্ভী তযি পদুস্সতি [পদুট্ঠস্মিং (সী. স্যা.)], পণ্ডিতা অত্থদস্সিনী;

অঞ্ঞং উপনিসং কত্ৰা, ৰধা তং পরিমোচযি.

২২৭. তং তাদিসিং [তাদিসং (ক.)] পাণদদিং, ওরসং গব্ভধারিনিং [গব্ভধারিণিং (সী. স্যা.)];

মাতরং কেন দোসেন, দজ্জাসি দকরক্খিনো [দকরক্খতো (পী.)].

২২৮. দহরা ৰিযলঙ্কারং, ধারেতি অপিল়ন্ধনং;

দোৰারিকে অনীকট্ঠে, অতিৰেলং পজগ্ঘতি [সঞ্জগ্ঘতি (ক.)].

২২৯. অথোপি পটিরাজূনং, সযং দূতানি সাসতি;

মাতরং তেন দোসেন, দজ্জাহং দকরক্খিনো.

২৩০. ইত্থিগুম্বস্স পৰরা, অচ্চন্তং পিযভাণিনী [অচ্চন্তপিযৰাদিনী (সী. পী.)];

অনুগ্গতা [অনুব্বতা (স্যা.), অনুপুব্বতা (ক.)] সীলৰতী, ছাযাৰ অনপাযিনী.

২৩১. অক্কোধনা পুঞ্ঞৰতী [পঞ্ঞৰতী (সী. পী.)], পণ্ডিতা অত্থদস্সিনী;

উব্বরিং [উপ্পরিং (সী.)] কেন দোসেন, দজ্জাসি দকরক্খিনো.

২৩২. খিড্ডারতিসমাপন্নং, অনত্থৰসমাগতং;

সা মং সকান পুত্তানং, অযাচং যাচতে ধনং.

২৩৩. সোহং দদামি সারত্তো [সারতো (স্যা.)], বহুং উচ্চাৰচং ধনং;

সুদুচ্চজং চজিত্ৰান, পচ্ছা সোচামি দুম্মনো;

উব্বরিং তেন দোসেন, দজ্জাহং দকরক্খিনো.

২৩৪. যেনোচিতা জনপদা [জানপদা (সী. স্যা. পী.)], আনীতা চ পটিগ্গহং;

আভতং পররজ্জেভি, অভিট্ঠায বহুং ধনং.

২৩৫. ধনুগ্গহানং পৰরং, সূরং তিখিণমন্তিনং;

ভাতরং কেন দোসেন, দজ্জাসি দকরক্খিনো.

২৩৬. যেনোচিতা [মযোচিতা (সী.), মযাচিতা (পী.)] জনপদা, আনীতা চ পটিগ্গহং;

আভতং পররজ্জেভি, অভিট্ঠায বহুং ধনং.

২৩৭. ধনুগ্গহানং পৰরো, সূরো তিখিণমন্তি চ [তিখিণমন্তিনো (ক.)];

মযাযং [মযা সো (সী. পী.)] সুখিতো রাজা, অতিমঞ্ঞতি দারকো.

২৩৮. উপট্ঠানম্পি মে অয্যে, ন সো এতি যথা পুরে;

ভাতরং তেন দোসেন, দজ্জাহং দকরক্খিনো.

২৩৯. একরত্তেন উভযো, ত্ৰঞ্চেৰ ধনুসেখ চ [ধনুসেখৰা (সী. স্যা. পী.)];

উভো জাতেত্থ পঞ্চালা, সহাযা সুসমাৰযা.

২৪০. চরিযা তং অনুবন্ধিত্থো [অনুবন্ধো (ক.)], একদুক্খসুখো তৰ;

উস্সুক্কো তে দিৰারত্তিং, সব্বকিচ্চেসু ব্যাৰটো;

সহাযং কেন দোসেন, দজ্জাসি দকরক্খিনো.

২৪১. চরিযা মং অযং [চরিযায অযং (সী. পী.)] অয্যে, পজগ্ঘিত্থো [সঞ্জগ্ঘিত্থো (স্যা.)] মযা সহ;

অজ্জাপি তেন ৰণ্ণেন, অতিৰেলং পজগ্ঘতি.

২৪২. উব্বরিযাপিহং অয্যে, মন্তযামি রহোগতো;

অনামন্তো [অনামন্তা (সী.)] পৰিসতি, পুব্বে অপ্পটিৰেদিতো.

২৪৩. লদ্ধদ্ৰারো [লদ্ধৰারো (সী. পী.)] কতোকাসো, অহিরিকং অনাদরং;

সহাযং তেন দোসেন, দজ্জাহং দকরক্খিনো.

২৪৪. কুসলো সব্বনিমিত্তানং, রুতঞ্ঞূ [রুদঞ্ঞূ (সী. স্যা. পী.)] আগতাগমো;

উপ্পাতে সুপিনে যুত্তো, নিয্যানে চ পৰেসনে.

২৪৫. পট্ঠো [পদ্ধো (সী. পী.)] ভূমন্তলিক্খস্মিং, নক্খত্তপদকোৰিদো;

ব্রাহ্মণং কেন দোসেন, দজ্জাসি দকরক্খিনো.

২৪৬. পরিসাযম্পি মে অয্যে, উম্মীলিত্ৰা উদিক্খতি;

তস্মা অচ্চভমুং লুদ্দং, দজ্জাহং দকরক্খিনো.

২৪৭. সসমুদ্দপরিযাযং, মহিং সাগরকুণ্ডলং;

ৰসুন্ধরং আৰসসি, অমচ্চপরিৰারিতো.

২৪৮. চাতুরন্তো মহারট্ঠো, ৰিজিতাৰী মহব্বলো;

পথব্যা একরাজাসি, যসো তে ৰিপুলং গতো.

২৪৯. সোল়সিত্থিসহস্সানি, আমুত্তমণিকুণ্ডলা;

নানাজনপদা নারী, দেৰকঞ্ঞূপমা সুভা.

২৫০. এৰং সব্বঙ্গসম্পন্নং, সব্বকামসমিদ্ধিনং;

সুখিতানং পিযং দীঘং, জীৰিতং আহু খত্তিয.

২৫১. অথ ত্ৰং কেন ৰণ্ণেন, কেন ৰা পন হেতুনা;

পণ্ডিতং অনুরক্খন্তো, পাণং চজসি দুচ্চজং.

২৫২. যতোপি আগতো অয্যে, মম হত্থং মহোসধো;

নাভিজানামি ধীরস্স, অনুমত্তম্পি দুক্কটং.

২৫৩. সচে চ কিস্মিচি কালে, মরণং মে পুরে সিযা;

সো মে পুত্তে [পুত্তে চ মে (সী. স্যা. পী.] পপুত্তে চ, সুখাপেয্য মহোসধো.

২৫৪. অনাগতং পচ্চুপ্পন্নং, সব্বমত্থম্পি পস্সতি [সব্বমত্থং ৰিপস্সতি (সী. স্যা. পী.)];

অনাপরাধকম্মন্তং, ন দজ্জং দকরক্খিনো.

২৫৫. ইদং সুণাথ পঞ্চালা, চূল়নেয্যস্স [চূল়নীযস্স (সী.)] ভাসিতং;

পণ্ডিতং অনুরক্খন্তো, পাণং চজতি দুচ্চজং.

২৫৬. মাতু ভরিযায ভাতুচ্চ, সখিনো ব্রাহ্মণস্স চ;

অত্তনো চাপি পঞ্চালো, ছন্নং চজতি জীৰিতং.

২৫৭. এৰং মহত্থিকা [খহিদ্ধিযা (স্যা.), মহিদ্ধিকা (ক.)] পঞ্ঞা, নিপুণা সাধুচিন্তিনী;

দিট্ঠধম্মহিতত্থায, সম্পরাযসুখায চাতি.

দকরক্খসজাতকং সত্তমং.