১৬. তিংসনিপাতো

৫১১. কিংছন্দজাতকং (১)

১. কিংছন্দো কিমধিপ্পাযো, একো সম্মসি ঘম্মনি;

কিং পত্থযানো কিং এসং, কেন অত্থেন ব্রাহ্মণ.

২. যথা মহা ৰারিধরো, কুম্ভো সুপরিণাহৰা [সুপরিণামৰা (ক.)];

তথূপমং অম্বপক্কং, ৰণ্ণগন্ধরসুত্তমং.

৩. তং ৰুয্হমানং সোতেন, দিস্ৰানামলমজ্ঝিমে;

পাণীহি নং গহেত্ৰান, অগ্যাযতনমাহরিং.

৪. ততো কদলিপত্তেসু, নিক্খিপিত্ৰা সযং অহং;

সত্থেন নং ৰিকপ্পেত্ৰা, খুপ্পিপাসং অহাসি মে.

৫. সোহং অপেতদরথো, ব্যন্তীভূতো [ব্যন্তিভূতো (সী. পী. ক.)] দুখক্খমো;

অস্সাদং নাধিগচ্ছামি, ফলেস্ৰঞ্ঞেসু কেসুচি [কেসুপি (ক. সী.)].

৬. সোসেত্ৰা নূন মরণং, তং মমং আৰহিস্সতি;

অম্বং যস্স ফলং সাদু, মধুরগ্গং মনোরমং;

যমুদ্ধরিং ৰুয্হমানং, উদধিস্মা মহণ্ণৰে.

৭. অক্খাতং তে মযা সব্বং, যস্মা উপৰসামহং;

রম্মং পতি নিসিন্নোস্মি, পুথুলোমাযুতা পুথু.

৮. ত্ৰঞ্চ খো মেৰ [মে (সী.), মম (?)] অক্খাহি, অত্তানমপলাযিনি;

কা ৰা ত্ৰমসি কল্যাণি, কিস্স ৰা ত্ৰং সুমজ্ঝিমে.

৯. রুপ্পপট্টপলিমট্ঠীৰ [রুপ্পপট্টপ্লমট্ঠীৰ (স্যা.), রূপপট্টপমট্ঠীৰ (ক.)], ব্যগ্ঘীৰ গিরিসানুজা;

যা সন্তি নারিযো দেৰেসু, দেৰানং পরিচারিকা.

১০. যা চ মনুস্সলোকস্মিং, রূপেনান্ৰাগতিত্থিযো;

রূপেন তে সদিসী নত্থি, দেৰেসু গন্ধব্বমনুস্সলোকে [দেৰগন্ধব্বমানুসে (স্যা.)];

পুট্ঠাসি মে চারুপুব্বঙ্গি, ব্রূহি নামঞ্চ বন্ধৰে.

১১. যং ত্ৰং পতি নিসিন্নোসি, রম্মং ব্রাহ্মণ কোসিকিং;

সাহং ভুসালযা ৰুত্থা, ৰরৰারিৰহোঘসা.

১২. নানাদুমগণাকিণ্ণা, বহুকা গিরিকন্দরা;

মমেৰ পমুখা হোন্তি, অভিসন্দন্তি পাৰুসে.

১৩. অথো বহূ ৰনতোদা, নীলৰারিৰহিন্ধরা;

বহুকা নাগৰিত্তোদা, অভিসন্দন্তি ৰারিনা.

১৪. তা অম্বজম্বুলবুজা, নীপা তালা চুদুম্বরা [তালমুদুম্বরা (স্যা. ক.)];

বহূনি ফলজাতানি, আৰহন্তি অভিণ্হসো.

১৫. যং কিঞ্চি উভতো তীরে, ফলং পততি অম্বুনি;

অসংসযং তং সোতস্স, ফলং হোতি ৰসানুগং.

১৬. এতদঞ্ঞায মেধাৰি, পুথুপঞ্ঞ সুণোহি মে;

মা রোচয মভিসঙ্গং, পটিসেধ জনাধিপ.

১৭. ন ৰাহং ৰড্ঢৰং [ৰদ্ধৰং (সী. পী.)] মঞ্ঞে, যং ত্ৰং রট্ঠাভিৰড্ঢন;

আচেয্যমানো রাজিসি, মরণং অভিকঙ্খসি.

১৮. তস্স জানন্তি পিতরো, গন্ধব্বা চ সদেৰকা;

যে চাপি ইসযো লোকে, সঞ্ঞতত্তা তপস্সিনো;

অসংসযং তেপি [তে (সী. পী.)] জানন্তি, পট্ঠভূতা [ৰদ্ধভূতা (সী. পী.)] যসস্সিনো.

১৯. এৰং ৰিদিত্ৰা ৰিদূ সব্বধম্মং, ৰিদ্ধংসনং চৰনং জীৰিতস্স;

ন চীযতী তস্স নরস্স পাপং, সচে ন চেতেতি ৰধায তস্স.

২০. ইসিপূগসমঞ্ঞাতে, এৰং লোক্যা ৰিদিতা সতি [পতি (ক. স্যা. ক.)];

অনরিযপরিসম্ভাসে, পাপকম্মং জিগীসসি [জিগিংসসি (সী. স্যা. পী.)].

২১. সচে অহং মরিস্সামি, তীরে তে পুথুসুস্সোণি;

অসংসযং তং অসিলোকো, মযি পেতে আগমিস্সতি.

২২. তস্মা হি পাপকং কম্মং, রক্খস্সেৰ [রক্খস্সু চ (স্যা.)] সুমজ্ঝিমে;

মা তং সব্বো জনো পচ্ছা, পকুট্ঠাযি [পকত্থাসি (সী. পী.), পত্ৰক্খাসি (স্যা.)] মযি মতে.

২৩. অঞ্ঞাতমেতং অৰিসয্হসাহি, অত্তানমম্বঞ্চ দদামি তে তং;

সো দুচ্চজে কামগুণে পহায, সন্তিঞ্চ ধম্মঞ্চ অধিট্ঠিতোসি.

২৪. যো হিত্ৰা পুব্বসঞ্ঞোগং, পচ্ছা সংযোজনে ঠিতো;

অধম্মঞ্চেৰ চরতি, পাপঞ্চস্স পৰড্ঢতি.

২৫. এহি তং পাপযিস্সামি, কামং অপ্পোস্সুকো ভৰ;

উপানযামি সীতস্মিং, ৰিহরাহি অনুস্সুকো.

২৬. তং পুপ্ফরসমত্তেভি, ৰক্কঙ্গেহি অরিন্দম;

কোঞ্চা মযূরা দিৰিযা, কোলট্ঠিমধুসাল়িকা;

কূজিতা হংসপূগেহি, কোকিলেত্থ পবোধরে.

২৭. অম্বেত্থ ৰিপ্পসাখগ্গা [ৰিপ্পসূনগ্গা (সী. স্যা. পী.), ৰিপ্পওনগ্গা (ক.)], পলালখলসন্নিভা;

কোসম্বসল়লা [কোসুম্ভসললা (সী. স্যা. পী.)] নীপা, পক্কতালৰিলম্বিনো.

২৮. মালী তিরিটী কাযূরী, অঙ্গদী চন্দনুস্সদো [চন্দনস্সদো (সী.)];

রত্তিং ত্ৰং পরিচারেসি, দিৰা ৰেদেসি ৰেদনং.

২৯. সোল়সিত্থিসহস্সানি, যা তেমা পরিচারিকা;

এৰং মহানুভাৰোসি, অব্ভুতো লোমহংসনো.

৩০. কিং কম্মমকরী পুব্বে, পাপং অত্তদুখাৰহং;

যং করিত্ৰা মনুস্সেসু, পিট্ঠিমংসানি খাদসি.

৩১. অজ্ঝেনানি পটিগ্গয্হ, কামেসু গধিতো [গথিতো (সী. পী.), গিদ্ধিতো (স্যা. ক.), গিদ্ধিকো (ক. অট্ঠ.)] অহং;

অচরিং দীঘমদ্ধানং, পরেসং অহিতাযহং.

৩২. যো পিট্ঠিমংসিকো হোতি, এৰং উক্কচ্চ খাদতি;

যথাহং অজ্জ খাদামি, পিট্ঠিমংসানি অত্তনোতি.

কিংছন্দজাতকং পঠমং.

৫১২. কুম্ভজাতকং (২)

৩৩. কো পাতুরাসী তিদিৰা নভম্হি, ওভাসযং সংৰরিং চন্দিমাৰ;

গত্তেহি তে রস্মিযো নিচ্ছরন্তি, সতেরতা [সতেরিতা (সী. স্যা. ক.)] ৰিজ্জুরিৰন্তলিক্খে.

৩৪. সো ছিন্নৰাতং কমসী অঘম্হি, ৰেহাযসং গচ্ছসি তিট্ঠসী চ;

ইদ্ধী নু তে ৰত্থুকতা সুভাৰিতা, অনদ্ধগূনং অপি দেৰতানং.

৩৫. ৰেহাযসং গম্মমাগম্ম [কমমাগম্ম (সী. স্যা.)] তিট্ঠসি, কুম্ভং কিণাথাতি যমেতমত্থং;

কো ৰা তুৰং কিস্স ৰা তায কুম্ভো, অক্খাহি মে ব্রাহ্মণ এতমত্থং.

৩৬. ন সপ্পিকুম্ভো নপি তেলকুম্ভো, ন ফাণিতস্স ন মধুস্স কুম্ভো;

কুম্ভস্স ৰজ্জানি অনপ্পকানি, দোসে বহূ কুম্ভগতে সুণাথ.

৩৭. গল়েয্য যং পিত্ৰা [পীত্ৰা (সী. পী.)] পতে পপাতং, সোব্ভং গুহং চন্দনিযোল়িগল্লং;

বহুম্পি ভুঞ্জেয্য অভোজনেয্যং, তস্সা পুণ্ণং কুম্ভমিমং কিণাথ.

৩৮. যং পিত্ৰা [যং ৰে পীত্ৰা (সী.)] চিত্তস্মিমনেসমানো, আহিণ্ডতী গোরিৰ ভক্খসারী [ভক্খসাদী (সী. স্যা. অট্ঠ.)];

অনাথমানো উপগাযতি নচ্চতি চ, তস্সা পুণ্ণং কুম্ভমিমং কিণাথ.

৩৯. যং ৰে পিৰিত্ৰা অচেলোৰ নগ্গো, চরেয্য গামে ৰিসিখন্তরানি;

সম্মূল়্হচিত্তো অতিৰেলসাযী, তস্সা পুণ্ণং কুম্ভমিমং কিণাথ.

৪০. যং পিত্ৰা উট্ঠায পৰেধমানো, সীসঞ্চ বাহুঞ্চ [বাহঞ্চ (পী.)] পচালযন্তো;

সো নচ্চতী দারুকটল্লকোৰ, তস্সা পুণ্ণং কুম্ভমিমং কিণাথ.

৪১. যং ৰে পিৰিত্ৰা অগ্গিদড্ঢা সযন্তি, অথো সিগালেহিপি খাদিতাসে;

বন্ধং ৰধং ভোগজানিঞ্চুপেন্তি, তস্সা পুণ্ণং কুম্ভমিমং কিণাথ.

৪২. যং পিত্ৰা ভাসেয্য আভাসনেয্যং, সভাযমাসীনো অপেতৰত্থো;

সম্মক্খিতো [সমক্খিতো (সী.)] ৰন্তগতো ব্যসন্নো, তস্সা পুণ্ণং কুম্ভমিমং কিণাথ.

৪৩. যং ৰে পিৰিত্ৰা উক্কট্ঠো আৰিলক্খো, মমেৰ সব্বা পথৰীতি মঞ্ঞে [মঞ্ঞতি (সী.)];

ন মে সমো চাতুরন্তোপি রাজা, তস্সা পুণ্ণং কুম্ভমিমং কিণাথ.

৪৪. মানাতিমানা কলহানি পেসুণী, দুব্বণ্ণিনী নগ্গযিনী পলাযিনী;

চোরান ধুত্তান গতী নিকেতো, তস্সা পুণ্ণং কুম্ভমিমং কিণাথ.

৪৫. ইদ্ধানি ফীতানি কুলানি অস্সু, অনেকসাহস্সধনানি লোকে;

উচ্ছিন্নদাযজ্জকতানিমায, তস্সা পুণ্ণং কুম্ভমিমং কিণাথ.

৪৬. ধঞ্ঞং ধনং রজতং জাতরূপং, খেত্তং গৰং যত্থ ৰিনাসযন্তি;

উচ্ছেদনী ৰিত্তৰতং [উচ্ছেদনী ৰিত্তগতং (স্যা.), উচ্ছেদনিৰিত্তগতং (ক.)] কুলানং, তস্সা পুণ্ণং কুম্ভমিমং কিণাথ.

৪৭. যং ৰে পিত্ৰা দিত্তরূপোৰ [দুট্ঠরূপোৰ (সী.)] পোসো, অক্কোসতি মাতরং পিতরঞ্চ;

সস্সুম্পি গণ্হেয্য অথোপি সুণ্হং, তস্সা পুণ্ণং কুম্ভমিমং কিণাথ.

৪৮. যং ৰে পিত্ৰা দিত্তরূপাৰ নারী, অক্কোসতি সসুরং সামিকঞ্চ;

দাসম্পি গণ্হে পরিচারকম্পি, তস্সা পুণ্ণং কুম্ভমিমং কিণাথ.

৪৯. যং ৰে পিৰিত্ৰান [যঞ্চে পীত্ৰান (পী.)] হনেয্য পোসো, ধম্মে ঠিতং সমণং ব্রাহ্মণং ৰা;

গচ্ছে অপাযম্পি ততোনিদানং, তস্সা পুণ্ণং কুম্ভমিমং কিণাথ.

৫০. যং ৰে পিৰিত্ৰা দুচ্চরিতং চরন্তি, কাযেন ৰাচায চ চেতসা চ;

নিরযং ৰজন্তি দুচ্চরিতং চরিত্ৰা, তস্সা পুণ্ণং কুম্ভমিমং কিণাথ.

৫১. যং যাচমানা ন লভন্তি পুব্বে, বহুং হিরঞ্ঞম্পি পরিচ্চজন্তা;

সো তং পিৰিত্ৰা অলিকং ভণাতি, তস্সা পুণ্ণং কুম্ভমিমং কিণাথ.

৫২. যং ৰে পিত্ৰা পেসনে পেসিযন্তো, অচ্চাযিকে করণীযম্হি জাতে;

অত্থম্পি সো নপ্পজানাতি ৰুত্তো, তস্সা পুণ্ণং কুম্ভমিমং কিণাথ.

৫৩. হিরীমনাপি অহিরীকভাৰং, পাতুং করোন্তি মদনায [মদিরায (পী.)] মত্তা;

ধীরাপি সন্তা বহুকং ভণন্তি, তস্সা পুণ্ণং কুম্ভমিমং কিণাথ.

৫৪. যং ৰে পিত্ৰা একথূপা সযন্তি, অনাসকা থণ্ডিলদুক্খসেয্যং;

দুব্বণ্ণিযং আযসক্যঞ্চুপেন্তি, তস্সা পুণ্ণং কুম্ভমিমং কিণাথ.

৫৫. যং ৰে পিত্ৰা পত্তখন্ধা সযন্তি, গাৰো কুটহতাৰ ন হি ৰারুণিযা;

[যং ৰে পিত্ৰা পত্তক্খন্ধা, সযন্তি গাৰো কূটহতারিৰ; ন হি ৰারুণিযা ৰেগো, নরেন সুস্সহোরিৰ; (সী.)] ৰেগো নরেন সুসহোরিৰ [যং ৰে পিত্ৰা পত্তক্খন্ধা, সযন্তি গাৰো কূটহতারিৰ; ন হি ৰারুণিযা ৰেগো, নরেন সুস্সহোরিৰ; (সী.)], তস্সা পুণ্ণং কুম্ভমিমং কিণাথ.

৫৬. যং মনুস্সা ৰিৰজ্জেন্তি, সপ্পং ঘোরৰিসং মিৰ [ৰিসমিৰ (স্যা.), ৰিসং ইৰ (ক.), ৰিসামিৰ (?)];

তং লোকে ৰিসসমানং, কো নরো পাতুমরহতি.

৫৭. যং ৰে পিত্ৰা অন্ধকৰেণ্ডপুত্তা, সমুদ্দতীরে পরিচারযন্তা [অন্ধকৰেণ্হুপুত্তা (সী. পী.), অণ্ডকৰেণ্ডপুত্তা (ক.)];

উপক্কমুং মুসলেহঞ্ঞমঞ্ঞং, তস্সা পুণ্ণং কুম্ভমিমং কিণাথ.

৫৮. যং ৰে পিত্ৰা পুব্বদেৰা পমত্তা, তিদিৰা চুতা সস্সতিযা সমায;

তং তাদিসং মজ্জমিমং নিরত্থকং, জানং মহারাজ কথং পিৰেয্য.

৫৯. নযিমস্মিং কুম্ভস্মিং দধি ৰা মধু ৰা, এৰং অভিঞ্ঞায কিণাহি রাজ;

এৰঞ্হিমং কুম্ভগতা মযা তে, অক্খাতরূপং তৰ সব্বমিত্ত.

৬০. ন মে পিতা ৰা অথৰাপি মাতা, এতাদিসা যাদিসকো তুৰংসি;

হিতানুকম্পী পরমত্থকামো, সোহং করিস্সং ৰচনং তৰজ্জ.

৬১. দদামি তে গামৰরানি পঞ্চ, দাসীসতং সত্ত গৰং সতানি;

আজঞ্ঞযুত্তে চ রথে দস ইমে, আচরিযো হোসি মমত্থকামো.

৬২. তৰেৰ দাসীসতমত্থু রাজ, গামা চ গাৰো চ তৰেৰ হোন্তু;

আজঞ্ঞযুত্তা চ রথা তৰেৰ, সক্কোহমস্মী তিদসানমিন্দো.

৬৩. মংসোদনং সপ্পিপাযাসং [সপ্পিপাযঞ্চ (সী.)] ভুঞ্জ, খাদস্সু চ ত্ৰং মধুমাসপূৰে;

এৰং তুৰং ধম্মরতো জনিন্দ, অনিন্দিতো সগ্গমুপেহি ঠানন্তি.

কুম্ভজাতকং দুতিযং.

৫১৩. জযদ্দিসজাতকং (৩)

৬৪. চিরস্সং ৰত মে উদপাদি অজ্জ, ভক্খো মহা সত্তমিভত্তকালে;

কুতোসি কো ৰাসি তদিঙ্ঘ ব্রূহি, আচিক্খ জাতিং ৰিদিতো যথাসি.

৬৫. পঞ্চালরাজা মিগৰং পৰিট্ঠো, জযদ্দিসো নাম যদিস্সুতো তে;

চরামি কচ্ছানি ৰনানি চাহং, পসদং ইমং খাদ মমজ্জ মুঞ্চ.

৬৬. সেনেৰ ত্ৰং পণসি সস্সমানো [সয্হমানো (স্যা. ক.)], মমেস ভক্খো পসদো যং ৰদেসি;

তং খাদিযান পসদং জিঘঞ্ঞং [জিঘচ্ছং (?)], খাদিস্সং পচ্ছা ন ৰিলাপকালো.

৬৭. ন চত্থি মোক্খো মম নিক্কযেন [ৰিক্কযেন (সী.)], গন্ত্ৰান পচ্চাগমনায পণ্হে;

তং সঙ্করং [সঙ্গরং (সী. স্যা. পী.)] ব্রাহ্মণস্সপ্পদায, সচ্চানুরক্খী পুনরাৰজিস্সং.

৬৮. কিং কম্মজাতং অনুতপ্পতে ত্ৰং [অনুতপ্পতী তং (সী. পী.)], পত্তং সমীপং মরণস্স রাজ;

আচিক্খ মে তং অপি সক্কুণেমু, অনুজানিতুং আগমনায পণ্হে.

৬৯. কতা মযা ব্রাহ্মণস্স ধনাসা, তং সঙ্করং পটিমুক্কং ন মুত্তং;

তং সঙ্করং ব্রাহ্মণস্সপ্পদায, সচ্চানুরক্খী পুনরাৰজিস্সং.

৭০. যা তে কতা ব্রাহ্মণস্স ধনাসা, তং সঙ্করং পটিমুক্কং ন মুত্তং;

তং সঙ্করং ব্রাহ্মণস্সপ্পদায, সচ্চানুরক্খী পুনরাৰজস্সু.