৫১৫. সম্ভৰজাতকং (৫)

১৩৮. রজ্জঞ্চ পটিপন্নাস্ম, আধিপচ্চং সুচীরত;

মহত্তং পত্তুমিচ্ছামি, ৰিজেতুং পথৰিং ইমং.

১৩৯. ধম্মেন নো অধম্মেন, অধম্মো মে ন রুচ্চতি;

কিচ্চোৰ ধম্মো চরিতো, রঞ্ঞো হোতি সুচীরত.

১৪০. ইধ চেৰানিন্দিতা যেন, পেচ্চ যেন অনিন্দিতা;

যসং দেৰমনুস্সেসু, যেন পপ্পোমু [পপ্পেমু (সী. অট্ঠ.)] ব্রাহ্মণ.

১৪১. যোহং অত্থঞ্চ ধম্মঞ্চ, কত্তুমিচ্ছামি ব্রাহ্মণ;

তং ত্ৰং অত্থঞ্চ ধম্মঞ্চ, ব্রাহ্মণক্খাহি পুচ্ছিতো.

১৪২. নাঞ্ঞত্র ৰিধুরা রাজ, এতদক্খাতুমরহতি;

যং ত্ৰং অত্থঞ্চ ধম্মঞ্চ, কত্তুমিচ্ছসি খত্তিয.

১৪৩. এহি খো পহিতো গচ্ছ, ৰিধুরস্স উপন্তিকং;

নিক্খঞ্চিমং [নিক্খং রত্ত (সী.), নিক্খমিমং (পী.)] সুৰণ্ণস্স, হরং গচ্ছ সুচীরত;

অভিহারং ইমং দজ্জা, অত্থধম্মানুসিট্ঠিযা.

১৪৪. স্ৰাধিপ্পাগা ভারদ্ৰাজো, ৰিধুরস্স উপন্তিকং;

তমদ্দস মহাব্রহ্মা, অসমানং সকে ঘরে.

১৪৫. রঞ্ঞোহং পহিতো দূতো, কোরব্যস্স যসস্সিনো;

‘‘অত্থং ধম্মঞ্চ পুচ্ছেসি’’, ইচ্চব্রৰি যুধিট্ঠিলো;

তং ত্ৰং অত্থঞ্চ ধম্মঞ্চ, ৰিধুরক্খাহি পুচ্ছিতো.

১৪৬. গঙ্গং মে পিদহিস্সন্তি, ন তং সক্কোমি ব্রাহ্মণ;

অপিধেতুং মহাসিন্ধুং, তং কথং সো ভৰিস্সতি.

১৪৭. ন তে সক্কোমি অক্খাতুং, অত্থং ধম্মঞ্চ পুচ্ছিতো;

ভদ্রকারো চ মে পুত্তো, ওরসো মম অত্রজো;

তং ত্ৰং অত্থঞ্চ ধম্মঞ্চ, গন্ত্ৰা পুচ্ছস্সু ব্রাহ্মণ.

১৪৮. স্ৰাধিপ্পাগা ভারদ্ৰাজো, ভদ্রকারস্সুপন্তিকং [ভদ্রকারস্স সন্তিকং (সী. স্যা.)];

তমদ্দস মহাব্রহ্মা, নিসিন্নং সম্হি ৰেস্মনি.

১৪৯. রঞ্ঞোহং পহিতো দূতো, কোরব্যস্স যসস্সিনো;

‘‘অত্থং ধম্মঞ্চ পুচ্ছেসি’’, ইচ্চব্রৰি যুধিট্ঠিলো;

তং ত্ৰং অত্থঞ্চ ধম্মঞ্চ, ভদ্রকার পব্রূহি [ব্রৰীহি (সী. পী.)] মে.

১৫০. মংসকাজং [মংসকাচং (পী.)] অৰহায, গোধং অনুপতামহং;

ন তে সক্কোমি অক্খাতুং, অত্থং ধম্মঞ্চ পুচ্ছিতো.

১৫১. সঞ্চযো [সঞ্জযো (সী. স্যা. পী.)] নাম মে ভাতা, কনিট্ঠো মে সুচীরত;

তং ত্ৰং অত্থঞ্চ ধম্মঞ্চ, গন্ত্ৰা পুচ্ছস্সু ব্রাহ্মণ.

১৫২. স্ৰাধিপ্পাগা ভারদ্ৰাজো, সঞ্চযস্স উপন্তিকং;

তমদ্দস মহাব্রহ্মা, নিসিন্নং সম্হি ৰেস্মনি [পরিসতি (স্যা.), পরীসতি (পী.)].

১৫৩. রঞ্ঞোহং পহিতো দূতো, কোরব্যস্স যসস্সিনো;

‘‘অত্থং ধম্মঞ্চ পুচ্ছেসি’’, ইচ্চব্রৰি যুধিট্ঠিলো;

তং ত্ৰং অত্থঞ্চ ধম্মঞ্চ, সঞ্চযক্খাহি পুচ্ছিতো.

১৫৪. সদা মং গিলতে [গিলতী (সী.), গিলতি (পী.)] মচ্চু, সাযং পাতো সুচীরত;

ন তে সক্কোমি অক্খাতুং, অত্থং ধম্মঞ্চ পুচ্ছিতো.

১৫৫. সম্ভৰো নাম মে ভাতা, কনিট্ঠো মে সুচীরত;

তং ত্ৰং অত্থঞ্চ ধম্মঞ্চ, গন্ত্ৰা পুচ্ছস্সু ব্রাহ্মণ.

১৫৬. অব্ভুতো ৰত ভো ধম্মো, নাযং অস্মাক রুচ্চতি;

তযো জনা পিতাপুত্তা, তেসু পঞ্ঞায নো ৰিদূ.

১৫৭. ন তং সক্কোথ অক্খাতুং, অত্থং ধম্মঞ্চ পুচ্ছিতা;

কথং নু দহরো জঞ্ঞা, অত্থং ধম্মঞ্চ পুচ্ছিতো.

১৫৮. মা নং দহরোতি উঞ্ঞাসি [মঞ্ঞাসি (স্যা. ক.)], অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৫৯. যথাপি চন্দো ৰিমলো, গচ্ছং আকাসধাতুযা;

সব্বে তারাগণে লোকে, আভায অতিরোচতি.

১৬০. এৰম্পি দহরূপেতো, পঞ্ঞাযোগেন সম্ভৰো;

মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৬১. যথাপি রম্মকো মাসো, গিম্হানং হোতি ব্রাহ্মণ;

অতেৰঞ্ঞেহি মাসেহি, দুমপুপ্ফেহি সোভতি.

১৬২. এৰম্পি দহরূপেতো, পঞ্ঞাযোগেন সম্ভৰো;

মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৬৩. যথাপি হিমৰা ব্রহ্মে, পব্বতো গন্ধমাদনো;

নানারুক্খেহি সঞ্ছন্নো, মহাভূতগণালযো;

ওসধেহি চ দিব্বেহি, দিসা ভাতি পৰাতি চ.

১৬৪. এৰম্পি দহরূপেতো, পঞ্ঞাযোগেন সম্ভৰো;

মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৬৫. যথাপি পাৰকো ব্রহ্মে, অচ্চিমালী যসস্সিমা;

জলমানো ৰনে গচ্ছে [চরং কচ্ছে (পী.)], অনলো কণ্হৰত্তনী.

১৬৬. ঘতাসনো ধূমকেতু, উত্তমাহেৰনন্দহো;

নিসীথে [নিস্সীৰে (স্যা.), নিসিৰে (ক.)] পব্বতগ্গস্মিং, পহূতেধো [বহুতেজো (স্যা. ক.)] ৰিরোচতি.

১৬৭. এৰম্পি দহরূপেতো, পঞ্ঞাযোগেন সম্ভৰো;

মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৬৮. জৰেন ভদ্রং জানন্তি, বলিবদ্দঞ্চ [বলিৰদ্দঞ্চ (সী. পী.)] ৰাহিযে;

দোহেন ধেনুং জানন্তি, ভাসমানঞ্চ পণ্ডিতং.

১৬৯. এৰম্পি দহরূপেতো, পঞ্ঞাযোগেন সম্ভৰো;

মা নং দহরোতি উঞ্ঞাসি, অপুচ্ছিত্ৰান সম্ভৰং;

পুচ্ছিত্ৰা সম্ভৰং জঞ্ঞা, অত্থং ধম্মঞ্চ ব্রাহ্মণ.

১৭০. স্ৰাধিপ্পাগা ভারদ্ৰাজো, সম্ভৰস্স উপন্তিকং;

তমদ্দস মহাব্রহ্মা, কীল়মানং বহীপুরে.

১৭১. রঞ্ঞোহং পহিতো দূতো, কোরব্যস্স যসস্সিনো;

‘‘অত্থং ধম্মঞ্চ পুচ্ছেসি’’, ইচ্চব্রৰি যুধিট্ঠিলো;

তং ত্ৰং অত্থঞ্চ ধম্মঞ্চ, সম্ভৰক্খাহি পুচ্ছিতো.

১৭২. তগ্ঘ তে অহমক্খিস্সং, যথাপি কুসলো তথা;

রাজা চ খো তং জানাতি, যদি কাহতি ৰা ন ৰা.

১৭৩. ‘‘অজ্জ সুৰে’’তি সংসেয্য, রঞ্ঞা পুট্ঠো সুচীরত;

মা কত্ৰা অৰসী রাজা, অত্থে জাতে যুধিট্ঠিলো.

১৭৪. অজ্ঝত্তঞ্ঞেৰ সংসেয্য, রঞ্ঞা পুট্ঠো সুচীরত;

কুম্মগ্গং ন নিৰেসেয্য, যথা মূল়্হো অচেতসো [অচেতনো (ক.)].

১৭৫. অত্তানং নাতিৰত্তেয্য, অধম্মং ন সমাচরে;

অতিত্থে নপ্পতারেয্য, অনত্থে ন যুতো সিযা.

১৭৬. যো চ এতানি ঠানানি, কত্তুং জানাতি খত্তিযো;

সদা সো ৰড্ঢতে রাজা, সুক্কপক্খেৰ চন্দিমা.

১৭৭. ঞাতীনঞ্চ পিযো হোতি, মিত্তেসু চ ৰিরোচতি;

কাযস্স ভেদা সপ্পঞ্ঞো, সগ্গং সো উপপজ্জতীতি.

সম্ভৰজাতকং পঞ্চমং.