৫১৪. ছদ্দন্তজাতকং (৪)

৯৭. কিং নু সোচসিনুচ্চঙ্গি, পণ্ডূসি ৰরৰণ্ণিনি;

মিলাযসি ৰিসালক্খি, মালাৰ পরিমদ্দিতা.

৯৮. দোহল়ো মে মহারাজ, সুপিনন্তেনুপজ্ঝগা [নু’পচ্চগা (সী. স্যা. পী.)];

ন সো সুলভরূপোৰ, যাদিসো মম দোহল়ো.

৯৯. যে কেচি মানুসা কামা, ইধ লোকস্মি নন্দনে;

সব্বে তে পচুরা ময্হং, অহং তে দম্মি দোহল়ং.

১০০. লুদ্দা দেৰ সমাযন্তু, যে কেচি ৰিজিতে তৰ;

এতেসং অহমক্খিস্সং, যাদিসো মম দোহল়ো.

১০১. ইমে তে লুদ্দকা দেৰি, কতহত্থা ৰিসারদা;

ৰনঞ্ঞূ চ মিগঞ্ঞূ চ, মমত্থে [মম তে (পী.)] চত্তজীৰিতা.

১০২. লুদ্দপুত্তা নিসামেথ, যাৰন্তেত্থ সমাগতা;

ছব্বিসাণং গজং সেতং, অদ্দসং সুপিনে অহং;

তস্স দন্তেহি মে অত্থো, অলাভে নত্থি জীৰিতং.

১০৩. ন নো পিতূনং ন পিতামহানং, দিট্ঠো সুতো কুঞ্জরো ছব্বিসাণো;

যমদ্দসা সুপিনে রাজপুত্তী, অক্খাহি নো যাদিসো হত্থিনাগো.

১০৪. দিসা চতস্সো ৰিদিসা চতস্সো, উদ্ধং অধো দস দিসা ইমাযো;

কতমং দিসং তিট্ঠতি নাগরাজা, যমদ্দসা সুপিনে ছব্বিসাণং.

১০৫. ইতো উজুং উত্তরিযং দিসাযং, অতিক্কম্ম সো সত্তগিরী ব্রহন্তে;

সুৰণ্ণপস্সো নাম গিরী উল়ারো, সুপুপ্ফিতো [সম্পুপ্ফিতো (স্যা.)] কিম্পুরিসানুচিণ্ণো.

১০৬. আরুয্হ সেলং ভৰনং কিন্নরানং, ওলোকয পব্বতপাদমূলং;

অথ দক্খসী মেঘসমানৰণ্ণং, নিগ্রোধরাজং অথ সহস্সপাদং [পোরং (ক.)].

১০৭. তত্থচ্ছতী কুঞ্জরো ছব্বিসাণো, সব্বসেতো দুপ্পসহো পরেভি;

রক্খন্তি নং অট্ঠসহস্সনাগা, ঈসাদন্তা ৰাতজৰপ্পহারিনো.

১০৮. তিট্ঠন্তি তে তুমূলং [তুমূল (স্যা.), ভিমূল (পী. ক.)] পস্সসন্তা, কুপ্পন্তি ৰাতস্সপি এরিতস্স;

মনুস্সভূতং পন তত্থ দিস্ৰা, ভস্মং করেয্যুং নাস্স রজোপি তস্স.

১০৯. বহূ হিমে রাজকুলম্হি সন্তি, পিল়ন্ধনা জাতরূপস্স দেৰী;

মুত্তামণীৰেল়ুরিযামযা চ, কিং কাহসি দন্তপিল়ন্ধনেন;

মারেতুকামা কুঞ্জরং ছব্বিসাণং, উদাহু ঘাতেস্সসি লুদ্দপুত্তে.

১১০. সা ইস্সিতা দুক্খিতা চস্মি লুদ্দ, উদ্ধঞ্চ সুস্সামি অনুস্সরন্তী;

করোহি মে লুদ্দক এতমত্থং, দস্সামি তে গামৰরানি পঞ্চ.

১১১. কত্থচ্ছতী কত্থমুপেতি ঠানং, ৰীথিস্স কা ন্হান [নহান (সী. পী.)] গতস্স হোতি;

কথঞ্হি সো ন্হাযতি [নহাযতি (সী. পী.)] নাগরাজা, কথং ৰিজানেমু গতিং গজস্স.

১১২. তত্থেৰ সা পোক্খরণী অদূরে [অৰিদূরে (স্যা. ক.)], রম্মা সুতিত্থা চ মহোদিকা [মহোদকা (স্যা. ক.)] চ;

সম্পুপ্ফিতা ভমরগণানুচিণ্ণা [কিণ্ণা (কত্থচি)], এত্থ হি সো ন্হাযতি নাগরাজা.

১১৩. সীসং নহাতুপ্পল [নহাতো উপ্পল (সী. স্যা. পী.)] মালভারী, সব্বসেতো পুণ্ডরীকত্তচঙ্গী;

আমোদমানো গচ্ছতি সন্নিকেতং, পুরক্খত্ৰা মহেসিং সব্বভদ্দং.

১১৪. তত্থেৰ সো উগ্গহেত্ৰান ৰাক্যং, আদায তূণিঞ্চ ধনুঞ্চ লুদ্দো;

ৰিতুরিযতি [ৰিতুরিয সো (সী. অট্ঠ.)] সত্তগিরী ব্রহন্তে, সুৰণ্ণপস্সং নাম গিরিং উল়ারং.

১১৫. আরুয্হ সেলং ভৰনং কিন্নরানং, ওলোকযী পব্বতপাদমূলং;

তত্থদ্দসা মেঘসমানৰণ্ণং, নিগ্রোধরাজং অট্ঠসহস্সপাদং.

১১৬. তত্থদ্দসা কুঞ্জরং ছব্বিসাণং, সব্বসেতং দুপ্পসহং পরেভি;

রক্খন্তি নং অট্ঠসহস্সনাগা, ঈসাদন্তা ৰাতজৰপ্পহারিনো.

১১৭. তত্থদ্দসা পোক্খরণিং অদূরে, রম্মং সুতিত্থঞ্চ মহোদিকঞ্চ;

সম্পুপ্ফিতং ভমরগণানুচিণ্ণং, যত্থ হি সো ন্হাযতি নাগরাজা.

১১৮. দিস্ৰান নাগস্স গতিং ঠিতিঞ্চ, ৰীথিস্স যা ন্হানগতস্স হোতি;

ওপাতমাগচ্ছি অনরিযরূপো, পযোজিতো চিত্তৰসানুগায.

১১৯. খণিত্ৰান কাসুং ফলকেহি ছাদযি, অত্তানমোধায ধনুঞ্চ লুদ্দো;

পস্সাগতং পুথুসল্লেন নাগং, সমপ্পযী দুক্কটকম্মকারী.

১২০. ৰিদ্ধো চ নাগো কোঞ্চমনাদি ঘোরং, সব্বে চ [সব্বেৰ (সী. স্যা. পী.)] নাগা নিন্নদুং [নিন্নাদু (স্যা.), নিন্নাদং (ক.)] ঘোররূপং;

তিণঞ্চ কট্ঠঞ্চ রণং [চুণ্ণং (ক. সী. পী.)] করোন্তা, ধাৰিংসু তে অট্ঠদিসা সমন্ততো.

১২১. ৰধিস্সমেতন্তি [ৰধিস্সমেনন্তি (স্যা.)] পরামসন্তো, কাসাৰমদ্দক্খি ধজং ইসীনং;

দুক্খেন ফুট্ঠস্সুদপাদি সঞ্ঞা, অরহদ্ধজো সব্ভি অৰজ্ঝরূপো.

১২২. অনিক্কসাৰো কাসাৰং, যো ৰত্থং পরিদহিস্সতি [পরিদহেস্সতি (সী. পী.), পরিধস্সতি (কত্থচি)];

অপেতো দমসচ্চেন, ন সো কাসাৰমরহতি.

১২৩. যো চ ৰন্তকসাৰস্স, সীলেসু সুসমাহিতো;

উপেতো দমসচ্চেন, স ৰে কাসাৰমরহতি.

১২৪. সমপ্পিতো পুথুসল্লেন নাগো, অদুট্ঠচিত্তো লুদ্দকমজ্ঝভাসি;

কিমত্থযং কিস্স ৰা সম্ম হেতু, মমং ৰধী কস্স ৰাযং পযোগো.

১২৫. কাসিস্স রঞ্ঞো মহেসী ভদন্তে, সা পূজিতা রাজকুলে সুভদ্দা;

তং অদ্দসা সা চ মমং অসংসি, দন্তেহি অত্থোতি চ মং [অত্থোতি মমং (স্যা. ক.)] অৰোচ.

১২৬. বহূ হি মে দন্তযুগা উল়ারা, যে মে পিতূনঞ্চ [পিতুন্নম্পি (পী.)] পিতামহানং;

জানাতি সা কোধনা রাজপুত্তী, ৰধত্থিকা ৰেরমকাসি বালা.

১২৭. উট্ঠেহি ত্ৰং লুদ্দ খরং গহেত্ৰা, দন্তে ইমে ছিন্দ পুরা মরামি;

ৰজ্জাসি তং কোধনং রাজপুত্তিং, ‘‘নাগো হতো হন্দ ইমস্স দন্তা’’.

১২৮. উট্ঠায সো লুদ্দো খরং গহেত্ৰা, ছেত্ৰান দন্তানি গজুত্তমস্স;

ৰগ্গূ সুভে অপ্পটিমে পথব্যা, আদায পক্কামি ততো হি খিপ্পং.

১২৯. ভযট্টিতা [ভযদ্দিতা (সী. পী.)] নাগৰধেন অট্টা, যে তে নাগা অট্ঠ দিসা ৰিধাৰুং;

অদিস্ৰান [অদিস্ৰ (সী. পী.)] পোসং গজপচ্চমিত্তং, পচ্চাগমুং যেন সো নাগরাজা.

১৩০. তে তত্থ কন্দিত্ৰা রোদিত্ৰান [রোদিত্ৰ (সী. পী.)] নাগা, সীসে সকে পংসুকং ওকিরিত্ৰা;

অগমংসু তে সব্বে সকং নিকেতং, পুরক্খত্ৰা মহেসিং সব্বভদ্দং.

১৩১. আদায দন্তানি গজুত্তমস্স, ৰগ্গূ সুভে অপ্পটিমে পথব্যা;

সুৰণ্ণরাজীহি সমন্তমোদরে, সো লুদ্দকো কাসিপুরং উপাগমি;

উপনেসি সো রাজকঞ্ঞায দন্তে, নাগো হতো হন্দ ইমস্স দন্তা.

১৩২. দিস্ৰান দন্তানি গজুত্তমস্স, ভত্তুপ্পিযস্স পুরিমায জাতিযা;

তত্থেৰ তস্সা হদযং অফালি, তেনেৰ সা কালমকাসি বালা.

১৩৩. সম্বোধিপত্তো স [চ (সী. স্যা.), ৰ (পী.)] মহানুভাৰো, সিতং অকাসি পরিসায মজ্ঝে;

পুচ্ছিংসু ভিক্খূ সুৰিমুত্তচিত্তা, নাকারণে পাতুকরোন্তি বুদ্ধা.

১৩৪. যমদ্দসাথ দহরিং কুমারিং, কাসাযৰত্থং অনগারিযং চরন্তিং;

সা খো তদা রাজকঞ্ঞা অহোসি, অহং তদা নাগরাজা অহোসিং.

১৩৫. আদায দন্তানি গজুত্তমস্স, ৰগ্গূ সুভে অপ্পটিমে পথব্যা;

যো লুদ্দকো কাসিপুরং উপাগমি, সো খো তদা দেৰদত্তো অহোসি.

১৩৬. অনাৰসূরং চিররত্তসংসিতং, উচ্চাৰচং [উচং নীচং (সী. স্যা. পী.)] চরিতমিদং পুরাণং;

ৰীতদ্দরো ৰীতসোকো ৰিসল্লো, সযং অভিঞ্ঞায অভাসি বুদ্ধো.

১৩৭. অহং ৰো তেন কালেন, অহোসিং তত্থ ভিক্খৰো;

নাগরাজা তদা হোমি [হোসিং (সী. স্যা. পী.)], এৰং ধারেথ জাতকন্তি.

ছদ্দন্তজাতকং চতুত্থং.