৫১০. অযোঘরজাতকং (১৪)

৩৬৩. যমেকরত্তিং পঠমং, গব্ভে ৰসতি মাণৰো;

অব্ভুট্ঠিতোৰ সো যাতি [সযতি (সী. পী.), স যাতি (কত্থচি)], সগচ্ছং ন নিৰত্ততি.

৩৬৪. ন যুজ্ঝমানা ন বলেনৰস্সিতা, নরা ন জীরন্তি ন চাপি মিয্যরে;

সব্বং হিদং [হি তং (সী. পী.)] জাতিজরাযুপদ্দুতং, তং মে মতী হোতি চরামি ধম্মং.

৩৬৫. চতুরঙ্গিনিং সেনং সুভিংসরূপং, জযন্তি রট্ঠাধিপতী পসয্হ;

ন মচ্চুনো জযিতুমুস্সহন্তি, তং মে মতী হোতি চরামি ধম্মং.

৩৬৬. হত্থীহি অস্সেহি রথেহি পত্তিভি, পরিৰারিতা মুচ্চরে একচ্চেয্যা [একচেয্যা (সী. পী.)];

ন মচ্চুনো [ন মচ্চুতো (সী.)] মুচ্চিতুমুস্সহন্তি, তং মে মতী হোতি চরামি ধম্মং.

৩৬৭. হত্থীহি অস্সেহি রথেহি পত্তিভি, সূরা [পুরা (ক.)] পভঞ্জন্তি পধংসযন্তি;

ন মচ্চুনো ভঞ্জিতুমুস্সহন্তি, তং মে মতী হোতি চরামি ধম্মং.

৩৬৮. মত্তা গজা ভিন্নগল়া [পভিন্নগলা (সী.)] পভিন্না, নগরানি মদ্দন্তি জনং হনন্তি;

ন মচ্চুনো মদ্দিতুমুস্সহন্তি, তং মে মতী হোতি চরামি ধম্মং.

৩৬৯. ইস্সাসিনো কতহত্থাপি ৰীরা [ৰীরা (সী. পী.)], দূরেপাতী [পতী (ক.)] অক্খণৰেধিনোপি;

ন মচ্চুনো ৰিজ্ঝিতুমুস্সহন্তি, তং মে মতী হোতি চরামি ধম্মং.

৩৭০. সরানি খীযন্তি সসেলকাননা, সব্বং হিদং [হি তং (সী. পী.), পিতং (স্যা.)] খীযতি দীঘমন্তরং;

সব্বং হিদং [হি তং (সী. পী.), পিতং (স্যা.)] ভঞ্জরে কালপরিযাযং, তং মে মতী হোতি চরামি ধম্মং.

৩৭১. সব্বে সমেৰং হি নরাননারিনং [নরানরীনং (পী.), নারী নরানং (স্যা.), নরনারীনং (ক.)], চলাচলং পাণভুনোধ জীৰিতং;

পটোৰ ধুত্তস্স দুমোৰ কূলজো, তং মে মতী হোতি চরামি ধম্মং.

৩৭২. দুমপ্ফলানেৰ পতন্তি মাণৰা, দহরা চ ৰুদ্ধা চ সরীরভেদা;

নারিযো নরা মজ্ঝিমপোরিসা চ, তং মে মতী হোতি চরামি ধম্মং.

৩৭৩. নাযং ৰযো তারকরাজসন্নিভো, যদব্ভতীতং গতমেৰ দানি তং;

জিণ্ণস্স হী নত্থি রতী কুতো সুখং, তং মে মতী হোতি চরামি ধম্মং.

৩৭৪. যক্খা পিসাচা অথৰাপি পেতা, কুপিতাতে [কুপিতাপি তে (সী. পী.)] অস্সসন্তি মনুস্সে;

ন মচ্চুনো অস্সসিতুস্সহন্তি, তং মে মতী হোতি চরামি ধম্মং.

৩৭৫. যক্খে পিসাচে অথৰাপি পেতে, কুপিতেপি তে নিজ্ঝপনং করোন্তি;

ন মচ্চুনো নিজ্ঝপনং করোন্তি, তং মে মতী হোতি চরামি ধম্মং.

৩৭৬. অপরাধকে দূসকে হেঠকে চ, রাজানো দণ্ডেন্তি ৰিদিত্ৰান দোসং;

ন মচ্চুনো দণ্ডযিতুস্সহন্তি, তং মে মতী হোতি চরামি ধম্মং.

৩৭৭. অপরাধকা দূসকা হেট্ঠকা চ, লভন্তি তে রাজিনো নিজ্ঝপেতুং;

ন মচ্চুনো নিজ্ঝপনং করোন্তি, তং মে মতী হোতি চরামি ধম্মং.

৩৭৮. ন খত্তিযোতি ন চ ব্রাহ্মণোতি, ন অড্ঢকা বলৰা তেজৰাপি;

ন মচ্চুরাজস্স অপেক্খমত্থি, তং মে মতী হোতি চরামি ধম্মং.

৩৭৯. সীহা চ ব্যগ্ঘা চ অথোপি দীপিযো, পসয্হ খাদন্তি ৰিপ্ফন্দমানং;

ন মচ্চুনো খাদিতুমুস্সহন্তি, তং মে মতী হোতি চরামি ধম্মং.

৩৮০. মাযাকারা রঙ্গমজ্ঝে করোন্তা, মোহেন্তি চক্খূনি জনস্স তাৰদে;

ন মচ্চুনো মোহযিতুস্সহন্তি, তং মে মতী হোতি চরামি ধম্মং.

৩৮১. আসীৰিসা কুপিতা উগ্গতেজা, ডংসন্তি মারেন্তিপি তে মনুস্সে;

ন মচ্চুনো ডংসিতুমুস্সহন্তি, তং মে মতী হোতি চরামি ধম্মং.

৩৮২. আসীৰিসা কুপিতা যং ডংসন্তি, তিকিচ্ছকা তেস ৰিসং হনন্তি;

ন মচ্চুনো দট্ঠৰিসং [দট্ঠস্স ৰিসং (ক.)] হনন্তি, তং মে মতী হোতি চরামি ধম্মং.

৩৮৩. ধম্মন্তরী ৰেত্তরণী [ৰেতরণী (সী. পী.)] চ ভোজো, ৰিসানি হন্ত্ৰান ভুজঙ্গমানং;

সুয্যন্তি তে কালকতা তথেৰ, তং মে মতী হোতি চরামি ধম্মং.

৩৮৪. ৰিজ্জাধরা ঘোরমধীযমানা, অদস্সনং ওসধেহি ৰজন্তি;

ন মচ্চুরাজস্স ৰজন্তদস্সনং [ৰজন্তি অদস্সনং (স্যা. ক.)], তং মে মতী হোতি চরামি ধম্মং.

৩৮৫. ধম্মো হৰে রক্খতি ধম্মচারিং, ধম্মো সুচিণ্ণো সুখমাৰহাতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী.

৩৮৬. ন হি ধম্মো অধম্মো চ, উভো সমৰিপাকিনো;

অধম্মো নিরযং নেতি, ধম্মো পাপেতি সুগ্গতিন্তি.

অযোঘরজাতকং চুদ্দসমং.

তস্সুদ্দানং –

মাতঙ্গ সম্ভূত সিৰি সিরিমন্তো, রোহণ হংস সত্তিগুম্বো ভল্লাতিয;

সোমনস্স চম্পেয্য ব্রহ্ম পঞ্চ-পণ্ডিত চিরস্সংৰত অযোঘরাতি.

ৰীসতিনিপাতং নিট্ঠিতং.