১৫. ৰীসতিনিপাতো

৪৯৭. মাতঙ্গজাতকং (১)

১. কুতো নু আগচ্ছসি দুম্মৰাসী [রুম্মৰাসী (সী. পী.)], ওতল্লকো পংসুপিসাচকোৰ;

সঙ্কারচোল়ং পটিমুঞ্চ [পটিমুচ্চ (সী. পী.)] কণ্ঠে, কো রে তুৰং হোসি [হোহিসি (সী. পী.)] অদক্খিণেয্যো.

২. অন্নং তৰেদং [তৰ ইদং (ক. সী. পী.), তৰযিদং (স্যা.)] পকতং যসস্সি, তং খজ্জরে ভুঞ্জরে পিয্যরে চ;

জানাসি মং ত্ৰং পরদত্তূপজীৰিং, উত্তিট্ঠপিণ্ডং লভতং সপাকো.

৩. অন্নং মমেদং [মম ইদং (ক. সী. পী.), মমযিদং (স্যা.)] পকতং ব্রাহ্মণানং, অত্তত্থায সদ্দহতো মমেদং [মম ইদং (ক. সী. পী.), মমযিদং (স্যা.)];

অপেহি এত্তো কিমিধট্ঠিতোসি, ন মাদিসা তুয্হং দদন্তি জম্ম.

৪. থলে চ নিন্নে চ ৰপন্তি বীজং, অনূপখেত্তে ফলমাসমানা [মাসসানা (সী. পী.), মাসিং সমানা (স্যা.)];

এতায সদ্ধায দদাহি দানং, অপ্পেৰ আরাধযে দক্খিণেয্যে.

৫. খেত্তানি ময্হং ৰিদিতানি লোকে, যেসাহং বীজানি পতিট্ঠপেমি;

যে ব্রাহ্মণা জাতিমন্তূপপন্না, তানীধ খেত্তানি সুপেসলানি.

৬. জাতিমদো চ অতিমানিতা চ, লোভো চ দোসো চ মদো চ মোহো;

এতে অগুণা যেসু চ সন্তি [যেসু ৰসন্তি (সী. পী.)] সব্বে, তানীধ খেত্তানি অপেসলানি.

৭. জাতিমদো চ অতিমানিতা চ, লোভো চ দোসো চ মদো চ মোহো;

এতে অগুণা যেসু ন সন্তি সব্বে, তানীধ খেত্তানি সুপেসলানি.

৮. ক্ৰেত্থ গতা [ক্ৰত্থ গতা (স্যা.), কত্থেৰ ভট্ঠা (পী.)] উপজোতিযো চ, উপজ্ঝাযো চ অথৰা গণ্ডকুচ্ছি [অণ্ডকুচ্ছি (সী. স্যা. পী.)];

ইমস্স দণ্ডঞ্চ ৰধঞ্চ দত্ৰা, গলে গহেত্ৰা খলযাথ [গলযাথ (ক.)] জম্মং.

৯. গিরিং নখেন খণসি, অযো দন্তেহি [দন্তেন (সী. পী.)] খাদসি;

জাতৰেদং পদহসি, যো ইসিং পরিভাসসি.

১০. ইদং ৰত্ৰান মাতঙ্গো, ইসি সচ্চপরক্কমো;

অন্তলিক্খস্মিং পক্কামি [পক্কমি (ক.)], ব্রাহ্মণানং উদিক্খতং.

১১. আৰেল্লিতং [অৰেঠিতং (সী. পী.)] পিট্ঠিতো উত্তমঙ্গং, বাহুং [বাহং (সী. পী.)] পসারেতি অকম্মনেয্যং [অকম্পনেয্যং (ক.)];

সেতানি অক্খীনি যথা মতস্স, কো মে ইমং পুত্তমকাসি এৰং.

১২. ইধাগমা সমণো দুম্মৰাসী, ওতল্লকো পংসুপিসাচকোৰ;

সঙ্কারচোল়ং পটিমুঞ্চ কণ্ঠে, সো তে ইমং পুত্তমকাসি এৰং.

১৩. কতমং দিসং অগমা ভূরিপঞ্ঞো, অক্খাথ মে মাণৰা এতমত্থং;

গন্ত্ৰান তং পটিকরেমু অচ্চযং, অপ্পেৰ নং পুত্ত লভেমু জীৰিতং.

১৪. ৰেহাযসং অগমা ভূরিপঞ্ঞো, পথদ্ধুনো পন্নরসেৰ চন্দো;

অপি চাপি সো পুরিমদিসং অগচ্ছি, সচ্চপ্পটিঞ্ঞো ইসি সাধুরূপো.

১৫. আৰেল্লিতং পিট্ঠিতো উত্তমঙ্গং, বাহুং পসারেতি অকম্মনেয্যং;

সেতানি অক্খীনি যথা মতস্স, কো মে ইমং পুত্তমকাসি এৰং.

১৬. যক্খা হৰে সন্তি মহানুভাৰা, অন্ৰাগতা ইসযো সাধুরূপা;

তে দুট্ঠচিত্তং কুপিতং ৰিদিত্ৰা, যক্খা হি তে পুত্তমকংসু এৰং.

১৭. যক্খা চ মে পুত্তমকংসু এৰং, ত্ৰঞ্ঞেৰ মে মা কুদ্ধো [কুদ্ধ (ক.)] ব্রহ্মচারি;

তুম্হেৰ [তুয্হেৰ (ক.)] পাদে সরণং গতাস্মি, অন্ৰাগতা পুত্তসোকেন ভিক্খু.

১৮. তদেৰ হি এতরহি চ ময্হং, মনোপদোসো ন মমত্থি [মম নত্থি (পী.)] কোচি;

পুত্তো চ তে ৰেদমদেন মত্তো, অত্থং ন জানাতি অধিচ্চ ৰেদে.

১৯. অদ্ধা হৰে ভিক্খু মুহুত্তকেন, সম্মুয্হতেৰ পুরিসস্স সঞ্ঞা;

একাপরাধং [এতাপরাধং (ক.)] খম ভূরিপঞ্ঞ, ন পণ্ডিতা কোধবলা ভৰন্তি.

২০. ইদঞ্চ ময্হং উত্তিট্ঠপিণ্ডং, তৰ [নত্থি সী. পী. পোত্থকেসু] মণ্ডব্যো ভুঞ্জতু অপ্পপঞ্ঞো;

যক্খা চ তে নং [তে পুত্তং (স্যা.)] ন ৰিহেঠযেয্যুং, পুত্তো চ তে হেস্সতি [হোহিতি (সী. পী.)] সো অরোগো.

২১. মণ্ডব্য বালোসি পরিত্তপঞ্ঞো, যো পুঞ্ঞখেত্তানমকোৰিদোসি;

মহক্কসাৰেসু দদাসি দানং, কিলিট্ঠকম্মেসু অসঞ্ঞতেসু.

২২. জটা চ কেসা অজিনা নিৰত্থা, জরূদপানংৰ মুখং পরূল়্হং;

পজং ইমং পস্সথ দুম্মরূপং [রুম্মরূপিং (সী. পী.)], ন জটাজিনং তাযতি অপ্পপঞ্ঞং.

২৩. যেসং রাগো চ দোসো চ, অৰিজ্জা চ ৰিরাজিতা;

খীণাসৰা অরহন্তো, তেসু দিন্নং মহপ্ফলন্তি.

মাতঙ্গজাতকং পঠমং.

৪৯৮. চিত্তসম্ভূতজাতকং (২)

২৪. সব্বং নরানং সফলং সুচিণ্ণং, ন কম্মুনা কিঞ্চন মোঘমত্থি;

পস্সামি সম্ভূতং মহানুভাৰং, সকম্মুনা পুঞ্ঞফলূপপন্নং.

২৫. সব্বং নরানং সফলং সুচিণ্ণং, ন কম্মুনা কিঞ্চন মোঘমত্থি;

কচ্চিন্নু চিত্তস্সপি এৰমেৰং, ইদ্ধো মনো তস্স যথাপি ময্হং.

২৬. সব্বং নরানং সফলং সুচিণ্ণং, ন কম্মুনা কিঞ্চন মোঘমত্থি;

চিত্তম্পি জানাহি [চিত্তং ৰিজানাহি (সী. পী.)] তথেৰ দেৰ, ইদ্ধো মনো তস্স যথাপি তুয্হং.

২৭. ভৰং নু চিত্তো সুতমঞ্ঞতো তে, উদাহু তে কোচি নং এতদক্খা;

গাথা সুগীতা ন মমত্থি কঙ্খা, দদামি তে গামৰরং সতঞ্চ.

২৮. ন চাহং চিত্তো সুতমঞ্ঞতো মে, ইসী চ মে এতমত্থং অসংসি;

‘‘গন্ত্ৰান রঞ্ঞো পটিগাহি [পটিগাযি (স্যা. ক.), পটিগায (?)] গাথং, অপি তে ৰরং অত্তমনো দদেয্য’’ [অপি নু তে ৰরং অত্তমনো দদেয্য (স্যা.), অপি নু তে অত্তমনো ৰরং দদে (ক.)].

২৯. যোজেন্তু ৰে রাজরথে, সুকতে চিত্তসিব্বনে;

কচ্ছং নাগানং বন্ধথ, গীৰেয্যং পটিমুঞ্চথ.

৩০. আহঞ্ঞন্তু [আহঞ্ঞরে (স্যা.)] ভেরিমুদিঙ্গসঙ্খে [সঙ্খা (স্যা.)], সীঘানি যানানি চ যোজযন্তু;

অজ্জেৰহং অস্সমং তং গমিস্সং, যত্থেৰ দক্খিস্সমিসিং নিসিন্নং.

৩১. সুলদ্ধলাভো ৰত মে অহোসি, গাথা সুগীতা পরিসায মজ্ঝে;

স্ৰাহং ইসিং সীলৰতূপপন্নং, দিস্ৰা পতীতো সুমনোহমস্মি.

৩২. আসনং উদকং পজ্জং, পটিগ্গণ্হাতু নো ভৰং;

অগ্ঘে ভৰন্তং পুচ্ছাম, অগ্ঘং কুরুতু নো ভৰং.

৩৩. রম্মঞ্চ তে আৰসথং করোন্তু, নারীগণেহি পরিচারযস্সু;

করোহি ওকাসমনুগ্গহায, উভোপি মং ইস্সরিযং করোম.

৩৪. দিস্ৰা ফলং দুচ্চরিতস্স রাজ, অথো সুচিণ্ণস্স মহাৰিপাকং;

অত্তানমেৰ পটিসংযমিস্সং, ন পত্থযে পুত্ত [পুত্তং (সী. পী.)] পসুং ধনং ৰা.

৩৫. দসেৰিমা ৰস্সদসা, মচ্চানং ইধ জীৰিতং;

অপত্তঞ্ঞেৰ তং ওধিং, নল়ো ছিন্নোৰ সুস্সতি.

৩৬. তত্থ কা নন্দি কা খিড্ডা, কা রতী কা ধনেসনা;

কিং মে পুত্তেহি দারেহি, রাজ মুত্তোস্মি বন্ধনা.

৩৭. সোহং এৰং পজানামি [সো অহং সুপ্পজানামি (সী. পী.)], মচ্চু মে নপ্পমজ্জতি;

অন্তকেনাধিপন্নস্স, কা রতী কা ধনেসনা.

৩৮. জাতি নরানং অধমা জনিন্দ, চণ্ডালযোনি দ্ৰিপদাকনিট্ঠা [দিপদাকনিট্ঠা (সী. পী.)];

সকেহি কম্মেহি সুপাপকেহি, চণ্ডালগব্ভে [চণ্ডালিগব্ভে (স্যা.)] অৰসিম্হ পুব্বে.

৩৯. চণ্ডালাহুম্হ অৰন্তীসু, মিগা নেরঞ্জরং পতি;

উক্কুসা নম্মদাতীরে [রম্মদাতীরে (স্যা. ক.)], ত্যজ্জ ব্রাহ্মণখত্তিযা.

৪০. উপনীযতি জীৰিতমপ্পমাযু, জরূপনীতস্স ন সন্তি তাণা;

করোহি পঞ্চাল মমেত [মমেৰ (স্যা. ক.)] ৰাক্যং, মাকাসি কম্মানি দুক্খুদ্রযানি.

৪১. উপনীযতি জীৰিতমপ্পমাযু, জরূপনীতস্স ন সন্তি তাণা;

করোহি পঞ্চাল মমেত ৰাক্যং, মাকাসি কম্মানি দুক্খপ্ফলানি.

৪২. উপনীযতি জীৰিতমপ্পমাযু, জরূপনীতস্স ন সন্তি তাণা;

করোহি পঞ্চাল মমেত ৰাক্যং, মাকাসি কম্মানি রজস্সিরানি.

৪৩. উপনীযতি জীৰিতমপ্পমাযু, ৰণ্ণং জরা হন্তি নরস্স জিয্যতো;

করোহি পঞ্চাল মমেত ৰাক্যং, মাকাসি কম্মং নিরযূপপত্তিযা.

৪৪. অদ্ধা হি সচ্চং ৰচনং তৰেতং, যথা ইসী ভাসসি এৰমেতং;

কামা চ মে সন্তি অনপ্পরূপা, তে দুচ্চজা মাদিসকেন ভিক্খু.

৪৫. নাগো যথা পঙ্কমজ্ঝে ব্যসন্নো, পস্সং থলং নাভিসম্ভোতি গন্তুং;

এৰম্পহং [এৰমহং (স্যা.)] কামপঙ্কে ব্যসন্নো, ন ভিক্খুনো মগ্গমনুব্বজামি.

৪৬. যথাপি মাতা চ পিতা চ পুত্তং, অনুসাসরে কিন্তি সুখী ভৰেয্য;

এৰম্পি মং ত্ৰং অনুসাস ভন্তে, যথা চিরং [যমাচরং (সী. পী. ক. অট্ঠ.)] পেচ্চ সুখী ভৰেয্যং.

৪৭. নো চে তুৰং উস্সহসে জনিন্দ, কামে ইমে মানুসকে পহাতুং;

ধম্মিং [ধম্মং (সী. পী.)] বলিং পট্ঠপযস্সু রাজ, অধম্মকারো তৰ [অধম্মকারো চ তে (সী. স্যা. পী.)] মাহু রট্ঠে.

৪৮. দূতা ৰিধাৰন্তু দিসা চতস্সো, নিমন্তকা সমণব্রাহ্মণানং;

তে অন্নপানেন উপট্ঠহস্সু, ৰত্থেন সেনাসনপচ্চযেন চ.

৪৯. অন্নেন পানেন পসন্নচিত্তো, সন্তপ্পয সমণব্রাহ্মণে চ;

দত্ৰা চ ভুত্ৰা চ যথানুভাৰং, অনিন্দিতো সগ্গমুপেহি [মুপেতি (পী. ক.)] ঠানং.

৫০. সচে চ তং রাজ মদো সহেয্য, নারীগণেহি পরিচারযন্তং;

ইমমেৰ গাথং মনসী করোহি, ভাসেসি [ভাসেহি (স্যা. পী. ক.)] চেনং পরিসায মজ্ঝে.

৫১. অব্ভোকাসসযো জন্তু, ৰজন্ত্যা খীরপাযিতো;

পরিকিণ্ণো সুৰানেহি [সুপিনেহি (সী. পী.)], স্ৰাজ্জ রাজাতি ৰুচ্চতীতি.

চিত্তসম্ভূতজাতকং দুতিযং.

৪৯৯. সিৰিজাতকং (৩)

৫২. দূরে অপস্সং থেরোৰ, চক্খুং যাচিতুমাগতো;

একনেত্তা ভৰিস্সাম, চক্খুং মে দেহি যাচিতো.

৫৩. কেনানুসিট্ঠো ইধ মাগতোসি, ৰনিব্বক [ৰণিব্বক (সী.)] চক্খুপথানি যাচিতুং;

সুদুচ্চজং যাচসি উত্তমঙ্গং, যমাহু নেত্তং পুরিসেন দুচ্চজং.

৫৪. যমাহু দেৰেসু সুজম্পতীতি, মঘৰাতি নং আহু মনুস্সলোকে;

তেনানুসিট্ঠো ইধ মাগতোস্মি, ৰনিব্বকো চক্খুপথানি যাচিতুং.

৫৫. ৰনিব্বতো [ৰনিব্বকো (স্যা. পী.)] ময্হ ৰনিং [ৰনং (ক.), ৰণিং (সী. স্যা. পী.)] অনুত্তরং, দদাহি তে চক্খুপথানি যাচিতো;

দদাহি মে চক্খুপথং অনুত্তরং, যমাহু নেত্তং পুরিসেন দুচ্চজং.

৫৬. যেন অত্থেন আগচ্ছি [আগঞ্ছি (সী. পী.)], যমত্থমভিপত্থযং;

তে তে ইজ্ঝন্তু সঙ্কপ্পা, লভ চক্খূনি ব্রাহ্মণ.

৫৭. একং তে যাচমানস্স, উভযানি দদামহং;

স চক্খুমা গচ্ছ জনস্স পেক্খতো, যদিচ্ছসে ত্ৰং তদতে সমিজ্ঝতু.

৫৮. মা নো দেৰ অদা চক্খুং, মা নো সব্বে পরাকরি [পরক্করি (স্যা. ক. অট্ঠ.), পরিক্করি (ক.) পরি + আ + করি = পরাকরি];

ধনং দেহি মহারাজ, মুত্তা ৰেল়ুরিযা বহূ.

৫৯. যুত্তে দেৰ রথে দেহি, আজানীযে চলঙ্কতে;

নাগে দেহি মহারাজ, হেমকপ্পনৰাসসে.

৬০. যথা তং সিৰযো [সীৰিযো (স্যা.)] সব্বে, সযোগ্গা সরথা সদা;

সমন্তা পরিকিরেয্যুং [পরিকরেয্যুং (স্যা. পী.)], এৰং দেহি রথেসভ.

৬১. যো ৰে দস্সন্তি ৰত্ৰান, অদানে কুরুতে মনো;

ভূম্যং [ভূম্যা (সী. পী.)] সো পতিতং পাসং, গীৰাযং পটিমুঞ্চতি.

৬২. যো ৰে দস্সন্তি ৰত্ৰান, অদানে কুরুতে মনো;

পাপা পাপতরো হোতি, সম্পত্তো যমসাধনং.

৬৩. যঞ্হি যাচে তঞ্হি দদে, যং ন যাচে ন তং দদে;

স্ৰাহং তমেৰ দস্সামি, যং মং যাচতি ব্রাহ্মণো.

৬৪. আযুং নু ৰণ্ণং নু সুখং বলং নু, কিং পত্থযানো নু জনিন্দ দেসি;

কথঞ্হি রাজা সিৰিনং অনুত্তরো, চক্খূনি দজ্জা পরলোকহেতু.

৬৫. ন ৰাহমেতং যসসা দদামি, ন পুত্তমিচ্ছে ন ধনং ন রট্ঠং;

সতঞ্চ ধম্মো চরিতো পুরাণো, ইচ্চেৰ দানে রমতে মনো মম [মমং (সী. পী.)].

৬৬. সখা চ মিত্তো চ মমাসি সীৰিক [সীৰক (সী. পী.)], সুসিক্খিতো সাধু করোহি মে ৰচো;

উদ্ধরিত্ৰা [উদ্ধত্ৰ (সী.), লদ্ধ ত্ৰং (পী.)] চক্খূনি মমং জিগীসতো, হত্থেসু ঠপেহি [আৰেসি (সী.)] ৰনিব্বকস্স.

৬৭. চোদিতো সিৰিরাজেন, সিৰিকো ৰচনঙ্করো;

রঞ্ঞো চক্খূনুদ্ধরিত্ৰা [চক্খূনি উদ্ধত্ৰা (সী. পী.)], ব্রাহ্মণস্সূপনামযি;

সচক্খু ব্রাহ্মণো আসি, অন্ধো রাজা উপাৰিসি.

৬৮. ততো সো কতিপাহস্স, উপরূল়্হেসু চক্খুসু;

সূতং আমন্তযী রাজা, সিৰীনং রট্ঠৰড্ঢনো.

৬৯. যোজেহি সারথি যানং, যুত্তঞ্চ পটিৰেদয;

উয্যানভূমিং গচ্ছাম, পোক্খরঞ্ঞো ৰনানি চ.

৭০. সো চ পোক্খরণীতীরে [পোক্খরণিযা তীরে (সী. পী.)], পল্লঙ্কেন উপাৰিসি;

তস্স সক্কো পাতুরহু, দেৰরাজা সুজম্পতি.

৭১. সক্কোহমস্মি দেৰিন্দো, আগতোস্মি তৰন্তিকে;

ৰরং ৰরস্সু রাজীসি, যং কিঞ্চি মনসিচ্ছসি.

৭২. পহূতং মে ধনং সক্ক, বলং কোসো চনপ্পকো;