৫০৯. হত্থিপালজাতকং (১৩)

৩৩৭. চিরস্সং ৰত পস্সাম, ব্রাহ্মণং দেৰৰণ্ণিনং;

মহাজটং খারিধরং [ভারধরং (পী.)], পঙ্কদন্তং রজস্সিরং.

৩৩৮. চিরস্সং ৰত পস্সাম, ইসিং ধম্মগুণে রতং;

কাসাযৰত্থৰসনং, ৰাকচীরং পটিচ্ছদং.

৩৩৯. আসনং উদকং পজ্জং, পটিগণ্হাতু নো ভৰং;

অগ্ঘে ভৰন্তং পুচ্ছাম, অগ্ঘং কুরুতু নো ভৰং.

৩৪০. অধিচ্চ ৰেদে পরিযেস ৰিত্তং, পুত্তে গহে [গেহে (সী. স্যা. পী.)] তাত পতিট্ঠপেত্ৰা;

গন্ধে রসে পচ্চনুভুয্য [পচ্চনুভোত্ৰ (স্যা.), পচ্চনুভুত্ৰ (পী.)] সব্বং, অরঞ্ঞং সাধু মুনি সো পসত্থো.

৩৪১. ৰেদা ন সচ্চা ন চ ৰিত্তলাভো, ন পুত্তলাভেন জরং ৰিহন্তি;

গন্ধে রসে মুচ্চন [মুঞ্চন (সী. ক.)] মাহু সন্তো, সকম্মুনা [সকম্মনা (সী. পী.)] হোতি ফলূপপত্তি.

৩৪২. অদ্ধা হি সচ্চং ৰচনং তৰেতং, সকম্মুনা হোতি ফলূপপত্তি;

জিণ্ণা চ মাতাপিতরো তৰীমে [তৰেমে (সী.), তৰ যিমে (স্যা. পী.)], পস্সেয্যুং তং ৰস্সসতং অরোগং [অরোগ্যং (স্যা. ক.)].

৩৪৩. যস্সস্স সক্খী মরণেন রাজ, জরায মেত্তী নরৰীরসেট্ঠ;

যো চাপি জঞ্ঞা ন মরিস্সং কদাচি, পস্সেয্যুং তং ৰস্সসতং অরোগং.

৩৪৪. যথাপি নাৰং পুরিসো দকম্হি, এরেতি চে নং উপনেতি তীরং;

এৰম্পি ব্যাধী সততং জরা চ, উপনেতি মচ্চং [মচ্চু (স্যা. পী.)] ৰসমন্তকস্স.

৩৪৫. পঙ্কো চ কামা পলিপো চ কামা, মনোহরা দুত্তরা মচ্চুধেয্যা;

এতস্মিং পঙ্কে পলিপে ব্যসন্না [ৰিসন্না (স্যা. ক.)], হীনত্তরূপা ন তরন্তি পারং.

৩৪৬. অযং পুরে লুদ্দমকাসি কম্মং, স্ৰাযং গহীতো ন হি মোক্খিতো মে;

ওরুন্ধিযা নং পরিরক্খিস্সামি, মাযং পুন লুদ্দমকাসি কম্মং.

৩৪৭. গৰংৰ [গাৰংৰ (সী.)] নট্ঠং পুরিসো যথা ৰনে, অন্ৰেসতী [পরিযেসতী (সী. পী.)] রাজ অপস্সমানো;

এৰং নট্ঠো এসুকারী মমত্থো, সোহং কথং ন গৰেসেয্যং রাজ.

৩৪৮. হিয্যোতি হিয্যতি [হীযোতি হীযতি (সী.)] পোসো, পরেতি পরিহাযতি;

অনাগতং নেতমত্থীতি ঞত্ৰা, উপ্পন্নছন্দং কো পনুদেয্য ধীরো.

৩৪৯. পস্সামি ৰোহং দহরং [দহরী (স্যা. পী. ক.)] কুমারিং, মত্তূপমং কেতকপুপ্ফনেত্তং;

অভুত্তভোগে [অভুত্ৰ ভোগে (স্যা. ক. অট্ঠ.), অভুত্ৰ ভোগে (পী.), ভোগে অতুত্ৰা (ক.)] পঠমে ৰযস্মিং, আদায মচ্চু ৰজতে কুমারিং.

৩৫০. যুৰা সুজাতো সুমুখো সুদস্সনো, সামো কুসুম্ভপরিকিণ্ণমস্সু;

হিত্ৰান কামে পটিকচ্চ [পটিগচ্চ (সী.), পটিগচ্ছ (স্যা. পী.)] গেহং, অনুজান মং পব্বজিস্সামি দেৰ.

৩৫১. সাখাহি রুক্খো লভতে সমঞ্ঞং, পহীনসাখং পন খাণুমাহু;

পহীনপুত্তস্স মমজ্জ ভোতি, ৰাসেট্ঠি ভিক্খাচরিযায কালো.

৩৫২. অঘস্মি কোঞ্চাৰ যথা হিমচ্চযে, কতানি [তন্তানি (সী. পী.)] জালানি পদালিয [পদালেয্য (সী.)] হংসা;

গচ্ছন্তি পুত্তা চ পতী চ ময্হং, সাহং কথং নানুৰজে পজানং.

৩৫৩. এতে ভুত্ৰা ৰমিত্ৰা চ, পক্কমন্তি ৰিহঙ্গমা;

যে চ ভুত্ৰান ৰমিংসু, তে মে হত্থত্ত [হত্থত্থ (সী. স্যা. পী.)] মাগতা.

৩৫৪. অৰমী ব্রাহ্মণো কামে, সো [তে (সী. পী.)] ত্ৰং পচ্চাৰমিস্সসি;

ৰন্তাদো পুরিসো রাজ, ন সো হোতি পসংসিযো.

৩৫৫. পঙ্কে চ [পঙ্কেৰ (সী. পী.)] পোসং পলিপে ব্যসন্নং, বলী যথা দুব্বলমুদ্ধরেয্য;

এৰম্পি মং ত্ৰং উদতারি ভোতি, পঞ্চালি গাথাহি সুভাসিতাহি.

৩৫৬. ইদং ৰত্ৰা মহারাজা, এসুকারী দিসম্পতি;

রট্ঠং হিত্ৰান পব্বজি, নাগো ছেত্ৰাৰ বন্ধনং.

৩৫৭. রাজা চ পব্বজ্জমরোচযিত্থ, রট্ঠং পহায নরৰীরসেট্ঠো;

তুৰম্পি নো হোতি যথেৰ রাজা, অম্হেহি গুত্তা অনুসাস রজ্জং.

৩৫৮. রাজা চ পব্বজ্জমরোচযিত্থ, রট্ঠং পহায নরৰীরসেট্ঠো;

অহম্পি একা [একাৰ (সী.)] চরিস্সামি লোকে, হিত্ৰান কামানি মনোরমানি.

৩৫৯. রাজা চ পব্বজ্জমরোচযিত্থ, রট্ঠং পহায নরৰীরসেট্ঠো;

অহম্পি একা চরিস্সামি লোকে, হিত্ৰান কামানি যথোধিকানি.

৩৬০. অচ্চেন্তি কালা তরযন্তি রত্তিযো, ৰযোগুণা অনুপুব্বং জহন্তি;

অহম্পি একা চরিস্সামি লোকে, হিত্ৰান কামানি মনোরমানি.

৩৬১. অচ্চেন্তি কালা তরযন্তি রত্তিযো, ৰযোগুণা অনুপুব্বং জহন্তি;

অহম্পি একা চরিস্সামি লোকে, হিত্ৰান কামানি যথোধিকানি.

৩৬২. অচ্চেন্তি কালা তরযন্তি রত্তিযো, ৰযোগুণা অনুপুব্বং জহন্তি;

অহম্পি একা চরিস্সামি লোকে, সীতিভূতা [সীতীভূতা (সী.)] সব্বমতিচ্চ সঙ্গন্তি.

হত্থিপালজাতকং তেরসমং.