৫০৮. পঞ্চপণ্ডিতজাতকং (১২)

৩১৫. পঞ্চ পণ্ডিতা সমাগতাত্থ, পঞ্হা মে পটিভাতি তং সুণাথ;

নিন্দিযমত্থং পসংসিযং ৰা, কস্সেৰাৰিকরেয্য [কস্স ৰাৰীকরেয্য (ক.)] গুয্হমত্থং.

৩১৬. ত্ৰং আৰিকরোহি ভূমিপাল, ভত্তা ভারসহো তুৰং ৰদে তং;

তৰ ছন্দরুচীনি [ছন্দঞ্চ রুচিঞ্চ (সী. পী.)] সম্মসিত্ৰা, অথ ৰক্খন্তি জনিন্দ পঞ্চ ধীরা.

৩১৭. যা সীলৰতী অনঞ্ঞথেয্যা [অনঞ্ঞধেয্যা (সী. পী.)], ভত্তুচ্ছন্দৰসানুগা (পিযা) [( ) নত্থি সী. পী. পোত্থকেসু] মনাপা;

নিন্দিযমত্থং পসংসিযং ৰা, ভরিযাযাৰিকরেয্য [ভরিযায ৰাৰীকরেয্য (ক.)] গুয্হমত্থং.

৩১৮. যো কিচ্ছগতস্স আতুরস্স, সরণং হোতি গতী পরাযনঞ্চ;

নিন্দিযমত্থং পসংসিযং ৰা, সখিনো ৰাৰিকরেয্য গুয্হমত্থং.

৩১৯. জেট্ঠো [যো জেট্ঠো (স্যা.)] অথ মজ্ঝিমো কনিট্ঠো, যো [সো (সী. স্যা. পী.)] চে সীলসমাহিতো ঠিতত্তো;

নিন্দিযমত্থং পসংসিযং ৰা, ভাতু ৰাৰীকরেয্য গুয্হমত্থং.

৩২০. যো ৰে পিতুহদযস্স পদ্ধগূ [পত্থগূ (স্যা.), পত্তগূ (ক.)], অনুজাতো পিতরং অনোমপঞ্ঞো;

নিন্দিযমত্থং পসংসিযং ৰা, পুত্তস্সাৰিকরেয্য [পুত্তস্স ৰাৰীকরেয্য (ক.)] গুয্হমত্থং.

৩২১. মাতা দ্ৰিপদাজনিন্দসেট্ঠ, যা নং [যো তং (সী. পী.)] পোসেতি ছন্দসা পিযেন;

নিন্দিযমত্থং পসংসিযং ৰা, মাতুযাৰীকরেয্য [মাতুযা ৰাৰীকরেয্য (ক.)] গুয্হমত্থং.

৩২২. গুয্হস্স হি গুয্হমেৰ সাধু, ন হি গুয্হস্স পসত্থমাৰিকম্মং;

অনিপ্ফন্নতা [অনিপ্ফাদায (সী. পী.), অনিপ্ফন্নতায (স্যা.), আ নিপ্ফাদা (?)] সহেয্য ধীরো, নিপ্ফন্নোৰ [নিপ্ফন্নত্থো (সী. পী.), নিপ্ফন্নত্থোৰ (স্যা.)] যথাসুখং ভণেয্য.

৩২৩. কিং ত্ৰং ৰিমনোসি রাজসেট্ঠ, দ্ৰিপদজনিন্দ [দিপদিন্দ (সী. স্যা. পী.)] ৰচনং সুণোম মেতং [নেতং (সী. পী.), তেতং (স্যা.)];

কিং চিন্তযমানো দুম্মনোসি, নূন দেৰ অপরাধো অত্থি ময্হং.

৩২৪. ‘‘পণ্হে [পঞ্ঞো (সী. পী.), পঞ্হে (স্যা.), পন্হে (ক.)] ৰজ্ঝো মহোসধো’’তি, আণত্তো মে ৰধায ভূরিপঞ্ঞো;

তং চিন্তযমানো দুম্মনোস্মি, ন হি দেৰী অপরাধো অত্থি তুয্হং.

৩২৫. অভিদোসগতো দানি এহিসি, কিং সুত্ৰা কিং সঙ্কতে মনো তে;

কো তে কিমৰোচ ভূরিপঞ্ঞ, ইঙ্ঘ ৰচনং সুণোম ব্রূহি মেতং.

৩২৬. ‘‘পণ্হে ৰজ্ঝো মহোসধো’’তি, যদি তে মন্তযিতং জনিন্দ দোসং;

ভরিযায রহোগতো অসংসি, গুয্হং পাতুকতং সুতং মমেতং.

৩২৭. যং সালৰনস্মিং সেনকো, পাপকম্মং অকাসি অসব্ভিরূপং;

সখিনোৰ রহোগতো অসংসি, গুয্হং পাতুকতং সুতং মমেতং.

৩২৮. পুক্কুস [পক্কুস (ক.) জা. ১.৭.৪১ পণ্ণজাতকে পস্সিতব্বং] পুরিসস্স তে জনিন্দ, উপ্পন্নো রোগো অরাজযুত্তো;

ভাতুঞ্চ [ভাতুচ্চ (সী. পী.), ভাতুৰ (স্যা.)] রহোগতো অসংসি, গুয্হং পাতুকতং সুতং মমেতং.

৩২৯. আবাধোযং অসব্ভিরূপো, কামিন্দো [কাৰিন্দো (সী. পী.)] নরদেৰেন ফুট্ঠো;

পুত্তস্স রহোগতো অসংসি, গুয্হং পাতুকতং সুতং মমেতং.

৩৩০. অট্ঠৰঙ্কং মণিরতনং উল়ারং, সক্কো তে অদদা পিতামহস্স;

দেৰিন্দস্স গতং তদজ্জ হত্থং [দেৰিন্দস্স তদজ্জ হত্থগতং (ক.)], মাতুঞ্চ রহোগতো অসংসি;

গুয্হং পাতুকতং সুতং মমেতং.

৩৩১. গুয্হস্স হি গুয্হমেৰ সাধু, ন হি গুয্হস্স পসত্থমাৰিকম্মং;

অনিপ্ফন্নতা সহেয্য ধীরো, নিপ্ফন্নোৰ যথাসুখং ভণেয্য.

৩৩২. ন গুয্হমত্থং ৰিৰরেয্য, রক্খেয্য নং যথা নিধিং;

ন হি পাতুকতো সাধু, গুয্হো অত্থো পজানতা.

৩৩৩. থিযা গুয্হং ন সংসেয্য, অমিত্তস্স চ পণ্ডিতো;

যো চামিসেন সংহীরো, হদযত্থেনো চ যো নরো.

৩৩৪. গুয্হমত্থং অসম্বুদ্ধং, সম্বোধযতি যো নরো;

মন্তভেদভযা তস্স, দাসভূতো তিতিক্খতি.

৩৩৫. যাৰন্তো পুরিসস্সত্থং, গুয্হং জানন্তি মন্তিনং;

তাৰন্তো তস্স উব্বেগা, তস্মা গুয্হং ন ৰিস্সজে.

৩৩৬. ৰিৰিচ্চ ভাসেয্য দিৰা রহস্সং, রত্তিং গিরং নাতিৰেলং পমুঞ্চে;

উপস্সুতিকা হি সুণন্তি মন্তং, তস্মা মন্তো খিপ্পমুপেতি ভেদন্তি.

পঞ্চপণ্ডিতজাতকং দ্ৰাদসমং.