৫০৭. মহাপলোভনজাতকং (১১)

২৮৪. ব্রহ্মলোকা চৰিত্ৰান, দেৰপুত্তো মহিদ্ধিকো;

রঞ্ঞো পুত্তো উদপাদি, সব্বকামসমিদ্ধিসু.

২৮৫. কামা ৰা কামসঞ্ঞা ৰা, ব্রহ্মলোকে ন ৰিজ্জতি;

স্ৰাস্সু [য্ৰাস্স (সী.)] তাযেৰ সঞ্ঞায, কামেহি ৰিজিগুচ্ছথ.

২৮৬. তস্স চন্তেপুরে আসি, ঝানাগারং সুমাপিতং;

সো তত্থ পটিসল্লীনো [পটিসল্লানো (ক.)], একো রহসি ঝাযথ.

২৮৭. স রাজা পরিদেৰেসি, পুত্তসোকেন অট্টিতো;

একপুত্তো চযং ময্হং, ন চ কামানি ভুঞ্জতি.

২৮৮. কো নু খ্ৰেত্থ [খেত্থ (সী. পী.)] উপাযো সো, কো ৰা জানাতি কিঞ্চনং;

যো [কো (সী. পী.)] মে পুত্তং পলোভেয্য, যথা কামানি পত্থযে.

২৮৯. অহু কুমারী তত্থেৰ, ৰণ্ণরূপসমাহিতা;

কুসলা নচ্চগীতস্স, ৰাদিতে চ পদক্খিণা.

২৯০. সা তত্থ উপসঙ্কম্ম, রাজানং এতদব্রৰি;

অহং খো নং পলোভেয্যং, সচে ভত্তা ভৰিস্সতি.

২৯১. তং তথাৰাদিনিং রাজা, কুমারিং এতদব্রৰি;

ত্ৰঞ্ঞেৰ নং পলোভেহি, তৰ ভত্তা ভৰিস্সতি.

২৯২. সা চ অন্তেপুরং গন্ত্ৰা, বহুং কামুপসংহিতং;

হদযঙ্গমা পেমনীযা, চিত্রা গাথা অভাসথ.

২৯৩. তস্সা চ গাযমানায, সদ্দং সুত্ৰান নারিযা;

কামচ্ছন্দস্স উপ্পজ্জি, জনং সো পরিপুচ্ছথ.

২৯৪. কস্সেসো সদ্দো কো ৰা সো, ভণতি উচ্চাৰচং বহুং;

হদযঙ্গমং পেমনীযং, অহো [অথো (সী. পী.)] কণ্ণসুখং মম.

২৯৫. এসা খো পমদা দেৰ, খিড্ডা এসা অনপ্পিকা [অনপ্পকা (ক.)];

সচে ত্ৰং কামে ভুঞ্জেয্য, ভিয্যো ভিয্যো ছাদেয্যু তং.

২৯৬. ইঙ্ঘ আগচ্ছতোরেন [আগচ্ছতোরেনং (ক.) আগচ্ছতু + ওরেন], অৰিদূরম্হি গাযতু;

অস্সমস্স সমীপম্হি, সন্তিকে ময্হং গাযতু.

২৯৭. তিরোকুট্টম্হি গাযিত্ৰা, ঝানাগারম্হি পাৰিসি;

বন্ধি নং [ভন্ধিতুং (স্যা. ক.)] অনুপুব্বেন, আরঞ্ঞমিৰ কুঞ্জরং.

২৯৮. তস্স [তস্সা (স্যা.)] কামরসং ঞত্ৰা, ইস্সাধম্মো অজাযথ;

‘‘অহমেৰ কামে ভুঞ্জেয্যং, মা অঞ্ঞো পুরিসো অহু’’.

২৯৯. ততো অসিং গহেত্ৰান, পুরিসে হন্তুং উপক্কমি;

অহমেৰেকো ভুঞ্জিস্সং, মা অঞ্ঞো পুরিসো সিযা.

৩০০. ততো জানপদা সব্বে, ৰিক্কন্দিংসু সমাগতা;

পুত্তো ত্যাযং মহারাজ, জনং হেঠেত্যদূসকং.

৩০১. তঞ্চ রাজা ৰিৰাহেসি [নিৰাহেসি (স্যা.), ৰিহাহেসি (পী.)], সম্হা রট্ঠা চ [রট্ঠাতো (সী. পী.), রট্ঠতো (ক.)] খত্তিযো;

যাৰতা ৰিজিতং ময্হং, ন তে ৰত্থব্ব [ৰত্তব্ব (সী. পী.)] তাৰদে.

৩০২. ততো সো ভরিযমাদায, সমুদ্দং উপসঙ্কমি;

পণ্ণসালং করিত্ৰান, ৰনমুঞ্ছায পাৰিসি.

৩০৩. অথেত্থ ইসি মাগচ্ছি, সমুদ্দং উপরূপরি;

সো তস্স গেহং পাৰেক্খি, ভত্তকালে উপট্ঠিতে.

৩০৪. তঞ্চ ভরিযা পলোভেসি, পস্স যাৰ সুদারুণং;

চুতো সো ব্রহ্মচরিযম্হা, ইদ্ধিযা পরিহাযথ.

৩০৫. রাজপুত্তো চ উঞ্ছাতো, ৰনমূলফলং বহুং;

সাযং কাজেন [কাচেন (পী.)] আদায, অস্সমং উপসঙ্কমি.

৩০৬. ইসী চ খত্তিযং দিস্ৰা, সমুদ্দং উপসঙ্কমি;

‘‘ৰেহাযসং গমিস্স’’ন্তি, সীদতে সো মহণ্ণৰে.

৩০৭. খত্তিযো চ ইসিং দিস্ৰা, সীদমানং মহণ্ণৰে;

তস্সেৰ অনুকম্পায, ইমা গাথা অভাসথ.

৩০৮. অভিজ্জমানে ৰারিস্মিং, সযং আগম্ম ইদ্ধিযা;

মিস্সীভাৰিত্থিযা গন্ত্ৰা, সংসীদসি মহণ্ণৰে.

৩০৯. আৰট্টনী মহামাযা, ব্রহ্মচরিযৰিকোপনা;

সীদন্তি নং ৰিদিত্ৰান, আরকা পরিৰজ্জযে.

৩১০. অনলা মুদুসম্ভাসা, দুপ্পূরা তা নদীসমা;

সীদন্তি নং ৰিদিত্ৰান, আরকা পরিৰজ্জযে.

৩১১. যং এতা উপসেৰন্তি, ছন্দসা ৰা ধনেন ৰা;

জাতৰেদোৰ সং ঠানং, খিপ্পং অনুদহন্তি নং.

৩১২. খত্তিযস্স ৰচো সুত্ৰা, ইসিস্স নিব্বিদা অহু;

লদ্ধা পোরাণকং মগ্গং, গচ্ছতে সো ৰিহাযসং.

৩১৩. খত্তিযো চ ইসিং দিস্ৰা, গচ্ছমানং ৰিহাযসং;

সংৰেগং অলভী ধীরো, পব্বজ্জং সমরোচযি.

৩১৪. ততো সো পব্বজিত্ৰান, কামরাগং ৰিরাজযি;

কামরাগং ৰিরাজেত্ৰা, ব্রহ্মলোকূপগো অহূতি.

মহাপলোভনজাতকং একাদসমং.