৫০৬. চম্পেয্যজাতকং (১০)

২৪০. কা নু ৰিজ্জুরিৰাভাসি, ওসধী ৰিয তারকা;

দেৰতা নুসি গন্ধব্বী, ন তং মঞ্ঞামি মানুসিং [মানুসী (স্যা. ক.)].

২৪১. নম্হি দেৰী ন গন্ধব্বী, ন মহারাজ মানুসী;

নাগকঞ্ঞাস্মি ভদ্দন্তে, অত্থেনম্হি ইধাগতা.

২৪২. ৰিব্ভন্তচিত্তা কুপিতিন্দ্রিযাসি, নেত্তেহি তে ৰারিগণা সৰন্তি;

কিং তে নট্ঠং কিং পন পত্থযানা, ইধাগতা নারি তদিঙ্ঘ ব্রূহি.

২৪৩. যমুগ্গতেজো উরগোতি চাহু, নাগোতি নং আহু জনা জনিন্দ;

তমগ্গহী পুরিসো জীৰিকত্থো, তং বন্ধনা মুঞ্চ পতী মমেসো.

২৪৪. কথং ন্ৰযং বলৰিরিযূপপন্নো, হত্থত্ত [হত্থত্থ (সী. স্যা. পী.)] মাগচ্ছি ৰনিব্বকস্স;

অক্খাহি মে নাগকঞ্ঞে তমত্থং, কথং ৰিজানেমু গহীতনাগং.

২৪৫. নগরম্পি নাগো ভস্মং করেয্য, তথা হি সো বলৰিরিযূপপন্নো;

ধম্মঞ্চ নাগো অপচাযমানো, তস্মা পরক্কম্ম তপো করোতি.

২৪৬. চাতুদ্দসিং পঞ্চদসিং [পন্নরসিং (সী. স্যা. পী.)] চ রাজ, চতুপ্পথে সম্মতি নাগরাজা;

তমগ্গহী পুরিসো জীৰিকত্থো, তং বন্ধনা মুঞ্চ পতী মমেসো.

২৪৭. সোল়সিত্থিসহস্সানি, আমুত্তমণিকুণ্ডলা;

ৰারিগেহসযা নারী [নারিযো (পী.)], তাপি তং সরণং গতা.

২৪৮. ধম্মেন মোচেহি অসাহসেন, গামেন নিক্খেন গৰং সতেন;

ওস্সট্ঠকাযো উরগো চরাতু, পুঞ্ঞত্থিকো মুঞ্চতু বন্ধনস্মা.

২৪৯. ধম্মেন মোচেমি অসাহসেন, গামেন নিক্খেন গৰং সতেন;

ওস্সট্ঠকাযো উরগো চরাতু, পুঞ্ঞত্থিকো মুঞ্চতু বন্ধনস্মা.

২৫০. দম্মি নিক্খসতং লুদ্দ, থূলঞ্চ মণিকুণ্ডলং;

চতুস্সদঞ্চ পল্লঙ্কং, উমাপুপ্ফসরিন্নিভং.

২৫১. দ্ৰে চ সাদিসিযো ভরিযা, উসভঞ্চ গৰং সতং;

ওস্সট্ঠকাযো উরগো চরাতু, পুঞ্ঞত্থিকো মুঞ্চতু বন্ধনস্মা.

২৫২. ৰিনাপি দানা তৰ ৰচনং জনিন্দ, মুঞ্চেমু নং উরগং বন্ধনস্মা;

ওস্সট্ঠকাযো উরগো চরাতু, পুঞ্ঞত্থিকো মুঞ্চতু বন্ধনস্মা.

২৫৩. মুত্তো চম্পেয্যকো নাগো, রাজানং এতদব্রৰি;

নমো তে কাসিরাজত্থু, নমো তে কাসিৰড্ঢন;

অঞ্জলিং তে পগ্গণ্হামি, পস্সেয্যং মে নিৰেসনং.

২৫৪. অদ্ধা হি দুব্বিস্সসমেতমাহু, যং মানুসো ৰিস্সসে অমানুসম্হি;

সচে চ মং যাচসি এতমত্থং, দক্খেমু তে নাগ নিৰেসনানি.

২৫৫. সচেপি [সচে হি (সী. পী. অট্ঠ.)] ৰাতো গিরিমাৰহেয্য, চন্দো চ সুরিযো চ ছমা পতেয্যুং;

সব্বা চ নজ্জো পটিসোতং ৰজেয্যুং, ন ত্ৰেৰহং রাজ মুসা ভণেয্যং.

২৫৬. নভং ফলেয্য উদধীপি সুস্সে, সংৰট্টযে [সংৰট্টেযং (সী. পী.), সংৰট্টেয্য (স্যা. ক.)] ভূতধরা ৰসুন্ধরা;

সিলুচ্চযো মেরু সমূলমুপ্পতে [মুব্বহে (সী. স্যা. পী. ক. অট্ঠ.), মুট্ঠহে (ক.)], ন ত্ৰেৰহং রাজ মুসা ভণেয্যং.

২৫৭. অদ্ধা হি দুব্বিস্সসমেতমাহু, যং মানুসো ৰিস্সসে অমানুসম্হি;

সচে চ মং যাচসি এতমত্থং, দক্খেমু তে নাগ নিৰেসনানি.

২৫৮. তুম্হে খোত্থ ঘোরৰিসা উল়ারা, মহাতেজা খিপ্পকোপী চ হোথ;

মংকারণা [মম কারণা (সী. স্যা. পী.)] বন্ধনস্মা পমুত্তো, অরহসি নো জানিতুযে [জানিতাযে (সী.), জানিতৰে (স্যা.), জানিতযে (পী.)] কতানি.

২৫৯. সো পচ্চতং নিরযে ঘোররূপে, মা কাযিকং সাতমলত্থ কিঞ্চি;

পেল়ায বদ্ধো মরণং উপেতু, যো তাদিসং কম্মকতং ন জানে.

২৬০. সচ্চপ্পটিঞ্ঞা তৰমেস হোতু, অক্কোধনো হোহি অনুপনাহী;

সব্বঞ্চ তে নাগকুলং সুপণ্ণা, অগ্গিংৰ গিম্হেসু [গিম্হাসু (সী. স্যা. পী.)] ৰিৰজ্জযন্তু.

২৬১. অনুকম্পসী নাগকুলং জনিন্দ, মাতা যথা সুপ্পিযং একপুত্তং;

অহঞ্চ তে নাগকুলেন সদ্ধিং, কাহামি ৰেয্যাৰটিকং উল়ারং.

২৬২. যোজেন্তু ৰে রাজরথে সুচিত্তে, কম্বোজকে অস্সতরে সুদন্তে;

নাগে চ যোজেন্তু সুৰণ্ণকপ্পনে, দক্খেমু নাগস্স নিৰেসনানি.

২৬৩. ভেরী মুদিঙ্গা [মুতিঙ্গা (সী. পী.)] পণৰা চ সঙ্খা, অৰজ্জযিংসু উগ্গসেনস্স রঞ্ঞো;

পাযাসি রাজা বহুসোভমানো, পুরক্খতো নারিগণস্স মজ্ঝে.

২৬৪. সুৰণ্ণচিতকং ভূমিং, অদ্দক্খি কাসিৰড্ঢনো;

সোৰণ্ণমযপাসাদে, ৰেল়ুরিযফলকত্থতে.

২৬৫. স রাজা পাৰিসি ব্যম্হং, চম্পেয্যস্স নিৰেসনং;

আদিচ্চৰণ্ণসন্নিভং, কংসৰিজ্জু পভস্সরং.

২৬৬. নানারুক্খেহি সঞ্ছন্নং, নানাগন্ধসমীরিতং;

সো পাৰেক্খি কাসিরাজা, চম্পেয্যস্স নিৰেসনং.

২৬৭. পৰিট্ঠস্মিং কাসিরঞ্ঞে, চম্পেয্যস্স নিৰেসনং;

দিব্বা তূরিযা পৰজ্জিংসু, নাগকঞ্ঞা চ নচ্চিসুং [নচ্চযুং (সী. পী. ক.)].

২৬৮. তং নাগকঞ্ঞা চরিতং গণেন, অন্ৰারুহী কাসিরাজা পসন্নো;

নিসীদি সোৰণ্ণমযম্হি পীঠে, সাপস্সযে [সোপস্সযে (ক.)] চন্দনসারলিত্তে.

২৬৯. সো তত্থ ভুত্ৰা চ অথো রমিত্ৰা, চম্পেয্যকং কাসিরাজা অৰোচ;

ৰিমানসেট্ঠানি ইমানি তুয্হং, আদিচ্চৰণ্ণানি পভস্সরানি;

নেতাদিসং অত্থি মনুস্সলোকে, কিং পত্থযং [কিমত্থিযং (সী. স্যা. পী.)] নাগ তপো করোসি.

২৭০. তা কম্বুকাযূরধরা সুৰত্থা, ৰট্টঙ্গুলী তম্বতলূপপন্না;

পগ্গয্হ পাযেন্তি অনোমৰণ্ণা, নেতাদিসং অত্থি মনুস্সলোকে;

কিং পত্থযং নাগ তপো করোসি.

২৭১. নজ্জো চ তেমা পুথুলোমমচ্ছা, আটা [আদা (স্যা.), অদা (পী.)] সকুন্তাভিরুদা সুতিত্থা;

নেতাদিসং অত্থি মনুস্সলোকে, কিং পত্থযং নাগ তপো করোসি.

২৭২. কোঞ্চা মযূরা দিৰিযা চ হংসা, ৰগ্গুস্সরা কোকিলা সম্পতন্তি;

নেতাদিসং অত্থি মনুস্সলোকে, কিং পত্থযং নাগ তপো করোসি.

২৭৩. অম্বা চ সালা তিলকা চ জম্বুযো, উদ্দালকা পাটলিযো চ ফুল্লা;

নেতাদিসং অত্থি মনুস্সলোকে, কিং পত্থযং নাগ তপো করোসি.

২৭৪. ইমা চ তে পোক্খরঞ্ঞো সমন্ততো, দিব্বা [দিব্যা (স্যা.), দিৰিযা (পী.)] চ গন্ধা সততং পৰাযন্তি;

নেতাদিসং অত্থি মনুস্সলোকে, কিং পত্থযং নাগ তপো করোসি.

২৭৫. ন পুত্তহেতু ন ধনস্স হেতু, ন আযুনো চাপি [ৰাপি (সী. পী.)] জনিন্দ হেতু;

মনুস্সযোনিং অভিপত্থযানো, তস্মা পরক্কম্ম তপো করোমি.

২৭৬. ত্ৰং লোহিতক্খো ৰিহতন্তরংসো, অলঙ্কতো কপ্পিতকেসমস্সু;

সুরোসিতো লোহিতচন্দনেন, গন্ধব্বরাজাৰ দিসা পভাসসি.

২৭৭. দেৰিদ্ধিপত্তোসি মহানুভাৰো, সব্বেহি কামেহি সমঙ্গিভূতো;

পুচ্ছামি তং নাগরাজেতমত্থং, সেয্যো ইতো কেন মনুস্সলোকো.

২৭৮. জনিন্দ নাঞ্ঞত্র মনুস্সলোকা, সুদ্ধী ৰ সংৰিজ্জতি সংযমো ৰা;

অহঞ্চ লদ্ধান মনুস্সযোনিং, কাহামি জাতিমরণস্স অন্তং.

২৭৯. অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

নারিযো চ দিস্ৰান তুৰঞ্চ নাগ, কাহামি পুঞ্ঞানি অনপ্পকানি.

২৮০. অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

নারিযো চ দিস্ৰান মমঞ্চ রাজ, করোহি পুঞ্ঞানি অনপ্পকানি.

২৮১. ইদঞ্চ মে জাতরূপং পহূতং, রাসী সুৰণ্ণস্স চ তালমত্তা;

[ইতো হরিত্ৰা সোৰণ্ণঘরানি কারয, রূপিযস্স চ পাকারং করোন্তু (সী. স্যা.) ইতো হরিত্ৰা সোৰণ্ণঘরানি, [কারয] রূপিযস্স চ পাকারং করোন্তু (পী.)] ইতো হরিত্ৰান সুৰণ্ণঘরানি, করস্সু রূপিযপাকারং করোন্তু [ইতো হরিত্ৰা সোৰণ্ণঘরানি কারয, রূপিযস্স চ পাকারং করোন্তু (সী. স্যা.) ইতো হরিত্ৰা সোৰণ্ণঘরানি, [কারয] রূপিযস্স চ পাকারং করোন্তু (পী.)].

২৮২. মুত্তা চ [মুত্তানঞ্চ (সী. স্যা.)] ৰাহসহস্সানি পঞ্চ, ৰেল়ুরিযমিস্সানি ইতো হরিত্ৰা;

অন্তেপুরে ভূমিযং সন্থরন্তু, নিক্কদ্দমা হেহিতি নীরজা চ.

২৮৩. এতাদিসং আৰস রাজসেট্ঠ, ৰিমানসেট্ঠং বহু সোভমানং;

বারাণসিং নগরং ইদ্ধং ফীতং, রজ্জঞ্চ কারেহি অনোমপঞ্ঞাতি.

চম্পেয্যজাতকং দসমং.