৫০৫. সোমনস্সজাতকং (৯)

২১১. কো তং হিংসতি হেঠেতি, কিং [কিন্নু (পী. ক.)] দুম্মনো সোচসি অপ্পতীতো;

কস্সজ্জ মাতাপিতরো রুদন্তু, ক্ৰজ্জ সেতু [কো ন্ৰেজ্জ সেতি (ক.), কো অজ্জ সেতু (?)] নিহতো পথব্যা.

২১২. তুট্ঠোস্মি দেৰ তৰ দস্সনেন, চিরস্সং পস্সামি তং ভূমিপাল;

অহিংসকো রেণুমনুপ্পৰিস্স, পুত্তেন তে হেঠযিতোস্মি [পোথযিতোস্মি (ক.)] দেৰ.

২১৩. আযন্তু দোৰারিকা খগ্গবন্ধা [খগ্গবদ্ধা (সী. পী.)], কাসাৰিযা যন্তু [হন্তু (ক.)] অন্তেপুরন্তং;

হন্ত্ৰান তং সোমনস্সং কুমারং, ছেত্ৰান সীসং ৰরমাহরন্তু.

২১৪. পেসিতা রাজিনো দূতা, কুমারং এতদব্রৰুং;

ইস্সরেন ৰিতিণ্ণোসি, ৰধং পত্তোসি খত্তিয.

২১৫. স রাজপুত্তো পরিদেৰযন্তো, দসঙ্গুলিং অঞ্জলিং পগ্গহেত্ৰা;

অহম্পি ইচ্ছামি জনিন্দ দট্ঠুং, জীৰং মং নেত্ৰা [জীৰং পনেত্ৰা (সী. পী.)] পটিদস্সযেথ.

২১৬. তস্স তং ৰচনং সুত্ৰা, রঞ্ঞো পুত্তং অদস্সযুং;

পুত্তো চ পিতরং দিস্ৰা, দূরতোৰজ্ঝভাসথ.

২১৭. আগচ্ছুং [আগঞ্ছুং (সী.), আগঞ্ছু (পী.)] দোৰারিকা খগ্গবন্ধা, কাসাৰিযা হন্তু মমং জনিন্দ;

অক্খাহি মে পুচ্ছিতো এতমত্থং, অপরাধো কো নিধ মমজ্জ অত্থি.

২১৮. সাযঞ্চ পাতো উদকং সজাতি, অগ্গিং সদা পারিচরতপ্পমত্তো;

তং তাদিসং সংযতং ব্রহ্মচারিং, কস্মা তুৰং ব্রূসি গহপ্পতীতি.

২১৯. তালা চ মূলা চ ফলা চ দেৰ, পরিগ্গহা ৰিৰিধা সন্তিমস্স;

তে রক্খতি গোপযতপ্পমত্তো, [ব্রাহ্মণো গহপতি তেন হোতি (সী. স্যা. পী.)] তস্মা অহং ব্রূমি গহপ্পতীতি [ব্রাহ্মণো গহপতি তেন হোতি (সী. স্যা. পী.)].

২২০. সচ্চং খো এতং ৰদসি কুমার, পরিগ্গহা ৰিৰিধা সন্তিমস্স;

তে রক্খতি গোপযতপ্পমত্তো, স [নত্থি ইদং সী. স্যা. পী. পোত্থকেসু] ব্রাহ্মণো গহপতি তেন হোতি.

২২১. সুণন্তু ময্হং পরিসা সমাগতা, সনেগমা জানপদা চ সব্বে;

বালাযং বালস্স ৰচো নিসম্ম, অহেতুনা ঘাতযতে মং [ঘাতযতে (সী. পী.)] জনিন্দো.

২২২. দল়্হস্মি মূলে ৰিসটে ৰিরূল়্হে, দুন্নিক্কযো ৰেল়ু পসাখজাতো;

ৰন্দামি পাদানি তৰ [তৰং (সী. পী.)] জনিন্দ, অনুজান মং পব্বজিস্সামি দেৰ.

২২৩. ভুঞ্জস্সু ভোগে ৰিপুলে কুমার, সব্বঞ্চ তে ইস্সরিযং দদামি;

অজ্জেৰ ত্ৰং কুরূনং হোহি রাজা, মা পব্বজী পব্বজ্জা হি দুক্খা.

২২৪. কিন্নূধ দেৰ তৰমত্থি ভোগা, পুব্বেৰহং [পুব্বে চহং (ক.)] দেৰলোকে রমিস্সং;

রূপেহি সদ্দেহি অথো রসেহি, গন্ধেহি ফস্সেহি মনোরমেহি.

২২৫. ভুত্তা চ মে [ভুত্তা (সী. পী.)] ভোগা তিদিৰস্মিং দেৰ, পরিৰারিতা [পরিচারিতা (ক.)] অচ্ছরানং গণেন [অচ্ছরাসংগণেন (স্যা. পী. ক.)];

তুৰঞ্চ [তৰঞ্চ (সী. পী.)] বালং পরনেয্যং ৰিদিত্ৰা, ন তাদিসে রাজকুলে ৰসেয্যং.

২২৬. সচাহং বালো পরনেয্যো অস্মি, একাপরাধং [এতাপরাধং (ক.)] খম পুত্ত ময্হং;

পুনপি চে এদিসকং ভৰেয্য, যথামতিং সোমনস্স করোহি.

২২৭. অনিসম্ম কতং কম্মং, অনৰত্থায চিন্তিতং;

ভেসজ্জস্সেৰ ৰেভঙ্গো, ৰিপাকো হোতি পাপকো.

২২৮. নিসম্ম চ কতং কম্মং, সম্মাৰত্থায চিন্তিতং;

ভেসজ্জস্সেৰ সম্পত্তি, ৰিপাকো হোতি ভদ্রকো.

২২৯. অলসো গিহী কামভোগী ন সাধু, অসঞ্ঞতো পব্বজিতো ন সাধু;

রাজা ন সাধু অনিসম্মকারী, যো পণ্ডিতো কোধনো তং ন সাধু.

২৩০. নিসম্ম খত্তিযো কযিরা, নানিসম্ম দিসম্পতি;

নিসম্মকারিনো রাজ, যসো কিত্তি চ ৰড্ঢতি.

২৩১. নিসম্ম দণ্ডং পণযেয্য ইস্সরো, ৰেগা কতং তপ্পতি ভূমিপাল;

সম্মাপণীধী চ নরস্স অত্থা, অনানুতপ্পা তে ভৰন্তি পচ্ছা.

২৩২. অনানুতপ্পানি হি যে করোন্তি, ৰিভজ্জ কম্মাযতনানি লোকে;

ৰিঞ্ঞুপ্পসত্থানি সুখুদ্রযানি, ভৰন্তি বুদ্ধানুমতানি [ৰদ্ধানুমতানি (সী. পী.)] তানি.

২৩৩. আগচ্ছুং দোৰারিকা খগ্গবন্ধা, কাসাৰিযা হন্তু মমং জনিন্দ;

মাতুঞ্চ [মাতুচ্চ (পী.)] অঙ্কস্মিমহং নিসিন্নো, আকড্ঢিতো সহসা তেহি দেৰ.

২৩৪. কটুকঞ্হি সম্বাধং সুকিচ্ছং [সুকিচ্ছ (সী. পী.)] পত্তো, মধুরম্পি যং জীৰিতং লদ্ধ রাজ;

কিচ্ছেনহং অজ্জ ৰধা পমুত্তো, পব্বজ্জমেৰাভিমনোহমস্মি.

২৩৫. পুত্তো তৰাযং তরুণো সুধম্মে, অনুকম্পকো সোমনস্সো কুমারো;

তং যাচমানো ন লভামি স্ৰজ্জ [সজ্জ (সী. পী.)], অরহসি নং যাচিতৰে [যাচিতুযে (ক.)] তুৰম্পি.

২৩৬. রমস্সু ভিক্খাচরিযায পুত্ত, নিসম্ম ধম্মেসু পরিব্বজস্সু;

সব্বেসু ভূতেসু নিধায দণ্ডং, অনিন্দিতো ব্রহ্মমুপেহি ঠানং.

২৩৭. অচ্ছের [অচ্ছরিয (সী. স্যা. পী.)] রূপং ৰত যাদিসঞ্চ, দুক্খিতং মং দুক্খাপযসে সুধম্মে;

যাচস্সু পুত্তং ইতি ৰুচ্চমানা, ভিয্যোৰ উস্সাহযসে কুমারং.

২৩৮. যে ৰিপ্পমুত্তা অনৰজ্জভোগিনো [ভোজিনো (সী. স্যা. পী.)], পরিনিব্বুতা লোকমিমং চরন্তি;

তমরিযমগ্গং পটিপজ্জমানং, ন উস্সহে ৰারযিতুং কুমারং.

২৩৯. অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

যেসাযং সুত্ৰান সুভাসিতানি, অপ্পোস্সুক্কা ৰীতসোকা সুধম্মাতি.

সোমনস্সজাতকং নৰমং.