৫০৪. ভল্লাতিযজাতকং (৮)

১৮৬. ভল্লাতিযো [ভল্লাটিযো (সী. পী.)] নাম অহোসি রাজা, রট্ঠং পহায মিগৰং অচারি সো;

অগমা গিরিৰরং গন্ধমাদনং, সুপুপ্ফিতং [সম্পুপ্ফিতং (সী. পী.)] কিম্পুরিসানুচিণ্ণং.

১৮৭. সাল়ূরসঙ্ঘঞ্চ নিসেধযিত্ৰা, ধনুং [ধনু (সী. স্যা. পী.)] কলাপঞ্চ সো নিক্খিপিত্ৰা;

উপাগমি ৰচনং ৰত্তুকামো, যত্থট্ঠিতা কিম্পুরিসা অহেসুং.

১৮৮. হিমচ্চযে হেমৰতায তীরে, কিমিধট্ঠিতা মন্তযৰ্হো অভিণ্হং;

পুচ্ছামি ৰো মানুসদেহৰণ্ণে, কথং নু [কথং ৰো (সী. স্যা. পী.)] জানন্তি মনুস্সলোকে.

১৮৯. মল্লং গিরিং পণ্ডরকং তিকূটং, সীতোদকা [সীতোদিযা (সী. পী.), সীতোদিকা (?)] অনুৰিচরাম নজ্জো;

মিগা মনুস্সাৰ নিভাসৰণ্ণা, জানন্তি নো কিম্পুরিসাতি লুদ্দ.

১৯০. সুকিচ্ছরূপং পরিদেৰযৰ্হো [পরিদেৰথৰ্হো (?) মোগ্গল্লানব্যাকরণে ৬.৩৮ সুত্তং], আলিঙ্গিতো চাসি পিযো পিযায;

পুচ্ছামি ৰো মানুসদেহৰণ্ণে, কিমিধ ৰনে রোদথ অপ্পতীতা.

১৯১. সুকিচ্ছরূপং পরিদেৰযৰ্হো, আলিঙ্গিতো চাসি পিযো পিযায;

পুচ্ছামি ৰো মানুসদেহৰণ্ণে, কিমিধ ৰনে ৰিলপথ অপ্পতীতা.

১৯২. সুকিচ্ছরূপং পরিদেৰযৰ্হো, আলিঙ্গিতো চাসি পিযো পিযায;

পুচ্ছামি ৰো মানুসদেহৰণ্ণে, কিমিধ ৰনে সোচথ অপ্পতীতা.

১৯৩. মযেকরত্তং [রত্তিং (পী.)] ৰিপ্পৰসিম্হ লুদ্দ, অকামকা অঞ্ঞমঞ্ঞং সরন্তা;

তমেকরত্তং অনুতপ্পমানা, সোচাম ‘‘সা রত্তি পুনং ন হেস্সতি’’.

১৯৪. যমেকরত্তং অনুতপ্পথেতং, ধনং ৰ নট্ঠং পিতরং ৰ পেতং;

পুচ্ছামি ৰো মানুসদেহৰণ্ণে, কথং ৰিনা ৰাসমকপ্পযিত্থ.

১৯৫. যমিমং [যযিমং (ক. সী.)] নদিং পস্সসি সীঘসোতং, নানাদুমচ্ছাদনং সেলকূলং [দুমচ্ছদনং সেলকূটং (সী. পী.), দুমসঞ্ছন্নং সেলকূলং (ক.)];

তং মে পিযো উত্তরি ৰস্সকালে, মমঞ্চ মঞ্ঞং অনুবন্ধতীতি.

১৯৬. অহঞ্চ অঙ্কোলকমোচিনামি, অতিমুত্তকং সত্তলিযোথিকঞ্চ;

‘‘পিযো চ মে হেহিতি মালভারী, অহঞ্চ নং মালিনী অজ্ঝুপেস্সং’’.

১৯৭. অহঞ্চিদং কুরৰকমোচিনামি, উদ্দালকা পাটলিসিন্ধুৰারকা [সিন্ধুৰারিতা (স্যা. পী. ক.)];

‘‘পিযো চ মে হেহিতি মালভারী, অহঞ্চ নং মালিনী অজ্ঝুপেস্সং’’.

১৯৮. অহঞ্চ সালস্স সুপুপ্ফিতস্স, ওচেয্য পুপ্ফানি করোমি মালং;

‘‘পিযো চ মে হেহিতি মালভারী, অহঞ্চ নং মালিনী অজ্ঝুপেস্সং’’.

১৯৯. অহঞ্চ সালস্স সুপুপ্ফিতস্স, ওচেয্য পুপ্ফানি করোমি ভারং;

ইদঞ্চ নো হেহিতি সন্থরত্থং, যত্থজ্জিমং [যত্থজ্জমং (সী. পী.)] ৰিহরিস্সাম [ৰিহরিস্সামু (পী.)] রত্তিং.

২০০. অহঞ্চ খো অগল়ুং [অগ্গলু (স্যা. ক.), অকলুং (পী.)] চন্দনঞ্চ, সিলায পিংসামি পমত্তরূপা;

‘‘পিযো চ মে হেহিতি রোসিতঙ্গো, অহঞ্চ নং রোসিতা অজ্ঝুপেস্সং’’.

২০১. অথাগমা সলিলং সীঘসোতং, নুদং সালে সলল়ে কণ্ণিকারে;

আপূরথ [অপূরথ (সী. পী.), আপূরথে (স্যা.)] তেন মুহুত্তকেন, সাযং নদী আসি মযা সুদুত্তরা.

২০২. উভোসু তীরেসু মযং তদা ঠিতা, সম্পস্সন্তা উভযো অঞ্ঞমঞ্ঞং;

সকিম্পি রোদাম সকিং হসাম, কিচ্ছেন নো আগমা [অগমা (সী. স্যা. পী.)] সংৰরী সা.

২০৩. পাতোৰ [পাতো চ (সী. স্যা. পী.)] খো উগ্গতে সূরিযম্হি, চতুক্কং নদিং উত্তরিযান লুদ্দ;

আলিঙ্গিযা অঞ্ঞমঞ্ঞং মযং উভো, সকিম্পি রোদাম সকিং হসাম.

২০৪. তীহূনকং সত্তসতানি লুদ্দ, যমিধ মযং ৰিপ্পৰসিম্হ পুব্বে;

ৰস্সেকিমং [ৰাসেকিমং (সী. পী.)] জীৰিতং ভূমিপাল, কো নীধ কন্তায ৰিনা ৰসেয্য.

২০৫. আযুঞ্চ ৰো কীৰতকো নু সম্ম, সচেপি জানাথ ৰদেথ আযুং;

অনুস্সৰা ৰুড্ঢতো আগমা ৰা, অক্খাথ মে তং অৰিকম্পমানা.

২০৬. আযুঞ্চ নো ৰস্সসহস্সং লুদ্দ, ন চন্তরা পাপকো অত্থি রোগো;

অপ্পঞ্চ [অপ্পংৰ (স্যা. ক.)] দুক্খং সুখমেৰ ভিয্যো, অৰীতরাগা ৰিজহাম জীৰিতং.

২০৭. ইদঞ্চ সুত্ৰান অমানুসানং, ভল্লাতিযো ইত্তর জীৰিতন্তি;

নিৰত্তথ ন মিগৰং অচরি, অদাসি দানানি অভুঞ্জি ভোগে.

২০৮. ইদঞ্চ সুত্ৰান অমানুসানং, সম্মোদথ মা কলহং অকত্থ;

মা ৰো তপী অত্তকম্মাপরাধো, যথাপি তে কিম্পুরিসেকরত্তং.

২০৯. ইদঞ্চ সুত্ৰান অমানুসানং, সম্মোদথ মা ৰিৰাদং অকত্থ;

মা ৰো তপী অত্তকম্মাপরাধো, যথাপি তে কিম্পুরিসেকরত্তং.

২১০. ৰিৰিধং [ৰিৰিধ (সী. স্যা.)] অধিমনা সুণোমহং, ৰচনপথং তৰ অত্থসংহিতং;

মুঞ্চং [মুঞ্চ (সী. পী.)] গিরং নুদসেৰ মে দরং, সমণ সুখাৰহ জীৰ মে চিরন্তি.

ভল্লাতিযজাতকং অট্ঠমং.