৫০৩. সত্তিগুম্বজাতকং (৭)

১৫৯. মিগলুদ্দো মহারাজা, পঞ্চালানং রথেসভো;

নিক্খন্তো সহ সেনায, ওগণো ৰনমাগমা.

১৬০. তত্থদ্দসা অরঞ্ঞস্মিং, তক্করানং কুটিং কতং;

তস্সা [তস্মা (স্যা. পী. ক.)] কুটিযা নিক্খম্ম, সুৰো লুদ্দানি ভাসতি.

১৬১. সম্পন্নৰাহনো পোসো, যুৰা সম্মট্ঠকুণ্ডলো [কুণ্ডলী (স্যা. ক.)];

সোভতি লোহিতুণ্হীসো, দিৰা সূরিযোৰ ভাসতি.

১৬২. মজ্ঝন্হিকে [মজ্ঝন্তিকে (সব্বত্থ)] সম্পতিকে, সুত্তো রাজা সসারথি;

হন্দস্সাভরণং সব্বং, গণ্হাম সাহসা [সহসা (সী. স্যা. পী.)] মযং.

১৬৩. নিসীথেপি রহো দানি, সুত্তো রাজা সসারথি;

আদায ৰত্থং মণিকুণ্ডলঞ্চ, হন্ত্ৰান সাখাহি অৰত্থরাম.

১৬৪. কিন্নু উম্মত্তরূপোৰ, সত্তিগুম্ব পভাসসি;

দুরাসদা হি রাজানো, অগ্গি পজ্জলিতো যথা.

১৬৫. অথ ত্ৰং পতিকোলম্ব, মত্তো থুল্লানি গজ্জসি;

মাতরি ময্হং নগ্গায, কিন্নু ত্ৰং ৰিজিগুচ্ছসে.

১৬৬. উট্ঠেহি সম্ম তরমানো, রথং যোজেহি সারথি;

সকুণো মে ন রুচ্চতি, অঞ্ঞং গচ্ছাম অস্সমং.

১৬৭. যুত্তো রথো মহারাজ, যুত্তো চ বলৰাহনো;

অধিতিট্ঠ মহারাজ, অঞ্ঞং গচ্ছাম অস্সমং.

১৬৮. কো নুমেৰ গতা [ক্ৰ নু’মে’পগতা (?)] সব্বে, যে অস্মিং পরিচারকা;

এস গচ্ছতি পঞ্চালো, মুত্তো তেসং অদস্সনা.

১৬৯. কোদণ্ডকানি গণ্হথ, সত্তিযো তোমরানি চ;

এস গচ্ছতি পঞ্চালো, মা ৰো মুঞ্চিত্থ জীৰতং [জীৰিতং (বহূসু)].

১৭০. অথাপরো পটিনন্দিত্থ, সুৰো লোহিততুণ্ডকো;

স্ৰাগতং তে মহারাজ, অথো তে অদুরাগতং;

ইস্সরোসি অনুপ্পত্তো, যং ইধত্থি পৰেদয.

১৭১. তিন্দুকানি পিযালানি, মধুকে কাসুমারিযো;

ফলানি খুদ্দকপ্পানি, ভুঞ্জ রাজ ৰরং ৰরং.

১৭২. ইদম্পি পানীযং সীতং, আভতং গিরিগব্ভরা;

ততো পিৰ মহারাজ, সচে ত্ৰং অভিকঙ্খসি.

১৭৩. অরঞ্ঞং উঞ্ছায গতা, যে অস্মিং পরিচারকা;

সযং উট্ঠায গণ্হৰ্হো, হত্থা মে নত্থি দাতৰে.

১৭৪. ভদ্দকো ৰতযং পক্খী, দিজো পরমধম্মিকো;

অথেসো ইতরো পক্খী, সুৰো লুদ্দানি ভাসতি.

১৭৫. ‘‘এতং হনথ বন্ধথ, মা ৰো মুঞ্চিত্থ জীৰতং’’;

ইচ্চেৰং ৰিলপন্তস্স, সোত্থিং [সোত্থী (স্যা.)] পত্তোস্মি অস্সমং.

১৭৬. ভাতরোস্ম মহারাজ, সোদরিযা একমাতুকা;

একরুক্খস্মিং সংৰড্ঢা, নানাখেত্তগতা উভো.

১৭৭. সত্তিগুম্বো চ চোরানং, অহঞ্চ ইসীনং ইধ;

অসতং সো, সতং অহং, তেন ধম্মেন নো ৰিনা.

১৭৮. তত্থ ৰধো চ বন্ধো চ, নিকতী ৰঞ্চনানি চ;

আলোপা সাহসাকারা, তানি সো তত্থ সিক্খতি.

১৭৯. ইধ সচ্চঞ্চ ধম্মো চ, অহিংসা সংযমো দমো;

আসনূদকদাযীনং, অঙ্কে ৰদ্ধোস্মি ভারধ [ভারত (সী. স্যা. পী.)].

১৮০. যং যঞ্হি রাজ ভজতি, সন্তং ৰা যদি ৰা অসং;

সীলৰন্তং ৰিসীলং ৰা, ৰসং তস্সেৰ গচ্ছতি.

১৮১. যাদিসং কুরুতে মিত্তং, যাদিসং চূপসেৰতি;

সোপি তাদিসকো হোতি, সহৰাসো হি [সহৰাসোপি (স্যা. ক.)] তাদিসো.

১৮২. সেৰমানো সেৰমানং, সম্ফুট্ঠো সম্ফুসং পরং;

সরো দিদ্ধো কলাপংৰ, অলিত্তমুপলিম্পতি;

উপলেপভযা [উপলিম্পভযা (স্যা. ক.)] ধীরো, নেৰ পাপসখা সিযা.

১৮৩. পূতিমচ্ছং কুসগ্গেন, যো নরো উপনয্হতি;

কুসাপি পূতি [পূতী (সী. পী.)] ৰাযন্তি, এৰং বালূপসেৰনা.

১৮৪. তগরঞ্চ পলাসেন, যো নরো উপনয্হতি;

পত্তাপি সুরভি [সুরভী (সী. স্যা. পী.)] ৰাযন্তি, এৰং ধীরূপসেৰনা.

১৮৫. তস্মা পত্তপুটস্সেৰ [ফলপুটস্সেৰ (সী. পী.), পলপুটস্সেৰ (ক. অট্ঠ.), পলাসপুটস্সেৰ (স্যা. ক.)], ঞত্ৰা সম্পাকমত্তনো;

অসন্তে নোপসেৰেয্য, সন্তে সেৰেয্য পণ্ডিতো;

অসন্তো নিরযং নেন্তি, সন্তো পাপেন্তি সুগ্গতিন্তি.

সত্তিগুম্বজাতকং সত্তমং.