৫০২. চূল়হংসজাতকং (৬)

১৩৩. এতে হংসা পক্কমন্তি, ৰক্কঙ্গা ভযমেরিতা;

হরিত্তচ হেমৰণ্ণ, কামং সুমুখ পক্কম.

১৩৪. ওহায মং ঞাতিগণা, একং পাসৰসং গতং;

অনপেক্খমানা [নাপেক্খমানা (ক.)] গচ্ছন্তি, কিং এসো অৰহিয্যসি.

১৩৫. পতেৰ পততং সেট্ঠ, নত্থি বদ্ধে সহাযতা [সহাযকা (স্যা.)];

মা অনীঘায হাপেসি, কামং সুমুখ পক্কম.

১৩৬. নাহং ‘‘দুক্খপরেতো’’তি [দুক্খপরেতোপি (ক.)], ধতরট্ঠ তুৰং [তৰং (সী. পী.)] জহে;

জীৰিতং মরণং ৰা মে, তযা সদ্ধিং ভৰিস্সতি.

১৩৭. এতদরিযস্স কল্যাণং, যং ত্ৰং সুমুখ ভাসসি;

তঞ্চ ৰীমংসমানোহং, ‘‘পততেতং’’ অৰস্সজিং.

১৩৮. অপদেন পদং যাতি, অন্তলিক্খচরো [অন্তলিক্খে চরো (সী. পী.)] দিজো;

আরা পাসং ন বুজ্ঝি ত্ৰং, হংসানং পৰরুত্তম [পৰরুত্তমো (ক. সী. পী.)].

১৩৯. যদা পরাভৰো হোতি, পোসো জীৰিতসঙ্খযে;

অথ জালঞ্চ পাসঞ্চ, আসজ্জাপি ন বুজ্ঝতি.

১৪০. এতে হংসা পক্কমন্তি, ৰক্কঙ্গা ভযমেরিতা;

হরিত্তচ হেমৰণ্ণ, ত্ৰঞ্ঞেৰ [ত্ৰঞ্চ তং (সী.), ত্ৰঞ্চ (পী.)] অৰহিয্যসি.

১৪১. এতে ভুত্ৰা চ পিত্ৰা চ, পক্কমন্তি ৰিহঙ্গমা;

অনপেক্খমানা ৰক্কঙ্গা, ত্ৰঞ্ঞেৰেকো উপাসসি.

১৪২. কিন্নু ত্যাযং [তাযং (সী. স্যা. পী.)] দিজো হোতি, মুত্তো বদ্ধং উপাসসি;

ওহায সকুণা যন্তি, কিং একো অৰহিয্যসি.

১৪৩. রাজা মে সো দিজো মিত্তো, সখা পাণসমো চ মে;

নেৰ নং ৰিজহিস্সামি, যাৰ কালস্স পরিযাযং.

১৪৪. যো চ ত্ৰং সখিনো হেতু, পাণং চজিতুমিচ্ছসি;

সো তে সহাযং মুঞ্চামি, হোতু রাজা তৰানুগো.

১৪৫. এৰং লুদ্দক নন্দস্সু, সহ সব্বেহি ঞাতিভি;

যথাহমজ্জ নন্দামি, দিস্ৰা মুত্তং দিজাধিপং.

১৪৬. কচ্চিন্নু ভোতো কুসলং, কচ্চি ভোতো অনামযং;

কচ্চি রট্ঠমিদং ফীতং, ধম্মেন মনুসাসসি.

১৪৭. কুসলঞ্চেৰ মে হংস, অথো হংস অনামযং;

অথো রট্ঠমিদং ফীতং, ধম্মেন মনুসাসহং.

১৪৮. কচ্চি ভোতো অমচ্চেসু, দোসো কোচি ন ৰিজ্জতি;

কচ্চি আরা অমিত্তা তে, ছাযা দক্খিণতোরিৰ.

১৪৯. অথোপি মে অমচ্চেসু, দোসো কোচি ন ৰিজ্জতি;

অথো আরা অমিত্তা মে, ছাযা দক্খিণতোরিৰ.

১৫০. কচ্চি তে সাদিসী ভরিযা, অস্সৰা পিযভাণিনী;

পুত্তরূপযসূপেতা, তৰ ছন্দৰসানুগা.

১৫১. অথো মে সাদিসী ভরিযা, অস্সৰা পিযভাণিনী;

পুত্তরূপযসূপেতা, মম ছন্দৰসানুগা.

১৫২. কচ্চি তে বহৰো পুত্তা, সুজাতা রট্ঠৰড্ঢন;

পঞ্ঞাজৰেন সম্পন্না, সম্মোদন্তি ততো ততো.

১৫৩. সতমেকো চ মে পুত্তা, ধতরট্ঠ মযা সুতা;

তেসং ত্ৰং কিচ্চমক্খাহি, নাৰরুজ্ঝন্তি [নাৰরজ্ঝন্তি (ক. সী. পী.)] তে ৰচো.

১৫৪. উপপন্নোপি চে হোতি, জাতিযা ৰিনযেন ৰা;

অথ পচ্ছা কুরুতে যোগং, কিচ্ছে [কিচ্চে (সী. স্যা. পী.)] আপাসু [আৰাসু (স্যা.), আপদাসু (ক.)] সীদতি.

১৫৫. তস্স সংহীরপঞ্ঞস্স, ৰিৰরো জাযতে মহা;

রত্তিমন্ধোৰ [নত্তমন্ধোৰ (সী. পী.)] রূপানি, থূলানি মনুপস্সতি.

১৫৬. অসারে সারযোগঞ্ঞূ, মতিং ন ত্ৰেৰ ৰিন্দতি;

সরভোৰ গিরিদুগ্গস্মিং, অন্তরাযেৰ সীদতি.

১৫৭. হীনজচ্চোপি চে হোতি, উট্ঠাতা ধিতিমা নরো;

আচারসীলসম্পন্নো, নিসে অগ্গীৰ ভাসতি.

১৫৮. এতং মে উপমং কত্ৰা, পুত্তে ৰিজ্জাসু ৰাচয [ঠাপস (স্যা. ক.)];

সংৰিরূল়্হেথ মেধাৰী, খেত্তে বীজংৰ [খেত্তবীজংৰ (সী. পী.)] ৰুট্ঠিযাতি.

চূল়হংসজাতকং ছট্ঠং.