৫০১. রোহণমিগজাতকং (৫)

১০৪. এতে যূথা পতিযন্তি, ভীতা মরণস্স [মরণা (স্যা. পী.), মরণ (ক.)] চিত্তক;

গচ্ছ তুৰম্পি মাকঙ্খি, জীৰিস্সন্তি তযা সহ.

১০৫. নাহং রোহণ [রোহন্ত (সী. পী.), রোহন (স্যা.)] গচ্ছামি, হদযং মে অৰকস্সতি;

ন তং অহং জহিস্সামি, ইধ হিস্সামি জীৰিতং.

১০৬. তে হি নূন মরিস্সন্তি, অন্ধা অপরিণাযকা;

গচ্ছ তুৰম্পি মাকঙ্খি, জীৰিস্সন্তি তযা সহ.

১০৭. নাহং রোহণ গচ্ছামি, হদযং মে অৰকস্সতি;

ন তং বদ্ধং [বন্ধং (ক.)] জহিস্সামি, ইধ হিস্সামি জীৰিতং.

১০৮. গচ্ছ ভীরু পলাযস্সু, কূটে বদ্ধোস্মি আযসে;

গচ্ছ তুৰম্পি মাকঙ্খি, জীৰিস্সন্তি তযা সহ.

১০৯. নাহং রোহণ গচ্ছামি, হদযং মে অৰকস্সতি;

ন তং অহং জহিস্সামি, ইধ হিস্সামি জীৰিতং.

১১০. তে হি নূন মরিস্সন্তি, অন্ধা অপরিণাযকা;

গচ্ছ তুৰম্পি মাকঙ্খি, জীৰিস্সন্তি তযা সহ.

১১১. নাহং রোহণ গচ্ছামি, হদযং মে অৰকস্সতি;

ন তং বদ্ধং জহিস্সামি, ইধ হিস্সামি জীৰিতং.

১১২. অযং সো লুদ্দকো এতি, লুদ্দরূপো [রুদ্দরূপো (সী. পী.)] সহাৰুধো;

যো নো ৰধিস্সতি অজ্জ, উসুনা সত্তিযা অপি [মপি (সী. স্যা. পী.)].

১১৩. সা মুহুত্তং পলাযিত্ৰা, ভযট্টা [ভযট্ঠা (পী.)] ভযতজ্জিতা;

সুদুক্করং অকরা ভীরু, মরণাযূপনিৰত্তথ.

১১৪. কিন্নু তেমে মিগা হোন্তি, মুত্তা বদ্ধং উপাসরে;

ন তং চজিতুমিচ্ছন্তি, জীৰিতস্সপি কারণা.

১১৫. ভাতরো হোন্তি মে লুদ্দ, সোদরিযা একমাতুকা;

ন মং চজিতুমিচ্ছন্তি, জীৰিতস্সপি কারণা.

১১৬. তে হি নূন মরিস্সন্তি, অন্ধা অপরিণাযকা;

পঞ্চন্নং জীৰিতং দেহি, ভাতরং মুঞ্চ লুদ্দক.

১১৭. সো ৰো অহং পমোক্খামি, মাতাপেত্তিভরং মিগং;

নন্দন্তু মাতাপিতরো, মুত্তং দিস্ৰা মহামিগং.

১১৮. এৰং লুদ্দক নন্দস্সু, সহ সব্বেহি ঞাতিভি;

যথাহমজ্জ নন্দামি, মুত্তং দিস্ৰা মহামিগং.

১১৯. কথং ত্ৰং পমোক্খো [কথং পমোক্খো (সী. পী.), কথং তে পরোক্খো (?)] আসি, উপনীতস্মি জীৰিতে;

কথং পুত্ত অমোচেসি, কূটপাসম্হ লুদ্দকো.

১২০. ভণং কণ্ণসুখং ৰাচং, হদযঙ্গং হদযস্সিতং;

সুভাসিতাহি ৰাচাহি, চিত্তকো মং অমোচযি.

১২১. ভণং কণ্ণসুখং ৰাচং, হদযঙ্গং হদযস্সিতং;

সুভাসিতাহি ৰাচাহি, সুতনা মং অমোচযি.

১২২. সুত্ৰা কণ্ণসুখং ৰাচং, হদযঙ্গং হদযস্সিতং;

সুভাসিতানি সুত্ৰান, লুদ্দকো মং অমোচযি.

১২৩. এৰং আনন্দিতো হোতু, সহ দারেহি লুদ্দকো;

যথা মযজ্জ নন্দাম, দিস্ৰা রোহণমাগতং.

১২৪. ননু ত্ৰং অৰচ [অৰচা (সী. পী.)] লুদ্দ, ‘‘মিগচম্মানি আহরিং’’;

অথ কেন নু ৰণ্ণেন, মিগচম্মানি নাহরি.

১২৫. আগমা চেৰ হত্থত্থং, কূটপাসঞ্চ সো মিগো;

অবজ্ঝি তং [অবজ্ঝি তঞ্চ (পী.)] মিগরাজং, তঞ্চ মুত্তা উপাসরে.

১২৬. তস্স মে অহু সংৰেগো, অব্ভুতো লোমহংসনো;

ইমঞ্চাহং মিগং হঞ্ঞে, অজ্জ হিস্সামি জীৰিতং.

১২৭. কীদিসা তে মিগা লুদ্দ, কীদিসা ধম্মিকা মিগা;

কথংৰণ্ণা কথংসীলা, বাল়্হং খো নে পসংসসি.

১২৮. ওদাতসিঙ্গা সুচিৰাল়া, জাতরূপতচূপমা;

পাদা লোহিতকা তেসং, অঞ্জিতক্খা মনোরমা.

১২৯. এদিসা তে মিগা দেৰ, এদিসা ধম্মিকা মিগা;

মাতাপেত্তিভরা দেৰ, ন তে সো অভিহারিতুং [অভিহারযুং (ক. সী.), অভিহারযিং (স্যা.), অভিহারযং (পী.)].

১৩০. দম্মি নিক্খসতং লুদ্দ, থূলঞ্চ মণিকুণ্ডলং;

চতুস্সদঞ্চ [চতুরস্সঞ্চ (স্যা. ক.)] পল্লঙ্কং, উমাপুপ্ফসরিন্নিভং [উম্মাপুপ্ফসিরিন্নিভং (সী. স্যা. পী. ক.)].

১৩১. দ্ৰে চ সাদিসিযো ভরিযা, উসভঞ্চ গৰং সতং;

ধম্মেন রজ্জং কারেস্সং, বহুকারো মেসি লুদ্দক.

১৩২. কসিৰাণিজ্জা [কসী ৰণিজ্জা (সী. স্যা. পী.)] ইণদানং, উঞ্ছাচরিযা চ লুদ্দক;

এতেন দারং পোসেহি, মা পাপং অকরী পুনাতি [অকরা পুনন্তি (ক. সী. পী.)].

রোহণমিগজাতকং [রোহন্তমিগজাতকং (সী. পী.)] পঞ্চমং.