৫০০. সিরীমন্তজাতকং (৪)

৮৩. পঞ্ঞাযুপেতং সিরিযা ৰিহীনং, যসস্সিনং ৰাপি অপেতপঞ্ঞং;

পুচ্ছামি তং সেনক এতমত্থং, কমেত্থ সেয্যো কুসলা ৰদন্তি.

৮৪. ধীরা চ বালা চ হৰে জনিন্দ, সিপ্পূপপন্না চ অসিপ্পিনো চ;

সুজাতিমন্তোপি অজাতিমস্স, যসস্সিনো পেসকরা [পেস্সকরা (সী. পী.)] ভৰন্তি;

এতম্পি দিস্ৰান অহং ৰদামি, পঞ্ঞো নিহীনো সিরীমাৰ [সিরিমাৰ (সী. স্যা. পী.)] সেয্যো.

৮৫. তুৰম্পি পুচ্ছামি অনোমপঞ্ঞ, মহোসধ কেৰলধম্মদস্সি;

বালং যসস্সিং পণ্ডিতং অপ্পভোগং, কমেত্থ সেয্যো কুসলা ৰদন্তি.

৮৬. পাপানি কম্মানি করোতি বালো [করোন্তি বালা (স্যা. ক.)], ইধমেৰ [ইদমেৰ (স্যা. ক. অট্ঠ.), ইমমেৰ (ক.)] সেয্যো ইতি মঞ্ঞমানো [মঞ্ঞমানা (স্যা. ক.)];

ইধলোকদস্সী পরলোকমদস্সী, উভযত্থ বালো কলিমগ্গহেসি;

এতম্পি দিস্ৰান অহং ৰদামি, পঞ্ঞোৰ সেয্যো ন যসস্সি বালো.

৮৭. ন সিপ্পমেতং ৰিদধাতি ভোগং, ন বন্ধুৰা [ন বন্ধৰা (সী. স্যা. ক.)] ন সরীরৰণ্ণো যো [ন সরীরাৰকাসো (সী. স্যা. পী.)];

পস্সেল়মূগং সুখমেধমানং, সিরী হি নং ভজতে গোরৰিন্দং [গোরিমন্দং (সী. পী.)];

এতম্পি দিস্ৰান অহং ৰদামি, পঞ্ঞো নিহীনো সিরীমাৰ সেয্যো.

৮৮. লদ্ধা সুখং মজ্জতি অপ্পপঞ্ঞো, দুক্খেন ফুট্ঠোপি পমোহমেতি;

আগন্তুনা দুক্খসুখেন ফুট্ঠো, পৰেধতি ৰারিচরোৰ ঘম্মে;

এতম্পি দিস্ৰান অহং ৰদামি, পঞ্ঞোৰ সেয্যো ন যসস্সি বালো.

৮৯. দুমং যথা সাদুফলং অরঞ্ঞে, সমন্ততো সমভিসরন্তি [সমভিচরন্তি (সী. পী.)] পক্খী;

এৰম্পি অড্ঢং সধনং সভোগং, বহুজ্জনো ভজতি অত্থহেতু;

এতম্পি দিস্ৰান অহং ৰদামি, পঞ্ঞো নিহীনো সিরীমাৰ সেয্যো.

৯০. ন সাধু বলৰা বালো, সাহসা ৰিন্দতে ধনং;

কন্দন্তমেতং দুম্মেধং, কড্ঢন্তি নিরযং ভুসং;

এতম্পি দিস্ৰান অহং ৰদামি, পঞ্ঞোৰ সেয্যো ন যসস্সি বালো.

৯১. যা কাচি নজ্জো গঙ্গমভিস্সৰন্তি, সব্বাৰ তা নামগোত্তং জহন্তি;

গঙ্গা সমুদ্দং পটিপজ্জমানা, ন খাযতে ইদ্ধিং পঞ্ঞোপি লোকে [ইদ্ধিপরো হি লোকে (ক. সী. স্যা.), ইদ্ধিপরো হি লোকো (সী. পী. অট্ঠ.)];

এতম্পি দিস্ৰান অহং ৰদামি, পঞ্ঞো নিহীনো সিরীমাৰ সেয্যো.

৯২. যমেতমক্খা উদধিং মহন্তং, সৰন্তি নজ্জো সব্বকালমসঙ্খ্যং;

সো সাগরো নিচ্চমুল়ারৰেগো, ৰেলং ন অচ্চেতি মহাসমুদ্দো.

৯৩. এৰম্পি বালস্স পজপ্পিতানি, পঞ্ঞং ন অচ্চেতি সিরী কদাচি;

এতম্পি দিস্ৰান অহং ৰদামি, পঞ্ঞোৰ সেয্যো ন যসস্সি বালো.

৯৪. অসঞ্ঞতো চেপি পরেসমত্থং, ভণাতি সন্ধানগতো [সণ্ঠানগতো (স্যা. পী.), সন্থানগতো (সী.)] যসস্সী;

তস্সেৰ তং রূহতি ঞাতিমজ্ঝে, সিরী হি নং [সিরিহীনং (সী. ক.), সিরীহীনং (স্যা. পী.)] কারযতে ন পঞ্ঞা [ন পঞ্ঞো (সী.), ন পঞ্ঞং (স্যা. ক.)];

এতম্পি দিস্ৰান অহং ৰদামি, পঞ্ঞো নিহীনো সিরীমাৰ সেয্যো.

৯৫. পরস্স ৰা অত্তনো ৰাপি হেতু, বালো মুসা ভাসতি অপ্পপঞ্ঞো;

সো নিন্দিতো হোতি সভায মজ্ঝে, পচ্ছাপি [পেচ্চম্পি (সী. পী.), পেচ্চাপি (?)] সো দুগ্গতিগামী হোতি;

এতম্পি দিস্ৰান অহং ৰদামি, পঞ্ঞোৰ সেয্যো ন যসস্সি বালো.

৯৬. অত্থম্পি চে ভাসতি ভূরিপঞ্ঞো, অনাল়্হিযো [অনালযো (পী.)] অপ্পধনো দলিদ্দো;

ন তস্স তং রূহতি ঞাতিমজ্ঝে, সিরী চ পঞ্ঞাণৰতো ন হোতি;

এতম্পি দিস্ৰান অহং ৰদামি, পঞ্ঞো নিহীনো সিরীমাৰ সেয্যো.

৯৭. পরস্স ৰা অত্তনো ৰাপি হেতু, ন ভাসতি অলিকং ভূরিপঞ্ঞো;

সো পূজিতো হোতি সভায মজ্ঝে, পচ্ছাপি সো সুগ্গতিগামী হোতি;

এতম্পি দিস্ৰান অহং ৰদামি, পঞ্ঞোৰ সেয্যো ন যসস্সি বালো.

৯৮. হত্থী গৰস্সা মণিকুণ্ডলা চ, থিযো চ ইদ্ধেসু কুলেসু জাতা;

সব্বাৰ তা উপভোগা ভৰন্তি, ইদ্ধস্স পোসস্স অনিদ্ধিমন্তো;

এতম্পি দিস্ৰান অহং ৰদামি, পঞ্ঞো নিহীনো সিরীমাৰ সেয্যো.

৯৯. অসংৰিহিতকম্মন্তং, বালং দুম্মেধমন্তিনং;

সিরী জহতি দুম্মেধং, জিণ্ণংৰ উরগো তচং;

এতম্পি দিস্ৰান অহং ৰদামি, পঞ্ঞোৰ সেয্যো ন যসস্সি বালো.

১০০. পঞ্চ পণ্ডিতা মযং ভদ্দন্তে, সব্বে পঞ্জলিকা উপট্ঠিতা;

ত্ৰং নো অভিভুয্য ইস্সরোসি, সক্কোৰ ভূতপতি দেৰরাজা;

এতম্পি দিস্ৰান অহং ৰদামি, পঞ্ঞো নিহীনো সিরীমাৰ সেয্যো.

১০১. দাসোৰ পঞ্ঞস্স যসস্সি বালো, অত্থেসু জাতেসু তথাৰিধেসু;

যং পণ্ডিতো নিপুণং সংৰিধেতি, সম্মোহমাপজ্জতি তত্থ বালো;

এতম্পি দিস্ৰান অহং ৰদামি, পঞ্ঞোৰ সেয্যো ন যসস্সি বালো.

১০২. অদ্ধা হি পঞ্ঞাৰ সতং পসত্থা, কন্তা সিরী ভোগরতা মনুস্সা;

ঞাণঞ্চ বুদ্ধানমতুল্যরূপং, পঞ্ঞং ন অচ্চেতি সিরী কদাচি.

১০৩. যং তং অপুচ্ছিম্হ অকিত্তযী নো, মহোসধ কেৰলধম্মদস্সী;

গৰং সহস্সং উসভঞ্চ নাগং, আজঞ্ঞযুত্তে চ রথে দস ইমে;

পঞ্হস্স ৰেয্যাকরণেন তুট্ঠো, দদামি তে গামৰরানি সোল়সাতি.

সিরীমন্তজাতকং [সিরিমন্দজাতকং (সী. স্যা. পী.)] চতুত্থং.