৪৯৯. সিৰিজাতকং (৩)

৫২. দূরে অপস্সং থেরোৰ, চক্খুং যাচিতুমাগতো;

একনেত্তা ভৰিস্সাম, চক্খুং মে দেহি যাচিতো.

৫৩. কেনানুসিট্ঠো ইধ মাগতোসি, ৰনিব্বক [ৰণিব্বক (সী.)] চক্খুপথানি যাচিতুং;

সুদুচ্চজং যাচসি উত্তমঙ্গং, যমাহু নেত্তং পুরিসেন দুচ্চজং.

৫৪. যমাহু দেৰেসু সুজম্পতীতি, মঘৰাতি নং আহু মনুস্সলোকে;

তেনানুসিট্ঠো ইধ মাগতোস্মি, ৰনিব্বকো চক্খুপথানি যাচিতুং.

৫৫. ৰনিব্বতো [ৰনিব্বকো (স্যা. পী.)] ময্হ ৰনিং [ৰনং (ক.), ৰণিং (সী. স্যা. পী.)] অনুত্তরং, দদাহি তে চক্খুপথানি যাচিতো;

দদাহি মে চক্খুপথং অনুত্তরং, যমাহু নেত্তং পুরিসেন দুচ্চজং.

৫৬. যেন অত্থেন আগচ্ছি [আগঞ্ছি (সী. পী.)], যমত্থমভিপত্থযং;

তে তে ইজ্ঝন্তু সঙ্কপ্পা, লভ চক্খূনি ব্রাহ্মণ.

৫৭. একং তে যাচমানস্স, উভযানি দদামহং;

স চক্খুমা গচ্ছ জনস্স পেক্খতো, যদিচ্ছসে ত্ৰং তদতে সমিজ্ঝতু.

৫৮. মা নো দেৰ অদা চক্খুং, মা নো সব্বে পরাকরি [পরক্করি (স্যা. ক. অট্ঠ.), পরিক্করি (ক.) পরি + আ + করি = পরাকরি];

ধনং দেহি মহারাজ, মুত্তা ৰেল়ুরিযা বহূ.

৫৯. যুত্তে দেৰ রথে দেহি, আজানীযে চলঙ্কতে;

নাগে দেহি মহারাজ, হেমকপ্পনৰাসসে.

৬০. যথা তং সিৰযো [সীৰিযো (স্যা.)] সব্বে, সযোগ্গা সরথা সদা;

সমন্তা পরিকিরেয্যুং [পরিকরেয্যুং (স্যা. পী.)], এৰং দেহি রথেসভ.

৬১. যো ৰে দস্সন্তি ৰত্ৰান, অদানে কুরুতে মনো;

ভূম্যং [ভূম্যা (সী. পী.)] সো পতিতং পাসং, গীৰাযং পটিমুঞ্চতি.

৬২. যো ৰে দস্সন্তি ৰত্ৰান, অদানে কুরুতে মনো;

পাপা পাপতরো হোতি, সম্পত্তো যমসাধনং.

৬৩. যঞ্হি যাচে তঞ্হি দদে, যং ন যাচে ন তং দদে;

স্ৰাহং তমেৰ দস্সামি, যং মং যাচতি ব্রাহ্মণো.

৬৪. আযুং নু ৰণ্ণং নু সুখং বলং নু, কিং পত্থযানো নু জনিন্দ দেসি;

কথঞ্হি রাজা সিৰিনং অনুত্তরো, চক্খূনি দজ্জা পরলোকহেতু.

৬৫. ন ৰাহমেতং যসসা দদামি, ন পুত্তমিচ্ছে ন ধনং ন রট্ঠং;

সতঞ্চ ধম্মো চরিতো পুরাণো, ইচ্চেৰ দানে রমতে মনো মম [মমং (সী. পী.)].

৬৬. সখা চ মিত্তো চ মমাসি সীৰিক [সীৰক (সী. পী.)], সুসিক্খিতো সাধু করোহি মে ৰচো;

উদ্ধরিত্ৰা [উদ্ধত্ৰ (সী.), লদ্ধ ত্ৰং (পী.)] চক্খূনি মমং জিগীসতো, হত্থেসু ঠপেহি [আৰেসি (সী.)] ৰনিব্বকস্স.

৬৭. চোদিতো সিৰিরাজেন, সিৰিকো ৰচনঙ্করো;

রঞ্ঞো চক্খূনুদ্ধরিত্ৰা [চক্খূনি উদ্ধত্ৰা (সী. পী.)], ব্রাহ্মণস্সূপনামযি;

সচক্খু ব্রাহ্মণো আসি, অন্ধো রাজা উপাৰিসি.

৬৮. ততো সো কতিপাহস্স, উপরূল়্হেসু চক্খুসু;

সূতং আমন্তযী রাজা, সিৰীনং রট্ঠৰড্ঢনো.

৬৯. যোজেহি সারথি যানং, যুত্তঞ্চ পটিৰেদয;

উয্যানভূমিং গচ্ছাম, পোক্খরঞ্ঞো ৰনানি চ.

৭০. সো চ পোক্খরণীতীরে [পোক্খরণিযা তীরে (সী. পী.)], পল্লঙ্কেন উপাৰিসি;

তস্স সক্কো পাতুরহু, দেৰরাজা সুজম্পতি.

৭১. সক্কোহমস্মি দেৰিন্দো, আগতোস্মি তৰন্তিকে;

ৰরং ৰরস্সু রাজীসি, যং কিঞ্চি মনসিচ্ছসি.

৭২. পহূতং মে ধনং সক্ক, বলং কোসো চনপ্পকো;

অন্ধস্স মে সতো দানি, মরণঞ্ঞেৰ রুচ্চতি.

৭৩. যানি সচ্চানি দ্ৰিপদিন্দ, তানি ভাসস্সু খত্তিয;

সচ্চং তে ভণমানস্স, পুন চক্খু ভৰিস্সতি.

৭৪. যে মং যাচিতুমাযন্তি, নানাগোত্তা ৰনিব্বকা;

যোপি মং যাচতে তত্থ, সোপি মে মনসো পিযো;

এতেন সচ্চৰজ্জেন, চক্খু মে উপপজ্জথ.

৭৫. যং মং সো যাচিতুং আগা, দেহি চক্খুন্তি ব্রাহ্মণো;

তস্স চক্খূনি পাদাসিং, ব্রাহ্মণস্স ৰনিব্বতো [ৰণিব্বিনো (সী.), ৰনিব্বিনো (পী.)].

৭৬. ভিয্যো মং আৰিসী পীতি, সোমনস্সঞ্চনপ্পকং;

এতেন সচ্চৰজ্জেন, দুতিযং মে উপপজ্জথ.

৭৭. ধম্মেন ভাসিতা গাথা, সিৰীনং রট্ঠৰড্ঢন;

এতানি তৰ নেত্তানি, দিব্বানি পটিদিস্সরে.

৭৮. তিরোকুট্টং তিরোসেলং, সমতিগ্গয্হ পব্বতং;

সমন্তা যোজনসতং, দস্সনং অনুভোন্তু তে.

৭৯. কো নীধ ৰিত্তং ন দদেয্য যাচিতো, অপি ৰিসিট্ঠং সুপিযম্পি অত্তনো;

তদিঙ্ঘ সব্বে সিৰযো সমাগতা, দিব্বানি নেত্তানি মমজ্জ পস্সথ.

৮০. তিরোকুট্টং তিরোসেলং, সমতিগ্গয্হ পব্বতং;

সমন্তা যোজনসতং, দস্সনং অনুভোন্তি মে.

৮১. ন চাগমত্তা পরমত্থি কিঞ্চি, মচ্চানং ইধ জীৰিতে;

দত্ৰান মানুসং [দত্ৰা মানুসকং (সী.)] চক্খুং, লদ্ধং মে [মে ইতি পদং নত্থি সী. পোত্থকে] চক্খুং অমানুসং.

৮২. এতম্পি দিস্ৰা সিৰযো, দেথ দানানি ভুঞ্জথ;

দত্ৰা চ ভুত্ৰা চ যথানুভাৰং, অনিন্দিতা সগ্গমুপেথ ঠানন্তি.

সিৰিজাতকং ততিযং.