৪৯৮. চিত্তসম্ভূতজাতকং (২)

২৪. সব্বং নরানং সফলং সুচিণ্ণং, ন কম্মুনা কিঞ্চন মোঘমত্থি;

পস্সামি সম্ভূতং মহানুভাৰং, সকম্মুনা পুঞ্ঞফলূপপন্নং.

২৫. সব্বং নরানং সফলং সুচিণ্ণং, ন কম্মুনা কিঞ্চন মোঘমত্থি;

কচ্চিন্নু চিত্তস্সপি এৰমেৰং, ইদ্ধো মনো তস্স যথাপি ময্হং.

২৬. সব্বং নরানং সফলং সুচিণ্ণং, ন কম্মুনা কিঞ্চন মোঘমত্থি;

চিত্তম্পি জানাহি [চিত্তং ৰিজানাহি (সী. পী.)] তথেৰ দেৰ, ইদ্ধো মনো তস্স যথাপি তুয্হং.

২৭. ভৰং নু চিত্তো সুতমঞ্ঞতো তে, উদাহু তে কোচি নং এতদক্খা;

গাথা সুগীতা ন মমত্থি কঙ্খা, দদামি তে গামৰরং সতঞ্চ.

২৮. ন চাহং চিত্তো সুতমঞ্ঞতো মে, ইসী চ মে এতমত্থং অসংসি;

‘‘গন্ত্ৰান রঞ্ঞো পটিগাহি [পটিগাযি (স্যা. ক.), পটিগায (?)] গাথং, অপি তে ৰরং অত্তমনো দদেয্য’’ [অপি নু তে ৰরং অত্তমনো দদেয্য (স্যা.), অপি নু তে অত্তমনো ৰরং দদে (ক.)].

২৯. যোজেন্তু ৰে রাজরথে, সুকতে চিত্তসিব্বনে;

কচ্ছং নাগানং বন্ধথ, গীৰেয্যং পটিমুঞ্চথ.

৩০. আহঞ্ঞন্তু [আহঞ্ঞরে (স্যা.)] ভেরিমুদিঙ্গসঙ্খে [সঙ্খা (স্যা.)], সীঘানি যানানি চ যোজযন্তু;

অজ্জেৰহং অস্সমং তং গমিস্সং, যত্থেৰ দক্খিস্সমিসিং নিসিন্নং.

৩১. সুলদ্ধলাভো ৰত মে অহোসি, গাথা সুগীতা পরিসায মজ্ঝে;

স্ৰাহং ইসিং সীলৰতূপপন্নং, দিস্ৰা পতীতো সুমনোহমস্মি.

৩২. আসনং উদকং পজ্জং, পটিগ্গণ্হাতু নো ভৰং;

অগ্ঘে ভৰন্তং পুচ্ছাম, অগ্ঘং কুরুতু নো ভৰং.

৩৩. রম্মঞ্চ তে আৰসথং করোন্তু, নারীগণেহি পরিচারযস্সু;

করোহি ওকাসমনুগ্গহায, উভোপি মং ইস্সরিযং করোম.

৩৪. দিস্ৰা ফলং দুচ্চরিতস্স রাজ, অথো সুচিণ্ণস্স মহাৰিপাকং;

অত্তানমেৰ পটিসংযমিস্সং, ন পত্থযে পুত্ত [পুত্তং (সী. পী.)] পসুং ধনং ৰা.

৩৫. দসেৰিমা ৰস্সদসা, মচ্চানং ইধ জীৰিতং;

অপত্তঞ্ঞেৰ তং ওধিং, নল়ো ছিন্নোৰ সুস্সতি.

৩৬. তত্থ কা নন্দি কা খিড্ডা, কা রতী কা ধনেসনা;

কিং মে পুত্তেহি দারেহি, রাজ মুত্তোস্মি বন্ধনা.

৩৭. সোহং এৰং পজানামি [সো অহং সুপ্পজানামি (সী. পী.)], মচ্চু মে নপ্পমজ্জতি;

অন্তকেনাধিপন্নস্স, কা রতী কা ধনেসনা.

৩৮. জাতি নরানং অধমা জনিন্দ, চণ্ডালযোনি দ্ৰিপদাকনিট্ঠা [দিপদাকনিট্ঠা (সী. পী.)];

সকেহি কম্মেহি সুপাপকেহি, চণ্ডালগব্ভে [চণ্ডালিগব্ভে (স্যা.)] অৰসিম্হ পুব্বে.

৩৯. চণ্ডালাহুম্হ অৰন্তীসু, মিগা নেরঞ্জরং পতি;

উক্কুসা নম্মদাতীরে [রম্মদাতীরে (স্যা. ক.)], ত্যজ্জ ব্রাহ্মণখত্তিযা.

৪০. উপনীযতি জীৰিতমপ্পমাযু, জরূপনীতস্স ন সন্তি তাণা;

করোহি পঞ্চাল মমেত [মমেৰ (স্যা. ক.)] ৰাক্যং, মাকাসি কম্মানি দুক্খুদ্রযানি.

৪১. উপনীযতি জীৰিতমপ্পমাযু, জরূপনীতস্স ন সন্তি তাণা;

করোহি পঞ্চাল মমেত ৰাক্যং, মাকাসি কম্মানি দুক্খপ্ফলানি.

৪২. উপনীযতি জীৰিতমপ্পমাযু, জরূপনীতস্স ন সন্তি তাণা;

করোহি পঞ্চাল মমেত ৰাক্যং, মাকাসি কম্মানি রজস্সিরানি.

৪৩. উপনীযতি জীৰিতমপ্পমাযু, ৰণ্ণং জরা হন্তি নরস্স জিয্যতো;

করোহি পঞ্চাল মমেত ৰাক্যং, মাকাসি কম্মং নিরযূপপত্তিযা.

৪৪. অদ্ধা হি সচ্চং ৰচনং তৰেতং, যথা ইসী ভাসসি এৰমেতং;

কামা চ মে সন্তি অনপ্পরূপা, তে দুচ্চজা মাদিসকেন ভিক্খু.

৪৫. নাগো যথা পঙ্কমজ্ঝে ব্যসন্নো, পস্সং থলং নাভিসম্ভোতি গন্তুং;

এৰম্পহং [এৰমহং (স্যা.)] কামপঙ্কে ব্যসন্নো, ন ভিক্খুনো মগ্গমনুব্বজামি.

৪৬. যথাপি মাতা চ পিতা চ পুত্তং, অনুসাসরে কিন্তি সুখী ভৰেয্য;

এৰম্পি মং ত্ৰং অনুসাস ভন্তে, যথা চিরং [যমাচরং (সী. পী. ক. অট্ঠ.)] পেচ্চ সুখী ভৰেয্যং.

৪৭. নো চে তুৰং উস্সহসে জনিন্দ, কামে ইমে মানুসকে পহাতুং;

ধম্মিং [ধম্মং (সী. পী.)] বলিং পট্ঠপযস্সু রাজ, অধম্মকারো তৰ [অধম্মকারো চ তে (সী. স্যা. পী.)] মাহু রট্ঠে.

৪৮. দূতা ৰিধাৰন্তু দিসা চতস্সো, নিমন্তকা সমণব্রাহ্মণানং;

তে অন্নপানেন উপট্ঠহস্সু, ৰত্থেন সেনাসনপচ্চযেন চ.

৪৯. অন্নেন পানেন পসন্নচিত্তো, সন্তপ্পয সমণব্রাহ্মণে চ;

দত্ৰা চ ভুত্ৰা চ যথানুভাৰং, অনিন্দিতো সগ্গমুপেহি [মুপেতি (পী. ক.)] ঠানং.

৫০. সচে চ তং রাজ মদো সহেয্য, নারীগণেহি পরিচারযন্তং;

ইমমেৰ গাথং মনসী করোহি, ভাসেসি [ভাসেহি (স্যা. পী. ক.)] চেনং পরিসায মজ্ঝে.

৫১. অব্ভোকাসসযো জন্তু, ৰজন্ত্যা খীরপাযিতো;

পরিকিণ্ণো সুৰানেহি [সুপিনেহি (সী. পী.)], স্ৰাজ্জ রাজাতি ৰুচ্চতীতি.

চিত্তসম্ভূতজাতকং দুতিযং.