৪৯৬. ভিক্খাপরম্পরজাতকং (১৩)

২৭০. সুখুমালরূপং দিস্ৰা [দিস্ৰান (ক. সী. অট্ঠ.)], রট্ঠা ৰিৰনমাগতং;

কূটাগারৰরূপেতং, মহাসযনমুপাসিতং [মুপোচিতং (বহূসু)].

২৭১. তস্স তে পেমকেনাহং, অদাসিং ৰড্ঢমোদনং [বদ্ধমোদনং (সী. পী.)];

সালীনং ৰিচিতং ভত্তং, সুচিং মংসূপসেচনং.

২৭২. তং ত্ৰং ভত্তং পটিগ্গয্হ, ব্রাহ্মণস্স অদাসযি [অদাপযি (সী. স্যা. পী.)];

অত্তানং [অত্তনা (পী. অট্ঠ. পাঠন্তরং)] অনসিত্ৰান, কোযং ধম্মো নমত্থু তে.

২৭৩. আচরিযো ব্রাহ্মণো ময্হং, কিচ্চাকিচ্চেসু ব্যাৰটো [ৰাৰটো (ক.)];

গরু চ আমন্তনীযো [আমন্তণীযো (সী. পী.)] চ, দাতুমরহামি ভোজনং.

২৭৪. ব্রাহ্মণং দানি পুচ্ছামি, গোতমং রাজপূজিতং;

রাজা তে ভত্তং পাদাসি, সুচিং মংসূপসেচনং.

২৭৫. তং ত্ৰং ভত্তং পটিগ্গয্হ, ইসিস্স ভোজনং অদা;

অখেত্তঞ্ঞূসি দানস্স, কোযং ধম্মো নমত্থু তে.

২৭৬. ভরামি পুত্ত [পুত্তে (সী. পী.)] দারে চ, ঘরেসু গধিতো [গথিতো (সী. পী.)] অহং;

ভুঞ্জে মানুসকে কামে, অনুসাসামি রাজিনো.

২৭৭. আরঞ্ঞিকস্স [আরঞ্ঞকস্স (সী. পী.)] ইসিনো, চিররত্তং তপস্সিনো;

ৰুড্ঢস্স ভাৰিতত্তস্স, দাতুমরহামি ভোজনং.

২৭৮. ইসিঞ্চ দানি পুচ্ছামি, কিসং ধমনিসন্থতং;

পরূল়্হকচ্ছনখলোমং, পঙ্কদন্তং রজস্সিরং.

২৭৯. একো অরঞ্ঞে ৰিহরসি [ৰিহাসি (ক.)], নাৰকঙ্খসি জীৰিতং;

ভিক্খু কেন তযা সেয্যো, যস্স ত্ৰং ভোজনং অদা.

২৮০. খণন্তালুকলম্বানি [খণমালুকলম্বানি (স্যা. ক.)], বিলালিতক্কলানি চ [বিল়ালিতক্কল়ানি চ (সী. পী.)];

ধুনং সামাকনীৰারং, সঙ্ঘারিযং পসারিযং [সংহারিযং পহারিযং (স্যা.), সংসারিযং পসারিযং (ক.)].

২৮১. সাকং ভিসং মধুং মংসং, বদরামলকানি চ;

তানি আহরিত্ৰা [আহত্ৰ (সী. স্যা.)] ভুঞ্জামি, অত্থি মে সো পরিগ্গহো.

২৮২. পচন্তো অপচন্তস্স, অমমস্স সকিঞ্চনো [অকিঞ্চনো (ক.)];

অনাদানস্স সাদানো, দাতুমরহামি ভোজনং.

২৮৩. ভিক্খুঞ্চ দানি পুচ্ছামি, তুণ্হীমাসীন সুব্বতং;

ইসি তে ভত্তং পাদাসি, সুচিং মংসূপসেচনং.

২৮৪. তং ত্ৰং ভত্তং পটিগ্গয্হ, তুণ্হী ভুঞ্জসি এককো;

নাঞ্ঞং কঞ্চি [কিঞ্চি (ক.)] নিমন্তেসি, কোযং ধম্মো নমত্থু তে.

২৮৫. ন পচামি ন পাচেমি, ন ছিন্দামি ন ছেদযে;

তং মং অকিঞ্চনং ঞত্ৰা, সব্বপাপেহি আরতং.

২৮৬. ৰামেন ভিক্খমাদায, দক্খিণেন কমণ্ডলুং;

ইসি মে ভত্তং পাদাসি, সুচিং মংসূপসেচনং.

২৮৭. এতে হি দাতুমরহন্তি, সমমা সপরিগ্গহা;

পচ্চনীকমহং মঞ্ঞে, যো দাতারং নিমন্তযে.

২৮৮. অত্থায ৰত মে অজ্জ, ইধাগচ্ছি রথেসভো;

সোহং অজ্জ পজানামি [ইতো পুব্বে ন জানামি (সী. পী.)], যত্থ দিন্নং মহপ্ফলং.

২৮৯. রট্ঠেসু গিদ্ধা রাজানো, কিচ্চাকিচ্চেসু ব্রাহ্মণা;

ইসী মূলফলে গিদ্ধা, ৰিপ্পমুত্তা চ ভিক্খৰোতি.

ভিক্খাপরম্পরজাতকং তেরসমং.

তস্সুদ্দানং –

সুৰ কিন্নর মুক্ক খরাজিনসো, ভিসজাত মহেসি কপোতৰরো;

অথ মোর সতচ্ছক ৰাণিজকো, অথ রাজ সব্রাহ্মণ ভিক্খপরন্তি.

পকিণ্ণকনিপাতং নিট্ঠিতং.