৪৯৩. মহাৰাণিজজাতকং (১০)

১৮০. ৰাণিজা সমিতিং কত্ৰা, নানারট্ঠতো আগতা;

ধনাহরা পক্কমিংসু, একং কত্ৰান গামণিং.

১৮১. তে তং কন্তারমাগম্ম, অপ্পভক্খং অনোদকং;

মহানিগ্রোধমদ্দক্খুং, সীতচ্ছাযং মনোরমং.

১৮২. তে চ তত্থ নিসীদিত্ৰা, তস্স রুক্খস্স ছাযযা [ছাদিযা (সী. স্যা. পী.)];

ৰাণিজা সমচিন্তেসুং, বালা মোহেন পারুতা.

১৮৩. অল্লাযতে [অদ্দাযতে (সী. পী.)] অযং রুক্খো, অপি ৰারীৰ [ৰারি চ (সী. পী.)] সন্দতি;

ইঙ্ঘস্স পুরিমং সাখং, মযং ছিন্দাম ৰাণিজা.

১৮৪. সা চ ছিন্নাৰ পগ্ঘরি, অচ্ছং ৰারিং অনাৰিলং;

তে তত্থ ন্হত্ৰা পিৰিত্ৰা, যাৰতিচ্ছিংসু ৰাণিজা.

১৮৫. দুতিযং সমচিন্তেসুং, বালা মোহেন পারুতা;

ইঙ্ঘস্স দক্খিণং সাখং, মযং ছিন্দাম ৰাণিজা.

১৮৬. সা চ ছিন্নাৰ পগ্ঘরি, সালিমংসোদনং বহুং;

অপ্পোদৰণ্ণে কুম্মাসে, সিঙ্গিং ৰিদলসূপিযো [সিঙ্গিং বিদলসূপিযো (সী. পী.), সিঙ্গীৰেরং লসূপিযো (ক.) সিঙ্গীন্তি সিঙ্গীৰেরাদিকং উত্তরিভঙ্গং; ৰিদলসূপিযোতি মুগ্গসূপাদযো (অট্ঠ.) ৰিদলং কলাযাদিম্হি ৰত্ততীতি সক্কতাভিধানে].

১৮৭. তে তত্থ ভুত্ৰা খাদিত্ৰা [ভুত্ৰা চ পিৰিত্ৰা চ (পী.)], যাৰতিচ্ছিংসু ৰাণিজা;

ততিযং সমচিন্তেসুং, বালা মোহেন পারুতা;

ইঙ্ঘস্স পচ্ছিমং সাখং, মযং ছিন্দাম ৰাণিজা.

১৮৮. সা চ ছিন্নাৰ পগ্ঘরি, নারিযো সমলঙ্কতা;

ৰিচিত্রৰত্থাভরণা, আমুত্তমণিকুণ্ডলা.

১৮৯. অপি সু ৰাণিজা একা, নারিযো পণ্ণৰীসতি;

সমন্তা পরিৰারিংসু [পরিকরিংসু (সী. স্যা. পী.)], তস্স রুক্খস্স ছাযযা [ছাদিযা (সী. স্যা. পী.)].

১৯০. তে তাহি পরিচারেত্ৰা [পরিৰারেত্ৰা (সী. স্যা. পী.)], যাৰতিচ্ছিংসু ৰাণিজা;

চতুত্থং সমচিন্তেসুং, বালা মোহেন পারুতা;

ইঙ্ঘস্স উত্তরং সাখং, মযং ছিন্দাম ৰাণিজা.

১৯১. সা চ ছিন্নাৰ পগ্ঘরি, মুত্তা ৰেল়ুরিযা বহূ;

রজতং জাতরূপঞ্চ, কুত্তিযো পটিযানি চ.

১৯২. কাসিকানি চ ৰত্থানি, উদ্দিযানি চ কম্বলা [উদ্দিযানে চ কম্বলে (সী. পী.)];

তে তত্থ ভারে বন্ধিত্ৰা, যাৰতিচ্ছিংসু ৰাণিজা.

১৯৩. পঞ্চমং সমচিন্তেসুং, বালা মোহেন পারুতা;

ইঙ্ঘস্স মূলে [মূলং (সী. পী. ক.)] ছিন্দাম, অপি ভিয্যো লভামসে.

১৯৪. অথুট্ঠহি সত্থৰাহো, যাচমানো কতঞ্জলী;

নিগ্রোধো কিং পরজ্ঝতি [অপরজ্ঝথ (সী.), অপরজ্ঝতি (স্যা. পী.)], ৰাণিজা ভদ্দমত্থু তে.

১৯৫. ৰারিদা পুরিমা সাখা, অন্নপানঞ্চ দক্খিণা;

নারিদা পচ্ছিমা সাখা, সব্বকামে চ উত্তরা;

নিগ্রোধো কিং পরজ্ঝতি, ৰাণিজা ভদ্দমত্থু তে.

১৯৬. যস্স রুক্খস্স ছাযায, নিসীদেয্য সযেয্য ৰা;

ন তস্স সাখং ভঞ্জেয্য, মিত্তদুব্ভো হি পাপকো.

১৯৭. তে চ তস্সানাদিযিত্ৰা [তস্স অনাদিত্ৰা (সী. স্যা.)], একস্স ৰচনং বহূ;

নিসিতাহি কুঠারীহি [কুধারীহি (ক.)], মূলতো নং উপক্কমুং.

১৯৮. ততো নাগা নিক্খমিংসু, সন্নদ্ধা পণ্ণৰীসতি;

ধনুগ্গহানং তিসতা, ছসহস্সা চ ৰম্মিনো.

১৯৯. এতে হনথ বন্ধথ, মা ৰো মুঞ্চিত্থ [মুচ্চিত্থ (পী.)] জীৰিতং;

ঠপেত্ৰা সত্থৰাহংৰ, সব্বে ভস্মং [ভস্মী (সী.)] করোথ নে.

২০০. তস্মা হি পণ্ডিতো পোসো, সম্পস্সং অত্থমত্তনো;

লোভস্স ন ৰসং গচ্ছে, হনেয্যারিসকং [হনেয্য দিসতং (সী.), হনেয্য দিসকং (স্যা.)] মনং.

২০১. এৰ [এত (সী. পী.)] মাদীনৰং ঞত্ৰা, তণ্হা দুক্খস্স সম্ভৰং;

ৰীততণ্হো অনাদানো, সতো ভিক্খু পরিব্বজেতি.

মহাৰাণিজজাতকং দসমং.