৪৯৪. সাধিনজাতকং (১১)

২০২. অব্ভুতো ৰত লোকস্মিং, উপ্পজ্জি লোমহংসনো;

দিব্বো রথো পাতুরহু, ৰেদেহস্স যসস্সিনো.

২০৩. দেৰপুত্তো মহিদ্ধিকো, মাতলি [মাতলী (সী.)] দেৰসারথি;

নিমন্তযিত্থ রাজানং, ৰেদেহং মিথিলগ্গহং.

২০৪. এহিমং রথমারুয্হ, রাজসেট্ঠ দিসম্পতি;

দেৰা দস্সনকামা তে, তাৰতিংসা সইন্দকা;

সরমানা হি তে দেৰা, সুধম্মাযং সমচ্ছরে.

২০৫. ততো চ রাজা সাধিনো [সাধীনো (সী. পী.)], ৰেদেহো মিথিলগ্গহো [পমুখো রথমারুহি (সী. পী.)];

সহস্সযুত্তমারুয্হ [যুত্তং অভিরুয্হ (সী.)], অগা দেৰান সন্তিকে;

তং দেৰা পটিনন্দিংসু, দিস্ৰা রাজানমাগতং.

২০৬. স্ৰাগতং তে মহারাজ, অথো তে অদুরাগতং;

নিসীদ দানি রাজীসি [রাজিসি (সী. স্যা. পী.)], দেৰরাজস্স সন্তিকে.

২০৭. সক্কোপি পটিনন্দিত্থ, ৰেদেহং মিথিলগ্গহং;

নিমন্তযিত্থ [নিমন্তযী চ (সী. পী.)] কামেহি, আসনেন চ ৰাসৰো.

২০৮. সাধু খোসি অনুপ্পত্তো, আৰাসং ৰসৰত্তিনং;

ৰস দেৰেসু রাজীসি, সব্বকামসমিদ্ধিসু;

তাৰতিংসেসু দেৰেসু, ভুঞ্জ কামে অমানুসে.

২০৯. অহং পুরে সগ্গগতো রমামি, নচ্চেহি গীতেহি চ ৰাদিতেহি;

সো দানি অজ্জ ন রমামি সগ্গে, আযুং নু খীণো [খীণং (স্যা.)] মরণং নু সন্তিকে;

উদাহু মূল়্হোস্মি জনিন্দসেট্ঠ.

২১০. ন তাযু [ন চাযু (সী. পী. ক.)] খীণং মরণঞ্চ [মরণং তে (সী. পী.)] দূরে, ন চাপি মূল়্হো নরৰীরসেট্ঠ;

তুয্হঞ্চ [তৰঞ্চ (সী. পী.), তৰ চ (ক.)] পুঞ্ঞানি পরিত্তকানি, যেসং ৰিপাকং ইধ ৰেদযিত্থো [ৰেদযতো (পী. ক.)].

২১১. ৰস দেৰানুভাৰেন, রাজসেট্ঠ দিসম্পতি;

তাৰতিংসেসু দেৰেসু, ভুঞ্জ কামে অমানুসে.

২১২. যথা যাচিতকং যানং, যথা যাচিতকং ধনং;

এৰং সম্পদমেৰেতং, যং পরতো দানপচ্চযা.

২১৩. ন চাহমেতমিচ্ছামি, যং পরতো দানপচ্চযা;

সযংকতানি পুঞ্ঞানি, তং মে আৰেণিকং [আৰেণিযং (সী. স্যা. পী.), আৰেনিকং (ক.)] ধনং.

২১৪. সোহং গন্ত্ৰা মনুস্সেসু, কাহামি কুসলং বহুং;

দানেন সমচরিযায, সংযমেন দমেন চ;

যং কত্ৰা সুখিতো হোতি, ন চ পচ্ছানুতপ্পতি.

২১৫. ইমানি তানি খেত্তানি, ইমং নিক্খং সুকুণ্ডলং;

ইমা তা হরিতানূপা, ইমা নজ্জো সৰন্তিযো.

২১৬. ইমা তা পোক্খরণী রম্মা, চক্কৰাকপকূজিতা [চক্কৰাকূপকূজিতা (সী. পী.)];

মন্দালকেহি সঞ্ছন্না, পদুমুপ্পলকেহি চ;

যস্সিমানি মমাযিংসু, কিং নু তে দিসতং গতা.

২১৭. তানীধ খেত্তানি সো ভূমিভাগো, তেযেৰ আরামৰনুপচারা [তে আরামা তে ৰন’মে পচারা (সী. পী.), তে যেৰ আরামৰনানি সঞ্চরা (ক.)];

তমেৰ ময্হং জনতং অপস্সতো, সুঞ্ঞংৰ মে নারদ খাযতে দিসা.

২১৮. দিট্ঠা মযা ৰিমানানি, ওভাসেন্তা চতুদ্দিসা;

সম্মুখা দেৰরাজস্স, তিদসানঞ্চ সম্মুখা.

২১৯. ৰুত্থং মে ভৰনং দিব্যং [দিব্বং (সী. পী.)], ভুত্তা কামা অমানুসা;

তাৰতিংসেসু দেৰেসু, সব্বকামসমিদ্ধিসু.

২২০. সোহং এতাদিসং হিত্ৰা, পুঞ্ঞাযম্হি ইধাগতো;

ধম্মমেৰ চরিস্সামি, নাহং রজ্জেন অত্থিকো.

২২১. অদণ্ডাৰচরং মগ্গং, সম্মাসম্বুদ্ধদেসিতং;

তং মগ্গং পটিপজ্জিস্সং, যেন গচ্ছন্তি সুব্বতাতি.

সাধিনজাতকং [সাধিনরাজজাতকং (স্যা.)] একাদসমং.